Thursday, June 14, 2007

ايه ده ؟؟ ايه اللي بيحصل ؟؟

الحلقه اللي فاتت ..
كوكو وصل مدينة انا
الحلقه دي ..
عدي كوكو من باب المدينه و كان اول انطباع جاله هو احساسه بأن الجو خالي
من الأوكسجين تماما و انه مش عارف يتنفس طبيعي و مكنش عارف ايه السبب
لا هو الجو حر و لا في تراب ؛ المهم طنش كوكو و قال يا كوكو يا كميل طنش خالص
دي كلها حاجات سطحيه و مش اساسيه ؛ و فضل كوكو ماشي شويه و الحياه
رايقه من حواليه بس هو جواه احساس مش كويس و هو كوكو الكميل لما احساسه يشتغل
و ريشات الاستشعار عنده تتهز يبقي في شئ غريب ؛ و فعلا الحاسه الساسه عنده
قويه لأنه بص لقا كوكو واقع علي الأرض و رجله مكسوره و عمال يعيط
اوي فجري كوكو الكميل عليه و قاله ..اقدر اساعدك ؟؟ اجيبلك كوكتور ؟؟
رد عليه الكوكو المكسور .. لأ
استغرب كوكو من الرد جدا بس قال في نفسه يمكن هو محرج يطلب حاجه من حد ميعرفوش
و رجع قاله تاني .. لأ بجد مش عزومة كوكارجبيه انا بقول بجد انتي مش قادر تتحرك
رد عليه الكوكو التاني بانفعال شديد اوي .. انت مالك يا اخي ملكش دعوه امشي
بقي لأن شكلك كده هتدفع كتير
و مفهمش كوكو يعني ايه .. شكلك كده هتدفع كتير
و مشي كوكو و هو بيبص علي المكسور اللي قاعد علي الأرض يتألم و رافض المساعده
و فضل الموضوع شاغل دماغ كوكو و مستغربله اوي ..
لحد ما لقا قدامه حاجه شغلتله دماغه عن التفكير ..منظر لفت انتباهه جدا
لدرجة انه فتح منقاره و لسانه دلدل من الدهشه .. شاف كوكو بيت والع
و طلعه منه النار من كل حته و في صريخ استغاثات طالع من جوه البيت ..بس
مش هو ده الشئ الغريب اللي لفت نظره .. الأغرب ان الكوكوهات السكان ماشيين رايحين
و جايين عادي جدا زي ما يكون مفيش مصيبه بتحصل .. و طبعا مكنش من كوكو
غير انه يجري بسرعه ناحية البيت عشان يحاول ينقذ حد .. و كوكو من طيبته و سذاجته
ابتدي يجري في وسط الشارع و يصرخ .. حريقه يا كوكو هات المدينه حريقاااااااااااااااااااااااه
و مفيش رمش و ريشه في المدينه اتحركت للمصيبه دي .. و كل ما كوكو يجري ناحية حد عشان
يطلبه مساعدته يلاقيه ماشي باصص قدامه و لا كأنه شايفه واخد في وشه
و ماشي زي الروبوت .. و فضل كوكو يحاول يدور علي مساعده و هو في قمة ذعره
لحد ما الصريخ اللي جوه البيت سكت و الكوكوهات المساكين اللي كانوا جوه اتشوا
ووقف كوكو يبص علي البيت لحد ما النار اكلت الخشب و بقت رماد و اطفت النار و بقي البيت
عباره عن كوم تراب .. و كبر الموضوع في دماغ كوكو جدا و بقي نفسه يعرف هو المدينه دي
ليه الكوكوهات عمله كده معقوله كلهم من ذوي الاحتياجات الخاصه و مبيسمعوش
مش ممكن .. امال يا تري المشكله جايه منين يا كوكو يا كميل ؟؟
المهم كمل كوكو طريقه و كان كل هدفه انه يلاقي حد يساعده يخرج من البلد دي
و يلاقي طريقه في المدينه الخضرا و يلاقي طانط ام مكاوك بقي و نخلص .. و ابتدا كوكو
يدور علي حد يساعده و اول واحد لقاه قدامه جري كوكو ناحيته و بمنتهي الأدب
قاله .. انا كوكو الكميل و كنت عايز حضرتك تساعدني اني الاقي المخرج من هنا .. و سمع
كوكو صوت دربكه حواليه خلته مش فاهم ايه اللي بيجري حواليه .. عربيات و ناس
و دوشه و زعيق .. و حبه حبه ابتدا كوكو يدرك ايه اللي حصل .. بس مش بالظبط
اكتشف كوكو انه مدبس في مصيبه كبيره بسبب حسن نيته و طيبته .. معقوله يا كوكو
الطيبه و القلب الأبيض يدوك في داهيه كده .. و بدأ كوكو مشوار عذاب جديد
و معاناه مع اللي حصل .. هو ايه اللي حصل ؟؟
كاكان
السؤال .. يا تري ايه اللي حصل ؟؟
يا للا بقي شدوا حيلكوا

15 comments:

semsem said...

