اهو نوايا .... تسند الزير

اهو نوايا .... تسند الزير

من كام شهر كده اسعدني حظي ووقفني ربنا بالحصول علي الوظيفه الحكوميه

الحمدلله ، اللهم لا اعتراض، و بقيت اقبض الشهر و اشكر ربنا و ابوس

ايديا وش و ضهر، لغاية ما جيت اقبض اّخر شهر و بالصدفه كنت بقبض انا

وواحد زميلي و كشف الرواتب قدامي فلفت نظري ان مرتبي ازيد من مرتب

زميلي باتنين جنيه بحالهم بس قلت عادي بتحصل

و فوجئت بالصراف بيقلي ... اكيد حضرتك متجوزه مش كده؟؟؟؟

قلتله ... اه سلامة الشوف بس ليه يعني؟؟؟؟؟

فرد علي.... ما هو اصل مرتب حضرتك ازيد اتنين جنيه من مرتب الأستاذ- و شاور علي زميلي

فاترسمت علي وشي ابتسامة بله من اللي هو منغولي ده و قلتله... لا والله

و رحت لفّه ناحية زيميلي و قلتله .... ياللا يا سيدي شد حيلك و اتجوز عشان تزيد اتنين جنيه بحالهم

******************************

ههههههههههه........ هههههههههههههههه

يا بختوا المتجوز... هيغير ستاير البيت ، و يشتري بدل كيلو لحمه يشتري اتنين او تلاته

و اهو برضه ممكن يدخل قتاة الأوربيت برضو ما يضرش، ده مرتبه زياده اتنيييييييييييييييين

جنيه يا اخوانا ...... لوي لوي للوي لوي

و اهو علي رأي المثل

اهو اتنين جنيه .... يسندوا المتجوز

سلاااااااااااااااااااااااااااااااااااااااام

خدوا الحكمه من افاواه............ الجعانين

و انا راكبه احد المواصلات العامه شغلت جهاز الردار كالعاده لالتقاط

اللي يعجبني من شخصيات محيطه بيا او حورات مسليه او مواضيع مسمعتش عنها قبل كده

و المره دي الموضوع اللي لقطه الرادار كان علي مزاجي جدا لأن انا ابديت رأي فيه قبل كده

في العديد من المحافل و المواقف

******************************************

راجل عجوز غلبان و باين علي وشه المعاناه و الارهاق و السن و ابتسامه خفيفه

تحس انه مصبر بيها نفسه، و قاعد جنبه راجل تاني و يدور بينهم الحوار التالي

الراجل العجوز: ما هو لو كل واحد فكر في غيره مش هيبقي ده الحال

الراجل التاني: مظبوط (و الكلمه دي اللي فضل متمسك بيها طول الحوار) اه مظبوط

الراجل العجوز: يعني انت راجل مقتدر كل سنه بتعمل عمره و حجيت بدل المره تلاته

و ربنا يزيدك موسعها عليك -ماشالله- طب يعني لو تفكر في غيرك

و تزكي من اللي اعطهولك ربنا و بدل ما تعمل عمره كل سنه اعملها سنه و السنه

اللي بعديها طلع حد يعمل عمره او شارك في جواز شاب او شابه او ساعد حد نفسه يحج

ما هو لو كل واحد طلع من اللي مكنزه محدش هيبقي فقير و ده كلام ربنا سبحانه و تعالي

************************

طبعا ده اختصار الحوار اللي كان حاصل .... بس علي طول افتكرت حماتي لما بتقول

لو كل واحد دفع زكاته عمر ما هيبقي فيه مسلم فقير- و ده استنادا للقصه الشهيره بتاعة -

عمرو ابن الخطاب و بيت المال

حقيقي يا جماعه الموضوع مهم اوي و في النهايه محدش بيخادهم معاه

و اهو راجل في الأوتوبيس بسيط حاسس بالمعاناه

و حاسس ان الناس بتفكر في نفسها و بس و اللي معاه مبقاش يدّي

اللي ممعاهوش، و لا المليان بقي يكب علي الفاضي و لا حاجه من الكلام الجميل ده

طب ليه ؟؟؟؟؟؟؟؟؟؟؟؟

و علي رأي المثل

خدوا الحكمه من افواه......... الجعانين

قال يا با علمني الهيافه

قال يابا علمني الهيافه......قال تعالي في الهايفه و اتصدر

رئيسي في العمل راجل يجيب شلل رباعي الحقيقه....او متفهموش هو الفراغ هيموته و لا ايه

كل شويه يطلعلنا بقرار جامد من اللي هما بطريقه هوجاء و انفعاليه بحته...و بعد التحريات اللي عملتها عنه

من الزملاء الأفاضل اللي اقدم مني في المكان ، عرفت انه علي الحال ده من زمان

حقيقي يا جماعه بيستفزني ...يعني مثلا اي شركه بتكلف الساعي او الأوفيس بوي بأنه يكون مسؤل

عن فتح الشركه قبل حضور الموظفين....انما الأخ عندنا لأ لازم يكون المفتاح مع حد من الموظفين

و طبعا الأخ الموظف ده لازم يجي بدري شويه او قبل ساعات العمل الرسميه عشان يفتح باب الشركه

اللي حصل بقي ان يوم نزل الأخ صاحب الشركه من شقته...اصل هو ساكن في العماره اللي فيها الشركه

المهم نزل لقا باب الشركه مقفول و ميعرفش ان الناس يا عيني ملطوعه في الشارع من بدري مستنيه

اللي معاه المفتاح....فما كان منه الا انه اصدر قرار بمعاقبتنا...علي قلة ادبنا...و اصدر قرار بأن ساعات العمل تبتدي الساعه 8و نص بدل 9 و ده عشان الموظفين تتربي...طب يعني ما كنت تخصم للي اتأخر اللي معاه المفتاح

لأن مفيش كده في الدنيا طب الواحد ينزل من البيت الساعه كام بقي

المهم خدوا عندكوا من المواقف الجميله دي كتييييييييييييييييير.....بس اخرها بقا و اللي جاب اخري بصراحه

و خلاني اكتب البوستايه دي .....هو ان احنا في امان الله من كام يوم قاعدين في مكاتبنا دخل علينا احد السعاه

و قال....مستر ع ...و ده للستر عليه مش اكتر مزكرتش اسمه...طلع قرار بمنع علب المناديل علي المكاتب

طبعا انا الكلمه خرمت ودني....و بعد شويه استوعبت و فقت ...علي تعليقات خفيه و من تحت لتحت علي القرار

الهام اللي المبجل ابو كرش كبير طلع بيه فجأه....يعني انت هتفرق معاك ايه ان علبة المناديل علي المكتب

