Tuesday, April 3, 2007

شهامة مدرس

النهارده في برنامج الساعه العاشره سمعت و شوفت الخبر ده 00
مدرس بمدرسة بني مزار خرج في رحله مع طالبات المدرسه
لزيارة الفيوم ؛ و في وقت ما وصلوا بيلعبوا بالكوره
قرب الشلالات و اتزحلقت بنت اسمها يارا ووقعت في الشلال
جري وراها المدرس محمد كمال سيد بمنتهي الشهامه و رمي نفسه
و انقذها و غرق هو الله يرحمه 00
و كانت مني الشاذلي مستضيفه وزير التربيه و التعليم و بيناقشوا مشاكل
تخص قطاع المدرسين و الكادر الوظيفي الجديد و لما عرضت الموضوع
و سألت معالي الوزير يا تري ايه اللي قدمتوه للمدرس ده ؟
و كان رده 00 الحقيقه احنا صرفنا لأهله 5000 جنيه 00
الحقيقه يشكر ده كده عداه العيب و قزح 00 تخيلوا 5000 جنيه
يعملوا ايه في الزمن ده هي طبعا حياته ما تتعوضش و لا بالملايين
انما هو كان مسؤل عن الأسره يعني في مورد انقطع بقي هما شايفين
انهم كده عملوا اللي عليهم ؟ ده المدرسه نفسها عملت اكتر من وجهة نظري
اولا هو تم دفنه في المدرسه و عملوا قاعه درس عندهم بأسم الشهيد محمد كمال سيد
و عملوا صدقه جاريه بأسمه 00 يعني المفروض لما نشوف نماذج من الشهامه
ازي كده لازم نكرمها و نعلم عليها و نقول و نديهم حقهم عشان الناس تتشجع
و نرجع تاني بلد الشهامه و الجدعنه زي ما المفروض 00
في الأخر 00
اقدم عزائي لأسرة الشهيد محمد كمال سيد و ادعيلهم بالصبر
و السلوان و ادعيله بالرحمه و الثبات عند السؤال
اللهم امين
سلام

14 comments:

واحـــد مـــــن الـنـــاس said...

الله يرحمه ويغفر ليه ولكل المسلمين يارب العالمين

اا لله وانا اليه راجعون

رجل والرجال قليل

Anonymous said...

السلام عليكم
الله يتقبل حسناته و يتجاوز عن سيئاته
نسال الله العظيم رب العرش الكريم ان يسكنه دار خيرا من داره و اهل خيرا من اهله..اللهم امين اللهم امين اللهم امين


ازيك يا يا كوكو يا كميل عاااااامل ايه
انا بحبك جداااا و علشان كده اي حد هيزعلك من العيال بتوع المدونات هقطع رقبته الي مش كميه..يعني اي حد هيزعل كوكو الكميل نهاره اسود غامق
و يا ريت تكتري من الكلام عن كوكو الكميل علشان بحبه جدااا
هعدي بكره هشقر علي مدونه كوكو الكميل بعد صلاه العصر
يلا سلام
كان معكم سفااااااااااااا ح الفراخ

يعقــــوب .... said...

الله يرحمة و يصبر أهله...المشكلة ان ال5000 جنيه دول بخالهم كده تلاقيهم اتصرفوا في اول يوم عشان مصاريف العزاء و الحجات ده...وانت عارفة كويس ان الحداية مبتحدفش كتاكيت...دول بالنسبة ليهم للحكومة بعني انها اديتهم 5 مليون جنيه..على اساس ان مرتب المدرس ده ميعديش بتاع 300 ,400 جنيه فالخمس تلاف دول عمر اهله مشافوهم يعني...و ربنا يرحمنا كلنا

بيتنا القديم said...

