Friday, April 11, 2008

هتخنق يا مستر/ع

الظاهر يا جماعه ان مديري المبجل هياخد من عشتي رقات و رقات
ليه يا كوكو يا كميل عمل ايه تاني مستر ع ؟؟؟؟؟؟
انا هقولكوا و انتوا قولوا ليه حق و لا لأ اطق اموت من قهر الانسان لأخيه الانسان
*************************
و صلت الشركه من نص ساعه كده في ميعادي معززه مكرمه و علي وشي كل علامات البهجه
و الفرح بشوارع يوم الجمعه و جمالها و هدؤها و فراغها
طلعت سلالم العماره بعد سلاموا عليكوا و عليكوا م السلام للسيكيوريتي
و كانت الصدمه بمجرد ما دخلت برجلي اليمين من عتبة باب الشركه
فجأه جالي حاله من الاختناق من شدة الريحه اللي انا شماها
و بعد شويه ادركت ان البيه صاحب الشركه الله ي.......يكرمه طلب شركة الرش
ايه ؟؟؟؟؟؟؟؟؟؟؟؟؟؟؟؟؟ رش .....ايوه رش يا صحابي الكميلين
و تخيلوا بقي اما كوكو كميل زيي يقعد في وسط الريحه المعفنه دي يجرالوا ايه
انا بقالي دلوقتي في الشغل ساعه الا ربع مثلا جالي اختناق صداع و دوخه
ربنا ما يوريكوا......حاجه مقرفه اوي .....يعني هو مكنش عارف يديي الشركه كلها اجازه لمدة يوم
تكون ريحة الزفت ده راحت شويه......لأ و ليه و هو تفرق معاه ايه ما انشالله نموت و لا نروح في ستين داهيه
نيجي و نشتغل و نقعد في الريحه الزفت دي و نصاب بالتهاب رئوي و لا سل
شئ غريب يا جماعه جدا انا مستفزه اوي من الحركه دي
و لا انتوا ايه رأيكوا؟؟؟؟؟؟؟؟؟؟؟؟؟؟؟؟؟؟؟

7 comments:

فاتيما said...

معاكى الف حق طبعا
بصى لو عندك بخور ولعيه يغطى على الريحة شوية
و احنا فى يوم الجمعة برضو عشان ياخد الشر و يروح
و لا هتقوليلى ممنوع دا كمان زى المناديل ؟

خمسة فضفضة said...

السلام عليكم ورحمة الله وبركاته

ال بعد الشر عنك يا كميله

بس مش يمكن المستر عين ده قاصد كده وتقريبا هوه كان عاوز يرشكوا انتوا مش الحشرات

بس قوليلي الاول شركة ايه دي اللي بتفتح يوم الجمعه
ربنا معاكوا

محمد عبد الغفار said...

هو انتم كان حد غاصبكم

Blank-Socrate said...

كوكو مفيش خوف لان الرش للحشرات
لكن انت كوكو يعنى الخوف من انفلونزا الطيور
:)

أنا حر said...

حاولي تشوفي اي مصدر للهوا لحسن كده هتتخنقوا من المدير الرخم ده قبل الريحة
انا خايف كل الموظفين يقعوا على ضهرهم اخر اليوم
:)
تحياتي

bastokka طهقانة said...

الراجل قال مادام الاكل مسمم و المية منيلة و الخضار مسرطن فحب يخدمكم و يجيب من الاخر و يبيدكم

اكيد الراجل ده من الحزب الوطني

اوروفوار

Christa said...

ما هو إحنا فى زمن كل واحد فيه بيفكر فى نفسه و بس
حتى الناس اللى جوة بيت واحد

ربنا يرحمنا