و لا في الدرج لا حول و لا قوة الا بالله ....خلاص يعني اصل الشركه مفيهاش غلطه كله ماشي زي الساعه

و جت علي علبة المناديل...طب يا اخي متشوف لمبة الحمام اللي قعدت محروقه اسبوع و متغيرتش

و لا الشطافه بردو اللي بايظه ...و لا و لا و لا....اقول فيك ايه و انت فيك كل العبر....بجد يا جماعه

فكرني بالبلديه اللي بتدهن الرصيف علي عدم نضافته....و شارع جامعة الدول اللي كل اسبوعين

بيغيروا الورد اللي فيه .....زي ما يكون احنا خلاص البلد ميه ميه و مش ناقصها الا التفاهات دي

و طبعا بعد قرار علبة المناديل.....مكانش علي لساني الا اني اقول

قال يا با علمني الهيافه........قال تعالي عند كوكو الكميل في الشركه و اتعلم

سلام م م م م م

من شبّ علي شئ.......شاب عليه

من شبّ علي شئ .......شاب عليه

هو ده اللي طول عمرنا بنسمعه بس انا رأي غير كده

معلش سيبوني افلسف شويه من نفسي....دلوقتي من المفترض ان كل شئ الواحد

شب عليه هو نتاج لتربيه الأهل .....بس هل يا تري كل ما ربانا عليه الأهل صح؟؟؟؟

من رأي انه لأ.....حاجات كتيييييير في تربية الأهل مش بتكون مظبوطه

لكن بيربونا عليها عشان هما اتربوا عليها.......وشابوا عليها زي ما المثل بيقول

لكن لو كانوا ما شابوش علي اللي اتربوا عليه و تمردوا اكيد ما كناش احنا هنكبر

علي الغلط اللي هما ربونا عليه...طبعا انا مش بعمم....بس نفسي الواحد يكتشف

بدري بدري ان فيه حاجات غلط اتربي عليها و اتعود و عاش و لو ساب نفسه هيشيب

و لو لحقها بدري بدري هيقدر يغيرقبل ما يدرك متأخر و يتصدم اكبر صدمه في حياته

انا مش عارفه حد فاهم انا كاتبه ايه ولّا لأ بس....انا فاهمه و علي العموم

من شبّ علي شئ.......يقدر يلحق نفسه و يغيره قبل ما يشبّ عليه

سلام

رضينا بالهم ....و الهم مش راضي بينا

رضينا بالهم ........... و الهم مش راضي بينا

حد فيكوا جرب يتعامل مع اكذوبة ...... تاكسي العاصمه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
علي العموم للي ما تعاملش قبل كده هحكي اللي حصل معايا في المرات اللي عصرت علي نفسي
كيلو لامون و اتصلت بيهم ....و شوفوا بقي انا ليا حق اطق و لا لأ؟؟؟؟
**************************************
اول مره ... جه متأخر عن معاده حوالي نص ساعه و كنت طلباه لنفسي
تاني مره .... كنت طلباه لناس صحابي اجانب و عايزين يروحوا بليل
و اتأخر بتاع ساعه ساعه و ربع ؛ و طبعا كان شكلي وحش قدام بتوع بلاد بره
تالت مره ... كنت عند اصحاب و طلبته يجي ياخدني اتصل بيا بمعدل 5 مرات مثلا
عشان يعرف العنوان فين ؛ و طبعا كالعاده اتأخر
رابع مره ... اتصلت عشان عايزه تاكسي قالي الموظف اللي رد ... لأ حضرتك لازم تحجزي قبلها لأنه
مفيش تاكسيات فاضيه و كلهم مشغولين
خامس مره .. قلت في عقل بالي .. يا بت احجزي من قبلها و يا مصبر الوحش ع الجحش
و اتصلت بليل و قلت للموظف .. لو سمحت انا عايزه تاكسي بكره يكون عندي 12 ظهرا
و لو سمحت ما يتأخرش ؛ رد الموظف .. عينيا يا فندم بس حضرتك اتصلي الساعه 11
عشان تتابعي هو وصل فين .. و اتصلت تاني يوم الساعه 11 في الميعاد المحدد
رد علي الموظف .. انا اسف يا فندم اصل هو السواق مش هيقدر يكون عند حضرتك
قبل 12 و نص .. طبعا مسكتش و رحت مدياله اللي فيه القسمه و قلتله متبعاتوش طبعا
سادس مره .. و اعتقد انها هتكون الأخيره ؛ كانت اول امبارح .. اتصلت بليل
عشان احجز تاكسي لتاني يوم الساعه خامسه بعد العصر ؛ و رد عي الموظف و اخد كل البيانات و اكد علي
اني مش محتاجه اتصل أأكد بكره و انه 5 بالثانيه هيكون تحت العماره ؛ جه تاني يوم الساعه اربعه
قلت برضو في عقل بالي يا بت قومي اتكلمي برضو و اعملي اللي عليكي ؛ و قمت
و انا فرحانه بروحي اتصل بالخط الساخن بتاعهم من الساعه 4 للساعه 5 الاربع
التليفون يرن و حد يرفع السماعه و يحطها ؛ لحد ماتخنقت .. و بعد شويه الساعه 5 رن الموبايل
و لقيت الموظف المسؤل عن الحجز بيتصل بيا و بيقولي .. انا اسف حضرتك اصل السواق حصله ظروف و مش هيقدر يجي في الميعاد .. محستش بنفسي الا و انا بقوله يا بني ادم اللي بيعتذر ده يعتذر ساعة الميعاد
و لا قبله ؛ اديني نمره للشكاوي .... و فعلا اخدت قرار في نفسي اني مش ههدي و لا هيرتاحلي بال
الا لما اتصل اشتكي .... و لما اتصل اشتكي هقترح عليهم اقتراح و هو تغيير اسم المشروع
من تاكسي العاصمه ... الي ... طابونة العاصمه
و قال علي رأي المثل
رضينا بالأجره .. و التاكسي مش راضي بينا

سلااااام


طلب خاص .. اللي فيكوا ليه نوادر شبه دي مع تاكسي الغرام يكتبهالي في الكومنت و انا هزودها علي البوست
****************************************************

و ادي خبرة الاّخرين و مواقفهم اللي كتبوهالي في الكومنتات
.... خدوا عندوكوا

سفاح كرموز

كنت رايح فرح مع والدتى واخواتى البنات ...ومش معانا عربية ...والفندق من ضمن فنادق المطار...فلو تاكسشى عادة ...هيلهفله مش ااقل من 60 جند اصلا ..

