2008 Movies (1)

حصل علي 8 جوائز اوسكار 2009 منها: افضل فيلم، افضل موسيقي تصويريه، افضل كلمات اغاني
افضل اخراج
و من رأي انه كان يستحق جائزه افضل ممثل، لأن حقيق الممثل اكثر من رائع رغم سنه الذي لم يتجاوز ال19
فيلم جيد جدا ، جديد من حيث التكنيك و القصه ، فيلم هندي و لكن سا عتين وربع مش 8 ساعات
فيلم ثري جدا فنيا رغم ضاّلة الانتاج ..... تعالوا شوفوا ياللي بتصرفوا ملايين علي افلام ملهاش اي لازمه

فيلم غنائي كوميدي اجتماعي

الجديد في الفيلم انه لم يتم تأليف اغاني خصيصا للفيلم و لكن استعانوا بأغاني فريق

The Abba

فريق السبعينات الشهير و يقوم جميع الممثلين بأعادة غناء هذه الأغاني اصواتهم

و من المبهر طبعا انك تسمع ممثلين بيغنوا بهذة الاجاده و خاصة الرائعه

Meryl Streep

فيلم اثاره من انتاج 2008

فيلم جيد جدا لممثل قدير اكثر من هايل

Liam Neeson

قصة اب تخطتف ابنته في فرنسا و يسافر للبحث عنها في 48 ساعه

فيلم جيد يستحق المشاهده

رغم عدم استلطافي للممثله الأمريكيه

Angelina Jolie

و ده لأني اري انها ضعيفه فنيا علي كل المستويات، الا انها اجبرتني علي تغيير رأي فيها

من خلال الشخصيه الحقيقه التي تلعب دورها في هذا الفيلم، و هي بالفعل رشحت لجائزة

افضل ممثله في دور رئيسي اوسكار 2009 و لكن لم تحصل عليها

تلعب دور (كرستين كولينز) مديره في احد سنترالات في لوس انجلوس سنه 1928

و تعود يوما ما الي البيت لتجد ان ابنها الوحيدالبالغ من العمر 9 سنوات اختفي، تظل في حروب مع الحكومه

علي مدار سنين لمحاولتهم اقناعها بأن الطفل الذي وجدوه و سلموه لها هو ابنها

فيلم اكتر من رائع و يستحق المشاهده

سلااااااااااااااااااااااااااام

Horror 1

فيلم من انتاج 2008

يؤسفني اني اقول انه فيلم لا قصه و لا مناظر فيلم مالوش معني

و كل الناس بتموت في اّخر الفيلم حتي اعتقد المخرج كمان

فيلم هايف و مقرف، و بلاش افسر اكتر من كده يا حضرة البيجباشي

ما يميز الفيلم هو التصوير و الاضاءه اللي معتمده طول احداث الفيلم

علي تصوير و اضاءة كاميرا هاندي كام

فيلم من انتاج 2009

يتناول الفيلم قصة فتاتان يفقدان امهما في حريق مروع مما يسبب للأخت الصغري

مأساه نفسيه تقضي علي اثارها 9 شهور في مصحه نفسيه بعد محاولة انتحارها

و تبدأ عقدة الفيلم بعد خروجها من المصحه و الالتقاء بصديقة ابيها الجديده

اللي عجبني في الفيلم... الممثله ، و انه غير متوقع بالمره

فيلم من انتاج 2008..... انتاج شركه معروفه بانتاج هذه النوعيه من افلام الرعب

هو فيلم جيد فنيا، تدور احداثه حول تيمة الانتقام و ان الدنيا دواره و هتاخد جزائك

مهما لفت الدنيا و دارت السنين

فيلم ممتع ما يميزه عدم وجود اي مشاهد دم رغم وجود مشاهد للقتل

سلاااااااااااااااام

واحد - صفر

عند وصولي الي قاعة السينما لم اتخيل هذا الاقبال الجماهيري علي الفيلم لدرجة اني لم اجد مكان

الا في الصفوف الأماميه و ذلك لامتلاء الصفوف الخلفيه عن اّخرها

و من رأي ان (كامله ابو ذكري) مخرجه متميزه جدا مالكه لأدواتها متطوره فنيا من فيلم لفيلم

ما استرعي انتباهي هو ان سيناريو الفيلم يشبه في اطاره الخارجي سيناريو فيلم(كباريه) الذي

يعرض كواليس حياة بعض الأشخاص التي لا يتاح لنا فرصة رؤيتها بالعين المجرده

هي قصص للعديد من الأشخاص في تدور كلها في يوم واحد و تنتهي بفوز مصر في المباراه

و هنا ينسي كل شخص متاعبه و مشاكله و يفرح بالفوز مخلفا وراءه يوم قاصي ملئ بالصعاب

نجحت السيناريست و المؤلفه (مريم ناعوم) في حفر الشخصيات بملامحها و نفسيتها و تفاصيلها

الداخليه و الخارجيه بصوره رائعه و هو الذي انعكس بدوره علي المخرجه في تنفيذ هذه التفاصيل علي الشاشه

ما يميز الفيلم شيئان من وجهة نظري

اولا: وصول الفيلم الي قاع المجتمع بصوره مختلفه عن العديد من الأفلام التي تعرضت لنفس المشكله من قبل

لم يقتصر الفيلم علي تقديم مشاكل الطبقه المعدمه و الكادحه فقط، بل عرض بعض مشاكل الأشخاص

من الطبقه العليا

ثانيا: تستحق المخرجه التقدير لمجهودها الواضح جدا مع بعض الممثلين اللي يعتبروا في احسن صورهم الفنيه

حتي الاّن مثل : انتصار، زينه، احمد الفيشاوي، نيللي كريم

اخيرا، تضاربت الأراء في الفيلم مابين هايل و سئ و انا انتمي للفريق الأول

مستنيه رأيكوا

سلاااااااااااااااااااااااااااااااااااااااااااام

Doubt

فيلم من انتاج 2008 ، يضم الفيلم مجموعه من الممثلين -الجامدين جدا- ينتمي الفيلم في تصنيفه

الي الدراما الاجتماعيه الغامضه، و ده حقيقي لأن الفيلم تعلوه حاله من الغموض اللي نجح المخرج

في توصيلها، يهتم الفيلم بقضيه هامه جدا و هي سقطات الرهبان و الراهبات و ممرورهم بظروف

و تجارب تكشف عن نواقص بشريه طبيعيه جدا -و ده لأن محدش معصوم من الخطأ-في مدرسه

كنسيه تتولي ادارتها الأم الكبري ذات الشخصيه القويه المتسلطه اللي ظهرت اول الفيلم دقيقه

علي اقل التفاصيل غير رحيمه بالمخطئ شكاكه الي اقصي الحدود مما جعل علي الجانب الاّخر

