Vantage Point

رغم عدم تحمسي لمّا قالولي ياللا نروح سيتي ستارز نشوف الفيلم،الا اني انبهرت
من اول لقطه في الفيلم......حقيقي تهنئه خاصه جدا لكل واحد مر بس من قدام
او من ورا الكاميرا، فيلم جيد جدا من ناحية الصوت و الصوره و الفكره
بأختصار الفيلم عباره عن حدث معين و هو زيارة الرئيس الأمريكي
لسلامانكا في اسبانيا لحضور احد مؤتمرات ...اللي لا بتقدم و لأبتأخر....و بيتم اغتيال
الرئيس بمجرد طلوعه علي المنصه....طب و ايه الجديد يا كوكو يا كميل ما مليون فيلم
شبه كده.....لأ ملكوش حق الجديد بقي هو ان في موقع الحدث اللي بيتم فيه تلات اربع الفيلم
فيه 8 اشخاص اغلبهم لا يمت للأخرين بصله،لكن كل واحد موجود لسبب مختلف
الجديد هو ان المخرج بقمة العبقريه يوريلك نفس الحدث من وجهة نظر كل شخص من دول
و ازاي تعامل مع الموقف و من خلال ده بيربط خيوط الموضوع الي ان يكشف لك عن
مرتكبي العمليه و مفجري المكان .....يا جماعه عمري في حياتي ما شفت فيلم فيه
مطاردات عربيات بالحلاوه و التقنيه دي .....و مونتاج الفيلم و تتابع الللقطات
لعب دور كبير جدا في عمل جو من التلاحق ...و في نفس الوقت نجح فريق التصوير
في التحكم في حركة الكاميرات بمهاره و حساسيه محصلتش.....ده غير ان المخرج
استخدم اسلوب جيد جدا في الرجوع بالخلف بالمشاهد ...يعني يمشي بيك المشهد لغاية جزء مثير جدا
و فجأه يرجع الشريط بالعكس و يرجع يبتدي تاني من الأول بس بداية الأحداث عند شخص تاني
كل ده و لسه متكلمتش بقي عن الممثلين اللي فعلا مفيش واحد فيهم حتي اللي عمل مشهدين صامتين
متخرجش من الفيلم و انت فاكره و متأثر بيه و بدوره

DEnnis Quaid

و هو ممثل امريكي شهير جدا ....قام بدور الحرس الشخصي للرئيس الأمريكي و اكثر واحد
من الحرس بيثق فيه الرئيس

Forest Whitaker

ممثل يتسم بالبرائه و الوجه الطفولي تقع في غرامه من اول نظره و من اول كادر
يسحبك وراه بابتسامته الصافيه و وشه المعبر و احساسه اللي بيوصلك بمنتهي السلاسه
و قام بدور احد الحاضرين للافتتاح المؤتمر و عنده ولع بالتصوير و
كان احد الشهود العيان و المصورين للأحداث الخفّيه اللي محدش شافها
الا من خلال عدسة كاميرته و نجح الممثل في
انه يأثر فيّ بشكل ميتوصفش ...فاز الممثل الرائع بجائزة الأوسكار احسن ممثل
سنه 2007 و ده عن دوره في فيلم
The Last King of Scotland

Matthew Fox

ممثل عادي.....صحيح وسيم و زي القمر بس مش مميز و فيه منه كتير
بس ده ما يمنعش انه قام بدوره علي اكمل وجهه
و هو احد حرس الرئيس و في نفس الوقت .....و لا بلاش اقول يمكن حد يحب يتفرج
فبلاش احرقه.......احب اضيف ان الممثل هو احد ابطال المسلسل الأجنبي
Lost

Sa3id Taghmaoui

ممثل فرنسي من اهل من المغرب العربي....من النازحين لفرنسا
تاريخه و انتاجه الفني في هوليود مش كبير و لكن من رأي
ان الفيلم ده هيكون مبثابة قفزه و نقله كبيره ليه
ممثل رائع من الوشوش العربيه اللي تحسسك بالرجوله الخشنه
و مش هقولكوا برضه دوره ايه عشان محرقش الفيلم
بالمناسبه شارك الممثل المغربي الفرنسي ..سعيد طاغماوي
في فيلم سنة 2004 مع النجم عمر الشريف و هو فيلم
كنت كتبته عنه بوستايه قبل كده ...هتلاقوها هنا Hidalgo

