Thursday, July 5, 2007

كوكو ابو الخطوات

الحلقه اللي فاتت
كوكو فجأه الدنيا اسودت في وشه
الحلقه دي
مكان عجيب غريب مريب .. ضلماااااااااااااه و مش كميل خالص
تفوح منه رائحه شنيعه ملهاش وصف .. حشرات من كل الأنواع بتجري
في كل مكان .. شوال مرمي علي جنب .. صوت رجلين بيقرب بيقرب بيقرب .. ظهرت الرجلين
في الشاشه رجلين كوكوهيه و تعرف كده من النظره الأولي .. فضلت الرجلين تقرب
من الشوال براحه براحه لحد ما وصلت .. الله الله دي في كناحات كمان ظهرت مع الرجلين
الكناحات قربت من الشوال .. بتحاول تفتح الشوال .. تفتح الشوال .. تزق الشوال
لتحت .. صوت كحه خارجه من الشوال .. حاجه بتتحرك في الشوال و بتصوصو ..زعيق جامد اوي
خرج من الشوال .. ظهر من الشوال .. كوكو الكمييييييييييييييل.. هيييييه هييههههه .. خرج كوكو و هو متضايق
و بيصوصو و يزعق و في نفس الوقت خايف .. كوكو مش فاكر حاجه خالص غير ان الدنيا اسودت فجأه قدامه
خرج كوكو و عقبال ما عينيه الكميله جمعت ايه اللي بيحصل .. سكت كوكو وهو بيبص لصاحب الرجلين اللي واقف
قدامه باستغراب .. لقي قدامه كائن كوكوهي صحيح بس عجيب من نوعه..و ركز كوكو في شكل
الكوكو صاحب الرجلين لقا شكله عليه اثر السنين رغم انه مش عجوز و لقا عنده عين متغطيه
بقماشه سوده .. و هدومه مقطعه و متوسخه و مش كميله خالص يا حرام .. و ريشه لونه
كأنه متحماش من ايام الحرب الكوكوهيه الأولي .. و حاول كوكو الكميل يعرف من ملامح الكوكو التاني ده
اذا كان كميل و لا مش كميل بس معرفش .. و بدأ كوكو الكلام بعد فترة صمت ..هو انت مين؟؟؟؟
و انا هنا ليه ؟؟؟؟؟ انت خطفتني في الشوال ده صح ؟؟؟؟ ليه انت حرامي و مش كميل .. ابتسم
الكوكو ابو الخطوات ابتسامه مريحه و قال .. ليك حق تفتكر فيا كده ؛ بس انا مش خاطفك
ده انا عايز مصلحتك صدقني ؛ انا كنت كوكو زيك كده حر و منطلق بس منهم لله اللي كانوا السبب؛
اتأثر كوكو الكميل اوي و قاله .. انا اسف سامحني بس اللي انت عملته يخليني افكر فيك مش كميل
بس متزعلش بقي .. و مد كوكو كناحه يسلم علي الكوكو ابو الخطوات و كمل كلامه و قال ..انا اسمي
كوكو الكميل و انا ضيف لمدة ساعات في البلد الغريبه بتاعتكوا دي و حصلي فيها حاجات غريبه
رد الكوكو ابو الخطوات .. ما هو انا عارف اللي حصلك و انا خطفتك كده عسان الحقك من اللي ممكن يحصلك
اكتر و يجرالك زي ما جرالي .. رد كوكو الكميل .. و انت ايه اللي جرالك .. رد ابو الخطوات و هو بيحط كناحه
علي كتف كوكو و بيقوله .. تعالي طب نقعد هنا علي الطوبخ دي و انا هحكيلك .. و قعدوا و بدأ ابو الخطوات في
سرد حدوتة حياته .. انا يا سيدي يا كوكو يا كميل كنت زائر زيك كده جاي المدينه سياحه
اهو اتفسح و اشوف اماكن جديده مشفتهاش قبل كده و الكلام ده من حوالي 10 سنين كده ؛ و اللي حصل