تلاميذ المدرسه ان يميلوا كل الميل ناحية قسيس وواعظ الكنيسه الذي يعتبر شخصيه ضد

لها مما يخلق الصراع الدرامي بين الشخصيتين مما يجعل الراهبه الأم تتصيدله الأخطاء

و هنا تأتي عقدة و حبكة الفيلم و هي (الشك) و هو ما يحمله اسم الفيلم ، الشك في المحيطين

لدرجة تصديق ما في رأسك دون اثباتات

الغريب ان الفيلم رشح لنفس خمس جوائز في مهرجان اوسكار و جولدن جلوب ،ولم ينل اي جائزه في المهرجانين

مع ان من رأي ان ممثل دور القسيس

Phillip Seymour Hoffman

كان يستحق جائزة احسن ممثل بجداره و التي رشح اليها بالفعل

و ايضا الممثله البارعه القديره في دور الراهبه الأم

Meryl Streep

تستحق جائزة احسن ممثله في دور رئيسي و اللتي رشحت لها ايضا

اما الممثله البارعه اللي ظهرت في مشهدين بس ممثله غير معروفه اسمها

Viola Davis

رشحت الممثله لجائزة احسن ممثله في دور مساعد و الحقيقه انها تستحقها مع وسام الشرف

الجدير بالذكر ان الفيلم حصل علي العديد من الجوائز في مهرجانات اخري في امريكا و انجلترا

اشجعكوا تتفرجوا

سلاااااااااااااااااااااااااااااام

خلطة فوزيه

شجعني حصول الفيلم علي جوائز علي عدم التردد في مشاهدته بالاضافه لاقتناعي
بجودة سينما / مجدي احمد علي ، لا اخفيكم القول اني توقعت فيلم افضل مما شاهدت
و لكن في المجمل هو فيلم -حاله- مش قصه لو جاز التعبير
نجح المخرج في خلق حاله اجتماعيه واقعيه تتلون ما بين المرح و الحزن و الألم و السعاده
و التوتر و الا مبالاه احيانا بما يدور في هذا الحي العشوائي المبني من طوبه متهالكه و اخري اختها بالظبط متهالكه برضو
نجح الممثلون في اداء ادوارهم، الا مجدي فكري الذي لم يخلع عبائته المعتاده في الاستظراف
و الاستخفاف و التمثيل بصوايع رجليه لقناعته انه ممثل محصلش بس خدعوه فقالوا
و جاء وجهه نجوي فواءد المشدود علي اّخره لدرجة انك تحس و هي بتتكلم ان مابين لحظه
و التانيه هينشق اجلد للكشف عن جمجه متهالكه، بس كانت متسكنه في دورها الي حد كبير
ما اّخذه كسلبيات علي المخرج هو انه لجأ في مشهدين الي استخدام خدعة الجرافيك
مما افقر المشهد قوته الدراميه و فصلك عن حادثه مروعه و هي موت ابن الهام شاهين الأكبر
من المحتمل ان المخرج لجأ للخدعه قاصدا ما وصلني من احساس بالبرود و تخفيف من وطأة
المأساه، بس انا كمتلقي كنت هستمتع اكتر بأستقبال الحدث كما هو
و لكل شيخ طريقه

سلااااااااااااااااام

رمضان مبروك ابو العلمين حموده

رجوع مشرف لمحمد هنيدي بعد اّخر افلامه التي افقدته الكثير

من معجبينه و اولهم انا، فيلمه الجديد تظهر فيه بصمات وائل احسان

المخرج المتميز و اللي كانت احد الأسباب الجوهريه في تميز الفيلم ايضا

يتناول الفيلم قضيه هامه جدا في مجتمعنا حاليا الا و هي التعليم

و المقارنه ما بين التعليم الخاص و تعليم الأرياف او المجاني

و قضيه جهل الأجيال الجديده للغتهم الأم و التعامل بالانجليزيه او في معني اّخر غياب الهويه

و يوازيه خط درامي اّخر متعلق بالمغنيات الشباب و تعلق الشباب بيهم

لدرجة اهمالهم دراستهم و الاتجاه احيانا لطرق غير سليمه

*************

اجاد محمد هنيدي رسم تفاصيل الشخصيه الي حد كبير

و حاول جاهدا انه مايجريش خلف الافيه حتي لو رخم و لكن اختيار

الافيهات في الفيلم الي حد كبير تعتمد علي افيهات حركيه او افيه الموقف اكتر من لفظيه

**************

سيرين عبد النور ليست بالسيئه زي ما كنت فاكره و لكن الي حد كبير لطيفه

**************

ما اخذه علي الفيلم هو.... فكرة ان التلميذ يحب المدرس اللي بيضربه و بيشبشبله

لم يعرض الفيلم نموذج لطالب مجتهد كما عرض العديد من النماذج السيئه

طبعا لأسباب ما كلنا عارفنها يتساوي في المعامله ابن الوزير و ابن الغفير

و هو ما يدعو للضجر في بعض مناطق من الفيلم

************

في المجمل فيلم حلو استمعت مدة ساعتين المشاهده

و اتمني ان هنيدي يرجع زي زمان لمستواه من تاني

**************

سلااااااااااااااااااااااااااااااام

كباريه

من كام ساعه حضرت فيلم كباريه في حفلة الساعه 3 بعد الضهر
و الحقيقه اني مندمتش اني نزلت في الحر ابدا، لأن بصراحه الفيلم من رأي
فيلم حلو اوي و مؤثر، و قصه من صميم المجتمع، دراما حيه، و من رأي هكذا تكون المحاكاه
لأن الفن محاكاه للواقع، بس هما هنا فهموا المحاكاه صح، لأن رغم ان الفيلم في كباريه
انما مفيش مشهد يخدش الحياء، و طبعا الممثلين و علي رأسهم خالد الصاوي، فتحي عبد الوهاب
و ماجد الكدواني و دنيا سمير غانم ابدعوا في ادوارهم و طبعا احمد بدير
هو العيب الفني الوحيد اللي يؤخذ علي الفيلم هو مشهد الانفجار ، الخدعه كانت رديئه شويتين
بس غير كده حتي علاء مرسي اللي انا مش بحبه كان عامل دور كويس اوي
و نجح السيناريست انه يبين التناقد الرهيب في شخصيه فؤاد اللي لعبها صلاح عبد الله
صاحب الكباريه، التناقد اللي احنا بنشوفه فعلا في الحياه، هو صاحب كباريه بس بيروح يعمل عمره كل سنه
و مابيشربش خمور و لا سجاير و لا بيعرف ستات غير مراته، و ده من رأي بيحصل فعلا علي مستويات
كتيره اوي في المجتمع، و لم ينحاز السيناريست لفكره ان الجماعات الاسلاميه او اللي
بيعملوا عمليات انتحاريه بأسم الاسلام لم ينحاز لفكرة انهم وحشين في المطلق او كويسين
لأ نجح انه يبين فيهم العنصر اللي دماغه متربسه علي القتل و العنصر التاني
الللي شايف ان المناقشه ممكن تجيب حل، المهم ان في المجمل الفيلم حلو
مبروك للسبكيه و لكل فنان عمل و لو مشهد واحد في الفيلم