بس ماما كلمته ...والراجل اللى فى الشركة كلمنى وقالى ده تحت البيت وفى الميعاد 7.30 بالليل...قلت اشطز يابو السفافيح دول عالم مزبوطة...المهم ابص من جميع الشبابيك مش الاقيه ..

فين وفين على ما اقنعت الراجل بتاع الشركة انه مش تحت العمارة واخدت منه رقم موبايل السواق بالعافية ...لاكتشف ان الراجل ادوله عنوان غلط...وهوا واقف مستنى عنده...فقولتله العنوان صح وجالى

بالليل واحنا مروحين كلمته عالساعه 12 قلتلهم عايز عربية تكون عندى 1.30 بالكتير اوى ...الموظف قالى حاضر واى تغييير هنكلمك قبلها بنص ساعه ...جت الساعه 1.30 لقيت الموظف بيدينى نمرة السواق بيقولى كلمه وشوفه فين ...انا مسكت نفسى عشان كنت فى فندق محترم وكنت هشتم اهله اصلا ..

كلمت السواق لقيته وبقوله فندق كذا عند المطار...يقولى مطار القاهرة ولا مطار امبابة !!!!!!!!!!!!!!!!!!!

قولتله لاء القاهرةة...قالى اسم الفندق ايه ...طب هلاقيه كويس...طب هدفع فلوس ...حوارات عبيطة وحسيت انى هلاقى عربية كارو هتجيلى...قالى ربع ساعة بالظبط واكون عندك...

وصلنا للساعه 2 قلت يلعن ابوهم مش راكب ...ورحت لبتاع الامن فى الفندق وخليته يجبلى تاكسى تبع الفندق ...اهو اسمه معروف والورق بتاعهم عند الفندق والامن ...وسألته عن الاجرة قالى اديهله 50 جنيه ...ووصلنا البيت

بس ولا اتصلت الغى ميعاد ولا يحزنون...اللى ما يحترمش ميعاده خصوصالو شركة يبقى ملعون نفسه بقى يتحمل

العملية مخلصتش لحد كده ...تانى يوم بالليل السواق بيكلمنى وبيستظرف وبيقل ادبه عشان لطعته فى الشارع ...انا خليته يحب يتلطع فى الشارع بعد ما كلمنى ...او بالاصح بعد ما قفلت معاه بعدها بربع ساعه اتعلم انه لما ييجى فى ميعاده احسن بكتيييييييييييييير من لما يتأخر...ولا شكوى ولا بتنجان

ههههههههههههههههههههه
*********************************************
شيماء

دانا حصلت معايا مرتين وحرمت والمره التانيه كانت فرح فى اقاصى الارض
وكلمتهم على اساس ان التاكسى يجى الساعه 8 عشان ده فرح ومواعيد بقى وكده
رد عليا بمنتهى الزوق والادب وقالى طبعا يا فندم الساعه 8 بالظبط هيكون عندك ولو حصل اى تغيير هنكلم حضرتك قبلها بنص ساعه
على اساس ان التغيير عادى فى الحالات دى ..محنا تحت رحمه حضراتكم امال شركه ايه وتاكسى عاصمه ايه
المهم البارد اتكلم الساعه 8 وقالى برضه بمنتهى الزوق والادب التاكسى هيجى الساعه 9ونص يا فندم .. نعم ليه ..اصل مفيش تاكسى فاضى دلوقت .."يا سلام امال انا مكلماك من بدرى وعامله حجز ليه؟؟؟؟؟"...المهم قلتله مينفعش احنا متاخرين ومرتبطين بمعاد" وبعدين انا عايزة الحق الزفه"..يهديك يرضيك يقوم البارد يرد يقوللى مفيش حل غير كده
اه ه ه ه ه ه ه البارد
ومن ساعتها وانا دمى محروق
:))))بس برضه لحقت الزفه
*************************************************************
مشمش

انا لسه من تلات ايام كنت بتعرف لاول مره علي تاكسي العاصمه

كنت هناك بوصل واحد صاحبي اجنبي للمطار .. جيت من الاسكندريه علي التحرير .. وكان فاضل حوالي 3 ساعات علي معاد الطياره , فقولت اتصل بالتاكسي ويجي , اهو الواد يركب حاجه محترمه بدل بهدله التكاسي بتاعه مصر

المهم
ضربت الرقم , و فضلت مستني حوالي خمس دقايق لحد ما حد عبرني ورد عليا .. عطيتهم العنوان وقلتلهم عايز التاكسي دلوقتي .. راحت الموظفه المختصه راكناني كمان خمس دقايق عشان في الاخر تقولي .. معلش بس معندناش سيارات متاحه في الوقت الحالي , المفروض ان التاكس مشروع استثماري , يعني المفروض برضه يكون متوفر في اغلب الاحيان في معظم المناطق الحيويه

************************************************************* ,

The Incredibles

فيلم ينطبق عليه المثل المعروف .. يموت الزمار و صوابعه بتلعب
و في نفس الوقت المثل التاني اللي بيقول .. مين فات قديمه تاه
و هي دي الفكره اللي بتدور حوالها الفيلم .. و هو بعد هجوم شديد من الناس
و حقد علي الخارقين رغم انهم كانوا بيقدمولهم مساعدات كبيره و بيقوموا بعمليات انقاذ
كتير ؛ و لكن هما كده البني ادمين لما يشوفوا حد ناجح يفضلوا وراه لحد مايدمروه
خلف و طلع نسله في نفس الصفات الخارقه بس كانوا بيحاولوا يداروا عشان المشاكل mr .incredible
و بعد تقاعده من شغلته كخارق اشتغل شغلانه مش حاببها بس فضل علي طول
يحن لشغلته الخارقه اللي هو اصلا اتولد عرفها لأنه لما فات قديمه تاه و فضلت صوابعه تلعب
******************************************
شخصيات الفيلم الأساسيه هي
اللي بيمتاز بقوه خارقه و جسم قوي و متين و رشيق mr .incredible
مراته و اللي عندها قوه خارقه من نوع تاني و هي المطاطيه جسمها بيمط في كل الاتجاهات elastigirl
بنته الكبيره اللي ليها قوه في الاختفاء و بتقدر تعمل حواليها حقل من الطاقه يحميها من اي هجوم violet
و عنده سرعه خارقه يسبق الصاروخ dash
ابنه البيبي لسه مش معروفله ايه هي قوته الخارقه انما اللي بان عليه انه بيولع نار jack jack
و هو صديق للبطل و عنده القدره علي تجميد اي حاجه قدامه frozone
في شخصيات تانيه برضو في الفيلم لطيفه جدا زي
و هي مصممة ازياء الخارقين و شخصيه تنكه اوي و تعتبر محرك للأحداث eda moda
و اّخر شخصيه هي شخصية الشرير و هو الضد للبطل اللي حدوته في الفيلم لطيفه جدا و غير متوقعه
و هو صاحب قوي خارقه متعدده sydrome
في شئ لطيف استهواني جدا و انا بدور علي صور للفيلم عشان البوستايه و هو الممثل اللي عامل شخصية مدير البطل في الشغل ؛ و جبتلكوا الصوره اهو صورة الممثل فيها شبه كبير من صورة الشخصيه
في الاّخر احب اقول ان الفيلم من انتاج 2004 و هو قصة و اخراج المخرج
اللي برضو من باكورة اعماله brad bird
ratatouille 2007فيلم جرافيكس انتاج ديزني هكتبلوكوا عنه قريب انشالله
jack jack attack 2005
عباره عن فيلم قصير تصور
لمكالة تليفون حصلت في الفيلم الأصلي بين الأم الخارقه و المربيه اللي كانت قاعده مع الولد الصغير
فكره عجبتني اوي ؛ انا كنت شفت الفيلم القصير قبل الأصلي و مفهمتش اوي و بعد ما شفت الأصلي
فهمت و لقيتها فكره لطيفه جدا
اخيرا حصل الفيلم علي جايزتين اوسكار في سنة 2005
جايزه احسن مؤثرات صوتيه للأفلام الجرافيكس
و جايزه احسن مخرج للأفلام الجرافيكس
و طبعا حصل علي جوايز في مهرجانات كتير و اترشح لجوايز اكتر
بس مش قادره احكي اكتر من كده باي باي بقي
سلام

