Saturday, October 20, 2007

التراويح راحت

نزلت اول يوم رمضان بعد المغرب علي طول لأداء صلاة التراويح في مسجد عمرو
و ده لأني بحب المسجد ده ... و كمان جالي اشاعه بتقول ان الشيخ محمد جبريل هيصلي
التراويح هناك و انا بحب صوته و دعائه ..
دخلنا مصلي السيدات .... و بدأت المأساة
كالعاده في مصلي السيدات .... كل واحده جايبه العيال و ناقص تجيب معاهم صندوق اللعب
بتاعهم و العشا و المسجد عباره عن حديقه عامه مليانه عيال و صريخ و صويت
و حاجه عجيبه ... المهم انا قولت اكيد الواحد و هو بيصلي مش هيحس
و ان العيال تسكت طبعا بحلم .. هو في عيال بتسكت برضو
لغاية ما حصل موقف خلاني قولت ان صلاة التراويح في ابيت نعمه و ارحم كتيييييير
و الموقف هو ... واقفين بنصلي و انا ماسكه المصحف في ايدي عشان اتابع
و سامعه من بعيد صوت طفل بيعيط .... يا ماما ماااا ما
و ابتدي الصوت يقرب ... لحد ما فاجأه لقيت الطفل ده قدامي و بأعلي مع عنده من صوت
راح فاتح الجعوره و صارخ ........ يا مااااااااااااااااااااااااااماااااااااااااااااااااااااااااااا انتي فيييييين
لدرجة ان انا اتخضين و المصحف كان هيقع من ايدي و بالتالي صحبتي اللي جنبي كانت هتضحك هي كمان من الخضه
و حاجه استغفر الله العظيم
اللي زاد و غطا ان الركن اللي انا كنت بصلي فيه كان مليان جزم علي شباشب من كل نوع اللي بصباع
و اللي بورده و اللي اسود و اللي احمر .... جوه الجامع علي السجاده الللي الناس بتسجد عليها
طب ليه ما هو الدواليب ماليه المسجد
انما تقول لمين ... هي دي مصلي السيدات للأسف
يخلوا الواحد يدخل المسجد و هو مضطر و يبقي عايز يخرج بسرعه
اميرة البلطجيه علي فكره لقيتها مناقشه الموضوع ده برضو بعنوان ..... صلي في البيت
و يا ريت فعلا ده اكرم ليكي و للناس
سلاااااااااااااااااااام

25 comments:

اسكندراني اوي said...

معلش
بتحصل كتيييير
واحيانا كمان الصوت والغاغه دي بتوصل لحد مصلى الرجال
والله المستعان وربنا يهدي

Anonymous said...

يووووه دي بتحصل كتير
علي قد ما بابقي عايزة اخنق العيال ههههههه
علي قد ما بقول اهو برضه بيتعودوا انهم يروحوا المسجد ومشد يبقي في ذهنهم عشان يطبقوها لما يكبروا

بس لا...ساعات فعلا بيبقي حرام برضه

المرة اللي فاتت كنت باصلي في جامع كبير و لقيت لك بقي الست جايبة لبناتها السندوتشات

والامام في الخطبة قال ان فيه عيال رمت احذية ع المصلين الرجال في الدور اللي تحت

طبعا مهزلة
ههههههه

لذلك انا استقربت مسجد جنب البيت
نسبة الاطفال فيه قليلة

و برضه الصلاة في البيت ارحم

ربنا يتقبل منا و منكم ان شاء الله

أميرة البلطجية said...

وبعدين يا كوكي؟
الجماعة االمهات دول حيقعدونا في البيوت وله ايييييييييييه؟؟

Eric Matt said...


ربنا يعين الجميع يا رب وفعلا الموضوع ده مهم جدا للحفاظ على الخشوع في الصلاة

تقبل الله منا ومنكم

تحياتي لك من ماناساس البلد

غمض عينيك said...