يا خسارة لو كان بيعرف يشيل حديد
او سباحة او ملاكمة او ليه في الأولمبيات
كنا وصينا وزير البترول يعينوه في الأبعدية بتاعة اهليهم زي ما عينو اللي يسوا واللي ما يسواش
طب ما تسألي مالهوش حد قريبو ولو من بعيد في الحزب الوثني الديمقراطي كنا صرفنالو كام مليون من دم الشعب واتعملو تنثال في أي ميدان

علي العموم في رب ما بينساش حد

ويجعلو عاااااااااااااااااااااااااامر

مجهول said...

رحمه الله كان مثلا وقدوه
الله يرحمه ويهدي وزير التعليم
.....
وياكوكو اهو راح للي حيكافؤه صح
ولا حيديله فلوس وكلا جنيهات
حيديله جنه خلد
رحمه الله
بوست جميل يا كوكي

محمد عبد الغفار said...

البلد لسه فيها رجاله والله

Eric Matt said...


اللهم امين

الموت دوما حولنا ولا نراه الا يوم أن يختارنا

انا لله و انا اليه راجعون

أميرة البلطجية said...

ياااااااه
الله يرحمه
وربنا يتقلبه من الشهداء
اما بالنسبة لموضوع الوزارة
حفكرك بالمثل بتاع تيته
قال يا مستني السمنة
...
طبعا مش انتي اللي كتك خيبة
:)
الله يرحمها تيته..مقالتش مثل ابلغ من ده

3aziz 3eni said...

الحقيقة الوزارة عملت اللى تقدر عليه واكثر وهو كان لازم يعنى يبقى شهم؟
الله يرحمه ويصبر اهله احنا بقاش لينا سعر خلاص الحديد غلى والبترول بيخلص حتى الطيور جالها انفلونزا يبقى احنا بقى نخلى عندنا دم ونسيب مكان لهم علشان يقدروا يعيشوا بسلام والمفروض اننا ما نسالش احنا ليه عايشين لانه ببساطة مالناش وجود او مكان عندهم. ربنا يستر علينا

koukawy said...

واحد من الناس 00 امين
**********************************
سفاح الفراخ 00 امين يا رب ؛
ياه ه ه ه وبقالك بودي جارد يا كوكو ايه الكمال ده ؛ هستناك بكره بعد صلاة العصر بس احتمال متلاقيش جديد
**********************************
يعقوب 00 نظريه برضو
**********************************
سمسم 00 انا مش فاهمه قصدك انت معاه في اللي عمله و لا عليه؟؟؟
*********************************
مجهول 00 بجد اه هو راح المكان الوحيد اللي مش هيتظلم فيه
***********************************
محمد عبد الغفار 00 ده حقيقي لسه في امل
*******************************
the groom 00
و لو في بروج مشيده
*******************************
بلطجيه 00 تيتك دي حكيمه
هههههههههههههه
******************************
سكومونس 00 نظره تشاؤميه بحاول اهرب منها

Anonymous said...

الله يرحمه و يحسن اليه ، يعنى المدرس الى ضحى بحياته يتصرف لاسرته 5000 جنيه و لاعب الكورة اللى جاب جول يتصرفله bmw

لا فعلا جوووووولللللللل

heba said...

الله يرحمه ويحسن إليه ويلهم أهله الصبر ويعوضهم خير

معادش حد في الزمن ده بالشهامة دي .. ربنا يجازيه خير ويجعله في موازين حسناته

وشكر خاص ليك يا كوكو عشان نشرت الخبر ده وكلنا بندعيله بالرحمة .. انت كميل خالص

يا مراكبي said...

ده مش غريب على حكومتنا أبدا .. ده حتى الخمسة آلاف جنيه دول مبلغ كبير كمان

لكن الحكومة ممكن تبدد أضعاف أضعاف أضعاف كده في أمور لا تستحق .. ولنا الله

koukawy said...

باكينام ناصر 00 شوفتي يابنتي ارزاق بقي
*******************************
شمس 00 ما هو لازم كل الناس تعرف ان في لسه خير و في امل
**********************************
يا مراكبي 00 انت قولت المفيد لنا الله