Sunday, April 22, 2007

كوكو خرج ليبدأ الرحله

الحلقه اللي فاتت 00
السؤال كان كوكو سمع ايه بيرن؟؟؟؟؟
الحلقه دي 00
اتسمر كوكو الكميل مكانه اما سمع الصوت ده بيرن و اول حاجه جت في دماغه
ان دي اجهزة التصنت اللي بيزرعها المجرمين في البيوت للتصنت علي الضحيه
و بعدين قال في نفسه 00 يا نهارك يا كوكو اللي مش كميل لحسن تكون قنبله
او الغام تحت ركلي واول ما ادوس تتفجر و كوكو يبقي اشلاء و ريشه يطير
في كل حته 00 و فضل كوكو واقف كده و بعدين الصوت سكت ؛ راح كوكو مخرج نفس
جامد من الراحه ان الصوت سكت من غير خساير ؛ و لسه كوكو هيتحرك
راح التليفون رن 00
- الو كوكو الكميل اوي يصوصو
- احنا مش بنتصل بيك مش بترد ليه؟ -
- انا مسمعتش التليفون يا استاذ خطاف ام مكاوك
-احنا اتصلنا بيك دلقوتي علي الكوكوبايل بتاعك مسمعتش و لا ودانك مسدوده نسلكهالك
فجأه قعد كوكو يصوصو ضحك للركب لدرجة ان عينيه الكميله دمعت 00
- انت بتصوصو ليه كده يا كوكو يا مايص انت ؟
- لأ ابدا 00 يصوصو ضحك 00 اصل انا كنت فاكر ان اللي بيرن ده كنبله مثلا
- ما انت اصلك جاهل و مشتريتش كوكوبايل بقالك كتير و متعرفش انك دلوقتي
تقدر تجيب رنات مختفه من نمر تليفونات زي 00 يقلد صوت المزيعه 00
اتصل فورا برقه 090012345 و نزل النغمات اللي تعجبك 00 عرفت انك جاهل يا
كوكو و انك مش متابع قناة ميلودي افلام
- من فضلك يا استاذ خطاف متغلطش انا مشتريتش كوكوبايل عشان انا فضلت اني اسعد حد
احسن من المظاهر و بعدين 00
- خلاص يا عم الكوكو انت هتتصاحب علي و لا هتفضل ترغي كده لحد ما نموت الرهينه
لأ من فضلك دي امي لو سمحت كل اللي انت عايزه انا هعمله
- اسمع يا كوكو انت تجيبلنا 1000 طن حبوب من عندكوا مقابل انك تاخد ام مكاوك
- ياه ه ه ه ده كتير اوي و بعدين ده احنا كده تحصل عندنا مجاعه
- خلاص خلوا الحبوب عندوكوا و بلاش تاخد ام مكاوك بس يا تري هتقدر تاكل حبوب
كل ما تفتكر انك انت السبب في موت ام مكاوك
- طب طب طب اسمعني ده تقيل اوي انا هشيله ازاي ؟
- خلاص اكتبلي بيهم شيك و هتفضل عندنا هنا انت و ام مكاوك و الشيك
عشان نتأكد ان الغيطان اللي نسحب منها فيهالا حبوب مش محصوده
- ماشي ماشي انا موافق
- انت دلوقتي تبدأ رحلتك ؛ يا لا نظبط الساعه علي الصفر
- بس انا معنديش ساعه
- يوه ه ه ه ده انت شكلك هتخنقنا ؛ هتلاقي عنك ساعه في شنطة العده اللي كانت في المطبخ
البسها و تعالي نظبطها سوا ؛ و بسرعه لحسن كده الفاتوره هتيجي عندنا كتير اوي
جري كوكو بسرعه و فتح الشنطه و قعد يقلب فيها بسرعه بسرعه ؛
و اخيرا لقا جيب صغير فيه ساعه راح مطلعها و لا بسها 00
- انا جيت يا استاذ خطاف و لبست الساعه
- طب اظبطها معايا
- مش بعرف
- يوه قرفتني انت عايزلك حد كبير في كل حاجه
و راح مادد الخطاف جناحه الضخم من سماعة التليفون و شادد الساعه من كنح كوكو
و راح بعد شويه مرجعهاله تاني 00
- ارتحت اهو انا ظبطهالك ؛ اتفضل يا سيدي و فتح ودانك عشان هنتصل بيك علي الكوكوبايل كتير
تيت تيت تيت
- هو انت كل مره تقفل السكه في وشي ايه ده
و قفل كوكو السماعه و جري اطمن ان الحاجات في الشنطه ؛ و جري فتح الدرج
اللي فيه دفتر الشيكوكات بتاع انكل كاكا و كتب شيك و مضي بأسمه
و خرج كوكو تاني و شال الشنطه علي ضهره و قرا الفتحه و دعا ربنا انه يوفقوا
و اتصرف بمنتهي الحرص عشان الكاميرات اللي في البيت ؛ و فتح كوكو باب
الشقه و حس بريشه جديده طالعه و عرف انها ريشة المغامره ؛
و خرج كوكو ووقف قدام باب الشقه00 و جاتله فكره عبقريه 00
كاكان
سؤال الحلقه اللي فاتت 00
محدش جاوب علي السؤال للأسف
سؤال الحلقه دي 00
يا تري ايه هي الفكره العبقريه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
شدوا حيلكوااااااااااا



13 comments:

Diyaa' said...