يا ساترررررررررررررررررررررر

دا مصلى السيدات ده بيبقى فظيييييععع

ببقى عايز اطلع من الصلاة اللي انا مش قادر اركز فيها اساسا واجيب رشاش واروح افرغة هناك عند السيدات

الله لما هي مشغولة اوي كده بحواديت بنت اختها اللي لتجوزت وشوار خالتها وخناق سلفتها وعشا عيلها جايه تصلي وتقرفنا ليه

لا وكمان بيجوا يدوروا على عرايس لولادهم

دي بتبقى حاجة صعبه اوي

ربنا يعينك ويعينا

كل سنة وانتي طيبه يا كوكو

Unknown said...

ده العادي هنا(:

كل سنة وانت طيبه
ورمضان كريم

david santos said...

Very good posting, thank you


جمال عبد الناصر,

15/1/1918/ - 28/9/1970

The Great, Gamal Abdel Nasser

صاحب البوابــة said...

فعلاً

أحياناً كثيرة اسمع من فتيات كثيرات نفس الشكوى

تحياتي أختي وكل عام وانت بألف خير

محمد عبد الغفار said...

وقرن فى بيوتكن

shabfa2re said...

ان شاء الله سلوكنا هيتغير وهنكون احسن

البنت الشلبية said...

انا واحدة من الناس بصلى فى البيت بصراحة وده عشان مبلاقيش حد يشجعنى لان صحابى مش ساكنين جنبى
كمان بصراحة كده مبخدش راحتى فى الصلاة اكتر مع ان صلاة الجماعة اكيد افيد واحسن
المهم ربنا يتقبل منا جميعا
وخلاص فاتو اول عشرة ايام فى رمضان ربنا يبلغنا باقى الايام على خير

Blank-Socrate said...

اكيد دا شىء صعب
ان الناس تفكر فى الاخرين و ياخد قرار انه مينزلش الجامع علشان الباقيين
لكن على الاقل
انت عندك هدف و اللحظات الجميله اللى هتقضيها مع ربنا مفيش حاجه تقدر تضيعها منك

أنا حر said...

كويس انك قررتي انك تصلي في البيت في بنات اعرفهم قرروا انهم ما يصلوش اصلا بسبب الموضوع ده
المفروض الناس تعرف ان ده مكان عبادة مش رحلة لدريم بارك
امتى بقى يارب هيتغير سلوكنا للاحسن؟؟
تحياتي

§a§a said...

عندك حق والله فعلا

على فكرة مرة من المرات اللى كنت باخد فيها دورة الارشاد السياحى ف المتحف المصرى بعد التخرج

كان معايا فى الارشاد يعنى طالع بمجموعه من العرب

وكانو من الاكراد فى العراق يعنى من الاخر شيعه

فطبعا الشيعه كان كل همهم انهم يروحو الحسين ومسجد الحسين

فبعد ما خلصت ارشاد اعدت معاهم فى حديقه المتحف المصرى واعدنا نتحدث قليلا فقالى ان مصر دى جميله جدا وفعلا هى ام الدنيا

وكانو معجبين جدا بالحضارة المصريه

المهم بقى

واحد منهم قالى ان انتو عندكم مساجد جميله ومهم الحسين طبعا

فبقوله ايوة

قالى بس انا لاحظت حاجه غربيه جدا فى مصر وللاسف وحشه جدا ومش موجودة عندنا فى العراق هى

هى ايه يا فندم

رد عليا قالى

انكم مش مهتمين بنظافه المساجد

شايف الشعب المصرى داخل مسجد الحسين كل واحد ماسك الشبشب والجذمه بتاعته

وحاططها على السجاد وجنب سجودة

ودا طبعا
بيخلى الروائح الكريهه والتراب وغيرها من الدخول الى المسجد اللى هو المفرضو يكون اطهر مكان

احنا عندنا فى العراق لا يمكن حد يدخل بالشبشب ولا بالحذاء داخل المسجد ابدا

فرديت عليه فى عقلى بقى

قولتله اصل الشباشب عندنا بتتسرق وشعبنا مشاء الله مش مخلى ولا شباشب ولا شربات

يا مراكبي said...

