Tuesday, April 10, 2007

كوكو و الملبن 00

مقدمه صغيره قبل الحلقه 00
مش قادره خلاص عندي كبت صوصوه هيخنقني و الكمبيوتر لسه عيان
و هموت و اصوصو فنزلت اصوصو من النت كافيه ؛ فطبعا اعذروني
لو الحلقه طلعت فيها اي عيوب لأن كل العوامل الخارجيه مختلفه
و طقوس الصوصوه مختفيه بس كان لازم اصوصو بدل ما يجرالي
حاجه مش كميله 00
************************************************
الحلقه اللي فاتت 00
كوكو رجع من عند انكل ابو مكاوك و قرر انه يدور علي ام مكاوك
الحلقه دي00
00 فجأه نط كوكو الكميل من مكانه علي صوت بيرن جوه ودنه الكميله
لو عايز تشوف ام مكاوك تاني دور عليها في الحاجات اللي عندك
لو عايز تشوف ام مكاوك تاني دور عليها في الحاجات اللي عندك
لو عايز تشوف ام مكاوك تاني دور عليها في الحاجات اللي عندك
زعق كوكو في الصوت اللي مش كميل اللي طالع من ودنه 00
خلاص عرفت اسكت بقي هدور 00
و جري كوكو الكميل علي علبة الحلويات و فتحها و كانت الحلويات متغطيه
بورق سولوفان اصفر كميل شال كوكو الورق و بص للعلبه و هو محتار
يبتدي بأنهي حته الأول المهم ابتدي كوكو يشيل حته حته من الحلويات
بس حس انه كده مش هيخلص في يومه و هيكونوا موتوا ام مكاوك
هز كوكو الكميل دماغه عشان يبعد الأفكار اللي مش كميله دي عنه
و شاف ان الحل الوحيد انه ياكل الحلويات عشان يبقي فتح كل وحده
و اتأكد ان مفيهاش حاجه و نط كوكو جوه العلبه و ابتدا يفتح
الكوليه الأول و ياكل و بعد ما خلص الكوليات كلهم بدأ في السكسكيه
و برضو مفيش حاجه جواهم و مبقاش قدامه بعد ماخلص
الا الملبن بس هو مش بيحبه بس ضميره الكوكاوي من جواه
قاله 00 يا كوكو يا ابني انت بتعمل خير و لازم تيجي علي نفسك
حتي لو هتعمل حاجه مش كميله 00و فعلا سمع كوكو لصوت ضميره
و قرر انه ياكل الملبن و سد كوكو خروم منقاره بكناحه و راح حاطط
منقاره في اول حتة ملبن ؛ و راحت لزقه علي منقاره و فضل
كوكو يشد منقاره جامد جامد عشان يعرف يتخلص من المابن لكن مش عارف
ووقع كوكو علي ضهره و حاول انه يساعد برجليه و يزق الملبن من منقاره
و اخيرا سلك الملبن من منقاره و راح لزق في رجليه و فضل كوكو
يا عيني علي ضهره يصوصو و يعافر مع الملبن و كان خايف جدا انه
يقطع له ريشه بعد ما خلاص ابتدي يطلع كله و يرجع زي الأول
و بعد معركه حامية الوطيس بين كوكو و الملبن و بعد ما لف
علي رجله و كتفه و قعد كوكو يلعب في السيرك و يجيب منقاره عند
رجليه عشان يفك نفسه قدر كوكو انه يتخلص من الملبن ؛
و شاف انه كان قرار مش كميل خالص انه ياكل الملبن
و راح ضارب كناحه علي راسه عشان يعاقب ضميره اللي
ساعده مش كويس ؛ بس كان لازم كوكو يفتح بقيت الملبنات
الباقيه و فكر كوكو و كان لسه ضميره الكوكاوي هيقترح عليه
يعمل ايه راح كوكو شاخط فيه 00 اسكت انت انا هتصرف
و دخل كوكو المطبخ و جاب سكينه و راح علي العلبه
و قعد يقطع الملبن حتت و يدور و بعد ما قطع كله مش لقا
حاجه برضو و طلع كوكو تاني جوه العلبه و قعد يدور جواها
علي جيب سحري انما مش لقا ؛ و نزل كوكو و هو يائس
و مش كميل و قال 00 الظاهر الحرامي اللي مش كميل ده
كان بيضحك علي و 000 فجأه طلع لكوكو لمبه علي دماغه
و ضحك و افتكر الكوكو الحلاوه اللي كان مع العلبه
و جري كوكو بسرعه ووقف قدام الكوكو الحلاوه
اللي علي الطرابيزه و بصله و قال 00 ياه ده اكبر منك يا كوكو
انت هتدور ازاي ؛ و فكر كوكو شويه و لقا طريقه
طلق كوكو علي الطرابيزه ووقف ورا الكوكو الحلاوه و قال في سره 00
سامحيني يا طانت ام مكاوك الله يرحمه 00 و راح زاقق كوكو برجله
الكوكو الحلاوه من علي الطرابيزه وقعه علي الأرض و اتكسر
حتت كتييير و راح ناطط كوكو فوقيه و قعد ينقر بمنقاره الكميل بين
الكوكو الحلاوه المكسر و اخيرا لقا كوكو ورقه كبيره ملفوفه برباط
و فرح كوكو نط لفوق من السعاده بأنه انتصر في اول خطوه
و حس كوكو بريشه جديده طاعاله و عرف انها ريشة الاصرار؛
و مسك كوكو الورقه في منقاره و راح علي الطرابيزه و حطها
و لسه بيفك الرباط 00 رن جرس التليفون 0000000
كاكان
******************************************************************
الفائز بسؤال الحلقه اللي فاتت 00
هقول عليه الحلقه الجايه عشان اسيب فرصه كمان للي مجاوبش
و السؤال هو 00 الورقه دي عباره عن ايه ؟؟
هو السؤال ده نص سؤال المره اللي فاتت بس انا هقول اللي كسب في النصين المره الجايه
و ادعولي المره الجايه اكتب الحلقه من الكمبيوتر بتاعي

11 comments:

The Groom said...


