Wednesday, April 18, 2007

الاسلام ما هو 00

الدين ليس حرفه و لا يصلح ان يكون حرفه 00
و لا توجد في الاسلام وظيفه اسمها رجل دين
و مجموعة الشعائر و المناسك التي يؤديها المسلم يمكن
ان تؤدي في روتينيه مكرره فاتره خاليه من الشعور فلا تكون من الدين في شئ
و ليس عندنا زي اسمه زي اسلامي ؛ و الجلباب و السروال و الشمروخ
و اللحيه اعراف و عادات يشترك فيها المسلم و البوذي و المجوسي
و الدرزي 00 و مطربو الديسكو و الهيبي لحاهم اطول 00
و ان يكون اسمك محمدا او عليا او عثمان ؛ لا يكفي لتكون مسلما
و ديانتك علي البطاقه هي الأخري مجرد كلمه ؛ و السبحه و التمتمه و الحمحمه؛
و سمة الدراويش و تهليلة المشايخ احيانا ياشرها الممثلون باجاده اكثر
من اصحابها ؛ و الرايات و اللافتات و المجامر و المباخر و الجماعات الدينيه
احيانا يختفي ورائها التاّمر و المكر السياسي و الفتن و الثورات التي لا تمت
للدين بصله ؛ ما الدين اذن ؟؟؟؟؟؟
الدين حاله قلبيه ؛ شعور ؛ احساس باطني بالغيب و ادراك مبهم ؛
لكن مع ابهامه شديد الوضوح بأن هناك قوه خفيه حكيمه مهيمنه عليا تدبر كل شئ
***********************
دي كانت مقدمة كتاب الاسلام ماهو للدكتور مصطفي محمود ؛ اللي بصراحه
و انا بقراه شدني وراه و سحبني في حاله من الروحانيه و التركيز الشديد لدرجة
اني خلصت الكتاب في يومين و نص ؛ و اتمنيت ان كل المسلمين يفكروا
بالطريقه دي و يخلصوا في عبادتهم و روحانياتهم قبل مظاهرهم بالطريقه دي
بيتكلم الدكتور مصطفي محمود ربنا يديله الصحه في كل باب من الكتاب علي
ركن او فرض من الفروض بس زاوية تناوله الشرح او التأملات اللي كاتبها
زاويه مختلفه كتير عن اللي متعودين نسمعه ؛ و انا بقرا كنت حاسه انه بيتكلم
مش كاتب و تحس ان كلامه همس بيدخل جواك و تحسه و تقتنع بيه
بمنتهي السلاسه و السهوله و الانسيابيه ؛ مش هقدر اقول اكتر من اللي مكنوب في المقدمه
هو شارح نفسه بنفسه
انا في نيتي اكتب البوست ده من فتره بس اللي خلاني اسرع و اكتبه دلوقتي
البوست اللي قارتها عند سمو الأميره البلطجيه بعنوان اسمي محمد بوست مش بتاعي
و وزيرها الهمام مجهول بعنوان حتي يعود محمد
اللي كتبوا بوست عن بوستايه تانيه اللي هي الأصليه بعنوان انا اسمي محمد للمدون الزميل
صاحب مدونة خربانه يا جدعان
و كانت البوستات دي بتناقش موضوع انا شايفه انه محسوم في الكتاب ده ؛
في النهايه انا تعبت اوي ان اعرف اجيب غلاف الكتاب لو حد لقاه يقولي ؛
بس جبتلكوا حاجه اجسن من الغلاف جبتلكوا مقتطفات من الكتاب من علي منتدي
سبحان الله و انا بدور علي الغلاف لقيته اللي مهتم يقري اللينك اهو هنا
و نهاية بشكر ربنا علي هذا العالم الجليل اللي رزقنا بيه و ربنا يشفيه من مرضه و وحدته
و يديله طولة العمر
الكتاب موجود في مكتبات دار المعارف
سعره 10 جنيه
سلام

15 comments:

يا مراكبي said...

برافو عليكي إنك قريتي الكتاب ده وكتبتي بوست عنه

ياما الناس بتحكم على الآخرين بالمظهر الديني اللي ممكن يكون جواه ما ينافي كل ده .. والأمثلة على كده كتيرة جدا

لو لدين كان بالمظهر الخارجي ما كانش حد غلب

تحياتي

أميرة البلطجية said...

الله يا كوكي
بسم الله ما شاء الله
المقطفات اللي من الكتاب جميييييييلة
انا ححط البوست دي عندى في بوستات تتقرى
..
اتمني ان التعليقات ع تكون بنفس مستوى الرقي بتاع البوست

يعقــــوب .... said...

