انا هعبّي شريط00

بقالي فتره بفكر في الموضوع ده و اخيرا خدت القرار
انا هعمل شريط 00 هتقولولي يا كوكو اتجننتي
هقولكوا ليه ؟ و اشمعني انا 00 يا كوكو استني
اعقلي 00 لو سمحتوا محدش يحوشني و لا يمسك في كمي
ما هو انا كل مفتح التليفزيون الاقي روتانا عامله
مسابقه للأصوات الجميله افتح الراديو الاقي نجوم اف ام
بتقول انها بتعمل التصفيات النهائيه ما بين خمسه من الاصوات
الشابه الجديده 00 ازهق و ارجع افتح التليفزيون
الاقي اعلان 00 اذا كان صوتك او صوتيك حلو و بدك
اتغني شركه اللي معرفش ايه بتقدملك الفرصه 00
طب بعد كل ده يا تري معايا حق و لا لأ 00
ما هو انا مش فاهمه يعني كل البلد بتغني و كمان بنستورد
لحمه بيضه من لبنان تغني و برضه اخوانا الخليجيين
مش عاتقنا و كل سمكري و لا نجار و سباك معاه قرشين و لا و لاد الحته
عندهم لمولوا قرشين صدقه عشان يغني و لا الحاجه امه
كانت شايله قرشين عشان الحج و لا الجامعيه و ادتهومله و لما يبقي نجم
و يقرفنا يبقي يرجعهملها 00 يا تري هو المغنيين قليلين للدرجه دي انهم
يعملوا مليون مسابقه و مسابقه للأصوات الجديده 00
ده كده بقي و لا مرض الطاعون و الكوليرا 00
يا ساتر و عليهم اصوات يعدموها 00 بس الواحد بقي يقول اللي ليه و اللي عليه
هما بيوفروا كتير للمنتج لأنهم ما بيلبسوش هدوم كل واحده جايبه قميص نومها
من البيت و رايحه تعبي شريط و بالمره في ساعتين يضربوا الفيديو كلوب
يعني حد ركز كده مع شركه زيّ روتانا كمثل بس ؛ بتنتج
كام شريط في السنه في حين ان دلوقتي كله بينزل من النت
مش زيّ زمان كان الواحد يتابع الشرايط الجديده و يشتريها
ده انا لو هيدوني الشريط ببلاش مش هخده بصراحه اصوات عايزه
الضرب بالجزمه و بعدين الحرق في ميدان عام 00
انا احلي تعليق سمعتوا من احد المقربين ليا علي الموضوع ده
قال لي الشخص 00 ياه ده كده فاضلنا مطرب و ناخد 75 قرش
بعد كلللللللللل اللي قلته ده مش معايا حق 00
انا هسيبكوا بقي عشان اعبي الشريط
و انتظروا شريطي قريبا في الأسواق و الميكروباصات
سلام

سينما الأطفال 00

اي حد مهتم بالسينما هيعرف ان مهرجان سينما الأطفال
اللي بتقام فعلياته في القاهره سنويا بدأ فعلا من يوم 1 مارس
و أخر يوم 8 مارس ؛ و بتشارك زي كل سنه بلاد البلطيق
استوانيا و ليتوانيا اللي بيعتبروا من الدول الناجحه جدا
في سينما الأطفال الروائيه و مشاركين السنه دي ب7 افلام
مشاء الله و منهم فلمين عرايس ؛ اما السينما المكسيكيه
فكان ليها نصيب الأسد و مشاركه 13 فيلم متنوع ما بين
افلام الرسوم و الصلصال و الروائيه الطويله و القصيره
اما البلاد العربيه اللي مشاركه 00 سوريا 2 فيلم
فلسطين فيلم و ده شئ مشجع جدا و الأردن و تونس
كل واحده بفيلم ؛ اما بالنسبه لمصر ما قالوش
بالظبط عدد الأفلام المشاركه و لا نوعيتها 00
المهم ان اللي فات ده كله كان مجرد بانوراما سريعه قبل ما ادخل
في الموضوع 00 يا جماعه شاغل بالي من زمان تساؤل وهو
ان ليه مصر معندهاش رصيد كويس من سينما الأطفال؟؟؟؟؟؟؟
و انا اقصد بسينما الأطفال مش الكارتون لأن في سنه من السنين كانوا
مشاكين ببكار اللي كان يعتبر طفره في الرسوم المتحركه في مصر
انما انا اقصد السينما الروائيه القصيره او الطويله
اللي بتكون ببطولة اطفال و بتناقش قضايا اطفال
انا شايفه ان النوع ده مختفي من سينمتنا خالص رغم انه
مهم جدا و حتي بالنسبه للكارتون و الرسوم المتحركه
اغلبها مستورد و احنا مدبلجينه او ممصرين الصوت
نفسي في يوم اشوف فيلم مصري من النوعيه بتاعت
marry poppins, the little princess,
jumanji,baby`s day out,home alone
و اكيد في تاني بس انا مش فاكره ؛ معرفش
حلمي كبير و لا ممكن في يوم من الأيام
نتخلص من افلام الجزارين و الفكهانيه و بالفلوس
دي نعمل سينما اطفال ؛ ده فلسطين المحتله
مشتركه بفيلم نبقي احنا بلد الديموقراطيه
و الحريه مايبقاش عندنا فيلم واحد كل سنه؟؟؟؟؟؟؟
يا للا ما هو الواحد لازم يبقي عنده طموح
سلام

