Thursday, June 28, 2007

تفتكروا هيخش النار؟؟؟؟

نظرا لأن الفتره دي في حاله من الركود التدويني العجيب و في حركه الزيارات
العائليه البلوجيه و اللي اثرت علي نفسية الكوكو الكميل الرقيقه
قرر كوكو انه مينزلش الحلقه الجديده الخميس ده لأن الحلقه اللي فاتت كوكو و المنشور كتير من اللي بيتبعوها
متبعوهاش ؛ بس انشالله الأسبوع الجاي ينشرها
بس انا مش عارفه حركة الركود الغريبه دي سببها ايه ؟؟
تفتكروا الصيف و الحر و سنينه و قرفه ؟؟؟؟؟
ما علينا خدوا بقي البوستايه الصغننه اللي جايه دي علي الماشي
***********************************************************
النهارده راكبه الأتوبيس رقم 900 اللي لونه اخضر و اللي متجهه
الي عبد المنعم رياض .. و كنت قاعده في مكان ورا و بعدين لما كرسي فضي
قدام قمت رحت قعدت .. قعدت جنب ست مخدتش بالي من شكلها في الأول
لحد ما قالتلي .. لو سمحتي ممكن اسألك سؤال .. لوهله مكدبش عليكوا
قلت هتشحت فمحضره علي لساني الله يسهلك عشان الواحد اتهري من قصص
و افلام الشحاته التمثيليه اللي انتوا عارفينها .. و في نفس الوقت قلقت
عشان متعرفنيش و بتكلمني ؛ المهم ميلت عليها لأن صوتها كان واطي
اوي .. و قلتلها .. مسمعتش عيدي الكلام تاني .. قالت تاني .. هو
لو سمحتي يعني تعرفي لو ان حد عارف واحده متجوزه و راح قالها
ان جوزها متجوز عليها هيخش النار؟ .. تنحت لها بنظره كلها بله
و هبل و استغراب و كل الأحاسيس اللي ممكن تتخيلوها في الدنيا
و بعد شويه رديت و قولتلها .. لأ معرفش .. و دورت وشي و كنت كل شويه
ابص في الازاز اللي في وشي اشوف وشها معكوس عليه و مليان حيره
و قلق و توتر و صعبت عليا .. بس اللي فضل شاغل بالي هو سؤلها ..طب
تفتكروا انتوا لو حد عمل كده هيخش النار ؟؟؟؟؟؟؟؟؟؟؟؟؟؟؟؟؟؟؟؟؟؟؟
سلام

20 comments:

اسكندراني اوي said...

مش عارف بس
الاعمال بالنيات
سؤال محير اوي بس بلاش تسالوه للمفتي
لا يفتي

فبركة said...

من قال لا أعرف فقد أفتى وخير ما عملتى
ودى مشكلة الشعب
نصه بيسأل أسئلة تافهة
والنص التانى بيفتى فى اللى مش عارفه مع إنه غير مؤهل للفتوى

تحياتى

safa7_karmooz said...

استنى يا كوكو كده مش فاهم ...

مين اللى يدخل النار ...اللى متجوز عليها...ولا اللى يروح يقولها

ومعلش عالانقطاع...ظروفا ما..:)

Diyaa' said...

لو بيقول الحقيقة من رأيي إنه مش عليه أي وزر بشرط إن ميكونش نيته هدم الأسرة وينقل الخبر بشكل مستفز
أما لو مش حقيقي فالكداب بيروح النار زي ما كل حبايبنا الشطار عارفين
تحياتي
ليكي وكل تناحة وانتي بخير
سلام عليكم

koukawy said...

اسكندراني اوي .. هو سؤال محير فعلا علي رأيك
***********************************
فبركه .. لا اعرف هي الأضمن
و علي رأيك شعبنا يموت في الفتي
***********************************
علاء .. هدخل انشالله و اوقلك رأي
**********************************
سفاح كرموز .. لأ اللي يروح يقول ؛
معلش ربنا معاك
***********************************
ضياء .. ميرسي علي رأيك يا ضوووووياء

Unknown said...

السؤال ده مش محتاج كل الحيره دي

لان من شروط تعدد الزوجات ان الزوج يخبر زوجته الاولي قبل زواجه بالثانيه

لو الزوج لم يخبر الزوجه الاولي ..فالمخالفه من نصيب الزوج لانه لم يستكمل الشروط التي وضعها الاسلام

لكن السؤال الحقيقي ..هل يجب علي الشخص الذي يعلم بهذه المخالفه ان يخبر الزوجه ؟ وان لم يخبرها .. حيخش النار ؟

الساكت عن الحق شيطان اخرس

safa7_karmooz said...

هههههههههه

طب ايه ...مش عارف بقى ..

اصل حكاية الجنة والنار بتاعت ربنا مش بتاعتنا...

سؤال محير فعلا...والشعب بقى اغرب

heba said...

الفتنة اشد من القتل
لو جوزها عايزها تعرف كان قالها وبعدين اللي شاغلها الراجل اللي بيفتن ولا الزوج اللي اتجوز ؟ مش عارفةوالله الست دي بتفكر ازاي وبعدين على فكرة يا كوكو هتلاقيها سألت الناس كلها يعني سألت قبلك كتير ولسة هتسأل بعدك كتير

اصل الموضوع شكله كده شاغلها قوي

Yasser Hussein said...