اني حاولت اعمل زي ما انت عملت و حاولت اساعد اللي يحتاج و فضلت مصر علي اللي في دماغي
و كان غصب عني لأن انا ربنا خلقني كده بحب اساعد غيري ؛ لحد ما في يوم نجحت اني اساعد عيله
كامله من الموت ؛و عينه اللي متغطي دي حادثه حصلتلي و انا بحاول افتح باب الشقه اللي كان ماليها الغاز
عشان الحق العيله و انا بزق الباب جامد رجعت علي ضهري عشان اخد دفعه افتح الباب راح مفتوح فجأه
رحت متزحلق و طاير و راشق بعيني في حدديه بتاعت اباجوره كانت علي الطرابيزه في صالة الشقه
و من يومها و انا بهرب مش لاقي وقت اعالجها و خلاص اتعمت مش بقيت اشوف بيها خالص ؛
المهم ان اتقلبت الدنيا و مقعدتش و طلع ضدي احكام كتير بالغرامه و الشنق ؛
و هربت و فضلت اهرب من مكان لمكان كل ما يلاقوني ؛ لحد ما وصلت المكان اللي احنا فيه ده
في البلاعات اللي بيعدموا فيا الخارجين عن القانون القاصي الظالم ده ؛ و طبعا عمرهم ما فكروا
اني هكون مستخبي في مكان الموت نفسه و بقالي هنا كتير مش عارف قد ايه لدرجة ان انا لما بخرج دلوقتي
لو اضطريت محدش بيركز لشكلي اوي لأن بقي شكلي مختلف شويه عن الصور اللي ملزقه في كل
حته بأعلان مكفأه عن اللي يلاقيني ؛ تخيل يا كوكو مش عايزينا نساعد حد بس هما عايزين اللي يساعدهم يلاقوني
تناقض مش كده ؛ المهم يا سيدي انا عرفت مشكلتك و انا خارج في رحلتي السريه الشهريه لأني اجيب اكل
من صفافيح الزباله و انا في صفيحه من الصفافيح سمعت المحكمه اللي كانت معمولالك في الشارع
فأفتكرت نفسي علي طول فقررت اني لازم اساعدك عشلان متتكررش المأساه معاك تاني ؛
بس هي دي الحدوته من طأ طأ لسلاموا عليكوا .. ايه رأيك بقي مش احسن كنت عملت معاك كده و لا كنت سبتك
اتبهدلت بهدلتي ؛ انا مستعد اساعدك يا كوكو ياكميل انك تخرج من هنا .. رد كوكو الكميل بسرعه .. يا
سلام انت بتتكلم بجد انا عايز اطلع علي البلد الخضرا عشان انا عايز اوصل لطانط ام مكاوك اصل الموضوع
..............................................................و كمان الخطاف قالي .............................
و بعد مارحت البلد الحمرا حصل ...............................و بعدها جيت هنا و لازم ارزح البلد الخضرا
عشان هي البلد اللي هتوديني للخطاف يا ريت تساعدني .. سكت الكوكو ابو الخطوات شويه ..
و قام اتمشي حوالين كوكو الكميل و كل شويه يبصله و يقف كأنه هيقول حاجه و بعدين يهز راسه
كأنه بيقول لأ و يكمل مشي تاني .. و بعد فتره علي نفس الحال وقف فجأه و بص لكوكو و قال .. بس
لقيت الفكره الجهنميه بس لازم نبتدي فيها حالا .. اتبسط كوكو اوي و قال .. يا سلام هنعمل ايه ؟؟؟؟؟؟؟؟
كاكان
سؤال الحلقه
يا تري ايه الحل اللي لقاه كوكو ابو الخطوات ؟؟؟؟؟؟؟؟؟؟؟؟؟؟؟
سؤال الحلقه اللي فاتت
للأسف محدش عرف الحل .. معلش حاولوا المره دي
كاكان

11 comments:

el kazzafi said...