الهلاهيل كسيانا

الهلاهيل كسيانا .. و العنطزه مليانا

مشهد بيلفت نظري كتير جدا و يجبرني غصب عن منخيري
اني اتأمله ؛ المشهد هو راجل يوقف الميكروباص او الأوتوبيس
او اي مواصله عشان يركب في ايده سيجاره ماسكها زي متكون هتهرب منه
و قبل ما يحط رجله علي سلمة الميكروباص عشان يركب
يسحب قد 30 نفس دفعه وحده قبل ما يرميها و لا لما يكون الحبيب
مسافر بلد عربي و بيودع حبيبته بشوق حار ؛ منظر الحقيقه
لازم يستوقفني و يخليني افكر هل فعلا السيجاره عند ناس هي الحياه؟؟؟
و ايه اللي هيحصل انه يرمي السيجاره ببساطه ؟؟
يعني مره حصل معايا موقف عصبني جدا ؛ ركبت الميكروباص و اول كرسيين اللي بره كان فاضي و علي جوه
قاعد واحد ماسك سيجاره و هاتك يا دخان معبأ الدنيا ؛ و لما قلتله من فضلك ممنوع التدخين في المواصلات
رد عليا بأسلوب حقير و زعق فيا و لا لما يكون هو اللي علي حق و قالي ببجاحه
ما انتي اللي جيتي قعدتي جنبي .. طبعا انا اكيد مسكتش و فهمته انه انا من حقي اقعد في اي حته
ده ملك عام انما انت مش من حقك تدخن لأن انا لو وقفت بيك عند اول ظابط هتدفع غرامه
و هتاخد اللي فيه القسمه .. بس طبعا كنت بنفخ في قربه مهربده مش مقطعه
و متقفلش الموضوع الا بتدخل السواق لفك الاشتباك
و انه قومه من جنبي خالص الحمدلله .. يا تري ليه السيجاره مهمه اوي عند اللي بيشربها؟؟
لدرجه ان ساعات ستات تحس ان السيجاره درتها .. شئ يضايق و محتاج مراجعة تفكير من اللي بيشربها
ده غير بقي انك تلاقي واحد هدومه مقطعه و شكله باين عليه الغلب و الفقر ماصص دمه
و ماسك في ايده سيجاره !!!!!! شئ عجيب جدا يا سيدي انت فيك صحه ده انت شكلك
اخف مرض عندك سوء التغذيه و كمان بتشرب سجاير !!!!!!!!!اكيد ده مش عقل
و النوعيه دي بتخليني علي طول افتكر المثل اللي بيقول
الهلاهيل كسيانا .. و السجاير خنقانا و قرفانا

سلااااااااااااااام

فاقد الشئ

بتمشي كعادتي لتفقد عشش الزملاء الأفاضل ؛ عجبني اوي بوست كاتبه
الزميل هيثم ابو عقرب بعنوان فوائد ان تتزوج مدخنه ؛
فأنا من وحي البوست ده و من وحي بوست قديم ليا بعنوان اذا كان رب البيت
هكتب البوست ده 00
************************************

فاقد الشئ لايعطيه

ازاي واحد بيعمل حاجه يحكم علي حد تاني بأنه ما يعملهاش ؛
و خاصة لو ان الشخص الأولاني ده كان حدوه قصدي قدوه ؛
شئ متناقد بيتهيألي ؛ يعني مثلا و انا بقرا الموضوع بتاع ابو عقرب
جالي الهاتف ده ازاي واحد بيدخن بيجيلوا عين يقول لمراته او لخطيبته متدخنيش ؛
ما هو الحرام عليك و عليها سواء و الضرر عليك و عليها برضو سواء ؛
او ام مثلا بتدخن و تقول لبنتها او ابنها متدخنش ؛ الله طب ما هو انت صوره
بيتبعها ازاي ميدخنش و ازاي هو يقتنع انها غلط او خطر او حرام اين كانت التسميه
و انتي و باباه بتدخنوا ماهي حاجه تمخول المخ ؛
طبق بقي الموضوع ده بقي علي حاجات كتير شبه كده ؛ و منها المثل اللي انا ضربته
في البوستايه القديمه اللي كتبا اسمها فوق ؛ طب معني كده ان المثل اللي بيقول
ان فاقد الشئ لا يعطيه ده صحيح ؟؟ يطلع واحد يقولك لأ في ناس رأيها ان المثل ده مش صحيح
و مبررهم ان فاقد الشئ بيحس بأن عنده نقص تجاه هذا الشئ فبيحاول بعد كده انه يتحشاه
يعني مثلا لو ان حد اتربي علي ان اهله بيضربوه هو لما يخلف مش هيضرب ولاده ؛
او لو اتربي في بيئه مفككه هيحاول انه يخلي الأسره بتاعته مترابطه ؛
او لو ان اهله مش كانوا بيدولوا فرصه يتناقش و يعبر عن رأيه هو هيعمل العكس مع ولاده ؛
انا شخصيا من رأي ان مفيش قاعده و ان الموضوع نسبي لأن ممكن الواحد الموضوع يقلب معاه عقده
و يطبقه بشكل مبالغ فيه فيبقي فاقد الشئ بالجامد اوي 00
فمؤقتا انا هغير شويه في صياغة المثل لحد اشعار اخر و هخليه 00
فاقد الشئ ممكن يعطيه بس لو معطهوش يا ريت تعذروه
سلام