مع احنرتمي الكبير و العميق للدكتور مصطفى محمود,,,و لكن من قال انه لا توجد وظيف اسمها رجل دين؟..من قال ان اللحية عرف؟.. من قال انه لا يوجد زي اسلامي؟

رجل دين هو رجل الدين الذي يفني عمره باحثا و خاطبا و معلما و مؤثرا..و كان الاوائل من الحكام المسلمين يجعلوهم في مراتب العظام و يوفروا لهم كل الوسائل ليتفرغوا لعلمهم و لا ينشغلوا بأمور الدنيا,,ليس مثل الآن ...الزي الاسلامي هو الزي الذي يحافظ و يستر الرجل و المرأة بمختلف انواعه و اساليبه..اللحية سواء كانت فرض ام واجب ام سنة او فضيله هى من هدي الرسول و نابعة من الاسلام...اما اذا كان يشترك بها معنا اليهودي و الجوسي و المسيحي ..فاليهودي و المسيحي و و و يشتركوا معنا في وجود و ايمانهم بالله اذا نقول هنا ان الايمان بالله عادة و عرف اجتماعي...هذه فقط بعض النقاط من الكتاب كنت اريد التعليق عليها .. ومع العلم ان الدكتور مصطفى ليس رجل دين انما رجل حاول ان يكون رجل دين و لكن اصبح رجل علم وليس دين.وربنا يديله الصحة و يكرمه

Anonymous said...

hii
ana far7ana gedan 3lshan fe 7ad 2o3gab belketab zay ma ana magnona beh ana mesh 2adra a2ol ad eh elketab we sa77bo me2saren fea ezay ana ad keda ba7eb mostafa m7mod we kol kotobo , a7b a2olk ya koko eny sebt elshoghl beta3y ba3d wak3et gahl elnas henak we so2alhom (مين مصطفى محمود دا بيبيع ايه يعنى ) takhyalo
el7amd lelah en rabena 3fa 3any
shokran
bayyyyy :)

Tamer Nabil Moussa said...

اولاا حمدالله على السلامة انتى كنتى فين غايبة بقلك فترة

عرضك وكلامك اكثر من رائع وعجبنى اوى

والكتاب ان شاء الله هروح اشترية

تحياتى

محمد عبد الغفار said...

الجوهر اهم من المظهر بلا شك والدين فى اساسه المعامله واسوأ نموذج فى العالم للمتدين هو من يهتم بالمظهر وجوهره خواء، اما ان وافق المظهر الجوهر فنحن بصدد الصدق بعينه

المشكله ان الأصرارا على المظهر عند البعض فاق كل شئ واختزل الأيمان فيه وفى المقابل الهجوم على المظهر صار هدف بغض النظر يحوى جوهر او لا

اللهم جنبنا الفتنه

Anonymous said...

بوست ممتاز عن كاتب رائع و ذكى يا كوكو
......
بس انتى عارفة ان مصطفى محمود عدى على مرحلتين فى حياته
هو الكتاب ده كان فى انهى مرحلة؟
يمين و لا يسار؟
لاحظى ان الكلام عن الكتاب ممكن يحمل وجهة نظر التيارين
....
تحياتى

Eric Matt said...


يعقوب حبيبي

رجل الدين بوصفك له هو نفس مقصد الدكتور مصطفى محمود وانتما لكما نفس الرأي لكن مع اختلاف أسلوب التعبير

أما بقا ليكي انت يا كوكو

شكرا لك

قلتي كل اللي في قلبي انت و الدكتور مصطفى محمود

تحياتي لك من ماناساس البلد

:))

koukawy said...

مراكبي 00
حقيقي ما كانش حد غلب ؛ انت قريت الكتاب ؟
********************************
اميرة البلطجيه 00 يا رب الفكره توصل
و ميرسي انك هتحطي البوست عندك
**********************************
يعقوب 00 انت كلامك صح ؛ و هو ده اللي يقصده الدكتور مصطفي محمود بالظبط
و جروم قال نفس الكلام اللي انا عايزه اقوله ؛ رجل الدين لما تتحول تبقي وظيفه تبقي كارثه لأنها فعلا مش وظيفه ؛ زيه زي العالم بالظبط العلم مش وظيفه و لا الدين وظيفه و ده اللي هو يقصده لو قريت هتعرف ؛ و في النهايه هو مصطفي محمود مش راجل دين بس تفوق علي رجال دين كتييييير
**********************************
شيمو 00 اي خدمه يا شيمو انتي تؤمريني
شوفي انتي عايزه كتب ايه تاني ؟؟؟
*********************************
تامر نبيل 00 الله يسلمك هو بس الكمبيوتر كان عنده وعكه ؛ انت كمان شكلك بقالك كتير مجتش هنا لأنك متعرفش انه كان عيان ؛لما تقراه قولي رأيك
*********************************
محمد عبد الغفار 00 حقيقي ان فيه ناس بتهاجم و خلاص بس هو زي ما انت بتقول ان لو اتفقوا يا ريت ؛ بس في النهايه مايجيش واحد ملتحي و بيلبس جلبيه يبص للي لابس بنطلون انه مش ملتزم او كافر او مايعرفش ربنا هو ده رأي ان كل واحد حر و محدش وصل و لا هيوصل ان بره و جوه يبقوا كويسين اوي
*********************************
احمد مختار عاشور 00 في المرحله التانيه بعد ما رجع من الحج لو قريت الكتاب هتتأكد من كده
***********************************
the groom ..
ميرسي يا جروم انك شاركتني الرد علي يعقوب انت فهمت صح ؛ و ميرسي ليك انت كمان انك عجبك البوست

