Saturday, July 28, 2007

اتقدم .. اتقدم .. و يا كوكو بلاش تتندم

الحلقه اللي فاتت
كوكو الكميل و كوكو ابو الخطوات اتكلموا ؛ و كوكو ابو الخطوات لقا الحل
الحلقه دي
وقف الكميل باصص لكوكو ابو الخطوات بلهفه مسنتي ان يطلع الحل من منقاره المبدع
اللي بينقط سكر .. و ابو الخطوات عمال يروح و يجي في المخبأ يمين و شمال
و بيصوصو برطمه مش مفهومه كده .. و بعدين راح لافف لكوكو الكميل بسرعه و قاله .. بص
يا سيدي انا فكرت و مخمخت و نخورت في نافوخي لأخره لقيت ان الحل الوحيد اللي ممكن نعمله
هو الحل اللي كنت اتفركت عليه زمان في فيلم اجنبي و كان فيه اتنين كوكوهات بيهربوا
من السجن .. بس هما نهايتهم كنت تعيسه و البوليس افشهم يا رب احنا ننجح ..تعالي يا كميل
دور معايا علي اي حاجه نفحت بيها في الأرض .. رد كوكو الكميل .. احنا هنفحت نفق ؟؟
اه انا شوفت الفيلم ده مش اسمه الهروب الكبير ؛ بس الكوكوهات اللي كانوا في الفيلم كانوا عندهم عضلات
احنا معضمين تفتكر هنقدر نحفر نفق كبير كده يطلعنا علي حدود المدينه الخضرا ؟؟
رد ابو الخطوات .. خليك متفائل يا كميل و بص لنص الكوبايه المليان .. بص كوكو الكميل
لكوكو ابو الخطوات و هو بيقولوا كده و استرجع في دماغه صورة ام مكاوك ؛ و صورته و هو في البالطو
الأسود ؛ و افتكر اغنيه كانت بتديله امل و قوه طول عمره كان بيسمعها في فيلم .. الكوكو الأسود..و
و كانت كلمات الأغنيه بتقول
اتقدم اتقدم .. و يا كوكو بلاش تتندم الشمس النور .. ميعطلش كوكو بحور و مدام الدنيا بتدور كوكو مالدنيا يتعلم اتقدم اتعلم استحمل اتبهدل .. يا كوكو
و بدأ كوكو الكيمل يدندن صوصوه كميله بالأغنيه و ابتدا صوت الصوصوه يعلا بالأغنيه
و اتحمس ابو الخطوات و ابتدا هو كمان يصوصو .. و راحوا لافين لبعض و ماسكين في كناحات بعض
و شدوا عليهم بقوه كعلامه انهم اتفقوا .. و بداـ رحلة البحث عن ادوات للحفر في المخبأ الضلمه
اللي مش باين فيه حاجه .. يدوروا يمين و شمال و مفيش فايده .. لغاية ما لقوا كومه كده
عجيبه فيها كراكيب كتير فوق بعض قعدوا ينبشوا فيها و ملقوش غير غطا حله معووج
و مغرفه بنص ايد ؛ الظاهر كانت ست بيت استغنت عنهم و رميتهم في الزباله .. بصوا
لبعض و ماكانش عندوهم حل تاني غير انهم يستعملوهم و خلاص .. اول حاجه عملها ابو الخطوات انه
نبش في فتحه كده و طلع علبه صفيح من الواضح ان فيها اسراره و اوراقه المهمه
اللي بيحتفظ بيها ؛ و راح مدخل منقاره في العلبه و را ح مطلع ورقه ملفوفه كده و راح شايل العلبه
الصفيح تاني .. و بعدين راح فارد الورقه اللي في ايده اللي طلعت خريطه للبلد الصفراويه الأناويه
خريطه كامله للبلد كلها من حدودها مع البلد الحمرا لغاية حدودها مع البلد الخضرا ..و راح
فاردها علي الأرض و بدأ في دراسة المسافات و المواقع عشان يعرف هو المفروض هيحفروا
لحد فين .. و كل ده و كوكو واقف فارس همام شجاع ماسك المغرفه
ام نص ايد في كناحه و علي اهبة الاستعداد لبدء المعركه .. قصدي الحفر .. في اي وقت ؛
المهم بعد تفحص وتمحص قدر ابو الخطوات يحسب التقريب ان المسافه اللي هيحتاجوا يحفروها
هتكون حوالي 50 كيلومتر و بعمق 20 كيلومتر احتياطي لحسن المغرفه و لا غطا الحله يفلت
و يلاقوا نفسهم في بيت رئيس البلد و لا حمام احد ظباط الشرطه الكوكوهيه و لا حاجه ..و لف
ابو الخطوات الخريطه و رجعها مكانها و مسك غطا الحله و مسكوا كناحات بعض و قروا الفتحه
و بدأ الحفر ..و في الخلفيه موسيقي صوصويه للأغنيه الكوكوهيه .. اتقدم اتقدم ويا كوكو بلاش تتندم
****************************************************************
و بعد مرور بتاع 3 او 4 ساعات .. كان المنظر من فوق اكوام من التراب الكتير و حفره في نص المخبأ
غويطااااااااااااااااااااااااااااااااااااااا .. المنظر من تحت .. كوكوهين واحد كان كميل و بقي كوكو المترب
وواحد تاني كان اصلا مترب و ينطبق عليه مثل .. ضربوا الكوكو علي عينه قال خربانه خربانه ..و نسمع
صوت كوكو الكميل و هو مليان تراب بيقول .. ياه ده احنا قربنا نوصل حفرنا كتير .. و يرد عليه
كوكو ابو الخطوات .. يا كوكو متستعجلش احنا لسه في اول 10 كيلو انت بس بيتهيألك .. ايه الاحباط
ده يقول كوكو الكميل في نفسه.. و كمل كوكو حفر والعرق يتساقط من عرفه الصغنن ويبضريب بكناحه المغرفه ف التراب لقي حاجه جامده خبطت في المغرفه رفع كناحه وخبط المغرفه تاني عملت صوت معدني بص كوكو الكيميل لابو الخطوات وقاله ايه ده وشالوا التراب بكناحتهم الكميله لحد مالقو نقوش غريبه علي سطح صندوق خشب بص كوكو لابو الخطوات وقالوا الاتنين في نفس الوقت........الصندوق ده فيه ايييييييييييه؟
كاكان
سؤال الحلقه الصندوق ده فيه ايه؟

