Tuesday, July 24, 2007

مرجان احمد ...... بتنجان


مش من عادتي اني اتفرج علي افلام في السينما كتير بفضل ان اشوفهم علي الكومبيوتر
عشان امخمخ اكتر ؛ و كان اّخر فيلم شفته وش اجرام لمحمد هنيدي ؛
و من ساعتها ما روحتش السينما غير امبارح عشان اتفرج علي فيلم ..مرجان احمد مرجان
من باب التغيير .. و من اللي سمعته عن سمعة الفيلم و مدي اعجاب الناس بيه
قلت بقي يا واد يا كوكو يا كميل ده انت هتشوف فيلم مصري حلو بقي اخيرا
و كانت صدمتي ان الفيلم مش حلو بس في نفس الوقت للأمانه في بعض الايجابيات
اول صدمتي و هي اكتر حاجه مبوظه الفيلم هو المبجل .. يوسف معاطي اللي الظاهر كده
كان جاب اخره في .. عباس الأبيض ؛ لأن من يوم المسلسل ده و انا مشوفتلوش حاجه
حلوه .. المهم و ماعلينا ؛ الأستاذ معاطي اعتقد انه متعبش في كتابة الفيلم لأنه بمنتهي البساطه
اغلب الفيلم هو مشهد و متكرر بعادل امام مع ممثلين مختلفين و لوكيشن مختلف ؛
انما هو نفس الموقف و تقريبا نفس الحوار .. و اقصد بكده مشاهد تقديم الرشوه ؛
اللي هو و انا مغمضه عرفت نهاية المشهد هتكون ازاي لأن اتكررت فاتحرقت
من الحاجات السيئه جدا برضو من الأستاذ معاطي .. تحسه انه جه في منطقه في الفيلم
معرفش يلملم الخيوط و التربيطات الأخرانيه عشان يخلص الفيلم ؛ فعمل نقله للحدث تافهه و غير منطقيه
و سطحيه ميعملهاش مؤلف في اللفه .. و اكتر حاجه استفزتني في المشهد اللي بيعتبر
مغير للأحداث اني عمري مشفت حد قبل كده ابوها يضربها بالألم تتنقل المستشفي و يجلها انهيار عصبي و تفقد النطق
كان موقف اوفر اوي بصراحه ؛ و من الحاجات برضو العجيبه في السيناريو ان عادل امام المفروض
انه راجل مش مثقف و خريج معهد لاسلكي و علي قد حاله علميا و ثقافيا و ادبيا ؛
و في اّخر الفيلم بينجح و يتخرج من جامعه انترناشيونال و امتحاناتهم بالانجليش ؛
شئ من رأي غير منطقي و مستفز في نفس الوقت
***********************************************************
من السلبيات كمان .. الماكياج اللي كان واضح اوي و بالذات علي وش ميرفت امين
و قد ايه كان مبين العجز و التجاعيد اللي في وشها و نفس الموضوع عند بسمه
الماكياج كان موضح العيوب اللي في وشها
*****************************************************
من السلبيات كمان اللي ممكن متلفتش نظر حد بس لفتت نظري اوي .. بيت مرفت امين
المفروض ان ميرفت امين في الفيلم دكتوره علي مستوي راقي من الفكر و الثقافه و بتدرس مادة
حضاره في الجامعه .. و ده يتناقض تماما مع ديكور صالون بيتها اللي كان بيتسم بعدم الذوق و لا التناسق
لا التكويني و لا اللوني .. تحس و انت بتبص ان عينك مش مرتاحه ؛ تحس ان كل قطعه من الديكور منفصله عن اخواتها .. ده غير ان حصل اكتر من مشهد في بيت ميرفت امين و كلهم حصلوا في نفس الصالون