سلاااااااااااااااااااااااااااااااااااااااام

Rendation

فيلم من انتاج 2007

فيلم سياسي قصه الي حد كبير واقعيه و متعلقه بالأحداث العالميه الحاليه
فيلم ايقاعه سريع....نص الفيلم ناطق بلهجات عربيه مختلفه و ده لأن الفيلم
بتدور احداثه في بلد عربيه في شمال افريقيا دون التحديد هي بلد ايه بالظبط
و القصه باختصار بتدور حول اعتقال مهندس مصري امريكي للاشتباه في انه
علي علاقه برئيس جماعه انتحاريه كانت مسؤله عن تفجير تم في شمال افريقيا
فيلم جيد جدا فنيا من كل النواحي....بس طبعا فيه بعض الانحياز لطيبة اليهود و الأمريكان
مش مهم احنا اتعودنا
***************************
رغم انه لا يعتبر بطل الفيلم او الممثل الرئيسي انما بالنسبه لي انا شايفه ان هو محور
الأحداث و هو البطل الرئيسي و الحقيقه هو يستحقها بجداره و هو الممثل المصري الألماني

Omar Metwally

هو ممثل مصري الأب و الماني الأم....عاش في امريكا و انضم لاستوديو الممثل
في لاس فيجاس ....و من اعماله السابقه فيلم ميونخ
ممثل ملامحه عربيه جدا......... ممثل متمكن من ادواته

قام بدور مهندس امريكي مصري تزوج من امريكيه يعتقل لتهمة انه علي علاقه بأحد رءوس
الجماعات الانتحاريه......يعتقل و يمارسوا معاه كل انواع التعذيب لحد ما يعترف
لمجرد انه يخلص من العذاب اللي بيمارسوه عليه

Yigal Naor

ممثل اسرائيلي الجنسيه ..........و الحقيقه اني طلع عيني لف و مشاوير علي النت عشان اكتشف
هو جنسيته ايه و في النهايه وصلت الحمدلله.....اصل هو بصراحه ممثل يستاهل
يتكتب عنه ....قام بدوره في الفيلم كمدير للمعتقل و المحقق اللي حقق مع المهندس المصري
كويس اوي.....و الجميل انه بيتكلم عربي لبلب
و الجدير بالذكر ان الممثل ده ليه فيلم انتاج 2008 عن قصة حياة الرئيس الراحل صدام حسين
و كان معمول مشكله ان ازاي ممثل اسرائيلي يقوم بدور صدام حسين مع ان انا مش شايفه مشكله
و الفيلم ده فيه كمان الفنان المصري عمرو واكده و الفيلم بعنوان
between 2 rivers

Jake Gyllenhaal

هو المفروض ان الممثل ده اللي قام بدور المحقق هو بطل الفيلم الأصلي
انما هو من رأي انه اضعف ممثل في الفيلم
و مش عايزه افسر اكتر من كده...هو ممثل امريكي معروف برضه و بلاش نجرح مشاعره

و طبعا بالنسبه للممثلتين في الفيلم مش كحتاجه اني اكتب عنهم لأنهم اتنين ممثلات
من الممثلات الأمريكيات الممزين جدا

Reese Witherspoon

و قامت بدور زوجة امهندس الأمريكي انور الابراهيمي المهندس الأمريكي المصري

Meryl Streep

الغنيه عن التعريف و قامت في الفيلم بأربع مشاهد فقط في دور وزيرة الأمن الأمريكي

في النهايه الفيلم من رأي فيلم جيد جدا ......و يستحق المشاهده


سلام

Jumper

فيلم من انتاج2008 يعرض حاليا في سينما جالاكسي مكان ما انا اتفرجت عليه امبارح في حفله الساعه 7

مقدرش انكر اني استمعت الي حد كبير بالفيلم رغم عدم ميلي لأفلام الخيال العلمي، بس احتمال اللي خلاني مبقاش متضايقه ان الفشار كان حلو ده اولا و ثانيا ان الفيلم بيميل اكتر لأفلام الأكشن اكتر منه فيلم
خيال علمي

يتناول الفيلم فكره غريبه شويه، و هي الانتقال عبر المكان في بربشه عين، و دي قدره خاصه يمتلكها بعض الأشخاص القليلين جدا و طول الفيلم يطاردهم مجموعه تسمي بالبلادينيين ...بقيادة الممثل الأمريكي
و اللي اخترع الات مخصوصه لاصطياد Samuel Jackson
النطاطين بالكهرباء و هما بينتقلوا من مكان لمكان و ده من خلال
الذبذبات اللي بيعملوها خلال انتقالهم من مكان لمكان

باختصار زي ما بيقولوا كده هو فيلم و لا قصه و لا مناظر
بس في نفس الوقت رغم انه فيلم لا يقاس فيه تمثيل و لا اخراج
و لا سيناريو...فهو فيلم خدع بصريه بالدرجه الأولي
و طبعا ارتباط الخدع بالمونتاج يبقي المونتاج بتاع الفيلم كمان مظبوط جدا....نيجي بقي لتفصيص الممثلين

Hayden Christensen

ممثل كندي...احد ابطال سلسله افلام الخيال العلمي الشهيره اللي انا شخصيا مشوفتش منه و لا جزء
هو ممثل وسيم جدامن مواليد سنة 1981 من رأي ان هو ممثل جيد الي حد كبير Star Wars
بس نوعية الأفلام دي مبتظهر امكانيات الممثلين بس نجح المخرج في اختياره لأداء الدور

samuel Jackson

ممثل امريكي غني عن التعريف له رصيد من الأعمال اللي برع فيها
اكتر ما عجبني فيه في الفيلم ده هو الشكل الخارجي للشخصيه او اللوك

Jamie Bell

ممثل انجليزي .. اول مره اشوفه ...و هو الممثل الوحيد في الفيلم
اللي حظه كويس لأنه كان عنده المساحه اللي يبين بيها قدراته و امكانياته التمثيليه...هو ممثل هايل متمكن من نفسه و له حضور عالي جدا رغم عدم وسامته و رغم انه انجليزي فلا تتسم ملامحه بالبرود خالص

Rachel Bilson

ممثله امريكيه...اصابتني طول الفيلم بحاله من عدم الراحه معرفش ليه ..هل لأن وشها مش مريح
و لا لأنها فكرتني بالممثله ثقيلة الظل اللي بقيت تفتح الحنفيه تنزل منها الممثله اللي ملطوعه في كل اعمال التلفيزيون و كل المجلات و الجرايد و الأفلام و البرامج ..منه و لا مؤاخذه فضالي...معرفش بس الحقيقه كانت كل متظهر في لقطه
اقفل نفسيا جدا و كمان الحقيقه معرفش ازاي المخرج مخدش باله من ان الممثله اللي كانت بتعمل دورها في مراحلها العمريه الأولي لا تشبهها بالمره ...المهم برضو عشان الواحد ميظلمهاش مقدرتش احكم هي كويسه و لا ترحمنا و تقعد في البيت و يا ريت تاخد اختها منه معاها