Eduardo Noreiga

ممثل اسباني اكثر من رائع...ليه طابع مختلف في التمثيل بحكم انه نجم سينما في بلدهم و ده خلاه
مخلوط بالطابع الغجري اللاتيني في تمثيله...و قام بدور رجل بوليس من رجال البوليس في
سلامانكا اسبانيا

Edgar ramirez

ممثل فنزويلي حاد الملامح، ممثل اول مره اشوفه علي الشاشه لكنه ممثل متمكن من ادواته
رغم ان السي في بتاعه مش ثري انما هو ممثل موهوب جدا و ذا ملامح عربيه الي حد كبير
قام بدور احد الشباب المنظمين للحركه الجهاديه..الجدير بالذكر ان الممثل ده بيتكلم 5 لغات
اسباني، ايطالي،فرنساوي، الماني و انجليزي.....يا بخته

Ayelet Zurer

ممثله من مواليد تل ابيب اسرائيل، ذات ملامح وجه رجالي حاده و لا يمكن وصفها بالجمال
بأي حال من الأحوال، لكنها ممثله رائعة الحضور و التميز علي الشاشه
و فيها حراره و ايقاع داخلي يخليك مترفعش عينك من عليها و انت بتتفرج
و اللي اداها التميز ده انها ليها طابع في التمثيل مختلف تماما عن ممثلات هوليوود
و الغريب جدا انها قامت بدور احد الشباب الي المفروض مسلمين للقيام باغتيال الرئيس الأمريكي

*******************************

احب اضيف في النهايه ان الفيلم حقق في اسبوعين عرض بس 40 مليون دولار امريكي
و ده حسب بيان ميزانية السينما الأمريكيه
شعور لطيف حقيقي لما تشوف ممثلين من جنسيات مختلفه بيعزفوا سيمفونيه فنيه عالية الجوده
كل واحد فيهم بطريقته و اسلوبه و تتكنيكه الفني و في نفس الوقت متناغمين
الي اقصي حد و مفيش اي نوع من انواع التنافر

في النهايه، نجح الفيلم الي حد كبير انه يحقق معادله صعبه مش بتحصلو انه زي ما صور امريكا
و الرئيس الأمريكي ملايكه و خلاك تتعاطف معاهم، في نفس الوقت وقف في صف الجماعه
الانتحاريه و صورهم في صوره طيبه
و هو ده معني عنوان الفيلم ...رؤية الأحداث من زاويه واضحه

سلام

من شبّ علي شئ.......شاب عليه

من شبّ علي شئ .......شاب عليه

هو ده اللي طول عمرنا بنسمعه بس انا رأي غير كده

معلش سيبوني افلسف شويه من نفسي....دلوقتي من المفترض ان كل شئ الواحد

شب عليه هو نتاج لتربيه الأهل .....بس هل يا تري كل ما ربانا عليه الأهل صح؟؟؟؟

من رأي انه لأ.....حاجات كتيييييير في تربية الأهل مش بتكون مظبوطه

لكن بيربونا عليها عشان هما اتربوا عليها.......وشابوا عليها زي ما المثل بيقول

لكن لو كانوا ما شابوش علي اللي اتربوا عليه و تمردوا اكيد ما كناش احنا هنكبر

علي الغلط اللي هما ربونا عليه...طبعا انا مش بعمم....بس نفسي الواحد يكتشف

بدري بدري ان فيه حاجات غلط اتربي عليها و اتعود و عاش و لو ساب نفسه هيشيب

و لو لحقها بدري بدري هيقدر يغيرقبل ما يدرك متأخر و يتصدم اكبر صدمه في حياته

انا مش عارفه حد فاهم انا كاتبه ايه ولّا لأ بس....انا فاهمه و علي العموم

من شبّ علي شئ.......يقدر يلحق نفسه و يغيره قبل ما يشبّ عليه

سلام

One missed call !!!!!!!