و ده اداني احساس ان الانتاج ملحقش يفرش بقيت الشقه و كانوا عايزين ينجزوا المشاهد بتاعت بيتها كلها في يوم
فراحوا واخدنهم كلهم في نفس الحته بنفس زاوية الكاميرا
**************************************************
من السلبيات .. ان كنت منتظره ان الزعيم هيضحكني اكتر من كده بس للأسف و علي رأي ناس
كانت بتتفرج معايا علي الفيلم قالولي .. احنا ضحكنا في السفاره في العماره اكتر
*********************************************************
********************************************************
من المشاهد اللي عجبتني .. هو مشهد مجلس الشعب و هو من رأي اكتر مشهد ضحكت فيه
علي الرغم من انه يحمل نفس اسلوب يوسف معاطي الساخر من الأوضاع السيئه اللي في البلد
بس مشهد لطيف و في كوميديا لطيفه و غير مصطنعه
*********************************************************
نيجي بقي للايجابيات .. اولا عادل امام مختلف من الناحيه الاباحيه شويه في الفيلم ده
يعني مفيش حاجات خارجه كتير زي عادته ؛ و برضو مختفتش خالص زي ما كانوا الناس بتقول
يعني مثلا كان في حته ملهاش لازمه خالص و هو في قافلة الفيلم لما بيتجوزوا و اللي هيتفرج هيفهم
و برضو لم يخلوا الفيلم من رجلين واحده لا بسه قصير و هو بيعلق عليهم ؛
او واحده حلوه و هو بيبصلها مش عارفه ازاي
بس في المجمل مش زي قبل كده
****************************************************
عجبني اوي .. احمد السعدني .. و ده لأنه من اللي اجتهدوا في الفيلم رغم ان مساحة الدور
مش كبيره اوي ؛ يعني علق معايا اكتر من شريف سلامه ؛ رغم ان شريف سلامه كويس
مش وحش ؛ بس الحقيقه احمد السعدني اجتهد في دوره ؛ بس يا ريت المره الجايه ياخد مساحه
اكبر من كده عشان يسبت نفسه اكتر من كده ؛ و ياريت ميزنقوهوش في نوعية الأدوار دي
زي عادة المخرجين اللي بيحولوا الممثلين لأنماط لحد ما الناس تتخنق
******************************************************
مش هتكلم عن احمد مكي لأني حاسه اني كنت بشوفه في تامر و شوقيه برضو
حلو بس مكرر
****************************************
الأغنيه من رأي هي احلي حاجه في الفيلم ؛ حقيقي عجبتني
لحن و كلمات و حتي الاستعراضات و المجموعات كان شكلها حلو في الكادر
***************************
عجبني كمان اوي الأفيش بتاع الفيلم و عدم انفراد عادل امام و ميرفت امين بالبوستر و انهم ادوا
الشباب فرصه للظهور ؛ علي خلاف ناس تانيه ناقص تطلع البوستر وشها بس من كتر الغرور
اللي عندهم .. و من راي شئ يحسب للزعيم ؛ و طبعا انا مبقصدش البوستر اللي انا حطاه
لأ اللي متعلق علي السينمات
********************************************************
في الاّخر طبعا كل اللي فات ده رأي واللي عنده كلام تاني يقول احنا مبنخافش لا مؤاخذه
هههههههههههههههههه
سلام