**************

و اخيرا ...فات علي الموؤلف و السيناريست حاجات كتير جدا مش مبرره
و كذا موقف لم يكتمل و بقي مبتور ...و اختفت شخصية صديق البطل فجأه و بدون مبرر
و برضو معرفناش ايه سببب مطاردة البلاديين للنطاطين هل لأنهم حاقدين عليهم ؟؟؟
ام لأنهم طيبين ؟؟؟و لا فعلا للسبب اللي اتقال علي لسان
ٍاكتر من مره...و هو ان قدره التواجد في كل مكان هي قدرة الاله وحده Samuel jackson
و يظل المعني في بطن الشاعر...و تظل فلوس التذاكر في جيب صاحب السينما

سلام

حين ميسره

بالرغم من كرهي الشديد لله في لله للمخرج/خالد يوسف

معرفش ليه شدّني التريلر بتاع فيلمه الأخير (حين ميسره) و قدر فضولي الشديد انه يتملك

منّي و يأثر عليا و دخلت الفيلم، بس برضو اخدت احتياطاتي و دخلت حفلة الضهر

عشان لو كان فيه اي حاجه كده و لا كده محرجش نفسي و اسمع تعليقات ملهاش لزمه

و لا حاجه ......و لأول مره اشوف فيلم لخالد يوسف احس ان فيه شيء مختلف فعلا

مش عارفه ايه اللي خلي الفيلم فيه اختلاف ، هل هو الديكور اللي وصل فعلا جو العشوائيات

و لا حركة الكاميرا اللي مفيهاش افتعال و لا هي حالة الهم و الغم اللي بيعشها المصريين

و اللي بالبلدي كده الفيلم قلب علينا المواجع....مش عارفه انا في العموم الفيلم عجبني

و مندمتش اني دفعت فلوس و خدت من وقتي و دخلته.....بس رغم كده الحلو ما يكملش

و خصوصا لما يكون الحلو ده من وش ال..........خالد يوسف، يعني مثلا مدام لجأ

المخرج لاستخدام لاب توب في احد مشاهد الفيلم يبقي كان لازم يعلم الفنان احمد بدير

كيفية استعمال الجهاز لأن بصراحه كان شكله اقرع اوي و هو بيحرك صوابعه علي الهوا

ثانيا بدون اي مبرر حشر السيناريست و المؤلف الجماعات الارهابيه اللي بنشوفها

برضو في كل افلام وحيد حامد، بالنسبه بقي للمشاهد الاباحيه اللي لا يستغني

الحقيقه تقال انها اقل نوعا ما من افلام كتير بس هما مشهدين اللي كانوا زياده حبتين

بس الكاّبه اللي محيطه بالفيلم تخلّي المشاهد دي تمر مرور الكرام بدون الشعور بها

و اأخيرا بقي مشهد الفينال في الفيلم كان سئ بطريقه غير طبيعيه و السبب هو استخدام الكرومه

لخلفية القطر و الحقيقه اني مش لاقيه اي مبرر انهم يستخدموا الكرومه لو كانوا جم علي نفسهم

شويه و بدل ما يصوروه في ساعه و يخلصوا كانوا صوروه في تلاته و خلوا ختامها احسن من كده

في النهايه انا لسه برضو ما مبحبش خالد يوسف مفيش حاجه اتغيرت بس الفيلم الحقيقه تتقال

انه الي حد كبير فيلم كويس، و اللي كان مفاجأه كمان هو عمرو عبد الجليل اللي

كان اختفي من زمان في ظروف غامضه بس رجع رجوع مشرف

ياللا بقي اللي شاف يقولي رأيه و اللي مشفش يقرا و خلاص

ههههههه

سلام

كفايه فوضي بقي

ردا على عدد الدستور بتاع النهارده السبت 1/12، كتب جوزي العزيز المقاله دي

و بعتها علي البريد الاكتروني الخاص بالجريده

بعد ما قرأ النقد اللي مكتوب عن فيلم المخرج الكبير (يوسف شاهين) الأخير

المقاله اللي في الدستور كانت بقلم: ياسمين مجدي
و بعنوان: يوسف شاهين عبقري السينما العربيه

منشور في الصفحه السابعه

***********************************************************************

كفايه فوضي بقي

بقلم: نور

عدد الدستور بتاع النهارده الصفحه السابعه خبر( يوسف شاهين عبقرى السينما العربيه) واضح ان الاخت ياسمين مجدى مشافتش الفيلم اصلا لانى اعتقد لو هيه شافته كان هيبقى رأيها مختلف خالص، لان الفيلم مفيهوش اى حاجه من يوسف شاهين اللهم الا قد يكون اسم الفيلم فقط .. فمخرج فيلم الارض لا يستطيع ان يخرج فيلم بهذا المستوى الوضيع المفتعل ولو حرص على ذلك فهو ابن غير شرعى ينسب له.....انا ارى بشكل شخصى ان الفيلم هو اضعف ما انتجته السينما المصريه من افلام خلال السنوات الاخيره..وعلى الرغم انه يتناول قضيه فى غاية الاهمية الا انه خرج الفيلم تافها ملفقا مهلهلا من حيث النسق الدرامى والتقنى فرأينا مشاهد نهايه الفيلم وثورة الحى على شخصية حاتم تصور بعشوائيه مفرطه وتلفق رغم ضعف مستواها التقنى فرأينا اكتر من مره ان عيون الكومبارس تداعب عدسة الكاميرا وهم فى قمة ثورتهم....والمخرج العالمى خالد يوسف لم نرى منه من العالميه الا الشتائم والعرى.....هل هذه هى العالميه من وجهة نظره ؟احداث الفيلم اغلبها ملفقه ولا تحترم عقلية المشاهد بل على العكس تسخر من رؤية الجمهور للشارع .فبعد الافان تيتر العظيم الذى رأيناه لمشاهد الانتهاكات الحقوقيه من رجال الشرطه فى المظاهرات .....ذهبت القصه الى الشاب وكيل النيابه وخطيبته التى تعيش بلا مبالاه وبتحرر عبيط.....انها سهرة تيلفزيونيه باهته ....بالتوازى مع عشق امين الشرطه لنور جارته الذى يصل الى الحب المرضى وعلى مدار اكثر من ساعه من الملل المتواصل والمشاهد الكوميديه لشخصية حاتم المحشوه حشوا وليس لها اى علاقة بدراما الفيلم وبعد ان نصل الى حاله من النفق والزهق تاتى عقدة الفيلم وهي اكتشاف ان نور تحب شابا وستتزوجه ......بعيدا عن القفزه الفجائيه لعلاقة نور بالشاب وكيل النيابة الذى ترك حبيبته بالامس وفى اليوم التالى رأيناه يذوب عشقا فى نور ..الا انها ايضا سهره تلفيزيونيه باهته من حيث بناءها الدرامى.. فرأينا شبكة العلاقات هذه اكثر من مليون مره....وليس لها اى علاقة بالفوضى ولا بالجموع الغفيره للامن المركزى التى تقمع المتظاهرين التى رأيناها فى بداية الفيلم ...يتطور هذا الصراع الى ذروته بعد ان يغتصب امين الشرطه نور بعد اختطافها فى مشاهد اقل ما توصف به انها ساذجه وتسخر من عقولنا وتحمل فى طياتها دلالات على انهم يقدمون هذا الفيلم لقبائل الزولو بافريقيا... وفى نهاية الفيلم يأتى الحل عن طريق اكثر سذاجه وهو عجوز الافلام الذى يخبر البطل بالحل فيدله على طريق الزنزانه الثانيه بمنتهى الهبل وسط عجز ساذج من الطرف الاخر للصراع وهم رجال الشرطه الفاسدين ...وانا اعطيه مبرر فى ذلك لانه يحاول ان ينهى الفيلم الذى طال ملله باى وسيله ..فهذ المخرج الذى اؤكد على انه ليس يوسف شاهين يسخر من معاناة المصريين ويحاول ان يصنع من نفسه بطلا يحارب الفساد ويطرح قضايا ساخنه فى السينما ويحاول جاهدا ان يوصف بانه مخرج عالمى فيسهب فى مشاهد العري والالفاظ الجارحه التى يتقزز منها جمهور السينما الغير عالمى كما سيصفهم.......فالفوضى فعلا موجوده ولكن داخل عقول هؤلاء المهوسين بأن يكونوا ابطالا على حساب البسطاء من الناس... ولكن احب ان اقول لهم امالكم ستخيب لان الفن الجيد يبقى والباهت يذوب...... يوسف شاهين المهاجر، الارض ،المصير، الناصر صلاح الدين، بابا امين.... مازلنا نذكره حتى الان وهذه المجموعه على سبيل المثال لا الحصر ......الى مذبلة السينما ايها الارزوقيه واتركوا الفن لناسه وارحموا الناس بقى قد تلاحظون فى كلامى حرقه وعصبيه ....اقسم انه ليس تحاملا ...فهذا الفيلم للاسف خيب امالى بشكل كبير لانى انتظرته منذ أن كان خبرا فى الجرائد واتخيله دائما منذ عرفت قصته من الجرائد وبعد ان رأيت التريللر والافيش قلت انه سيقلب مسار السينما العربيه....وفتره انتظار طويله.....ثم الفيلم بهذا المستوى ...لا انسي ان اؤكد براعة الفنان خالد صالح فى الاداء الجميل فعلا والصدق الفنى والفنانتان هاله صدقى وهاله فاخر

