Wednesday, February 13, 2008

حين ميسره

بالرغم من كرهي الشديد لله في لله للمخرج/خالد يوسف
معرفش ليه شدّني التريلر بتاع فيلمه الأخير (حين ميسره) و قدر فضولي الشديد انه يتملك
منّي و يأثر عليا و دخلت الفيلم، بس برضو اخدت احتياطاتي و دخلت حفلة الضهر
عشان لو كان فيه اي حاجه كده و لا كده محرجش نفسي و اسمع تعليقات ملهاش لزمه
و لا حاجه ......و لأول مره اشوف فيلم لخالد يوسف احس ان فيه شيء مختلف فعلا
مش عارفه ايه اللي خلي الفيلم فيه اختلاف ، هل هو الديكور اللي وصل فعلا جو العشوائيات
و لا حركة الكاميرا اللي مفيهاش افتعال و لا هي حالة الهم و الغم اللي بيعشها المصريين
و اللي بالبلدي كده الفيلم قلب علينا المواجع....مش عارفه انا في العموم الفيلم عجبني
و مندمتش اني دفعت فلوس و خدت من وقتي و دخلته.....بس رغم كده الحلو ما يكملش
و خصوصا لما يكون الحلو ده من وش ال..........خالد يوسف، يعني مثلا مدام لجأ
المخرج لاستخدام لاب توب في احد مشاهد الفيلم يبقي كان لازم يعلم الفنان احمد بدير
كيفية استعمال الجهاز لأن بصراحه كان شكله اقرع اوي و هو بيحرك صوابعه علي الهوا
ثانيا بدون اي مبرر حشر السيناريست و المؤلف الجماعات الارهابيه اللي بنشوفها
برضو في كل افلام وحيد حامد، بالنسبه بقي للمشاهد الاباحيه اللي لا يستغني
الحقيقه تقال انها اقل نوعا ما من افلام كتير بس هما مشهدين اللي كانوا زياده حبتين
بس الكاّبه اللي محيطه بالفيلم تخلّي المشاهد دي تمر مرور الكرام بدون الشعور بها
و اأخيرا بقي مشهد الفينال في الفيلم كان سئ بطريقه غير طبيعيه و السبب هو استخدام الكرومه
لخلفية القطر و الحقيقه اني مش لاقيه اي مبرر انهم يستخدموا الكرومه لو كانوا جم علي نفسهم
شويه و بدل ما يصوروه في ساعه و يخلصوا كانوا صوروه في تلاته و خلوا ختامها احسن من كده
في النهايه انا لسه برضو ما مبحبش خالد يوسف مفيش حاجه اتغيرت بس الفيلم الحقيقه تتقال
انه الي حد كبير فيلم كويس، و اللي كان مفاجأه كمان هو عمرو عبد الجليل اللي
كان اختفي من زمان في ظروف غامضه بس رجع رجوع مشرف
ياللا بقي اللي شاف يقولي رأيه و اللي مشفش يقرا و خلاص
ههههههه
سلام

21 comments:

A.SAMIR said...

انا مش عارف ايه سبب كرهك لخالد يوسف؟
خالد يوسف امتداد طبيعي لعاطف الطيب
لو تعرفي عاطف الطيب بتاع ضربة شمس وليلة ساخنة وسواق الاتوبيس
لو حبيتي عاطف الطيب وافلامه اكيد هتحبي خالد يوسف وافلامه
عموما
وللناس فيما يعشقون مذاهب
تحياااتي

أنا حر said...

الفيلم تحفه فنيه فعلا ممكن اختلف معاكي في رأيك في خالد يوسف لأني بحبه جدا
الممثلين كلهم اجادوا في الفيلم ده
تحياتي

мσнη∂ιš said...

ههههه
أحسن عشان مغامرش بروحي و أشوفه

Blank-Socrate said...

اهلا يا كوكو
هابى بتاع من اللى بيقولوا عليه النهاردة
معلهش اكمن الواحد مش مرتبط فمبفهمش فى الكلام دا
دا غير انا لسه صغير و قلولى هتفهم لما تكبر
المهم انت شجعتينى احضر الفلم دا
لانى محتار بينه و الجزيرة
و لسه محتار

koukawy said...

احمد سمير.... بص انا من محبين عاطف الطيب جدا بس رأي ان عاطف الطيب مكنش متفتح اوي بسفاله كده
بحس انه بيقصد يحشر مشاهد اباحيه زياده عامل فيها امريكاني
..............................
انا حر.......اه حقيقي حتي عمرو سعد انا مش بستظرفه بس كان كويس اوي
............................
مهندس....لأ شوفه هو في المجمل حلو
..........................
سقراط....و انت طيب و عقبال ما تكبر و ترتبط بقي و تحتفل باللي اسمه بتاع ده ..ههه..اه احضر الفيلم
.............................

يا مراكبي said...

يعني إيه الكرومة دي؟

أنا لازم أعرف الحاجات دي قبل ما أقتحم مجال السينما

أفيدونا أفادكم الله

خمسة فضفضة said...