10 comments:

مجهول said...

اتفرج عليه الاول بس وبعدين احكم

بس انا شايف ان تيمور وشفيقة احسن منغير ما اشوف مرجان كمان

فيه بذمتك فيلم اسمه مرجان
هههههههههه

محمد عبد الغفار said...

شاهدت الفيلم بالمجان

هو هو عادل امام عامل نيو لوك صحيح بس هو هو كمروج لفكر فاسد داعر وبسفالته وقلة دينه وتبجحه على كل شئ بدايه بالمنطق ونهايه بالدين والمتدينين

هذه المره ذاد فقد تبجح على الله ذاته وليعافينا الله

أميرة البلطجية said...

الفلم ملوش قصة وأي كلام..لكن فيه شوية كوميديا بذات من الولد ابو شعر ده..بتاع ال
g
wal
d
looool
يله..فلم وعدي
بص الصارحة الراجل ده خلاص بقي كفاية كده عليه..يعتزل بقي ويريحنا
شفتي شفيقة وتيمور؟

sara... said...

دا انتى شحورتى الفيلم يا كوكو
عامه انا متفقه معاكى تماما فى الكلام عن السيناريو بتاع الفيلم...والنقلات والشقلبظات الجامده بدون معالجه حلوة
بس بقه ميرفت امين كانت قمورة اوى
انا حبيت احمد مكى اكتر واحد فى الفيلم ..اكتر حد ضحكت معاه...يمكن لانى ما شفتش تامر وشفيقه
والبوستر عجبنى جدا وهو سبب دخولى الفيلم
بس انا استمتعت بالفيلم لانى برده كان بقالى سنتين ولا حاجه ما بروحش سينما


مدونتك جميله جدا يا كوكو اول دخول ليا هنا

Anonymous said...

بصراحة

مهميك على سردك الكويس
اللي لم يخل باحداث الفيلم
وفي نفس الوقت لم يحرقه

بتنجان داه انا مش باحبه لله في لله

ومع ذلك
يمكن اروح اشوف الفيلم
علشان خاطر شوقية

Marwa Friday said...

صباح الفل
ياكوكو
بصي أنا بعتبر عادل امام فنان وله علامات حلوة في السينما المصرية
لكنه مش فوق النقد
وده اللي بيغيظني
الزعيم الزعيم
وخليه يهيص براحته
ربنا يهدي! ا حلو يا كوكو

صاحب البوابــة said...

وصف جميل وتحليل عميق المعنى

وكأننا حضرنا الفيلم تماماً

:)

تحياتي

البنت الشلبية said...

اذيك عاملة ايه

شوفى انا مشوفتش مرجان لكن روحت كركر وعمرو وسلمى والاتنين اسوء من بعض

وكتير من الناس بتقول ان احسن فيلمين دلوقتى هما الشبح احمد عز
والبلياتشو هيثم زكى

ده لانهم فيهم قصة وتتفرجى وانتى حاسة انك بتففرجى على فيلم مش فيديو كليب

الى مش عاجبنى فى السينما اليومين دول انك السبكى داخل بأفلامه الكتيرة فى عقول الناس بالافيهات الى بتضحك عشان يدخلو الفيلم
ولما ندخل الفيلم نلاقى كم كبير من الالفاظ النابية والسفالة فى المشاهد والايحاءات

بصراحة انا قولت مش هروح سينما تانى ابقى اشوفها على الكمبيوتر بقى

سلام

بيتنا القديم said...

كوكو
....
وانا اللي عجبني قوي يا جميل

تعليقك علي الفيلم ونقدك اللذيذ

بس انا ما بحبش عادل امام

الا في فيلم احنا بتوع الاتوبيس

فيما عدا ذلك هو نجم كوميديا جنسية

عبيطة

ويجعلوعامر

koukawy said...

نجهول .. ههههههههه
*************************************
محمد عبد الغفار .. اولا حمدالله ع السلامه
عندك حق
*******************************
بلطجيه ..لسه مشفتوش
********************************
سارا .. اهلا بيكي و يا رب متكونش اخر مره
***********************************
طهقان .. شوف و مش هتخسر
********************************
مروه جمعه .. مفيش حد فوق النقيد لأن مفيش حد كويس في المطلق
**********************************
صاحب البوابه .. طب مش تجيب تمن التذكره بقي
هههههههههههههههه
******************************
البنت الشلبيه .. بس الواحد بيحن احيانا لزيارة السينما
******************************
سمسم .. الصراحه هو ليه افلالم كتير حلوه
بس تلميحاته الجنسيه برضو كتير