كوكو بجد

اعذريني

أنا اسف و ربنا يسلمك يا رب

أنا بس اليومين دولا مش مركز خالص و مش عارف أتابع حلقات الكوكو الكميل

بس انت ادعيلي واعرفي اني دايما زائر مستديم هنا حتى لو مفهمتش حلقات الكوكو

ربنا يكرمك

سلاااام من ماناساس البلد

شادي فايد said...

انا فاتني حلقات كتير

لازم اشوف القديم ولا اتابع من دلوقتي

؟؟؟؟؟؟

:))

اصل الكمبيوتر بتاعي انا كمان كان عيان

Ghost said...

عجبتى الطفوليه اللى ف كتابتك

ضحكت

لكن بعد شويه خجلت من نفسى

المفروض انا شرير

عيب لما اضحك

نياه نياه نياه

يعقــوب said...

انت كده متخفيش على نفسك..جوه البيت برة البيت مفيش فرق الحكايات كلها روعة...بس خليكي جدعة و طولي البوست بأه الواحد مبيلحقش يدوب بوصل لربع مج النسكافيه..انا عاوز بوست اخلص معاه نسكافيه الصبح

أميرة البلطجية said...

ايه ده؟ لأ يا كوكو انا مش فاهمة خالص!
حاسة ان حسى الهندسي ضرب بعد البوست دي عشا انا كنت فاكرة كوكو ده..عادى يعمي..علبة الحلاوة بتاعه على اده وكده..زينا يعني..زمش عارفة اتخيل الاحجام دي!
وعموما اكيد الورقة فيها خريطة لأوضه الغسيل اللي ام مكوك مستخبية فيها
المهم..هي مستخبية ليه؟
تلاقيها جيبالوه عروسة ومخبياها ولما كوكو يلاقيها حيلاقي العروسة الكميلة ويفرح
ارجعى بقي يا كوكييييييي
وحشاني

shams said...

الله على التشويق يا كوكو بجد راااااائع
الورقة دي احتمال كبير تكون خريطة أو حاجة توصله لمكان أم مكاوك
وبعدين هو الملبن طلع وحش كده ليه ؟
كده برنسس تزعل هههههه

copa said...

انا نفسي افهم ايه حكاية كوكو ده

انا خلااااااااااص هتجننن كل ما ادخل الائي قصة كوكو

طيب خليها كوبا علي الاقل معروف

علي فكره مش بغلط في كوكو انا عارفكم يا بنات متهورين و مش بترضوا اي كلمة علي الكوكهات بتاعتكم دول

أحمد مختار عاشور said...

أنا عايز أقولك انى بشعر بالدفء فى مدونتك مع المزيكا و البانير و الحاجات اللى بتتحرك اللى مش عارف اسمها و زقزقات العصافير
حقيقى برافو على التصميم

أميرة البلطجية said...

ارجعيلنا يا كوكييييييييييي
وحشاني اوي من هنا للصين

koukawy said...

the groom ..
طبعا اهلا بيك بس انت مش فاهم الحلقات عشان مش بتقراها من زمان
بس لو تابعت يمكن تفهم اكتر عموما انت مشرفني انت و منساس ابلد كلها
و علي فكره مدونتك من المدونات اللي بحب ادخلها اوي
**********************************
شادي فايد 00
لأ لازم تشوف القديم يا شادي
مش خف الكمبيوتر بتاعك؟
ادعيلي عقبال كومبيوتي انا كمان
*********************************
ghost ..
المره الجايه لما تضحك
اضحك ضحكه شريره
ياماميييي خوفت كوكو
ههههههههههه
*******************************
يعقوب 00
شكلك بتشرب جردل نسكافيه مش ماج
ههههههههههههه
**********************************
بلطجيه 00
انتي كمان وحشتينيييييييي اويييييييي
اللا هانت المفوض بكره تتحل ؛ انتي كمان وحشتيني من هنا لأستراليا ؛
و تفكيرك راح بعيد في موضوع العروسه
هههههههههههههههه
*********************************
شمس 00
ما هو اصلا كوكو من زمان عندوا مشاكل نفسيه من الملبن بس هو من لله اللي كان السببب و خلاه ياكله
***********************************
copa ..
طب انت بعد كل ده مقلتش يعني عاجبك كوكو و حكاويكه و لا لأ؟؟؟؟؟؟؟؟
***********************************
احمد مختار عاشور 00
و انا بشعر بالسعاده لما بلاقيك في العشه مش عارف قد ايه
و ميرسي عل الكلام الجميل ده
********************************

§a§a said...

انا ايضا فات منى حلقات كتير انش اء الله اتابعها من جديد