احاسيس جديده و متناقضه

بدأت من حوالي اسبوعين الشعور بأحاسيس متناقضه متضاربه

لم اشعر بها من قبل، شعور غريب جدا احساسي بكائن اّخر يتحرك

في احشائي شعور في اوله يخض الي ان اعتدت عليه

حتي بدأ فضولي و رغبتي في معرفه هو الكائن لما بيتحرك بيكون بيعمل ايه؟؟؟

يا تري بيهرش، بيعطس، بيتقلب عشان جنبه اليمين نمل

و من احاسيسي الي هتموتني هو شعوري بأني هفشل في التعامل مع هذا الكائن

الصغنن الكميل لما يجي كمان 3 شهور علي وش الدنيا

احساسي اني مش هفهم هو بيعيط ليه؟؟؟

و لا امتي اغيرله و لا ازاي هغيرله، امتي بردان امتي فرحان

ممكن مثلا تروح علي نومه و مسمعش لما يعيط

ممكن لخبطتي ديه تخليني خيبه و معرفش احافظ عليه؟؟؟

طب يا تري انا القراّن اللي بقراه كتير بصوت عالي و بسمعه اكتر من الأول عشان يوصله

يا تري فعلا بيسمعه؟؟؟؟؟؟؟؟؟؟؟

طب هقدمله في مدرسة ايه؟؟؟؟

طب هياخد دروس و لا لأ؟؟؟؟؟؟؟؟

طب......طب....طب

الخ الخ الخ من التساؤلات اللي شغلالي مخي بدري و من غير داعي و انا عارفه كده

و برضو غصب عني دماغي مش مريحاني

شكلي صدعتكوا

سلاااااااااااااااااااااااااااااااام

2008 Movies (1)

حصل علي 8 جوائز اوسكار 2009 منها: افضل فيلم، افضل موسيقي تصويريه، افضل كلمات اغاني
افضل اخراج
و من رأي انه كان يستحق جائزه افضل ممثل، لأن حقيق الممثل اكثر من رائع رغم سنه الذي لم يتجاوز ال19
فيلم جيد جدا ، جديد من حيث التكنيك و القصه ، فيلم هندي و لكن سا عتين وربع مش 8 ساعات
فيلم ثري جدا فنيا رغم ضاّلة الانتاج ..... تعالوا شوفوا ياللي بتصرفوا ملايين علي افلام ملهاش اي لازمه

فيلم غنائي كوميدي اجتماعي

الجديد في الفيلم انه لم يتم تأليف اغاني خصيصا للفيلم و لكن استعانوا بأغاني فريق

The Abba

فريق السبعينات الشهير و يقوم جميع الممثلين بأعادة غناء هذه الأغاني اصواتهم

و من المبهر طبعا انك تسمع ممثلين بيغنوا بهذة الاجاده و خاصة الرائعه

Meryl Streep

فيلم اثاره من انتاج 2008

فيلم جيد جدا لممثل قدير اكثر من هايل

Liam Neeson

قصة اب تخطتف ابنته في فرنسا و يسافر للبحث عنها في 48 ساعه

فيلم جيد يستحق المشاهده

رغم عدم استلطافي للممثله الأمريكيه

Angelina Jolie

و ده لأني اري انها ضعيفه فنيا علي كل المستويات، الا انها اجبرتني علي تغيير رأي فيها

من خلال الشخصيه الحقيقه التي تلعب دورها في هذا الفيلم، و هي بالفعل رشحت لجائزة

افضل ممثله في دور رئيسي اوسكار 2009 و لكن لم تحصل عليها

تلعب دور (كرستين كولينز) مديره في احد سنترالات في لوس انجلوس سنه 1928

و تعود يوما ما الي البيت لتجد ان ابنها الوحيدالبالغ من العمر 9 سنوات اختفي، تظل في حروب مع الحكومه

علي مدار سنين لمحاولتهم اقناعها بأن الطفل الذي وجدوه و سلموه لها هو ابنها

فيلم اكتر من رائع و يستحق المشاهده

سلااااااااااااااااااااااااااام

Horror 1

فيلم من انتاج 2008

يؤسفني اني اقول انه فيلم لا قصه و لا مناظر فيلم مالوش معني

و كل الناس بتموت في اّخر الفيلم حتي اعتقد المخرج كمان

فيلم هايف و مقرف، و بلاش افسر اكتر من كده يا حضرة البيجباشي

ما يميز الفيلم هو التصوير و الاضاءه اللي معتمده طول احداث الفيلم

علي تصوير و اضاءة كاميرا هاندي كام

فيلم من انتاج 2009

يتناول الفيلم قصة فتاتان يفقدان امهما في حريق مروع مما يسبب للأخت الصغري

مأساه نفسيه تقضي علي اثارها 9 شهور في مصحه نفسيه بعد محاولة انتحارها

و تبدأ عقدة الفيلم بعد خروجها من المصحه و الالتقاء بصديقة ابيها الجديده

اللي عجبني في الفيلم... الممثله ، و انه غير متوقع بالمره

فيلم من انتاج 2008..... انتاج شركه معروفه بانتاج هذه النوعيه من افلام الرعب

هو فيلم جيد فنيا، تدور احداثه حول تيمة الانتقام و ان الدنيا دواره و هتاخد جزائك

مهما لفت الدنيا و دارت السنين

فيلم ممتع ما يميزه عدم وجود اي مشاهد دم رغم وجود مشاهد للقتل

سلاااااااااااااااام

واحد - صفر

عند وصولي الي قاعة السينما لم اتخيل هذا الاقبال الجماهيري علي الفيلم لدرجة اني لم اجد مكان