Diyaa' said...

ربنا يجازيكي كل خير
وعجبني أويييييييي الجزء ده
والكتاب هقراه في ساعتين ونص لو في إيدي بس لايموني عليه :)) هجيبه بإذن الله بس الاقي tour guide الأول


وعايز أقول ليعقوب حاجة
أحنا دماغنا صغيرة أوي ...تدخلنا في حاجات جانبية ..لحية مين بس ..لو أنت مربيها سنة ..بتتبع الرسول عليه أفضل الصلاة والسلام ..ماشي علي عيني وراسي ..لكن أرجوك متنجرش لمناقشة حول جدوي اللحية ومقارنة بينها عند المسلمين وعند الهيبز ..
لأن ببساطة لما هتقول لواحد يهود أنا بربي لحيتي اقتداء بالرسول ( ص ) مش هيفهم..لأنه ميعرفش سيدنا محمد حق المعرفة ولو يعرف فأكيد ورث كراهيته من تربيته ..بجد خلونا في صميم الدين ومع احترامي اللحية عمرها ما كانت من صميم الدين
وعلي فكرة أنا مهمل وسايب دقني بقالي فترة وهشيلها أول ما أفوق ..بس أنا معترض علي إنك تناقشها وتدافع عنها كجزء من الإسلام...اقتدي بالرسول وخلي دي حاجة بينك وبين ربنا..وأعمل زيي لما حد يقولي سايب دقنك ليه ..بقيت متدين ولا ترويش...مبردش عليه ..لأنه للأسف اتربي غلط وهيجرني لجدل ملوش لزمة


ومتفق معاك في إن مصطفي محمود عمره ما كان رجل دين واللقب ده مش شغلانة ولو في فلوس بياخدها خادم المسجد فدي زي إعانة علي المعيشة لقاء تفرغه لخدمة دينه ...وكذلك المؤذن وحتي العالم ..لكن تحول الدين لوظيفة هو اللي خلاه حاجة تخوف وحاجة بيحاول الكثير تجنبها ...المادة شوهت الدين للأسف ..ولولا إن ربنا بيحفظ الإسلام وكتابه كان زمان الدنيا لايصة..
ربنا يستر علينا
وشكراً يا كوكو يا كميلة أوي
وربنا يجازيكي كل خير

Diyaa' said...

الدين حاله قلبيه ؛ شعور ؛ احساس باطني بالغيب و ادراك مبهم ؛
لكن مع ابهامه شديد الوضوح بأن هناك قوه خفيه حكيمه مهيمنه عليا تدبر كل شئ

دول الجملتين اللي عجبوني ..مش فاكر كتبتهم في التعليق اللي فات ولا لأ ...
سلام عليكم
وحمد الله علي سلامة جهازك :)

heba said...

الكتاب ده شكله رااااائع وتحفة لأن المقتطفات اللي انتي كتبتيها بتتكلم في الصميم وربنا يجازي الدكتور مصطفى محمود خير لأن هو كتب حاجة صح بغض النظر اتجاهاته كانت عاملة ازاي ماهو احنا لينا عقل برده نقيم بيه الكلام اللي قدامنا

وياريت اللي بيسيئوا استخدام الدين يقروا الكتاب ده

§a§a said...

جزاكى الله خيرا

SomeOne said...

سبحان الله
انا بدور على بوست عندك يكون بتاريخ 20 -4
فلقيت اني كنت مقرتش البوست ده

الكتاب ده لازم اقراه ان شاء الله عشان انا بثق في رأيك من يوم ما اشتريت
تاكسي

عموما انا كنت بدور على بوست بالتاريخ ده ليه بقى
؟؟

عشان ده تاريخ اخر كومنت جالي من كوكو
وبعدها كل لما ادخل مدونة القي تعليقات كوكو
وكوكو مش بيجي يزورني

انا بكل تأكيد مش زعلان

انا بس خايف يكون كوكو زعلان مني في حاجة او يكون كوكو ضايقه رأي ليا في بوست عندي او كومنت عند اي حد