رغم عدم اهتمامي او حبي للأفلام الرعب لكن بعد اجماع المجموعه علي دخول الفيلم
مكنش قدامي الا اني اوافق علي رغبة الأغلبيه و اروح معاهم سينما جالاكسي
عشان نشوف فيلم رعب....و بدأ الفيلم ....معرفش ليه من اول ما بدأ حسيت
اني شوفت الفيلم ده قبل كده كذا مره ،و ده بسبب احساسي ان الفكره دي استخدمت قبل
كده مليون مره و كان اّخرها فيلم
اللي كان بيتناول نفس فكرة اللي بيموت بطريقه بشعه Dark Water
و تفضل جثته مخفيه في مكان محدش يعرفه و روحه تطوف و تقتل في الناس انتقاما للي حصله
و كان اللي استشفيته من اول الفيلم ....لقيته في اّخر الفيلم
فكده بالنسبه للقصه لا جديد......اما بقي بالنسبه للخدع البصريه و السمعيه
فكانت اكتر من رائعه و نجحت المؤثرات و الخدع في خلق جو من التوتر ...رغم انه جو مش جديد
انما خلقت جو من التوتر العام .... و خاصة مشهد هام جدا اللي بتظهر فيه الروح الشريره الحقيقيه
بعد ما كنا مخدوعين في جثه تانيه خالص..المشهد مصنوع ببراعه تكنيكيه هايله سواء في الصوت او الصوره
و من الحاجات اللي عجبتني في الفيلم كمان ...البوستر ...رغم شعوري انه مسروق شويه من
انما البوستر فكره حلو Sawرباعية
المهم ان في المهايه الواحد اتفسح و شاف فيلم ..حلو او وحش مش مهم
و اهو كله بيطلع في الغسيل......و فيلم يفوت و لا حد يموت
سلااااااااااااااااااام

حين ميسره

بالرغم من كرهي الشديد لله في لله للمخرج/خالد يوسف

معرفش ليه شدّني التريلر بتاع فيلمه الأخير (حين ميسره) و قدر فضولي الشديد انه يتملك

منّي و يأثر عليا و دخلت الفيلم، بس برضو اخدت احتياطاتي و دخلت حفلة الضهر

عشان لو كان فيه اي حاجه كده و لا كده محرجش نفسي و اسمع تعليقات ملهاش لزمه

و لا حاجه ......و لأول مره اشوف فيلم لخالد يوسف احس ان فيه شيء مختلف فعلا

مش عارفه ايه اللي خلي الفيلم فيه اختلاف ، هل هو الديكور اللي وصل فعلا جو العشوائيات

و لا حركة الكاميرا اللي مفيهاش افتعال و لا هي حالة الهم و الغم اللي بيعشها المصريين

و اللي بالبلدي كده الفيلم قلب علينا المواجع....مش عارفه انا في العموم الفيلم عجبني

و مندمتش اني دفعت فلوس و خدت من وقتي و دخلته.....بس رغم كده الحلو ما يكملش

و خصوصا لما يكون الحلو ده من وش ال..........خالد يوسف، يعني مثلا مدام لجأ

المخرج لاستخدام لاب توب في احد مشاهد الفيلم يبقي كان لازم يعلم الفنان احمد بدير

كيفية استعمال الجهاز لأن بصراحه كان شكله اقرع اوي و هو بيحرك صوابعه علي الهوا

ثانيا بدون اي مبرر حشر السيناريست و المؤلف الجماعات الارهابيه اللي بنشوفها

برضو في كل افلام وحيد حامد، بالنسبه بقي للمشاهد الاباحيه اللي لا يستغني

الحقيقه تقال انها اقل نوعا ما من افلام كتير بس هما مشهدين اللي كانوا زياده حبتين

بس الكاّبه اللي محيطه بالفيلم تخلّي المشاهد دي تمر مرور الكرام بدون الشعور بها

و اأخيرا بقي مشهد الفينال في الفيلم كان سئ بطريقه غير طبيعيه و السبب هو استخدام الكرومه

لخلفية القطر و الحقيقه اني مش لاقيه اي مبرر انهم يستخدموا الكرومه لو كانوا جم علي نفسهم

شويه و بدل ما يصوروه في ساعه و يخلصوا كانوا صوروه في تلاته و خلوا ختامها احسن من كده

في النهايه انا لسه برضو ما مبحبش خالد يوسف مفيش حاجه اتغيرت بس الفيلم الحقيقه تتقال

انه الي حد كبير فيلم كويس، و اللي كان مفاجأه كمان هو عمرو عبد الجليل اللي

كان اختفي من زمان في ظروف غامضه بس رجع رجوع مشرف

ياللا بقي اللي شاف يقولي رأيه و اللي مشفش يقرا و خلاص

ههههههه

سلام

اضراب فولكس

اولا كل سنه و الاخوه الأقباط بخير

و بالمره كل سنه و احنا طيبين بمناسبة السنه الهجريه و يجعلها ربنا سنه

فل و خير و سعاده انشالله

*****************************

تعرفوا فكرت في حاجه جامده اوي و انا خارجه النهارده رايحه الشغل و شارع الهرم

فاضي و بيبرق و لا لما اكون مشط ماشي في راس واحد اقرع......و الميكروباسات الفولكس البيضه