مجهود رائع
مدونة جميلة ما شاء الله

هل سمعت باجلوكو وتريد ان تعرف ما هو وان تسجل به؟؟
اليك
مدونتي:
http://aglocohits.blogspot.com/

المدونة بها :


زيادة الريفيرال
وبناء شبكتك
وبناء مدونتك واشهارها
وكيف تجعل موقعك اول نتائج بحث جوجل
وتصفح متخفي وراديو نجوم اف ام
nojoom FM
والان خدمة الرد المباشر على جميع اسئلة اجلوكو في اول غرفة دردشة مختصة باجلوكو

صاحب البوابــة said...

سؤال بسيط

لماذا لا تحاولى أن تكتبي قصص للأطفال وتنشريها

أن اضمن لكِ ان تنفذ سريعاً

قلمك موهوب

فعلاً

تحياتي

كراكيب عادل said...

مش عارف اجاوب الحر مسيح الدماغ

مع ان الحلقة جميلة

عجبتني كلمة الحرب الكوكوهية الاولي

هههههههههههههه

متخلي الاجابات اسهل لظروف الحر

وابقي ارجعي خليها صعبة في بداية الشتا

:)
وخاصة للغلابة الي زيي في الكويت

أميرة البلطجية said...

بعت ايميل اللعبة يا كوكي

يا مراكبي said...

أنا جيت أشوف الإستفتاء

إيه ده .. بتعجزيني يعني؟ وأنا أعرف منين الأفلام دي تبقى إيه؟ أنا أول مرة أسمع أسماء الأفلام دي أصلا .. ولو حصل لي الشرف وشوفتها هيبقى بعد الصيف ما يخلص وتنزل "دي في دي" هنا في الكويت

شوفي لي إستفتاء تاني اقدر عليه يا كوكو

البنت الشلبية said...

كوكاوى ازيك يا فندم

الخطوات على ما اعتقد ان كوكو ابو الخطوات هيحط كوكو الكميل جوا الشوال من تانى وبعد كده يجيب عربية كارو ويسوقها لحد حدود البلد الغريبة دى وبكده يهرب كوكو الكميل ويدخل على مكان تانى اكثر اثارة وتشويق

هههههههههه ايه رأيك فى التمثيلية دى

Blank-Socrate said...

انا حاسس انى مقصر
علشان مش متابع كوكو علشان كدا تلاقى كومنت فى المواضيع التانيه
يا ريت تسامحنى يا كميل

اسكندراني اوي said...

اولا
حيدورو الاول على الفانوس السحري دا لازم عشان تتحل المشكله دي

ثانيا
انتي فكرك انا شفت اي فيلم من اللي انتي قلتي عليهم دول
ولا الهوى
لو سمحتي غيري الاستفتاء ده
ههههههههههههههههه

تحياتي

koukawy said...

اليثي .. مفهمتش الموضوع اوي
***********************************
صاحب البوابه..محاولتش قبل كده ابدا
ميرسي علي المجامله الجميله دي
**********************************
كراكيب عادل .. هو في اسهل من كده ما نتوا بتفقسوني علي طول و تعرفوا الاجابه
***********************************
يا مراكبي .. اه فاتتني دي ؛ استني اللي بعديه بقي بعد الصيف
************************************
الشلبيه .. تمثيليه جامده اوي حقيقي
*********************************
بلانك سقراط .. مسمحاك
********************************
اسكندراني اوي .. عيني هغير الاستفتاء بعد الصيف انشالله

afyaa2 said...

مدونه ..
جيده
ماقدرت افهم القصه
لكن حبيت اعلق وبعدين اقراه مره ثانيه

أميرة البلطجية said...

انا بايني دماغي هنجت عشان بقالي كتير مش باخد جرعة كوكوهيه ومش عارفة افكر كوكو ابو الخطوات بيفكر في ايه
انا بس عندي سؤال
كوكوهاية راحت فييييييييييييييييييييين؟؟؟؟؟