الأزمه الاقتصاديه و العلبه اللي في النمليه
هتسقلوني ايه علاقة الأزمه الاقتصاديه بالعلبه اللي في النمليه؟؟؟؟؟؟؟؟؟
علي طول هرد عليكوا و اقول.... هي نفس العلاقه بالأزمه الاقتصاديه و مرتبي الغلبان الصدمان العدمان
ازاي يا كوكو يا كميل.. يا ريت تفسر اكتر شويه
عيني حاضر افسر و افسر و افسر كمان -
ماهو انا لما اتربط من زمارة رقابتي و يتخنق علي و يضيق الخناق لما افرفر انا و كل زمايلي
في الشغل عشان الشهر اللي فات كان يوم 13 في الشهر و احنا لسه ما قبضناش
و بعديها بكام يوم ينزل قرار متين من رئيس مجلس الاداره و صاحب الشركه ابو كرش كبير يقول
ان الأزمه الاقتصاديه تحتم علينا اننا نستعمل الورق و ش وضهر، و حبر البرنتر منشربوش
و دبابيس الدباسه منبلبعهاش بدل الملبس....... و كلام من ده كتييييييييير
يبقي اكيد هي دي العلاقه الطرديه اللي انا قلت عليها في الأول
****************
يعني انا مال امي انا بالأزمه الاقتصاديه؟؟؟؟؟؟؟؟؟
يعني هما الكام سحتوت.... الحمدلله اللهم لا اعتراض.... اللي انا بقبضهم هما اللي سببوا
الأزمه الاقتصاديه، و للا هما اللي هيحلوا مشكلة الشركه الماديه لو انا ماقبضتش في ميعادي؟؟؟؟؟؟؟
سؤال يطرح نفسه لكل واحد صاحب رأس مال، او شركه ، او رجل اعمال مسؤل يبقض افراد و
...... هذه الأفراد بتربي افواه و ارانب
هل لو سعدتك في نفس الموقف هتبقي مبسوط و رايح الشغل بنفس ؟؟؟؟
و لا هتبقي قرفان و بتحسبن عشان وراك مسؤليات؟؟؟؟؟؟
و لا لما يجي الكهربائي و الزبال و بتاع الغاز تقولهم معلش اصل فيه ازمه اقتصاديه عالميه؟؟؟؟؟؟؟؟؟
و لا لما ابنك يعوز درس و لا كراسه و لا بلوفر في البرد هتقولوا ولعلك فحمتين و بالاش تكتر في الفحم عشان فيه ازمه اقتصاديه؟؟؟؟؟؟؟؟؟؟؟
و الله مش عارفه اقول ايه؟؟؟؟؟؟؟؟؟؟؟
*************************
يا صاحب شركتنا المبجله اتقي ربنا و قبضنا في ميعادنا لو سمحت
يا اما الحاله الماديه هتبقي في النمليه
************************
ادعوكم لقراءة هذا البوست من عند ياسر حسين لأنه جايب سيرة النمليه برضو
سلااااااام
7 comments:
انا بس نفسى اعرف لو رئيس مجلس الاداره قرا البوست بتاعك ده هيعمل فيكى ايه
:)
متهيالى الشحاته على باب السيده زينب هيكون من السيناريوهات المحتمله لمصيرك المحتوم بعد ما يقرا البوست
تحياتى
محمد حمدي..... و لا يهمني الرازق هو الله
و عاي جميع المدونين يلمولي كسوة الشتاء من دلوقتي
انتى لو رحتي لبتاع الفول اللي جارر عربية في الشارع ولقتيه باع لك كيس فول بجنية ميجيش بربع جنية
هيقول لك الازمة الاقتصادية العالمية
ومش بعيد يقول لك بسبب الدولار
اهوه اي كلام يا عبدالسلام
وطظ في المدير بتاعكم ابو كرش كبير
:)))))))))
مع خالص احتراماتي
السلام عليكم ورحمة الله وبركاته
koukawy
مدونتك جميله
بالنسبه للازمه الاقتصاديه احب اطمنك انها مش عندك لوحدك
دي طالتنا كلنا
والمرتب اخده الوبا زي ما اخد هنادي ياماي
احنا حاليا بنشتغل عشان نزكي عن صحتنا متفكريش في اكتر من كده
^_^
ربنا معاكم..وفعلاً العقليات اللي بتدير الشركات في مصر والمستثمرين أغلبهم بيديروها بنظام الإقطاع بتاع زمان اللي هو غصب عنك هتعمل المطلوب ومش مهم هيوصلك حقك إمتي ده إن وصل أصلاً حقك كامل
للأسف إجتماعياً بقي العالم الثالث علي شفا حفرة من إنه يتحول لمجتمع أكلي لحوم بشر...ربنا يستر يا بنتي
ويا رب تقبضي في معادك :)
السلام عليكم
الصراحه دي اول مره ازور فيها
المدونه الجميله دي و ان شاء الله مش
هتكون الاخيره
و كل سنه و انت طيب
تحياتي لك بالمزيد من التفوق و التقدم
طبعا انا ضد حكاية تأخير المرتب والقبض لنص الشهر
لكن فعلا الوضع الاقتصادي جلوقتي بقا يحتم على كل الشركات انها تقلل من التكاليف بتاعتها
الموضوع وصل لدرجة التكيفات والاضاءة واستهلاك الكهرباء
Post a Comment