Tuesday, June 5, 2007

ايه هو المونتاج ؟؟؟؟

البوست ده اهداء لأحد كميلين العشه اللي مقدرش يسألني
سؤال و مردش عليه ؛ الكميل يعقوب البلوجاوي الصديق
كان سألني في كومنت ليه علي البوستايه بتاعت فيلم
requiem for a dream
اللي كنت مناقشه فيه مدي اسهام المونتاج في نجاح الفيلم
و رد علي يعقوب في كومنت و قالي 00
انا نفسي من زمان اعرف يعني ايه مونتاج ؟؟؟؟
فطبعا انا لقيت ان كومنت هيبقي مش كفايه اني اشرحله يعني ايه
مونتاج فقررت اكتبله البوستايه دي و اهو اللي يحب يعرف و يستفيد
******************************************
المونتاج هو 00
مرحله في صناعة الفيلم بتحصل بعد الانتهاء من تصوير كل مشاهد الفيلم
و هي عباره عن تركيب اللقطات بالتوالي ؛ يعني لو احنا عندنا مشهد
معين اتصور من كذا زاويه كل زاويه بلقطه او شوت زي ما بيقولوا
يجوا في المونتاج يبتددوا يركبوا اللقطات دي علي بعض عشان في النهايه
يحصل المشهد اللي احنا بنتفرج عليه
كمان غير كده في مونتاج ما بين المشاهد كمان مش اللقطات بس ؛
يعني تحديد النقله ما بين مشهد و مشهد هتتعمل ازاي نقله حاده
و للا نقله بطيئه و لا هتتعمل مسحوبه اللي بيسموها
fade out
او
disolve
و طبعا بيتحكم المونتاج في ايقاع الصوره او المشاهد اللي بنتفرج عليها
عشان كده المونتاج مهم لدرجة انه ممكن يبوظ مشاهد الفيلم حتي لو تصويرها
حلو او يخلي الفيلم حلو حتي لو التصوير مش هايل اوي ؛
بس هو ده المونتاج يا استاذ يعقوب اي خدمه
سلاااااااااااااااااااااااااااااااااام

10 comments:

يعقــــوب .... said...

بصراحة مكنتش متوقع إن سؤالي هياخد الاهتمام ده!!!وده لو دل على شيئ فهو يدل على جدعنتك من الاخر يعني....شكرا جدا شرح وافي وكافي من غير لا رغي و لا تشتيت....يلا يا شباب خدوا صور معاها عشان بعد كدة لما تبقى عالمية تعرفوا تبيعوا الصور ده بملايين
:)

يا مراكبي said...

أنا على فكرة بأعمل مونتاج كويس جدا لكل الافلام اللي بأصورها بكاميرا الفيديو الخاصة بتاعتي

Yasser Hussein said...

معلومات قيمة بالنسبة طبعاً للهاوي أو اللي عايز يفهم معنى المصطلح
بس أنا عندي سؤال ويمكن تكوني جاوبتي عليه قبل كده
بس أنا شخصياً معرفش جوابه
وهو
أنتي دراستك متعلقة بالتصوير أو السينما
ولا دي هواية من هواياتك

خالص تحياتي

أميرة البلطجية said...

ايه ده ما شاء الله يا كوكي..انتي دارسة سينما؟

Eric Matt said...


ربنا يكرمك

تحياتي لك من ماناساس البلد

انا زعلان من يعقوب لانه مش بيزورني

:(

محمد عبد الغفار said...

فى مونتاج تانى وده فى كارنا كار صناعه الملابس الجاهزه

ويقصد به تجميع الأجزاء السابق تجهيزها من قطعه الملابس سوياً لتصبح منتج نهائى

Unknown said...

تصدقي انا برده مكنتش عارف ايه المونتاج ده .. في حاجات كده الواحد بيفترض انها بتتعمل لوحدها
:D

والمونتاج كان حاجه منهم .. هو الفيلم بيتصور .. ولوحده يتجمع ويبقي فيلم
شكرا علي المعلومه دي

معلش انا كنت بعيد عن عالم التدوين الفتره اللي فاتت , بس انا رجعتلكو تاني اهو

koukawy said...

يعقوب 00 ايه كل ده ده كتير عليا و بعدين طالما استطاعتي اساعدك او اسعد اي حد معملش كده ليه انا مش جادعه و لاحاجه انا بس بحاول ابسط حد اهو يمكن ربنا يجازيني خير
************************************
يا مراكبي 00 انت جامد في كله كده ؟
مش كفايه بتكتب حلو
هههههههههههه
*********************************
ياسر حسين 00 من ده علي ده
*********************************
بلطجيه 00 شوفتي بقي
******************************
the groom 00
يبقي اكيد زعلان مني انا كمان صح ؟؟
******************************
محمد عبد الغفار 00
معلومه مفيده ميرسي
****************************
مشمش 00 اهلا بيك متغبش تاني بقي
بتوحش العشه

Unknown said...

مش حعمل كده تاني ..حرمت خلاص

دانا فاتني كتييييييييييير قوي

كراكيب عادل said...

المونتاج لازم يكون الي بيعملة صاحب حس عالي جدااا وفني

فعلا ممكن يبوظ الفيلم لو متعملوش مونتاج صح