8 comments:

heba said...

مفيش أي
clue
يساعدنا يا كوكو علشان نعرف الصندوق ده فيه ايه ؟
بس لازم تكون فيه حاجة تساعدهم
هي ايه والله مش قادرة اخمن

كل مرة اروع من اللي قبلها يا كوكو
رااااااااائع

يعقــــوب .... said...

الاغنية جامدة جدا

كراكيب عادل said...

بقي الحل في النفق

ولا يخطر علي البال

اكيد مومياء مع نقوش غريبة

او كنز قديم

اسكندراني اوي said...

لما نشوف اخرتها ايه
مع الكوكو بتاعك ده
ممكن الصندوق يكون فيه ذخيره من ايام الهكسوس مثلا

Marwa Friday said...

صباح الفل يا كوكو
حلو ..عاجبانس فكرة الكتكوت جدا هههههههه
وعاجبني حبك للسينيما
تحياتي

Unknown said...

كوكو بقي متعب قوي الايام دي . وبقي بيسأل اسئله عايزه تخمين جااامد


ياتري الصندوق كان فيه ايه ؟
تاريخ المدينه مثلا ؟وسبب انها بقت كده ؟

بيتنا القديم said...

مهو مش معقول الصندوق هيكون فيه فيل

مثلاً

ممكن يكون فيه

ممكن يكون فيه

ممكن يكون فيه

هاوووووووووووم

خخخخخخخخخخخخخ

ويجعلوعامر

أميرة البلطجية said...

جثة أم مكاوك!!!