دي شكوى عامة على فكرة

خدي عندك دي كمان

أنا أفتكر قبل ما نروح الحج طلبوا زوجتي لحضور إجتماع للسيدات اللي مسافرين في الفوج بتاعنا .. وقامت المشرفة ونبهتهم على إن معظم الوش والقلق والتأخير والعطله والدوشة بييجي بسبب الستات وقعدت تحكيلهم على كل الأمثلة اللي بتحصل علشان يتجنبوها

رحنا هناك وولا كأن حد قال حاجة .. وكل اللي المشرفة حذرت منه حصل وكأني شفت الفيلم كلة قبل كده

Eric Matt said...


كوكو الكميل

جيت بس أسلم وأقولك كل عام وانت بخير وعيدكم مبارك ان شاء الله :)

تحياتي من ماناساس البلد

Ahmed Al-Sabbagh said...

هههههههههههه
معلش
بس احنا عندنا فى مصلى الرجالة مفيش كدة خالص

بس اظن فى جوامع تانية ممكن تبقى أهدى
ده انتى كمان ما شوفتيش جامع عمرو فى اخر تلات ايام
هههههه

تحياتى

FATMA said...

انا كمان صليت تقريبا اسبوع في الجامع و بعدين حسيت ان الناس مش فاهمة الفرق بينه و بين دريم بارك تقريبا

رفقة عمر said...

كل سنه وانت طيبه
عيد سعيد عليكم وعلى الاسرة
ورزقكم الله القبول اللهم امين

أميرة البلطجية said...

kol sana wenti tayba ya koki
may allah accept yr edbada in ramadan
prayed for u sweetie :)

Unknown said...

كل سنه وانت طيبه .. يا ريت الكحك ماياخدوكيش مننا اكتر من كده

انا مستني العيديه

بيتنا القديم said...

العيد فرحة
يا سلام
واجمل فرحة
يا سلام
تجمع شمل بعيد وقريب
سعدنا بيها
سعدنا بيها
بيخليها
بيخليها
ذكري جميلة لبعد العيد
غنو معايا غنو
غنو
وقولوا ورايا قولوا
قولوا
كتر يا رب في اعيادنا
واطرح فيها البركة وزيد
جانا العيد اهو جانا العيد
جانا العيد اهو جانا العيد
.........................
من مأثورات صفاء ابو السعود
قبل الزواج من الشيخ صالح كامل
اللي خلي كل ايامها عييييييييييد
وعجبي
ـــــــــــــــــــــــــــــــــ
كل عام وانتم بخير

Diyaa' said...

وقرن في بيوتكن ..عايز اعمل ابتسامة من اللئيمة دي
المهم ازيك ؟ يا رب يكون رمضان كان كله بركة بالنسبة لك رغم كل المعوقات
ويا رب تكوني اتبسطتي في العيد واسف للتأخير بس معلش بقي مكانش شهر طبيعي وكنت مخوخ أوي فه ويا ريتني حتي صليت الراويح بيتوتي
المهم موضوع البوست مش غريب لأن في بعض الجوامع الهادية كنا بنسمع الصوت من غير منحتاج نطلع فوق والدور والباقي علي الراجل اللي مراته بتدبسله العيلين وهو نازل يصلي عشن ترتاح في الفرجة علي المسلسل وبتبقي قلبة دماغ والحمد لله معندناش حد بيضحك زي صاحبتك :)) وهي دي مصر فمش تندهشي وحاولي تكلمي واحدة من ذوات العيال تقنعيها بلا جدوي اصطحابهم وضرورة وجود حل
المهم تقبل الله منا ومنك
وربنا يهدي الجميع
سلام

Unknown said...

كل سنة وانت طيبه

ويارب يكون عيد سعيد عليكي

Blank-Socrate said...

ايه كميل
مفيش تحيه العيد
لا كدا العشه الكميله و كتاكتها عاوزين اهتمام