Sunday, April 6, 2008

قال يا با علمني الهيافه

قال يابا علمني الهيافه......قال تعالي في الهايفه و اتصدر
رئيسي في العمل راجل يجيب شلل رباعي الحقيقه....او متفهموش هو الفراغ هيموته و لا ايه
كل شويه يطلعلنا بقرار جامد من اللي هما بطريقه هوجاء و انفعاليه بحته...و بعد التحريات اللي عملتها عنه
من الزملاء الأفاضل اللي اقدم مني في المكان ، عرفت انه علي الحال ده من زمان
حقيقي يا جماعه بيستفزني ...يعني مثلا اي شركه بتكلف الساعي او الأوفيس بوي بأنه يكون مسؤل
عن فتح الشركه قبل حضور الموظفين....انما الأخ عندنا لأ لازم يكون المفتاح مع حد من الموظفين
و طبعا الأخ الموظف ده لازم يجي بدري شويه او قبل ساعات العمل الرسميه عشان يفتح باب الشركه
اللي حصل بقي ان يوم نزل الأخ صاحب الشركه من شقته...اصل هو ساكن في العماره اللي فيها الشركه
المهم نزل لقا باب الشركه مقفول و ميعرفش ان الناس يا عيني ملطوعه في الشارع من بدري مستنيه
اللي معاه المفتاح....فما كان منه الا انه اصدر قرار بمعاقبتنا...علي قلة ادبنا...و اصدر قرار بأن ساعات العمل تبتدي الساعه 8و نص بدل 9 و ده عشان الموظفين تتربي...طب يعني ما كنت تخصم للي اتأخر اللي معاه المفتاح
لأن مفيش كده في الدنيا طب الواحد ينزل من البيت الساعه كام بقي
المهم خدوا عندكوا من المواقف الجميله دي كتييييييييييييييييير.....بس اخرها بقا و اللي جاب اخري بصراحه
و خلاني اكتب البوستايه دي .....هو ان احنا في امان الله من كام يوم قاعدين في مكاتبنا دخل علينا احد السعاه
و قال....مستر ع ...و ده للستر عليه مش اكتر مزكرتش اسمه...طلع قرار بمنع علب المناديل علي المكاتب
طبعا انا الكلمه خرمت ودني....و بعد شويه استوعبت و فقت ...علي تعليقات خفيه و من تحت لتحت علي القرار
الهام اللي المبجل ابو كرش كبير طلع بيه فجأه....يعني انت هتفرق معاك ايه ان علبة المناديل علي المكتب
و لا في الدرج لا حول و لا قوة الا بالله ....خلاص يعني اصل الشركه مفيهاش غلطه كله ماشي زي الساعه
و جت علي علبة المناديل...طب يا اخي متشوف لمبة الحمام اللي قعدت محروقه اسبوع و متغيرتش
و لا الشطافه بردو اللي بايظه ...و لا و لا و لا....اقول فيك ايه و انت فيك كل العبر....بجد يا جماعه
فكرني بالبلديه اللي بتدهن الرصيف علي عدم نضافته....و شارع جامعة الدول اللي كل اسبوعين
بيغيروا الورد اللي فيه .....زي ما يكون احنا خلاص البلد ميه ميه و مش ناقصها الا التفاهات دي
و طبعا بعد قرار علبة المناديل.....مكانش علي لساني الا اني اقول
قال يا با علمني الهيافه........قال تعالي عند كوكو الكميل في الشركه و اتعلم
سلام م م م م م

6 comments:

محمد عبد الغفار said...

أعملوا اضراب ، وبعد كده هيديكوا نص شهر رشوه عشان تسكتوا

Blank-Socrate said...

انت خسارة فى الراجل دا يا كوكو
انا هافتح شركتى بعد 20 سنه و انت هتكونى مسئوله العلاقات العامه
:)
ايه اخبارك

أُكتب بالرصاص said...

طبب ايه الهدف من هذا القرار؟

يعني الراجل عنده عقدة من فاين
والا انتم بتسخدموا المناديل وترموها على الارض؟
طيب القرار يعتبر ضمني بعدم استخدام المناديل.
طيب واللي مرشح ؟
ينيل الدنيا؟

بأقول لك ايه؟

احسبيها
واعقليها
وتوكلي

ديتها بطحة على دماغه

AHMED SAMIR said...

انا اكتشفت ان الانسان علشان ياخد مدير
يبقى لازم ياخد قبلها كورس في الغلاسة والرخامة والتباتة والا فلااااااا
تحياتي

Desert cat said...

يعنى كدا يا كوكو تظلمى الراجل
هو عنده عقدة من المناديل اصل بيستخدم كم القميص مش تراعو مشاعره برضه

فاتيما said...

كوكو يا كميلة
بصى دى عقد مترسبة من الطفولة ...
طب انتى عارفة كان عندنا مديرة كتبت قرار نمضى عليه كلنا من اكبرنا لاصغرنا ...اننا نتعهد الا نرمى تفل الشاى فى الحوض بتاع الحمامات ....
أل إيه ...التفل بيسد البلاعات ...
شوفتى و النبى ...
و السكريتر يجرى و رانا واحد واحد .. يتحايل علينا عشان نمضى و نلم الدور عشان هوه اللى هيتاذى ...
دى ناس تموت فى التحكمات من غير لازمة
و أصبرى يا كوكو ...
الصبر طيب ...
و ربنا يهد القوى