بعد قراية الكومنتات اضافه بسيطه 00
كتب لي الزميل ياسر حسين الكومنت ده
و يا ريت اللي مهتم يقرا البوستايا اللي عنده لأن الموضوع عنده مشيق
جداااااااااااااا 00
و ده كان نص الكومنت باللينك بتاع البوتايه
******************************************

أنا معاكي مليون المية في كل الكلام اللي قلتيه
وخصوصاً إني بأعتبر نفسي عدو التدخين رقم واحد
ولو تتذكري كان ليا تدوينة عن الموضوع ده وعن ارتباط بعض المبدعين بالكيف وأنتي شرفتيني بتعليقك الجميل عليه وللتذكرة مش أكتر ده اللنك بتاع الموضوع لعله يكون فيه إضافة أو إفادة لقراءك الأعزاء
http://cartoonya.blogspot.com/2007/03/blog-post.html

لسانك حصانك

لسانك حصانك 00 ان صنته صانك 00 و ان هنته هانك

في مشاهدتي للحكم اللي صدر النهارده علي المستشار مرتضي منصور
اللي اتعرض في برنامج 90 دقيقه و الساعه ال10 ؛ علي طول
جه في دماغي المثل ده ؛ الله اعلم طبعا هل فعلا هو اهان المحكمه
و اللا هما كانوا اوفر و اتلككولوا محدش عارف ؛ بس انا و اعتقد مش انا لوحدي
عندي خلفيه كفايه عن مرتضي منصور انه لسانه فالت و علي طول بيزعق
و يتخانق و يشتم و يقلع الجزمه و و و و ؛ فمستبعدش انه عمل كده برضه
في المحكمه و شتم الهيئه القضائيه و رئيس مجلس الدوله السيد نوفل ؛
بس شهادة السيد نوفل بتقول انه لما قدم المذكره ضد مرتضي كتب فيها
انه سب و اهانه للهيئه القضائيه و دار المحكمه اللي من المفروض انه مكان مقدس و له احترامه ؛
في النهايه الله اعلم و ياما في السجن مظاليم و ربنا يفك سجنه و يكون ده
درس ليه و للسانه اللي مواديه في داهيه
و علي رأي المثل 00
لسانك حصانك 00 ان صنته صانك 00 وان هنته تطس 3 سنين سجن
سلام

لا كرامه لنبي في قومه

لا كرامه لنبي في قومه

الشهر اللي فات كتبت بوست بعنوان كلب الأمير
و استكمالا للحادثه دي هكتب بوست النهارده
بتفرج علي برنامج 90 دقيقه من عشر دقايق كده
و كانوا جايبين حادثه تانيه لكلاب الأمير السعودي
الأمير تُرك منه لله هو و اهله 00
الضحيه المره دي اسمه سيد مصطفي سيد و كان في
فندق الموفنبيك لما هجم عليه كلب الأمير و بطحه ارضا جابله
لمس اكتاف و حط بوزه و سنانه في وش الشاب و عضه و قطعله
هدومه و حاولوا يكلفتوا الموضوع زي ما عملوا مع اهل الطفله حبيبه بالظبط
قبل كده بس الولد اصر انه هيعمل محضر و مش هيسكت و فعلا طلع علي المستشفي
و منها علي معتز الدمرداش لفضح الموضوع و هو سخن كده 00
المهم ان اتصل المستشار القانوني لفندق الموفنبيك بمدينة الانتاج الاعلامي
محمد ابراهيم الزيات ؛ و حرق دمي الصراحه ؛ لأنه قال بعد ما سأله معتز
ايه الدور اللي قام بيه امن الفندق تجاه الحادثه 00 لا يا استاذ معتز امن الفندق
كان ليه الدور الأول و الأقوي في انتشال حبيبه من بين انياب الكلب ؛ و بالنسبه لحادثة
سيد ما قالش حاجه لأن الأمن معملش حاجه اصلا لأنه بشهادة الشهود امن الفندق
كان لامؤاخذه بيتلب من بوديجاردز الأمير 00
و طبعا عجبني رد معتز جدا علي الزيات لما قاله 00 لأ يشكر الأمن
بصراحه لمجهوده العظيم في انقاذ البنت لا الصراحه عمل اللي عليه
و زياده 00
اللي اتقال بقي النهارده و شد انتباهي ان الأمير ترك افندي كعب الغزال
متقدم فيه 87 محضر بنفس السبب 00
و انه في تونس طردوه شر طرده بسبب انه اتهجم علي عامل في الفندق
اللي كان متلقح فيه 00
طب يعني هو تونس اجدع مننا ؟ احنا ليه مرحلناهوش من زمان ؟
و لا هو علي رأي محمد صبحي في مسرحية تخاريف 00 بفلوسي يا كلاب
ما هو بصراحه الموضوع محير جدا 00
و الغريبه بشهادة شهود كتير ان اي حد بيجي يقدم محضر بيقع
تحت ضغط و تهديد من الأمير و دلاديله 00
يا تري مين بقي الضحيه القادمه للكلاب المسعوره ؟؟؟؟؟؟؟؟؟؟؟
و قال علي رأي الحكمه او المقوله او المثل اللي بيقول 00

لا كرامه لنبي لا في قومه 00 و لا في قوم تاني
سلام

اضافه بسيطه بعد قرأة الكومنتات 00
سمو الأميره البلطجيه تنازلت و نزلت من العرش لتتفقد
احوال الرعيه و ناقشت الموضوع ده في بيان ليها بعنوان
ههوهوهووووووهوهوهو00ووووو
و انا بشكر سموها و بنحني علي هذا الفضل العظيم