كوكوهايه وصلت 00

الحلقه اللي فاتت 00

كاكوكاكو وقف يستني كوكوهايه علي المحطه و كوكو الكميل استخبي
الحلقه دي 00
وقف كاكوكاكو علي المحطه و كانت الساعه اتنين و بدأ الوقت يمر
و كل اوتوبيس يعدي يشب كوكو الكميل من ورا الحيطه اللي مستخبي وراها
عشان يبص كوكوهايه نزلت من الأوتوبيس و لا لأ و لما ما يشوفهاش
يشاور لكاكوكاكو انها مش موجوده 00 و زهق كاكوكاكو من الوقفه و رجليه وجعته
راح قاعد علي الرصيف عشان مكانش فيه مكان علي الكرسي بتاع المحطه
و فضل كوكو يراقب الأوتوبيسات من غير ما يزهق خالص 00
و فجأه جه اوتوبيس و حس كوكو بقلبه الكميل بيدق بسرعه و بيخرج من مكانه
لما شاف كوكوهايه نازله علي السلم بتاع الأوتوبيس ؛ و قعد كوكو
يهز كناحه الكميل في الهوا جامد عشان كاكوكاكو ياخد باله انما كاكوكاكو
من التعب كان حاطط راسه بين كناحاته و سرحان و شكله كده نام علي الرصيف
و هو قاعد و فضل كوكو يصوصو و يهز كناحاته كامد و عمل لكاكوكاكو
قرد و كاكوكاكو ولا هنا و كانت كوكوهايه في الوقت ده واقفه مستنيه عشان تعدي الشارع
و جت لكوكو فكره كميله بسرعه و قعد يدور علي الأرض حواليه و لقا زلطايه
صغننه راح ماسكها و لف كناحاته جامد في الهوا بسرعه زي الطاحونه
و راح حادف الزلطه راحت خابطه في دماغ كاكوكاكو اللي راح ناطط من مكانه و اتخض
و بص ناحيه كوكو لقاه عامل يشاور بكناحه ناحية كوكوهايه
و فهم كاكوكاكو انها وصلت بس راح باصص لكوكو الكميل و شاورله اعمل ايه؟
و رد عليه كوكو الكميل بالاشاره برضو روح وراها بسرعه 00
و مشي كاكوكاكو بسرعه عشان يكلم كوكوهايه انما لسه هيندهلها راحت معديه الشارع
و ملحقش كاكوكاكو يعدي وراها و بص لكوكو لقاه بيقوله عدّي بسرعه
و عدّي كاكوكاكو بسرعه و فضل يجري في وسط العربيات و كانت هتخبطه
و في نفس الوقت كان كوكو الكميل بيعدّي برضو الناحيه التانيه معاهم
و جري كاكوكاكو بسرعه ورا كوكوهايه و لما خلاص قرب منها اوي ادّور و بص لكوكو راح
كوكو مشاورله 00 اندهلها 00 اتشجع كاكوكاكو و خد نفس كميييييل اوي
و راح نادهلها 00 كوكوهايه 00
كاكان

انقذوا الأقصي 00

من مدونة الزميله كلبوزه لكن سمباتيك

ايدكم معانا ننجح حملة الدفاع عن الاقصى اللي متبنيها الزميل

قاســـــــم أفنـــــــــدي

يقول:

بأقترح نبعث في اليوم ده (3 مارس) رسالة إلي اليونسكو لتخصيص لجنة دائمة لمراقبة والحفاظ علي المسجد الأقصى (كأثر تاريخي)وفقا لاتفاقية حماية التراث الثقافي والطبيعي أسوة بحملتهم للحفاظ علي أصنام أفغانستان وننشر نسخة من الرسالة دي علي كافة مدواناتنا ومنتدياتنا ومجموعاتنا البريدية. مع العلم أنهم بالفعل قرروا إرسال بعثة تقصي للحقائق يوم 23 فبراير

مكتب اليونسكو برام الله

b.lamine@unesco.org

مكتب اليونسكو بجنيف

geneva@unesco.org

ولو نجحنا وقدرنا نحرك الجبال بصوتنا نعمل يوم تاني للتضامن مع حقن دماء العراق فدم الانسان أعظم حرمة.ممكن أعرف رأيكم وهل دي أولوياتكم زي ما هي أولوياتي ولا أنا غلطان والأولي أشغل بالي بكريم وهالة وهند وتامر؟أفيدوني أفادكم الله________
تحديث
نص الرسالة المقترحة:
Mr. Koshiro MatsoraUnesco GMDear Sir,We acknowledge and appreciate your great efforts to protect and save the priceless human heritage all over the world. Recently, we read that a group of professional investigators has been sent by the Unesco to Jerusalem to investigate the situation of Israeli excavations at the area of Al Masjed Al Aqsa, which we have a big concern that this may affect the foundations and lead to buildings collapse for one of the most important historic elements of this area and allover the world.We do support your efforts and your investigation group and looking for assigning a permanent chamber near this area to monitor, announce and stop any trial to destroy our heritage either for political or religion reasons.Thank you

and best regards,Sincerely,

مصر من تاني 00

طبعا مش محتاجه اتكلم عن محمود السعدني لأني حتي لو اتكلمت
مش هوفيه قدره فهدخل في الموضوع دغري علي طول 00
مصر من تاني كتاب شيق و ممتع جدا مش عشان هو حواديت بتتحكي
لأ لأنه بيحكي عن فترات في تاريخ مصر لما درسوهلنا في المدرسه كانت من وجهة نظر تانيه خالص اللي هي المنمقه او السياسيه و الأجتماعيه
انما من وجهة نظر السعدني كانت من ناحيه ضد كل اللي فات
و هي من ناحية الخبايا و الدهاليز عند الصعاليق و عامة الناس
اللي كان ليهم دور كبير في الأحداث الجاريه في الفترات دي
اللي التاريخ محطش عليهم سبوت و همشهم نوعا ما ؛
بيبدأ الكتاب من دخول عمرو ابن العاص مصر و ينتهي
بفتره حكم جمال عبد الناصر مرورا طبعا في نص الكتاب
علي المماليك و الشراكسه و محمد علي و فترة الملكيه
في النهايه هو كتاب يستحق القرأه اكتر من مره لأن مره واحده
مش كفايه انك تلم كل المعلومات اللي فيه
و بالنسبه لأماكن بيعه 00 روز اليوسف ؛ مدبولي ؛
الهيئه العامه للكتاب
اي خدمه
سلام