حد عارف واحدة متجوزة!!
أنهي نوع من المعرفة؟
دي حاجة
الحاجة التانية لو جوزها متجوز عليها
ايه المشكلة
تعدد الزوجات حلال
غير كده اللي بيدخل الجنة بيدخل برحمة ربنا مش بأعماله
يعني حكاية فلان رايح الجنة وفلان رايح النار
دي مش احنا كبشر اللي نحكم فيها
ده شيء بيد المولى عز وجل
إن شاء عذب وإن شاء غفر

خالص تحياتي

كراكيب عادل said...

بصي فعلا الايام دي فية حاجة غريبة

بس هو ضيق وقت يمكن مع الناس


انا جاي برضو اسلم علي كوكو


مليش دعوة انا بموضوع الست دي

هههههههههههههههههههه

يا مراكبي said...

أولا كلمة يخش النار دي كبيرة جدا وما ينفعش إحنا كبشر نحكم بالظاهر على الناس لأن ربنا سبحانه وتعالى هو اللي هيحاسب الناس على أعمالهم بمجمل الحسنات والسيئات وأشياء أخرى لا يعلمها إلا الله عز وجل

والراجل اللي رايح يفتن ده ممكن يكون قصده خير وممكن يكون قصده شر .. وفي الحالتين برضه حسابه هيخضع لنفس القاعدة السابقة على مجمل أعماله .. يعني ممكن يكون قصده هنا خير وتلاقيه في النار .. وممكن يكون قصده هنا شر وتلاقيه في الجنة

koukawy said...

ليكوا كلكوا ميرسي اوي علي التعاون .. و يا ريت كنت اعرف الست دي عشان اقريها ردودكوا و ارائكوا في الموضوع
ميرسي يا كميلين

بيتنا القديم said...

غالباً النار مفهاش قسم من النوع ده

لكن الله اعلم ممكن مع شيوع هذا النوع

يتعملهم قسم خاص

تحياتي

ويجعلوعامر

Blank-Socrate said...

كوكو الكميل
اكيد اللى فتن عمل حاجات كتير غير الموضوع دا يدخله النار!!!!!!!

ربنا يرحم كل الناس من النار و يهدى الجميع

Blank-Socrate said...

فى موضوع جديد فى سلسله الملايكه المرة دى بالاسماء

البنت الشلبية said...

انا اسفة على التاخير عن البلوج الحوة دى

شوفى انا رأيى انه ميقولهاش احسن لان لو جوزها عايز يعرفها هيقولها كمان هيا مع الوقت هتعرف

فمفيش داعى للفتنة انها تفتن على الراجل يعنى...

سلام

Unknown said...

ياعينى اكيد الست دى محتارة لدرجة انها بتسأل اللى جمبها فى الأتوبيييس

ربنا يفك كربها يارب ويسترها مع الجميع

بس فكرة انها تدخل النار دى حاجة كبيرة اوى .... معتقدش يعنى .

مممممممممم

حاجة تحير فعلا

--------------

كوكو يا كميلة مش تزعلى عشان مش باجى كتير بس والله لو تعرفى العنوان بتاع مدونتك ضاع منى اصلا ههههههههههههههههه

بس مش عارفة حركة الزيارات البلوجرية قلت كدة ليه .. احتمال الحر والنت فيه ضغط كبير عليه وكدة

والله أعلم

سلام يا كميلة ومستنية زيارتك
:)

koukawy said...

سمسم .. حقيقي الله اعلم
**********************
بلانك سقراط .. اه مين عارف
***************************
شلبيا .. بصي هو كان لازم يقزلها لأن ده احد شروط الجواز مين واحدع تانيه بس في النهايه الله اعلم المضوع ايع اصلا
**********************************
انسانه .. الله اعلم بالقلوب

أميرة البلطجية said...

كوكو أكمل بلوجر في العالم كله
وحشتيني
وبجد بفرح بسؤالك
وبتمني اشوفك ع الماسنجر بس للاسف
:(
مش بتيجي
بصى بالنسبة لنقص الزيارات..أممم ممكن يا كوكو عشان انتي قعدتي فترة مترديش ع الكومنت بقيت الناس مبتسبش كومنتس..مش شرط ان الناس مش بتيجي..انتي مش حاطة كاونتر؟ ده غالبا المقياس الحقيقي (بس اطرحي عدد المرات اللي انتي بتخشي فيها)...بالنسبة للبوست...بصى الموقف ميتاخدش من كلمة..اكيد فيه ملابسات تانية..وعموما ..اللي بيتسبب في الاذية وخراب البيوت يبقي مذنب..واللي بيعمل حاجة يصلح بيها وضع غلط يبقي كويس...هي بقي اللي فتنت عملت ايه وكانت نيتها ايه واذت مين وصححت اي اوضاع؟ هي ادرى بنفسها
وربنا يسامح الجميع
:)
احمد حيخلص انهاردة ان شاء الله وحيعد بقي يقرا اللي فاته..ربنا بس يكرمه انهاردة ان شاء الله
سلام يا حبيبي

طهقان said...

يدخل النار علشان اتجوز عليها؟
والا يدخل النار علشان راح قالها ان جوزها اتجوز عليها؟

ايه دا؟

الناس دي مش فاهمة والا ايه؟

ايه علاقة النار بالجواز؟

يا عالم
خلوا الشعب يعيش
ويتجوز
مرة واتنين وتلاتة