واخر كلامى ارجوكم لا تجاملوا على حساب الفن والمجتمع

والسلام عليكم

chicken little

اخيرا الحمدلله رجعت بعد غياب بسبب الظروف المتلاحقه من موت ولدي و التهاب حاد
في الحلق خلاني بشاور بدل متكلم لمدة اربع خمس ايام
بس الحمدلله انا كويسه دلوقتي .. و رجعت تاني لعشتي اللي بحبها و بموت فيها
وحشتوني كلكم .. و بشكر كل اللي قدمولي العزاء و دعوا بالرحمه
ميرسي

*************************************************************************




فيلم من انتاج شركة ديزني العالميه سنة 2005 ؛ فيلم في رأي رجع تاني
ذكريات افلام ديزني الكلاسيكيه اللي كنت بتفرج عليها و انا صغيره بس بالاضافه للتقنيه
الحديثه طبعا ؛ و من الطبيعي اني انحاز للفيلم و اقول انه كميل اوي لأنه
بطولة كوكو كميل زي القمر ؛ و كوكوهايه بنت برضو سكر ؛ ده طبعا بالاضافه لصحابهم الخنزير و السمكه
و كل الحيوانات اللي تتخيلوهم .. بتدور الأحداث في مدينه كلها حيوانات و بيحصل غزو
فضاء ؛ انما مش ده الغرض الأساسي من الفيلم انما الفيلم بيناقش موضوع مهم اوي
موجه للأبناء و الأباء مع بعض و هو .. الحوار .. ضرورة وجود الحوار و الثقه بين الأطفال
و اهلهم لازم يكون في وقت مخصوص للأب و الأم مع الأطفال للكلام و اللعب و تبادل الأفكار ؛
الغريبه يا جماعه مفيش فيلم كارتون او جرافيكس اتفرج عليه الا لما اطلع منه برساله
موجه او مورال زي ما بيقول المتخصصين .. ياللا جتنا نيله في كارتوناتنا الهباب ؛
اللي لفت انتباهي كمان في الفيلم هو خلفيات المشاهد .. طبعا هتسألوني يعني ايه يا كوكو ؟؟
يعني يا صحابي يا كيميلين اقصد الحدث اللي بيحصل في الخلفيه يعني مثلا يبقي مشهد اساسي
شغال في مقدمه الشاشه و في الخلفيه في حدث تاني فرعي يهلك من الضحك و ده حاصل في اجزاء
كتير من الفيلم .. هو صحيح شويه بياخد النظر و الانتباه عن الحدث الأساسي بس
بيبقي موقف او شخصيه تضحك جدا
في الاّخر احب اقولكوا ان الفيلم اتعمله جزء تاني انتاج 2006 بعنوان
chicken little .. ace in action
هاشوفه و اكتبلكه عنه انشالله
اما بالنسبه بقي لجوايز الفيلم.. فحصل الفيلم علي 3 جوايز و هي ..
عن دور الطفل الفضائي mathew josten جايزه احسن صوت مدبلج سنة 2006 للمثل
في مهرجان الفنانين الشباب
و جايزه احسن اختيار للأصوات سنة 2006 في مهرجان تسكين الأدوار في امريكا
و جايزة احسن موسيقي تأثيريه و تصويريه سنة 2006 في مهرجان الأفلام التلفيزيونيه
بس هو ده اللي عندي اقوله اي خدمه يا معلمين .. علي رأي اللمبي
سلاااااام