سلام تاني مره

السؤال لغير الله مذله

السؤال لغير الله 00 مذله

النهاره كان يوم ما يعلم بيه الا ربنا ؛ يا ساتر يوم مليان حوادث
معديه من السيده عيشه لقيت عربيه نقل داخله في عامود الكوبري
وواقع عليها سور الكوبري من فوق مبططها زي علبة السردين
يا ساتر منظر مفزع اللهم احفظنا ؛ وصلت مكان ما كنت رايحه
بعد ساعتين عناء و مجاهده في المواصلات و السكه المقفوله بالضبه
و المفتاح الاقي الناس بتقول الحادثه الأفظع بتاعة قلعة الكبش في حي السيده زينب
حريق مهول حرق حوالي 250 بيت من الخشب و الناس بقت في الشارع ملهومش مكان يسترهم
و مأوي ؛ اسأل و كان سببه ايه الحريق يقولولي انبوبة بوتاجاز
طبعا مستغربتش خالص لأن انا كتبت بوست بخصوص الموضوع ده زمااااان
بعنوان روتين حتي مع الوفيات ؛ و كان ساعتها بيقولوا ان هتطلع لجنه للتفتيش و اجراء اللازم
حسبي الله و نعم الوكيل اهه منطقه بحالها ولعت و كانوا لسه مبعتوش اللجنه للتفتيش
يا تري مستنين ايه مصيبه اكبر من كده ؛ علي العموم اللي عايز يقرا اكتر في الموضوع
جبتلكوا لينك اهو هنا
و بدعي للناس دي كلها بالصبر و بالرحمه من ربنا و اقولهم ان حقيقي
السؤال لغير الله و خصوصا في البلد دي 00 مذله
سلام

اللي مالوش خير في اهله 00

اللي مالوش خير في اهله 00 مالوش خير في حد

امبارح بسمع نجوم اف ام و لقيتهم بيتكلموا في
موضوع لطيف و يشجع الواحد علي انه يسمع
و ده علي غير عادة نجوم اف اع ؛ كانوا
بينقشوا موضوع ان ليه لما ربنا بيفتح علي فلان
و يسهلهاله ينسي اصله 00
انا الحقيقه الموضوع عجبني و ده اللي شجعني
اني اكتب فيه بوستايه لأن الموضوع ده منتشر جدا
و خاصة في الوسط الفني 00 تلاقي الأخ و الأخت
الفنانين بداية طريقهم الفني مسلوعين و معضمين
لأنهم كانوا جعانين و مش لقيين الللقمه
تعالي كده شفهم بعد اما يبقوا نجوم و الفلوس بتجري في
ايديهم بقي شكلهم ازاي و تحس انهم بقوا اتنين في بعض و يبان
عليهم اللحمه و الهبر و تيجي في لقاء في التليفيزيون تقولك00
بابي اصله كان عنده سلسلة محلات في لندن ؛ بابي ايه بس
يا حاجه ايش حال احنا شايفينك من يوم ماطلعتي و كنتي بتحطي روج
من اللي بيتباع في محلات 2 و نص ؛ و تلاقي بقي اسطوانات ترعرعت
في بيت بابا ؛ و مامي كانت من العيله المالكه 00 و حاجات شبه كده
كتير ؛ و اللي شبه كده برضو تيجي ممثله تقولك لأ اصل انا مش بعمل ادوار
اغراء و لا مشاهد فيها بوس و حاجات خليعه ؛ و تيجي انت صدفه قاعد قدام ميلودي
افلام او روتانا و جايبن فيلم مقاولات قديم من اللي بيجي الساعه 2 الضهر ده؛ تلاقيها
البوس في الفيلم اقل حاجه عملاها ؛ طب ليه الكدب ما هو انتي تتقفشي بسهوله اوي
ده شئ ما يتخباش ؛ من رأي ان الناس دي لازم متنساش اصلها
بالعكس تفتكر هي قد ايه كانت محتاجه و ربنا اداها ؛ و تفتكر برضو
انها تتوب عن الوحش اللي هي عملته قبل كده و مترمهوش ورا ضهرها و تنكره
و تنساه 00 اصل اللي مش بيشكر ربنا علي نعمه ربنا مش بيزيده
و اللي مش بيتوب و بيطنش و بيسقع هو كمان ربنا مش هيسيبه
و علي رأي المثل 00
اللي مالوش خير في اصله 00 مالوش خير في حد
سلام

جبتك يا عبد المعين 00

جبتك يا عبد المعين تعيني 00 لقيتك يا عبد المعين عايز تتعان

الموضوع ده بقالي فتره عايزه اكتب فيه و بقول لنفسي
يا بت مش مهم اعملي نفسك مش واخده بالك ؛ بس الاقي
نفسي تاخد بالها برده 00 و انا اقول يا واد طنش خالص
بس خلاص الموضوع بقي رخم و لازم اتكلم فيه 00
من المفروض يا جماعه ان اي راجل امن او عسكري
او شرطه يكونوا هما اللي بيحموني و انا ماشيه في الشارع
يعني لو حد عاكسني مثلا المفروض اول واحد اجري عليه هو راجل
الأمن 00 انما لما الاّيه تنعكس و يبقي راجل الأمن هو اللي بيعاكس
يبقي انا المفروض اجري علي مين ؟؟؟؟؟؟؟؟؟؟؟؟؟؟؟؟؟؟؟
و الحاله اللي انا بوصفها دي بتحصل جنب 00
كشك واقف فيه عسكري قدام سفاره مثلا و زهقان من الوقفه و يطلعه
علي كل واحده معدّيه بقي
اي عربية امن مركزي راكنه تلاقي العساكر هتكسر الحديد اللي محبوسين
وراه و بيدّوني احساس بالكلاب المسعوره اللي بتطلع رياله
من جنب بوزها 00 محبش اوصف بني اّدم بحيوان بس هو ده اقرب
تشبيه بيجي في بالي 00
ده غير بقي لو داخله عماره فيها واحد من الأمن و مسبلاتي
انا تعليقي علي الموضوع المتفاقم ده هو المثل اللي بيقول 00
جبتك يا عبد المعين تعيني 00 لقيتك يا عبد المعين عايزلك كلمتين في جنابك
سلام

مصائب قوم00

مصائب قوم 00عند قوم00فوائد

هو ليه الناس مش بتمشي صح من نفسها؟
ليه لازم يتحط غرامات و عقوبات عشان الناس تلتزم
بالقواعد و الروابط و النظام؟
هويعني كان لازم يوقفوا مفتشات عشان الستات
متزوغش من دفع تذاكر المترو؟
اه بجد هو ده اللي حصل00
اللي حصل انهم مسكوا في الرجاله كتير بتزوغ من دفع التذكره
في المترو00فراحو معينين عدد كبير
من البنات كمفتشات للسيدات عشان يكون ليهم
الحق في دخول عربية الستات و يقدروا
يحصروا عدد المزوغات 00و كانت الكارثه
انهم مسكوا في حوالي شهر اكتر من الف ست
مزوغه من دفع التذكره00طب ليه تكسفوا
نسفكوا 00انا اصلي حطيت نفسي في مكان واحده
او واحد من المزوغين لو اتقفشت هيبقي شكلي
ايه 00حسيت انه هيبقي شكلي سخيف و مبلول
طب لو مش مهم الشكل و الاحراج قدام الناس00
قدام ربنا ده الأهم لأن دي سرقه00
و انا باعترف اعتراف اني بعتبر نفسي
واحده من المساعدين علي السرقه لأن لما واحده
بتجيلي في المترو و تقولي ممكن اعدّي وراكي
مبعرفش اقوللها لأ بس مش عارفه اعمل ايه
غير اني اعديها00بس اللي جه في دماغي علي
طول اول ما سمعت موضوع تعيينات البنات
في الوظيفه دي 00المثل اللي بيقول00
تذاكر قوم عند قوم00 فوائد
سلام