هعلق علي البوست بكره ..بس هو أنتي مستعجلة ليه كده ..كتبتي البوست وخرجتي ...بليز ابقي بلغيني بردك علي طلبي قريب ...معلش هتعبك معايا
سلام مؤقت والتعليق ده مش مهم يتنشر برضه
سلام عليكم تصبحي علي خير

Diyaa' said...

حلو الخيال ده ..بس إيه حوار ريشة المغامرة ده ؟:(
والله بتضحكيني غصب عني ..
سلام

Diyaa' said...
This comment has been removed by the author.
شادي فايد said...

أنا نزلت كل الحلقات السابقة عندي على الجهاز

يومين بالظبط افضي واقراهم

:)

shams said...

لأ صعب يا كوكو ان الواحد يتوقع الفكرة العبكرية اللي جت في دماغ كوكو عشان هو دماغه كميلة خالص

وبعدين ده انت دخلت الخيال في الموضوع يعني أونكل خطاف مد ايده من سماعة الكلوفون وضبط الساعة لكوكو ؟؟؟؟ حلوة برده

انا مستنية اعرف افكار كوكو العبكرية

أميرة البلطجية said...

الفكرة انه يكلم البوليس من الشارع

Islamist Bloke said...

دخلت المدونة قبل كدة بس مقرأتش كتير وخرجت

وكل يوم الاقى اميرة البلطجية تكتب عنك

النهاردة دخلت تانى

عجبتني اوى فكرة كوكو الكميل

جامدة جدا بصراحة

بتفكريني بحلقات اسمها
The Flatmates
على موقع
BBC
برضة كل اسبوع حلقة وفى نهايتها يطرحوا سؤال متعلق بالحلقة القادمة

مدونة جميلة جدا-واعتقد اكيد مش محتاجة انى اقولك مدونة جميلة- بس هى فعلا جميلة وما شاء الله ربنا يوفقك ويبارك فيكي وفى كوكو

عندي اقتراح

اية رايك لو تتعاوني مع مدونة تانية مثلا رسام كاريكاتير وتحولى شخصية كوكو الى شخصية كرتونية وتكتبي حلقاتها

بس بيني وبينك

هو كشخصية تدوينية اجمل بكتير

وسلامي لكوكو

safa7_karmooz said...

مممممممممممممممممم

الفكرة العبقرية

ان حد عبقرى زيى هيدخل ويسيب كومنت ويتسائل ايه هى الفكرة دى ...

هههههههههههههه

Diyaa' said...

جبت الكتاب النهارده ...بعت لصاحب المنتدي وعملوا تفعيل للأشتراك وعرفت أنزله
متشكر لتعبك وأهتمامك ..لو عملتي سكان لجزء مش مشكلة لو بعتيه ..
شكراً تاني ليكي أوي
infernal_themind2050@gmail.com
سلام عليكم ويا رب تكوني بخير

The Groom said...


تسجيل حضور يا كميل

لكن انا للاسف مش قادر اركز

تحياتي لك من ماناساس البلد

مجهول said...

كوكو احيي صاحب الفكره بتاع رسم الكاركتير مع قصصك
بجد فكره رائعه
واولا قبل كل حاجه حمد لله علي السلامه
موضوعك اللي فات راائع


بجد فكري في حكايه الكاركتير دي

mesh2dra said...

يبلغ الكوكوليس

koukawy said...

ضياء 00 طيب انت ليه مش عايز تضحك؟
علي العموم انت سبقتني و جبت الكتاب برافو عليك
******************************
شادي فايد 00 ماشي
********************************
شمس 00 اصل كوكو الكميل محلتوش غير العبكريه الفزه
***********************************
البلطجيه 00 لأ
*********************************
اسلاميست بلوك 00 ميرسي علي ذوقك و علي فكره انا مشفتش الحلقات دي قبل كده
و بالنسبه لفكرة الكاريكاتير هفكر هي فكره حلوه طبعا 00
و ابقي عدّي بانتظام بقي و سيب كومنتس نورتني
**********************************
سفاح كرموز 00 ههههههههههههههههه
*******************************
the groom ..
اللي واخد عقلك مش قادر تركز ليه؟
****************************
مجهول 00 بفكر فعلا يا مجهجه بس مين يا تري يتعاون معايا؟؟
***********************************
مش قادره 00 لأ برضو زي البلطجيه