اللي الكارته بتاعتها المفروض من مشعل للجيزه .....و هما ماشيين بينشوا

و ناقص ينزلوا يبوسوا ايدين الناس اللي واقفه انهم يركبوا للجيزه

طب يعني حسوا علي دموكوا في الأيام العاديه بتتنكوا علي الناس

و تقسموا شارع الهرم اربع محطات عشان تسرقوا و تخدوا ضعف الأجره

و تيجوا يوم الأجازه تبقوا شحاتين و .....و لا بلاش

انما بنقول لمين ......المهم بقي الحاجه المهمه اللي انا فكرت فيها

اننا نعمل اضراب يوم الأجازه الرسميه و اللي ينزل يوم الجمعه

زي حالاتي و ميكونش عنده اجازه او حتي نازل مشوار

اننا منركبش الميكروباصات البيضه و نركب حاجه تانيه

يمكن يحسوا علي دمهم و يحترموا نفسهم

مش عارفه ممكن تجيب نتيجه و لا الناس هي اللي هتبقي خسرانه

مش عارفه رأيكوا ايه؟؟؟؟؟؟؟؟؟؟؟؟؟؟؟؟؟؟؟؟

سلام

عيد ميلاد اول

باه ه ه ه ه ه ه
فجأه اكتشفت النهارده ان فات علي ميلاد العشه سنه بالظبط
زي النهارده السنه اللي فاتت عرفت يعني ايه بلوج
و عرفت يعني ايه عشه و صحاب للعشه
و زي النهارده السنه اللي فاتت كان كوكو معايا و بيملي العشه صوصوه و لعب و تنطيت
فاتت سنه بسرعه اوي .... ما هي دايما كده الايام السعيده تعدي بسرعه
كل سنه و انتي طيبه يا عشتي الكميله
كل سنه و انت طيب يا كوكو يا كميل
و ميرسي علي المفاجأه الكميله اللي انت عملتها
كنت حاسه انك هترجعلي تاني يوم عيد ميلاد عشتك
و متزعلش مني يا كوكو لو كنت قصرت معاك و لا خنقتك مني
فعشان كده سبتني و هربت
او عي تهرب تاني يا كوكو و تسبني لايصه في العشه لوحدي مش عارفه اكتب ايه
اوعي تهرب تاني يا كوكو ... لأنك مش هتلاقي قلب احن مني و لا قلم اصدق مني يكتب عنك
كل سنه و انتي طيبه يا عشتي ....و عقبال مليون سنه
و كل سنه و كل صحاب العشه الكميله بخير و صحه و سعاده و كماله
و يا رب 2008 تبقي احلي من كل السنين اللي عدت

كفايه فوضي بقي

ردا على عدد الدستور بتاع النهارده السبت 1/12، كتب جوزي العزيز المقاله دي

و بعتها علي البريد الاكتروني الخاص بالجريده

بعد ما قرأ النقد اللي مكتوب عن فيلم المخرج الكبير (يوسف شاهين) الأخير

المقاله اللي في الدستور كانت بقلم: ياسمين مجدي
و بعنوان: يوسف شاهين عبقري السينما العربيه