خليك ورا الضرايب00

خليك ورا ال 000 لحد باب الدار

زمان و انا عندي حوالي 10 سنين00
كنت بلعب بالعجله الحمرا بتاعتي00
و دخلت علي بابا و انكل محمود صاحبه
و هما قاعدين في الجنينه بتاعت البيت
و كانوا بيتكلموا عن حاجه اسمها00
الضرايب00فسألت انكل محمود00
يعني ايه ضرايب يا انكل00و رد
عليا انكل محمود و قالي00الضرايب
دي يا كوكو عباره عن نسبه من ربح
او من الدخل المادي لكل فرد من الشعب
بتاخده منه الحكومه 00رحت انا
قايله 00الله طب انا سمعتك بتقول يا انكل
انك مش بتدفع الفلوس دي انت كده حرامي؟
و رد عليه انكل محمود بكلام مفهمتوش اوي ساعتها
بس فهمت معناه لما كبرت و بدأت اركز و افهم اكتر00
و فهمت ليه انكل محمود ماكانش بيدفع الضرايب00
لأن المفروض ان الضرايب اللي بتتسحب من الفرد
او من المواطن بتروح في اصلاحات و حاجات مفيده للبلد00
بس كنت امشي و ابص حوالي الاقي كراسي المواصلات
مكسره00و الشوارع كلها مطبقات و بلاليع بتكسر العربيات
و الشوارع عايزه تترصف00و المستشفيات الحكوميه
حالتها صعبه اوي و لو العيان يدخل يعي اكتر00
و المدارس و00و00و000الخ0
و اما كنت اشوف كل ده كنت بسأل نفسي
معقول كل الناس بتعمل زيّ انكل محمود عشان
كده كل الحاجات دي بايظه و لا ايه السبب؟
و ماكنتش عارفه الحقيقه ايه00
بس يا جماعه من كام يوم سمعت خبر اداني
شوية امل و قلت اهو شعرايا الواحد يتعلق فيها
و نفسي يا رب يكون انكل
محمود عايش عشان يعرف الموضوع ده
الموضوع اللي جابلي حبة تفاؤل هو00
ان مصلحة الضرايب في اعلانها
الجديد بتقول 00ان التهرب من دفع الضرايب
مش في مصلحة البلد و ده لأنه بيقصر في الاعمار
و التجديدات و بناء المدارس و المستشفيات
و لما الواحد مبيدفعش بيضر اخواته من الشعب
و بيعطل مسيرة النمو و التقدم و الاصلاح
و انا رأي اننا نجرب نظام الاقرار الضريبي
الجديد اللي اتطبق من السنه اللي فات
و اللي هو باعتباري من المتعاملين
مع الضرايب احسن بكتير من الكعب الداير بتاع
قبل كده00و اهو نجرب و نشوف
و علي رأي المثل00
خليك ورا الضرايب00 لحد اما نشوف النتايج
سلام