تحياتى بوست رائع

مدبس فى مصيبه
مممممم

اكيد انه عمل دوشه فى الشارع ساعه الحريقه وازعج الناس

كراكيب عادل said...

اعتقد انة مدينة انتاج اعلامي ولا حاجة ودي كانت مشاهد من افلام

حريقة وواحد مكسور بيمثل

او زي سيرك مدفوع الاجر


حاجة كدة يعني

اية المدينة الغريبة دي

؟؟؟؟

صاحب البوابــة said...

السلام عليكم

اشكر كل من تساءل عن غيابي

ووقف بجانبي في محنتي

تحياتي لكل شريف حر

البنت الشلبية said...

ازيك يا جميلة

الحل بقى

واض والله اعلم انه اشتبهوا فى كوكو الكميل انه هوا الى ضرب كوكو وكسرله رجله وهوا السبب فى الحريقة

كوكو الجميل بقى wanted

هههههههههه

سلام

.:.-=- ELGaZaLy-=-.:. said...

ههههههههههههههههههه

حلوة اوى يا كوكو بجد

Unknown said...

اظن كوكوالكميل خالف قانون البلد دي لما عرض المساعده ..لانه مهتمش بنفسه وبس..لا ده دور كمان علي حاجه غير انا ... وبكده حيجي البوليس ياخده القسم ومش بعيد تبقي الحكايه يا الدفع يا الحبس


قولي صح بقي عشان دي اول محاوله ليا مع فوازير كوكوالكميل

-_- said...

هنعملها فيلم امتى ؟؟

بيتنا القديم said...

كوكو
....
هو اسم النبي حرصوه وصاينوه الكوكو الكميل..ماخدش بالو لليفطة الطويلة العريضة المكتوب عليها "في مدينة انا من تدخل فيما لا يعنيه اتلزئلوه ما لا يرضيه"...اظن ماخدش بالوه
مسكين ان شاء الله هما يومين في التخشيبة ويخرج استاذ في الانا
تحياتي

safa7_karmooz said...

كوكو ..

ازيك

معلش خلااص هانت ...

هخلص اكزامز ...وابقى لاجىء هنا

المهم

فيه ندوة لخالد الخميسى يوم التلات هيتكلم عن كتابه بتاع تاكسى لو عاوزة تيجى

http://www.facebook.com/event.php?eid=2477867141

او العنوان اهوة:


Nahdet El Mahrousa NGO
Street:
18 Mahmoud Bassiouny St.
City/Town:
Downtown, Cairo

heba said...

أكيد الدوشة والهيصة دي عربيات البوليس والصحافة وجايين يقبضوا عليه والظاهر كده انهم هيتهموه في كل البلاوي اللي بتحصل

معلش يا كوكو السجن للجدعان

أميرة البلطجية said...

اظن يا كوكو إن السبب ان المدينة دي مدينة للانانين بس واسمها مدينة أنا,,يعني محدش يساعد حد ومحدش يطلب مساعدة من حد..ولما كوكو عرض يساعد الكوكو المكسور وقاله انت حتدفع كتير..اكيد كان قصده حيدفع غرامة مخالفة القوانين في المدينة..فاكيد برضه لما كوكو نفسه طلب مساعدة الدنيا اتقلبت عشان هو خالف القوانين وحيروح في ستين داهية!!
الاجابة دي مني انا واحمد اخويا

مجهول said...

اشكرك يا كوكي يا كميل يا جميل
علي سؤالك
وانشاء الله اعود قريبا جدا
تحياتي
البوست اللي فات رائع جدا جدا

يعقــــوب .... said...

عندك بأه الفيلم ده...لو مكنتش شوفتيه لازم تشوفيه لو بتحبي ادب القصة والحوار
The Tenth Man.. its a novel for Graham Greene
وعملوها فيلم بطولة الكبير قوي
Anthony Hopkins
طبعا مش هقول اخراج ايه ولا موسيقى ايه ولا تصوير ايه...هسيبلك الحجات ده تبعك. أه والمونتاج طبعا

Yasser Hussein said...

في ناس مع الأسف بتعتقد إنها جدعنه لما يتنرفز ويشتم ويضرب
ومخبيش على الجميع أنى يوما ما وقعت فى الخطأ ده أثناء سيري بسيارتي
صدمنى سواق ميكروباص
أحد المارة بسيارته قام قايل لي:
أوعى تسيبه
الكلمة دي فعلت مفعول شياطين الانس معى
تهورت وضربت سواق الميكروباص
وبعد أن هدأت لومت نفسي بشدة
لأنه تصرف همجي
ومن بعدها وانا بقدر الامكان اتمالك اعصابي في مثل هذه المواقف
لأن سواء ضارب أو مضروب
فأنا خسران
خالص تحياتي

islam yusuf said...

كوكو الكميل
شكله هايجيله حالة اكتئاب
علشان خاطرى بلاش توديه الأماكن المرعبة دى
الواد لسه صغير و ده لمصلحته
كلهم من ذوى الاحتياجات الخاصه
يبقى هما أكيد فى مصر
تحياتى