the pianist

قصه واعيه جرت احداثها في بولدنا عام 1930 عن عازف بيانو كان من اشهرهم في الوقت ده
Wladyslaw Szpilman
و مع قيام الحرب العالميه التانيه و دخول جيوش النازي لبولندا بدأت مأساة اليهود اللي بتدور حواليها احداث الفيلم من خلال قصة العازف اليهودي العرق .. مكدبش عليكوا نجح الفيلم في تصوير الماّسي اللي اتعرضولها اليهود لدرجة انهم صعبوا علي بس في نفس الوقت في اوقات وصلني احساس ان المخرج بيحاول يقطع قلبك و يخليك تتعاطف لأقصي درجه ؛ و ده يخليني اديكوا نبذه عن خلفية المخرج
مواليد 1933 ؛ فرنسا و لكنه من اصل بولندي Roman Polanski
هو ابن لأب يهودي و كان من الناجين من محرقة الهولوكست الشهيره ؛ و عاصر بناء حائط الجيتو اللي فصل اليهود في بولندا عن بقية البلد في حي منفصل ورا الجدار ده ؛ و لكن كان الأب بيحاول جاهدا انه يبعد ابنه عن السينمات اللي كان بيروح متسلل سرقه عشان يتفرج مع الغير يهود ؛ و لكن بقي مخرج قد الدنيا ؛اللي يعرف الخلفيه دي عن حياة المخرج و بعدين يشوف الفيلم هيلاقي كتير من أحداث الفيلم متطابقه مع حياة المخرج و ده طبعا لأن عازف البيانو و المخرج الاتنين كانوا مواكبين لنفس الفتره التاريخيه و طبعا تحيز المخرج بشده للجانب اليهودي و ده طبعا حقه ما هم اهل و عيله ؛ الا في مشهد واحد خلي في شئ ايجابي .. و هي شخصية ظابط الماني بيكتشف مخبأ العازف صدفه و بيسألوا انت مين ؟ و بتشتغل ايه ؟ و لما بيعرف انه عازف بيانو بياخدوا عند بيانو قديم
و بيخليه يعزفله و من عزف البيانيست بيتعاطف معاه الظابط لحد ما بيحصل الانقلاب و بيتشال الظابط و بنعرف من تسلسل تاريخه بعد كده انه بيموت في السجون السوفيتيه و ده طبعا لما الاتحاد السوفيتي بيدخل بولندا و يخرج الألمان و ينصر البولنديين علي كل طوائفهم ؛اّخر حاجه هقولها كالعاده .. الفيلم فاز ب3 جوايز اوسكار في دورة المهرجان سنة 2003 جايزة احسن ممثل عن دور البطوله Adrien Brody
و جايزة احسن مخرج ؛ و جايزة احسن صوره و سنة 2002 حصل المخرج علي جايزه افضل اخراج في مهرجان كان.. اترشح الفيلم لجوايز كتير ؛ و حصل علي جوايز في مهرجانات تانيه كتير محليه و عالميه
في النهايه الفيلم حلو .. و خلاني اسأل نفسي سؤال ؛
الكره اللي عند الناس كلها لليهود
و طبعا عندهم حق هما يستاهلوا الحرق
ممكن يخليني لو انا ماشيه في الشارع و لقيت واحد يهودي محتاج مساعده او اسعاف
و اي شئ مش هتعاطف معاه كأنسان
و مليش دعوه باتجاهه و يكفي اني اساعد روح و اكيد ربنا هيجازيني خير
و لا هاقول لأ ده يهودي يولع و يروح في ستين داهيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
معادله صعبه بجد
سلام

مرجان احمد ...... بتنجان

مش من عادتي اني اتفرج علي افلام في السينما كتير بفضل ان اشوفهم علي الكومبيوتر
عشان امخمخ اكتر ؛ و كان اّخر فيلم شفته وش اجرام لمحمد هنيدي ؛
و من ساعتها ما روحتش السينما غير امبارح عشان اتفرج علي فيلم ..مرجان احمد مرجان
من باب التغيير .. و من اللي سمعته عن سمعة الفيلم و مدي اعجاب الناس بيه
قلت بقي يا واد يا كوكو يا كميل ده انت هتشوف فيلم مصري حلو بقي اخيرا
و كانت صدمتي ان الفيلم مش حلو بس في نفس الوقت للأمانه في بعض الايجابيات
اول صدمتي و هي اكتر حاجه مبوظه الفيلم هو المبجل .. يوسف معاطي اللي الظاهر كده
كان جاب اخره في .. عباس الأبيض ؛ لأن من يوم المسلسل ده و انا مشوفتلوش حاجه
حلوه .. المهم و ماعلينا ؛ الأستاذ معاطي اعتقد انه متعبش في كتابة الفيلم لأنه بمنتهي البساطه
اغلب الفيلم هو مشهد و متكرر بعادل امام مع ممثلين مختلفين و لوكيشن مختلف ؛
انما هو نفس الموقف و تقريبا نفس الحوار .. و اقصد بكده مشاهد تقديم الرشوه ؛
اللي هو و انا مغمضه عرفت نهاية المشهد هتكون ازاي لأن اتكررت فاتحرقت
من الحاجات السيئه جدا برضو من الأستاذ معاطي .. تحسه انه جه في منطقه في الفيلم
معرفش يلملم الخيوط و التربيطات الأخرانيه عشان يخلص الفيلم ؛ فعمل نقله للحدث تافهه و غير منطقيه
و سطحيه ميعملهاش مؤلف في اللفه .. و اكتر حاجه استفزتني في المشهد اللي بيعتبر
مغير للأحداث اني عمري مشفت حد قبل كده ابوها يضربها بالألم تتنقل المستشفي و يجلها انهيار عصبي و تفقد النطق
كان موقف اوفر اوي بصراحه ؛ و من الحاجات برضو العجيبه في السيناريو ان عادل امام المفروض
انه راجل مش مثقف و خريج معهد لاسلكي و علي قد حاله علميا و ثقافيا و ادبيا ؛
و في اّخر الفيلم بينجح و يتخرج من جامعه انترناشيونال و امتحاناتهم بالانجليش ؛
شئ من رأي غير منطقي و مستفز في نفس الوقت
***********************************************************
من السلبيات كمان .. الماكياج اللي كان واضح اوي و بالذات علي وش ميرفت امين
و قد ايه كان مبين العجز و التجاعيد اللي في وشها و نفس الموضوع عند بسمه
الماكياج كان موضح العيوب اللي في وشها
*****************************************************
من السلبيات كمان اللي ممكن متلفتش نظر حد بس لفتت نظري اوي .. بيت مرفت امين
المفروض ان ميرفت امين في الفيلم دكتوره علي مستوي راقي من الفكر و الثقافه و بتدرس مادة
حضاره في الجامعه .. و ده يتناقض تماما مع ديكور صالون بيتها اللي كان بيتسم بعدم الذوق و لا التناسق
لا التكويني و لا اللوني .. تحس و انت بتبص ان عينك مش مرتاحه ؛ تحس ان كل قطعه من الديكور منفصله عن اخواتها .. ده غير ان حصل اكتر من مشهد في بيت ميرفت امين و كلهم حصلوا في نفس الصالون
و ده اداني احساس ان الانتاج ملحقش يفرش بقيت الشقه و كانوا عايزين ينجزوا المشاهد بتاعت بيتها كلها في يوم
فراحوا واخدنهم كلهم في نفس الحته بنفس زاوية الكاميرا
**************************************************
من السلبيات .. ان كنت منتظره ان الزعيم هيضحكني اكتر من كده بس للأسف و علي رأي ناس
كانت بتتفرج معايا علي الفيلم قالولي .. احنا ضحكنا في السفاره في العماره اكتر
*********************************************************
********************************************************
من المشاهد اللي عجبتني .. هو مشهد مجلس الشعب و هو من رأي اكتر مشهد ضحكت فيه
علي الرغم من انه يحمل نفس اسلوب يوسف معاطي الساخر من الأوضاع السيئه اللي في البلد
بس مشهد لطيف و في كوميديا لطيفه و غير مصطنعه
*********************************************************
نيجي بقي للايجابيات .. اولا عادل امام مختلف من الناحيه الاباحيه شويه في الفيلم ده
يعني مفيش حاجات خارجه كتير زي عادته ؛ و برضو مختفتش خالص زي ما كانوا الناس بتقول
يعني مثلا كان في حته ملهاش لازمه خالص و هو في قافلة الفيلم لما بيتجوزوا و اللي هيتفرج هيفهم
و برضو لم يخلوا الفيلم من رجلين واحده لا بسه قصير و هو بيعلق عليهم ؛
او واحده حلوه و هو بيبصلها مش عارفه ازاي
بس في المجمل مش زي قبل كده
****************************************************
عجبني اوي .. احمد السعدني .. و ده لأنه من اللي اجتهدوا في الفيلم رغم ان مساحة الدور
مش كبيره اوي ؛ يعني علق معايا اكتر من شريف سلامه ؛ رغم ان شريف سلامه كويس
مش وحش ؛ بس الحقيقه احمد السعدني اجتهد في دوره ؛ بس يا ريت المره الجايه ياخد مساحه
اكبر من كده عشان يسبت نفسه اكتر من كده ؛ و ياريت ميزنقوهوش في نوعية الأدوار دي
زي عادة المخرجين اللي بيحولوا الممثلين لأنماط لحد ما الناس تتخنق
******************************************************
مش هتكلم عن احمد مكي لأني حاسه اني كنت بشوفه في تامر و شوقيه برضو
حلو بس مكرر
****************************************
الأغنيه من رأي هي احلي حاجه في الفيلم ؛ حقيقي عجبتني
لحن و كلمات و حتي الاستعراضات و المجموعات كان شكلها حلو في الكادر
***************************
عجبني كمان اوي الأفيش بتاع الفيلم و عدم انفراد عادل امام و ميرفت امين بالبوستر و انهم ادوا
الشباب فرصه للظهور ؛ علي خلاف ناس تانيه ناقص تطلع البوستر وشها بس من كتر الغرور
اللي عندهم .. و من راي شئ يحسب للزعيم ؛ و طبعا انا مبقصدش البوستر اللي انا حطاه
لأ اللي متعلق علي السينمات
********************************************************
في الاّخر طبعا كل اللي فات ده رأي واللي عنده كلام تاني يقول احنا مبنخافش لا مؤاخذه
هههههههههههههههههه
سلام