يا واخد القرد00

يا واخد القرد علي ماله00يروح المال و يبقي القرد علي حاله

هو في شباب عايزه تتجوز؟؟

هو في حاجه اسمها جواز دلوقتي؟؟

الجواز ده كان زمان ايام العز و الناس اللي عايزه

تفتح بيت بصحيح

كل الكلام ده بنسمعه من الأهالي الأفاضل

اللي عندهم بنات عايزين يجوزوهم00

و ده رأيهم و هما حرين00

انا بقي معترضهههههه جدا00لأن الشباب عايزه

تتجوز بس مش عايزه تتدبس او حد يبيع

و يشتري فيها او يحس انه رايح يشتري غساله00

الأهالي بيغالوا في المهور و الطلبات زياده

عن اللزوم و الحاله ضنك00و ممكن تبقي البنت موافقه

علي انها تتجوز بأقل الامكانيات و ربنا

يسهل بعد كده ما الجواز بييجي برزقه

و رغم كده تلاقي الأهل بتتكلم في

حاجات سطحيه متوقفش الحياه00زي مثلا ان يكون

المطبخ من عمرو حلمي اللي ب20 الف

و الحلل تكون من اللي ب الف مش ب800

يعني انا مش فاهمه هتفرق ايه00

انا من رأي ان الأهل بالطريقه دي بيعجزوا الشباب

و بيضطروهم للجواز العرفي و للغلط00و بعدين

هل الاب او الام هيتبسطوا لما يجوزوا بنتهم لواحد

محشي فلوس بس معندوش دين و مش بيراعي ربنا

و ممكن يكون عجوز00و في كل الحالات يبقوا قضوا عليها

و ساعتها الفلوس و لا هتنفع ده حتي الناس بتقول

ان الفلوس مش كل حاجه00الفلوس مش بتشتري السعاده

و احنا بنشتري راجل00انما مش بنشتري بنك

لأن ممكن ببساطه البنك يفلس و المال يروح

و ماناب اللي اتجوزت الا التدبيسه في القرد لامؤاخذه

طب ليه البهدله دي00و ليه

لما الشاب يجي يدخل من الباب تضغط عليه

و تحسسه انه ما ينفعش يتجوز و يروح ينتحر احسن

يا ابهات يا امهات00حرام عليكوا انتوا

بتعملوا كارثه و انتوا مش حاسين00

و بعدين علي رأي المثل اللي مكتوب فوق

و المثل التاني اللي بيقول00

خدوهم فقرا يغنيكم ربنا00

سلام

يغرس رأسه في الرمال00

يغرس رأسه في الرمال 00كالنعامه

يا جماعه سمعتوا اللي حصل00كلام في سركوا قال ايه

منعوا المصورين من حضور اجتماعات مجلس الشعب

ليه يا تري؟؟ بتقولوا ليه 00عشان المصورين

لقطوا صور للأعضاء الأفاضل و هما نايمين00

الظاهر ان العيال مانيمهومش امبارح بليل00

و بيقزقزوا لامؤاخذه لب و بياكلوا بلح

و حاجه السطه علاّخر 00طب مايغيرو اسمه

و يخلوه كافتريا الشعب00

المهم ان الصور اتنشرت في الجرايد

لأن المفروض برضه ان مجلس الشعب ده

بيتكلم بأسم الشعب مش بأسم حد تاني

و من المفروض اننا نعرف كل اللي بيحصل

ما هو اصل الواحد ما راحش انتخب الأخ عشان يروح ينام

و مايتكلمش عنه و يعرض مشاكله00 و بدل ما الموضوع يتعالج

من جذوره و يتحل من المنبع الأساسي

للمشكله 00لأ دفنوا راسهم في الرمله لامؤأخذه برضه

زيّ النعام و منعوا المصورين و اتهموهم بتشويه شكل الأعضاء

و تصويرهم في اوضاع شخصيه مش المفروض انها تتصور00

و يعني هما المصورين كانوا جابوا الصور دي من بيتهم

ما هي حاجات حاصله فعلا00و لازم تظهر و تتناقش عشان ما تزدش

انما اقول ايه بعد اللي قالوا مجدي الجلاد في الساعه العاشره

بأن غير مقبول طبعا اني اشوف احد اصحاب المناصب

العليا00بدون ذكر اسماء كالعاده00بيقزز لب

دي اهانه للمجلس و اهانه للشعب00بس انا نفسي اقول حاجه

هو مش مجلس الشعب ده ليه ريس برضه00طب يا تري كان

فين وقت حدوث هذه التجاوزات 00داهيه ليكون هو كمان

كان نايم او كان في المقله بيجيب لب00

سلام

القرش الأبيض

القرش الأبيض 00ينفع في اليوم الأسود

ياه ه ه ه ه 00انتوا عارفين يا جماعه اعتقد ان المثل ده ا تكتب

ايام الجنيه الجبس 00لو كان حد سمع عنه00

ايام ما كان القرش بتشتري حاجات بيه و ممكن تحوّش كمان

انما دلوقتي حتي الميت جنيه البيضه ماتنفعش في اليوم الاسود

لأن برضه درجة الأسود زمان كانت فاتحه شويه عن دلوقتي

يا جماعه الواحد زمان يعني علي سنة حاجه و تمنين مش

بعيد اوي 00كان يشتري بجنيه فول يقضيه هو الأسره

المكونه من خمس افراد مثلا و خمس ارغفة عيش

كل واحد رغيف يشبع لأن الرغيف كان ماشا الله

بخيره00انما دلوقتي حتي الفول اللي هو المفروض

اكلة الناس الغلابه بقي غالي بقي الحبه اللي بجنيه

بقوا زيّ الحبه اللي بربع جنيه زمان 00و الشخص الأكيل

مش هيقضيه رغيف لأن الرغيف انا اتنبأله انه قدام هيبقي في حجم

العيش الكيزر و هيبقي علي رأي المثل00لا بيحوق و لا بيلوأ

شوف انت بقي جنب الفول و العيش حزمتين جرجير علي شوية

قوطه و خيار و مخلل هتبقي اكلة الفطار واقفه عليك بكام

و لسه في غدا و عشا و تحلّي و تشرب شاي و قهوه

شوف كده في اليوم واقف عليك الأكل بس بكام00

و شوف كده انهي قرش ابيض ده اللي ينفع في

هذا اليوم الاسود الحالك السواد

قلبت عليكوا المحافظ 00بفتح الميم00معلش

سلام

اذا كان رب البيت00

اذا كان رب البيت بالدف ضارب00فشيمة اهل البيت الرقص

قريت في احد البلوجات واحد كاتب بيشتكي من سلوك ابنه

اللي عنده 14 سنه بأنه شافه بيتفرج

علي حاجات خليعه و هو اتصدم و معرفش يعمل ايه00

و بعد البوستايا دي بتصفح البوستات التانيه لقيته عنده كاتيجوري بخصوص

الجنس و حاجات مخله و كاتب مواضيع فجه اوي00

طب يعني انت مستغرب من سلوك ابنك و مش مستغرب انك انت

المفروض قدوه و هو بيقلدك00الحقيقه انا بتكلم عن الموضوع

ده كمثل من امثال كتييييير بشوفها00يعنين منين أم تقدر

تقول لبنتها او ابنها متشربش سجاير و هي بتشرب 00

او ازاي اب يقول لأبنه اتأدب و ماتشتمش و هو لسانه فالت

بيتهيألي انه هيكون صعب و هيبقي شكلك وحش اوي

قدامه لما يبتدي يدرك00و اظن ان المثيرات اللي حواليه

كفايه اوي انها تفسد اخلاقه و هو في بيئه صالحه

تخيلوا بقي لو ان البيئه مش صالحه هيكون ايه الوضع00؟

هو في حل من الاتنين00يا اما ميخلفش و يعيش براحته

و يشيل ذنب نفسه00او يبقي رب بيت بصحيح لأنه هيتحاسب

عن الذريه دي00يعني بالبلدي بلاش يضرب هو بالدف

و يستغرب بعد كده ان شيمة اهل بيته الرقص00

سلام

ان كان اللي بيتكلم00

ان كان اللي بيتكلم مجنون00الي بيسمع عاقل

للأسف الاعلانات التجاريه بقت شئ منفر و بدل ما يكون دور الاعلان انه

يشجعك انك تشتري المنتج بالعكس يسد نفسك من سوء الاسلوب المستخدم في الاعلان

ما هو اصل الاعلان ده فن مش اي حاجه و خلاص00بس انا احب اركز اكتر في البوست ده

علي نوعيه معينه من الاعلانات اللي انا هطبق عليها المثل

و هي00التي في شوب

اللي هي اصلا بضاعتهم كلها صيني 00اكيد عارفنهم 00و لو حد ميعرفهمش

يقعد شويه و يستحمل اي فيلم علي قناة ميلودي افلام و يستني كده في الفواصل

ويشوف مدي فقر و تفاهة الماده الاعلانيه المقدمه و اللي هو مثلا الانتاج بتاع

الاعلان كله علي بعضه يوم ما يضربه الدم يبقي 250 جنيه مثلا00

ده غير الغلاسه اللي بيستعملوها في شرح المنتج مثلا كان اعلان منهم عن

طقم صيني و كان اللي بيتقال00الحله اللهلوبه اللي تطبخي فيها و انتي

مطمنه و لو اتصلتي دلوقتي هتحصلي علي الطاسه الشقيه اللي كلها حنيه و معاها مطبقيه

غنيه بالوانها الزكيه000 غير بقي ان الاعلان مش ممتع ازاي ممكن حد يشتري

حاجه ماشفهاش 00الغريب ان انا بسمع ان ناس كتير بتشتري من الحاجات ديه

و الحقيقه مش عارفه ازاي ممكن ان الواحد يثق فيهم 00عشان كده دايما بقول

ان كان اللي بيتكلم تي في شوب00الي بيسمع يقفل التي في احسن

سلام