منشور في الصفحه السابعه

***********************************************************************

كفايه فوضي بقي

بقلم: نور

عدد الدستور بتاع النهارده الصفحه السابعه خبر( يوسف شاهين عبقرى السينما العربيه) واضح ان الاخت ياسمين مجدى مشافتش الفيلم اصلا لانى اعتقد لو هيه شافته كان هيبقى رأيها مختلف خالص، لان الفيلم مفيهوش اى حاجه من يوسف شاهين اللهم الا قد يكون اسم الفيلم فقط .. فمخرج فيلم الارض لا يستطيع ان يخرج فيلم بهذا المستوى الوضيع المفتعل ولو حرص على ذلك فهو ابن غير شرعى ينسب له.....انا ارى بشكل شخصى ان الفيلم هو اضعف ما انتجته السينما المصريه من افلام خلال السنوات الاخيره..وعلى الرغم انه يتناول قضيه فى غاية الاهمية الا انه خرج الفيلم تافها ملفقا مهلهلا من حيث النسق الدرامى والتقنى فرأينا مشاهد نهايه الفيلم وثورة الحى على شخصية حاتم تصور بعشوائيه مفرطه وتلفق رغم ضعف مستواها التقنى فرأينا اكتر من مره ان عيون الكومبارس تداعب عدسة الكاميرا وهم فى قمة ثورتهم....والمخرج العالمى خالد يوسف لم نرى منه من العالميه الا الشتائم والعرى.....هل هذه هى العالميه من وجهة نظره ؟احداث الفيلم اغلبها ملفقه ولا تحترم عقلية المشاهد بل على العكس تسخر من رؤية الجمهور للشارع .فبعد الافان تيتر العظيم الذى رأيناه لمشاهد الانتهاكات الحقوقيه من رجال الشرطه فى المظاهرات .....ذهبت القصه الى الشاب وكيل النيابه وخطيبته التى تعيش بلا مبالاه وبتحرر عبيط.....انها سهرة تيلفزيونيه باهته ....بالتوازى مع عشق امين الشرطه لنور جارته الذى يصل الى الحب المرضى وعلى مدار اكثر من ساعه من الملل المتواصل والمشاهد الكوميديه لشخصية حاتم المحشوه حشوا وليس لها اى علاقة بدراما الفيلم وبعد ان نصل الى حاله من النفق والزهق تاتى عقدة الفيلم وهي اكتشاف ان نور تحب شابا وستتزوجه ......بعيدا عن القفزه الفجائيه لعلاقة نور بالشاب وكيل النيابة الذى ترك حبيبته بالامس وفى اليوم التالى رأيناه يذوب عشقا فى نور ..الا انها ايضا سهره تلفيزيونيه باهته من حيث بناءها الدرامى.. فرأينا شبكة العلاقات هذه اكثر من مليون مره....وليس لها اى علاقة بالفوضى ولا بالجموع الغفيره للامن المركزى التى تقمع المتظاهرين التى رأيناها فى بداية الفيلم ...يتطور هذا الصراع الى ذروته بعد ان يغتصب امين الشرطه نور بعد اختطافها فى مشاهد اقل ما توصف به انها ساذجه وتسخر من عقولنا وتحمل فى طياتها دلالات على انهم يقدمون هذا الفيلم لقبائل الزولو بافريقيا... وفى نهاية الفيلم يأتى الحل عن طريق اكثر سذاجه وهو عجوز الافلام الذى يخبر البطل بالحل فيدله على طريق الزنزانه الثانيه بمنتهى الهبل وسط عجز ساذج من الطرف الاخر للصراع وهم رجال الشرطه الفاسدين ...وانا اعطيه مبرر فى ذلك لانه يحاول ان ينهى الفيلم الذى طال ملله باى وسيله ..فهذ المخرج الذى اؤكد على انه ليس يوسف شاهين يسخر من معاناة المصريين ويحاول ان يصنع من نفسه بطلا يحارب الفساد ويطرح قضايا ساخنه فى السينما ويحاول جاهدا ان يوصف بانه مخرج عالمى فيسهب فى مشاهد العري والالفاظ الجارحه التى يتقزز منها جمهور السينما الغير عالمى كما سيصفهم.......فالفوضى فعلا موجوده ولكن داخل عقول هؤلاء المهوسين بأن يكونوا ابطالا على حساب البسطاء من الناس... ولكن احب ان اقول لهم امالكم ستخيب لان الفن الجيد يبقى والباهت يذوب...... يوسف شاهين المهاجر، الارض ،المصير، الناصر صلاح الدين، بابا امين.... مازلنا نذكره حتى الان وهذه المجموعه على سبيل المثال لا الحصر ......الى مذبلة السينما ايها الارزوقيه واتركوا الفن لناسه وارحموا الناس بقى قد تلاحظون فى كلامى حرقه وعصبيه ....اقسم انه ليس تحاملا ...فهذا الفيلم للاسف خيب امالى بشكل كبير لانى انتظرته منذ أن كان خبرا فى الجرائد واتخيله دائما منذ عرفت قصته من الجرائد وبعد ان رأيت التريللر والافيش قلت انه سيقلب مسار السينما العربيه....وفتره انتظار طويله.....ثم الفيلم بهذا المستوى ...لا انسي ان اؤكد براعة الفنان خالد صالح فى الاداء الجميل فعلا والصدق الفنى والفنانتان هاله صدقى وهاله فاخر

واخر كلامى ارجوكم لا تجاملوا على حساب الفن والمجتمع

والسلام عليكم