The Incredibles

فيلم ينطبق عليه المثل المعروف .. يموت الزمار و صوابعه بتلعب
و في نفس الوقت المثل التاني اللي بيقول .. مين فات قديمه تاه
و هي دي الفكره اللي بتدور حوالها الفيلم .. و هو بعد هجوم شديد من الناس
و حقد علي الخارقين رغم انهم كانوا بيقدمولهم مساعدات كبيره و بيقوموا بعمليات انقاذ
كتير ؛ و لكن هما كده البني ادمين لما يشوفوا حد ناجح يفضلوا وراه لحد مايدمروه
خلف و طلع نسله في نفس الصفات الخارقه بس كانوا بيحاولوا يداروا عشان المشاكل mr .incredible
و بعد تقاعده من شغلته كخارق اشتغل شغلانه مش حاببها بس فضل علي طول
يحن لشغلته الخارقه اللي هو اصلا اتولد عرفها لأنه لما فات قديمه تاه و فضلت صوابعه تلعب
******************************************
شخصيات الفيلم الأساسيه هي
اللي بيمتاز بقوه خارقه و جسم قوي و متين و رشيق mr .incredible
مراته و اللي عندها قوه خارقه من نوع تاني و هي المطاطيه جسمها بيمط في كل الاتجاهات elastigirl
بنته الكبيره اللي ليها قوه في الاختفاء و بتقدر تعمل حواليها حقل من الطاقه يحميها من اي هجوم violet
و عنده سرعه خارقه يسبق الصاروخ dash
ابنه البيبي لسه مش معروفله ايه هي قوته الخارقه انما اللي بان عليه انه بيولع نار jack jack
و هو صديق للبطل و عنده القدره علي تجميد اي حاجه قدامه frozone
في شخصيات تانيه برضو في الفيلم لطيفه جدا زي
و هي مصممة ازياء الخارقين و شخصيه تنكه اوي و تعتبر محرك للأحداث eda moda
و اّخر شخصيه هي شخصية الشرير و هو الضد للبطل اللي حدوته في الفيلم لطيفه جدا و غير متوقعه
و هو صاحب قوي خارقه متعدده sydrome
في شئ لطيف استهواني جدا و انا بدور علي صور للفيلم عشان البوستايه و هو الممثل اللي عامل شخصية مدير البطل في الشغل ؛ و جبتلكوا الصوره اهو صورة الممثل فيها شبه كبير من صورة الشخصيه
في الاّخر احب اقول ان الفيلم من انتاج 2004 و هو قصة و اخراج المخرج
اللي برضو من باكورة اعماله brad bird
ratatouille 2007فيلم جرافيكس انتاج ديزني هكتبلوكوا عنه قريب انشالله
jack jack attack 2005
عباره عن فيلم قصير تصور
لمكالة تليفون حصلت في الفيلم الأصلي بين الأم الخارقه و المربيه اللي كانت قاعده مع الولد الصغير
فكره عجبتني اوي ؛ انا كنت شفت الفيلم القصير قبل الأصلي و مفهمتش اوي و بعد ما شفت الأصلي
فهمت و لقيتها فكره لطيفه جدا
اخيرا حصل الفيلم علي جايزتين اوسكار في سنة 2005
جايزه احسن مؤثرات صوتيه للأفلام الجرافيكس
و جايزه احسن مخرج للأفلام الجرافيكس
و طبعا حصل علي جوايز في مهرجانات كتير و اترشح لجوايز اكتر
بس مش قادره احكي اكتر من كده باي باي بقي
سلام