السلام عليكم ورحمة الله وبركاته

حمد الله علي السلامه ، فينك يا بنتي من زمان ، والله وحشتينا ووحشنا كوكو ومغامراته الكميله

بصي انا ماشفتش لفيلم ، بس كل اللي قريت عندهم تحليل ليه من اخوانا المدونين حسيت انه ماعجابهمش انت اول واحده تقول فيه كلمه كويسه

عموما لما ابقي اشوفه هاعرف مين الصح ومين الغلط

و بالنسبة لخالد يوسف لما بلاقي اسمه علي اي فيلم اعرف علي طول ان هايبقي فيه مشاهد اباحيه زياده اوي ويمكن كمان مالهاش لازمه

koukawy said...

المراكبي.....شوف يا سيدي لكرومه هي ...فاكر زمان افلام شاديه و كمال الشيناوي مثلا لما كانوا يبقوا سايقين عربيه ،و المشهد اللي وراهم شارع و عربيات و كده كانوا بيبقوا هما بيصوروا في بلاتوه و سابتين مكانهم و الصوره اللي ورا دي هي اللي بتتحرك ،اهي اللي وراهم دي هي الكرومه...و اي خدمه
...................................
خمسه فضفضه.....انا موجوده اهه بس اطلع من حلجه ادخل في حاجه
و علي رأيك المشاهد غالبا بيبقي ملهاش لازمه

anwer said...

انا فعلا كنت مستغرب هما بينقدوا اوي كدة ليه
انا دخلته تقريبا يوم منزل وقفة العيد الكبير
مشفتش فيه حاجة اوفر اوي يعني

محمد عبد الغفار said...

المخرج خالد يوسف

ادتيه ما لا يستحق بهذا اللقب

ولاحمد سمير اقول حرام عليك

david santos said...

Thanks for your posting and have a good week.

رفقة عمر said...

كوكو ياقر ازيك عامله ايه
قولت اطمن عليكى

koukawy said...

رفقة عمر....و انتي عامله ايه وحشاني كتير .....ربنا يخليكي و تطمني علي علي طول
.................................
عبد الغفار......انت تقصد اللي مكان النقط يعني؟؟؟؟

شادي فايد said...

اختلافنا مع شخص لا يدعونا اننا نشتمة
وخالد يوسف كحرفة اخراج
مخرج ممتاز
بس هو مستفز
ومعقد حبتين

Rozza!.......فاقد الذاكرة said...

صباح الخير
كل ما ازور بلوج اجد حد بيتكلم عن الفلم
مش عارف ليه
بغض النظر عن الفلم وعن المخرج
الفلم بيتكلم عن واقع
واحنا محتاجين شوية افلام واقعية
مش افلام عربية صارت زي الافلام الهندية,

بحب السيما said...

مع انى مستغرب جدا ان العك اللى اسمه حين مسخرة ديه عجبك , بس العملية فى الاخر اذواق
انا داخل بصراحة عشان الكومنت الاولانى بتاع اسم النبى حارسه وصاينه احمد سمير عشان مش طالبة الواحد يموت مفقوع

خالد يوسف ايه الى امتداد عاطف الطيب
مين العبيط اللى فهمك كده
ايش جاب سواق الاتوبيس والبرىء والهروب وضد الحكومة للعاضفة وويجا وهى فوضى وحين ميسرة

ايش جاب اعظم مخرج مصر جابته فى التالتين سنة الاخيرة لاكبر مدعى لسه ياما نشوف ونسمع منه فى السنين اللى جاية

قال امتداد قال

ملحوظة اخيرة : ضربة شمس اخراج محمد خان مش عاطف الطيب

koukawy said...

بحب السيما.....منورني يا اخ سيما
و انا متفقه معاك في الرأي بتاعك جدا لأن انا من الكارهين جدا لخالد يوسف
سواء انا او جوزي لو كنت قريت البوست اللي قبله عن هي فوضي
بس انا مقلتش ان الفيلم حلو في المطلق ....هو فيلم حلو بالنسبه اولا لخالد يوسف
و الفيلم فيه اخطاء كتييييير ميعملهاش مخرج في حضانه و انا يمكن قلت منها حاجه
بس هو الفيلم حلو بالنسبه للي احنا بنشوفه ....و اللي خلي الفيلم الي حد كبيرحلو الممثلين....و بصراحه الفيلم يتظلم لو قلنا عليه وحش و كمان في نفس الوقت مفيش مقارنه بينه و بين الرئ خااااااااااالص طبعا ايش جاب ليجاب
ابقي تعالي تاني انا بحب السيما زيك
سلام

بحب السيما said...

صحيح ياكوكو
ينفع الاقى 18 بوست عن الافلام وماالاقيش فيهم اميلى اللى واضح انك بتعشقيه
ياريت البوست السينمائى الجاى يكون عنه

koukawy said...

بحب السيما........ارجع دور تاني عن بوستايه عنوانها.يا ميت ندامه.دي عن فيلم Amelie
ازاي تفوتني حاجه زي دي ده من احلي الأفلام

محمد عبد الغفار said...

مفهمتش سؤالك

koukawy said...

محمد عبد الغفار....كنت عايزه اعرف اديت خالد يوسف حقه في ايه؟؟؟؟؟