كوكو بدأ الخطه 00

الحلقه اللي فاتت 00
كوكو طلعله ريشة المعلم
الحلقه دي 00
نام كوكو زيّ ما هو علي الكنبه قدام التليفيزيون و هو بيفكر
و لما طلعت الشمس دخلت من الشباك و لمست عينين كوكو الكميل
فتح كوكو عينيه الكميله براحه و قام و كان عنده صداع جامد اوي جوه راسه
و دخل كوكو الأوضه لقا كاكوكاكو نايم 00 فراح كوكو جنبه براحه
و قاله بصوصوه كميله 00 يا كاكوكاكو يا للا عشان نفطر و ننزل
يا كاكوكاكو 00 و كاكوكاكو زيّ ما معروف ان نومه تقيل اويييييي
زغزغ كوكو كاكوكاكو في كناحه راح كاكوكاكو قايم مخضوض
و قال 00 في ايه؟ 00 و لقا كوكو قاعد جنبه علي السرير
و بيقوله 00 يا لا يا كسلان عشان نفطر و ننزل 00
و قام كاكوكاكو غصب عنه 00 و دخل كوكو و كاكوكاكو
المطبخ و كان كوكو حضر السندويتشات و حطهم في الشنطه
و صلا الصبح 00 وقال لكاكوكاكو 00 انا عملت سانكوتشات
عشان ناكل في السكه و منتأخرش اننا نروح لكوكوهايه 00
و نزل كاكوكاكو و كوكو و قرروا انهم يتمشوا عشان
مكنش في محل فاتح يشتروا منه سبت يقعد فيه كوكو 00
و بدأوا الرحله لبيت كوكوهايه 00 و قال كوكو لكاكوكاكو
و هما بياكلوا السندوتشات و بيتمشوا 00 كاكوكاكو انا عايزه اقولك حاجه
بس متزعلش 00 رد كاكوكاكو 00 قول يا كوكو و انا مش هزعل منك يا
كميل انت يا كميل 00 قال كوكو 00 اصل انا بقالي فتره
يا كاكوكاكو بيجيلي صوصوات في ودني بتقولي ان اللي انا بعملوا
غلط و ان انا مش المفروض ادخلك وسيط بيني و بين كوكوهايه
لحسن سوري يعني انت تبقي خاين و تحبها و تحلقلي اكتر ما انا محلوق
و الصوصوات الكهريه دي عماله تغلطني و تقولي غير اللي في دماغك
بس انا اقول للصوصوات ان انا واثق في كاكوكاكو ؛ انت رأيك ايه
يا كاكوكاكو طمني انا صح و لا انت هتلعب بمنقارك من ورا
ضهري الكميل؟؟؟؟؟؟؟
رد كاكوكاكو00 ايه يا كوكو اللي بتقوله ده انت كده مش واثق فيا
انا عمري ما اعمل كده ابدا 00 رد كوكو 00
انا يا كاكوكاكو عارف انا بس كنت بقولك عشان ابقي صريح
المهم دلوقتي لما نوصل هتقف انت علي محطه الكوكوبيس اللي كوكوهايه
بتنزل فيها و هي راجعه من الشغل و انا هقف بيعيد اشاورلك عشان متتلخبطش
و لو لقي نفسك هتتلخبط شاورلي و قولها ان انت معاك واحد صاحبك
و سميني اي اسم تاني غير اسمي ماش ي يا كاكوكاكو 00
ووصلوا اخيرا بعد مشي كتيييير للمحطه و ساب كوكو كاكوكاكو و قاله
قبل ما يستخبي 00 بص الساعه دلوقتي اتنين هي بتيجي علي 2 و نص
خاليك باصصلي و اول ما هشوفها هشورلك و تبتدي تتعرف عليها
ماشي فاهم يا كاكوكاكو و لا هتنام علي المحطه 00
كاكان

تاكسي 00

كتاب 00 تاكسي حواديت المشاوير ل خالد الخميسي ؛

من رأي انه كتاب شيق و جواه حاجات كتير

تمس القلوب من جواها و احلي ما فيه انه بلغه

دارجه قريبه من الشعب يعني لو اي حد من اي طبقه

قراه هيفهمه ؛ بس انا كان ليا اعتراض بسيط علي الكتاب

او يعني هو مش بسيط هو مهم و اساسي و هو استعمال

الألفاظ الخارجه 00 انا كواحده من الناس لما بقرا كلام

خارج بتفصل عن المود اللي الكاتب حطني فيه

يعني من رأي لو ان خالد كان لجأ الي طريقه اخري غير

انه يكتب الألفاظ زي ما سمعها كان الكتاب هيكون كامل من

مجاميعه 00 و كان في طرق كتير انه يعبر بيها عن اللي

عاوز يقوله زيّ الطريقه اللي منتشره بين كتير من المدونين

المحترمين و هي التييييييييييييييت مثلا 00

بس بعيدا عن الموضوع ده انا شايفه انه هيكون من الكتب

المهمه اللي صدرت الفاتره اللي فاتت

تحياتي لخالد الخميسي علي الفكره الجديده من نوعها

ملحوظه 00 الحته دي عشان البلوجاوي العزيز اللي ماينفعش

نرفضله طلب ما هو اخونا و دي من

حقوق البلجويه عليه برضو ؛ الزميل

سفاح كرموز

طلب مني مكان بيع الكتاب ؛ هو طبعة مكتبة الشروق

فهتلقوه هناك

سلام