notes on a scandal

مباراه تمثيليه شديدة الوطيس .. زي ما بيقولوا .. بين اتنين ممثلات جامدين اوي
حقيقي الفيلم اكتر حاجه فيه عجبتني هما الممثلات ؛ طبعا الفكره حلوه و نجح السيناريست
في رسم نفسيات الشخصيات ؛ و رسم المواقف المختلفه بين الشخصييتين ؛
و المخرج هايل برضو ؛ بس احتمال لو ان الفيلم مفيهوش الممثلات دول كان يبقي فيلم عادي
لأن في ما بين الممثلات اللي بيسموه الكيميا .. تحس انهم بيسلموا و يستلموا من بعض
الأحاسيس و النظرات و الأنفاس بمنتهي البراعه و الحساسيه و الانسيابيه ؛
فكرة الفيلم قائمه علي الوحده و الفراغ وبيعملوا ايه في نفسية البشر ؛ و كمان ان الوحده مش لازم
ان يكون الواحد لوحده لأ ممكن يبقي عنده عيله و اهل و اطفال بس هو وحيد ؛ و ده اللي جمع
ما بين الشخصييتين و هي الوحده علي اختلاف صورها واللي وصلت ليه كل شخصيه منهم ؛
الفيلم جديد من انتاج 2006 و كان مشارك في اّخر دوره لمهرجان الأوسكار
و اترشح لأربع جوايز منها جايزه احسن ممثله للرائعه
judi dench
و جايزة الممثله دور مساعد للممثله الهايله
cate blanchett
و كمان اترشح لجايزة احسن موسيقي تصويريه و جايزة احسن سيناريو
بس للأسف و ده شئ غريب مخدوش و لا جايزه مع ان الممثلات كانوا يستهلوا
بجايزة احسن ممثله مساعده في مهرجان دالاس cate blanchett و لكن فازت
و تورينتو في نفس سنة الانتاج
فيلم يستحق المشاهده و اللي يحب يتعلم تمثيل يقعد ياخد دروس علي ايدين
جوز المبدعات اللي في الفيلم
يالللا بقي كفايه عليكوا
سلام

corpse bride

فيلم جرافيكس هايل و فريد من نوعه سواء في الرسومات او في الفكره
مدة الفيلم ساعه و ربع متحسش بيهم من كتر ما الفيلم يشد ؛
فيلم مليان بالشخصيات و الأنماط الغريبه زي شخصية العنكبوت و الدوده
طبعا اللي هيتفرج هيفهم قصدي ؛ هو فيلم انتاج 2005
و المبهر في الفيلم هو خيال المؤلف و الفكره اللي كاتبها ؛
ده طبعا بالاضافه للموسيقي التصويريه اللي بتتسم بالبساطه و الروعه و التأثير
و كمان برع الممثلين بأداء اصوات الشخصيات ؛ و المضحك انكوا لو شفتوا
الشخصيات الجرافيك هتلاقوا فيهم شبه كبير من الممثلين اللي عملين صوتهم ؛
شخصيات الفيلم الرئيسيه 3 ؛ و الشخصيات الثانويه كتير بس تحس ان الفيلم من غيرهم
مينفعش عاملين جو بالبلدي كده ؛ ده غير بقي زي ما قولت في الأول ان رسم الشخصيات
جديد يعني الرسومات او الخطوط اللي مكونه الرسومات غريبه مشفتهاش بالشكل ده قبل كده ؛
اللي احب تعرفوه كمان .. اللي قام بصوت شخصية
او الشخصيه الرئيسيه هو ممثل انا مش بحبه اوي بس هو عامل الصوت حلو في الفيلم هو الممثل victor
؛ و حصل الفيلم علي اربع جوائز في اخراج الجرافيكس خلال 2005 و 2006 jhonny deep
في الاّخر احب اشجعكوا تتفرجوا علي الفيلم .. و ارجع و اقول انه فيلم غريييييييييييييييييييييب
اوي
سلااام

requiem for a dream

فيلم من انتاج سنة 2000؛ للمخرج الأمريكاني
Darren Aronofesky
و من رأي انه مخرج هايل و عنده قدره علي ظبط ايقاع
المشاهد و الصوره ؛ ده غير عبقرية المونتاج؛
انا شايفه ان المونتاج لعب دور كبير اوي في ان الفيلم يبقي حلو ؛
و ده طبعا احد الحاجات اللي بنفقدها في السينما المصريه النيو لوك سينما علي حد تعبيري ؛
اللي كمان حلو اوي في الفيلم الموسيقي التصويريه اللي استعمل فيها المؤلف الموسيقي
Clint Mansell
تيمه موسيقيه او جمله موسيقيه و لعب علي توزيعها حسب ما الموقف يستدعي ؛
بس اللي اضمنه للي هيتفرج هتعلق في ودنه الجمله الموسيقيه علي طول ؛
نسيت بقي من الأول اقولكوا ان الفيلم بيناقش قضيه مهمه اوي و هي المخدرات بأنواعها ؛
و اللي بيجي تحتها غير بقي الحشيش و الهروين و الكوك او الكوكايين كمان بتعتبر
حبوب التخسيس و المهدئات من المخدرات و ده اللي بيعرضه الفيلم من خلال قصص منفصله متصله
لأكتر من حد و تأثره بالمخدرات ؛ و كمان الهوس الأعلاني او الاعلامي و تأثيره بالسلب علي البني ادم؛
كمان احب اقول ان الممثلين ابدعوا و خصوصا علي رأسهم الممثله القديره اللي قايمه بدور الأم
Ellen Burstin
و هي من مواليد سنة 1932 و هي امريكانيه الجنسيه ؛ و نالت جايزة الأوسكار سنة 2001
في دورها في الفيلم ده ؛ و كمان في نفس السنه نالت جوايز احسن ممثله في
golden globe
kansas city film
phoenix film
و في العموم نال الفيلم 19 جايزه من مهرجانات مختلفه؛ و اترشح للفوز 30 مره
و اخيرا الفيلم من نوعيه افلام الدراما النفسيه اللي يدوسلك علي الأوتار
الداخليه للشرايين القلبيه و المعنويه و الدماغيه و كل الشرايين اللي انتوا عايزناها
اتمنلكوا فرجه ممتعه و مؤثره
سلاااام

the grudge 2

فيلم من انتاج 2006 و هو لحد دلوقتي
جزئين ؛ هو فيلم رعب زيه زي كتير من افلام الرعب
اللي بتعتمد علي شد الأعصاب مش المشاهد اللي بتمطر دم ؛
بس مش قصة الفيلم اللي شدتني لأن من رأي انها قصه مكرره في افلام كتير قبل كده زي
the ring 1 : 2002
the ring 2 : 2005
dark water : 2005
بس اللي شدني في الفيلم و حسيت انه جديد و هو اللي خلي الفيلم
فيه شدة اعصاب نوعا ما هو المؤثرات الصوتيه اللي انا شخصيا
مكنتش سمعتها في فيلم قبل كده بالاتقان ده و اللي توصلك الاحساس
بالقشعريره حتي لو انت مش باصص علي الصوره ؛
بس الفيلم في مجمله مش فيلم وحش و برضو مش فيلم جديد بس
انا ادي جيزه للمؤثرات الصوتيه
احب اقول كمان ان الفيلم ليه جزء انتج سنة 2003 و كان بعنوان
ju-on: the grudge


و جزء انتج سنة 2004 و يعتبر الجزء الأول بعنوان
the grudge


و الفيلم كان ليه اجزاء قديمه ليها نفس العنوان كانت انتاج سنة
1915 ؛ 1917 ؛
و الجزء التالت الحديث محطوط علي ليستة الانتاج القادم بتاريخ 2008
بس اخر حاجه احب اقولها ان اللي عايز يتفرج علي الفيلم يبقي ما يعليش
الصوت اوي لأنه مررررررررررررررررررررعب
سلام