يعلم ربنا ان مدونتك اهم مدونة بدخلها
وبتعلم منها

انا مثلا
من يوم البوست اللي اتكلم فيه كوكو عن رمي الورق في الأرض
وأنا مرمتش ورقة على الأرض

فلو كوكو زعلان مني ارجو انه يقولي
عشان لو كنت عملت او بعمل حاجة غلط اصلحها

انا بجد عمال ادور على سبب مقنع ان كوكو مش يزورني غير انه يكون زعلان مش لاقي
؟؟؟

انا حستريح لو كوكو جه قالي انا زعلان عشان كذا وكذا
لان لو قالي انه مش زعلان مش حعرف اقتنع

ولو كوكو مش بيعلق عندي عشان بوستاتي مش عجبته فأعتقد انه كان لازم يقول في الكومنتات
ولا ايه؟؟

جايز اكون مكبر الموضوع
بس كل لما ادخل مدونة والاقي تعليق كوكو اتجنن

يعني معقول يعدي عشرين يوم كوكو ما يفكرش يدخل مدونتي
؟؟؟

وليد said...

السلام عليكم ورحمة الله
كنت أبحث فى جوجل عن مقال لى فوجدت هذا اللينك
أسعد جدا جدا بان اجد أعمالى هنا او هناك سواء أشاروا لى ام لم يشيروا..

المهم كتبت هذا المقال فى منتدى (حارة زعتر ) الذى أتشرف بكونى شريك فيه
والمنتدى كان فريسة صراع بين السلفية والإخوان
شاهد هنا
http://z3tr.loaloaa.com/showthread.php?t=9817
وهنا
http://z3tr.loaloaa.com/showthread.php?t=9661&page=1
وكان الجدال يدور حول الموقف من حزب الله
فكتبت متقمصا شخصية الإنسان العادى
هنابتاريخ 8/8/2006
http://z3tr.loaloaa.com/showthread.php?t=9982
وبعدها نشرتها فى مدونتى
واخترت محمد أسما لانه يمثل الأغلبية
وكان هدفى واضحا
يا اتباع المدرسة السلفية ويا اعضاء جماعة الإخوان
إن صراعاتكم وخلافاتكم تدمى قلوب الشباب الذى لا يعرف الفرق بينكم
محمد لم يكن أمعة لكنه نموذ يمثل الشريحة الأعم والأكبر من الشعب المصرى
الذى يجلس جله الأن يشاهد محمد حسان على قناة الناس ويتأثر به ويتعاطف معه ويعمل بما يقول ثم يغير المحطة على مسلسل (سارة ) حسب ما يحدث فى بيت امى كنموذج
وهناك من يغير المحطة لما هو أنيل

محمد شاب تاه بين هذا وذاك
وخشيت ان يترك محمد الجمل بما حمل ويتحول لجورج
والله أعلم لماذا حذفت الاستاذة أميرة اسم جورج وكل ما يتعلق به فى المقال
فالأقتباس يلزمها بالتنوية أنها حذفت
ربما ارادت أن تتجنب غضب النصارى

وقد غضب بعضهم فعلا لا ادرى لماذا
http://3alkahwa.blogspot.com/2006/08/blog-post_09.html

لكن على العموم انا سعيد بهذا الفرح ورغم أنه فرحى لكننى لم أكن موجودا

وكل ما يهمنى الأن أن تكون الفكرة وصلت
وان يعرف كل فريق أننا زهقنا منه
والتعليقات هنا شاهدة على ما اقول
فإن يدخل أحدهم ويعلن أن الأسلام عافية
وان اللحية فرض غصب عنا وان الاسلام ليس فيه مظاهرات عافية

حين قرات هذا الكلام تذكرت ما كان يقوله الشيخ محمد حسان والشيخ يعقوب وغيرهم من ان التليفزيون لا خير فيه وان الفضائيات لعنه وان اقتناء التليفزيون شئ غير جيد
ثم ها هم يحتلون قنوات كاملة

بكره الاخ ده يخرج فى مظاهرة لما المشايخ يقلوله

هذا عيب أخر فى التدين
يتبع بلا عقل

وهذا العيب فى الفريقيين



جزاكم الله خيرا جميعا
وليد عبد الله

waled_loaloaa@hotmail.com



ملحوظة : لو زرتوا حارة زعتر
هتشوفوا التجربة واقعية
اعضاء سلفية يريدون خطف المنتدى ويريدون الاشراف تلميحا وتصريحا بدعوى اننا ناقصين الأهلية
وأعضاء اخوان يدافعون عن كونهم مجرد اعضاء وان المنتدى مستقل

وادارة غلب حمارها فى إفاهم الجميع أننا لسنا مع أحد
وأننا محمد الذى لن يكون جورج