الا في الصفوف الأماميه و ذلك لامتلاء الصفوف الخلفيه عن اّخرها

و من رأي ان (كامله ابو ذكري) مخرجه متميزه جدا مالكه لأدواتها متطوره فنيا من فيلم لفيلم

ما استرعي انتباهي هو ان سيناريو الفيلم يشبه في اطاره الخارجي سيناريو فيلم(كباريه) الذي

يعرض كواليس حياة بعض الأشخاص التي لا يتاح لنا فرصة رؤيتها بالعين المجرده

هي قصص للعديد من الأشخاص في تدور كلها في يوم واحد و تنتهي بفوز مصر في المباراه

و هنا ينسي كل شخص متاعبه و مشاكله و يفرح بالفوز مخلفا وراءه يوم قاصي ملئ بالصعاب

نجحت السيناريست و المؤلفه (مريم ناعوم) في حفر الشخصيات بملامحها و نفسيتها و تفاصيلها

الداخليه و الخارجيه بصوره رائعه و هو الذي انعكس بدوره علي المخرجه في تنفيذ هذه التفاصيل علي الشاشه

ما يميز الفيلم شيئان من وجهة نظري

اولا: وصول الفيلم الي قاع المجتمع بصوره مختلفه عن العديد من الأفلام التي تعرضت لنفس المشكله من قبل

لم يقتصر الفيلم علي تقديم مشاكل الطبقه المعدمه و الكادحه فقط، بل عرض بعض مشاكل الأشخاص

من الطبقه العليا

ثانيا: تستحق المخرجه التقدير لمجهودها الواضح جدا مع بعض الممثلين اللي يعتبروا في احسن صورهم الفنيه

حتي الاّن مثل : انتصار، زينه، احمد الفيشاوي، نيللي كريم

اخيرا، تضاربت الأراء في الفيلم مابين هايل و سئ و انا انتمي للفريق الأول

مستنيه رأيكوا

سلاااااااااااااااااااااااااااااااااااااااااااام

اّخر خدمة الغز...... علقه

اّخر خدمة الغز...... علقه

انا اتحلقلي يا رجااااااااله ..... حلقه معفنه الصراحه .... بس بكرامتي برضو اوعوا تفتكروا

ليه يا كوكو يا كميل هو فيه حد يقدر يحلقلك ريشك الكميل ده؟؟؟؟

اه هو ده اللي حصل، و ادي الحكايه من طأطأ لسلاموا عليكم...... عليكم السلام

كتبلي الدكتور علي شهاده مرضيه بأسبوعين نظرا لظروفي الصحيه المضطربه

التي تستلزم الراحه لفتره، قدرت بطريقه ما اني اوصل الشهاده للشركه اللي بشتغل فيها

لاثبات اني في راحه بأمر طبيب

و كانت المفاجأه لما جالي تليفون بعد يومين من وصول الشهاده الشركه من مدير الشئون

الاداريه يبلغني فيها انهم قبلوا استقالتي و ان الشهاده الطبيه مرفوضه

و طبعا ما كان علي الا اني قلتله - مفيش مشكله حضر الاوراق و المستحقات و اتصل بيا

بس قعدت مع نفسي اتأمل ياه ه ه ه ه ه قد كده اصحاب رؤؤس الأموال معندهمش انسانيات

بتاتا، و لا عشان الأزمه الاقتصاديه اللي الكل بيتحجج بيها خلت الناس بتتحكم في مصدر

رزق عائلات، انا مش راجل مسؤل عن عيله و عن اكلها و شربها و مصارفها

فالموضوع مش فارق معايا كتير، بس اللي فكرت فيه المسؤؤلين عن عائلات يعملوا ايه

لما فجأه يلاقي نفسه في الشارع، و ليه عشان هو مبقاش محتاجك فيبتلكك لك

مبيفكروش هيروحوا من ربنا فين؟؟؟؟؟؟؟؟؟؟؟؟؟

حقيقي علي رأي المثل

اّخر الشغل في شركة (ا.ف) .... حلقه

سلاااااااااااااااااااااااااااااااااام

Doubt

فيلم من انتاج 2008 ، يضم الفيلم مجموعه من الممثلين -الجامدين جدا- ينتمي الفيلم في تصنيفه

الي الدراما الاجتماعيه الغامضه، و ده حقيقي لأن الفيلم تعلوه حاله من الغموض اللي نجح المخرج

في توصيلها، يهتم الفيلم بقضيه هامه جدا و هي سقطات الرهبان و الراهبات و ممرورهم بظروف

و تجارب تكشف عن نواقص بشريه طبيعيه جدا -و ده لأن محدش معصوم من الخطأ-في مدرسه

كنسيه تتولي ادارتها الأم الكبري ذات الشخصيه القويه المتسلطه اللي ظهرت اول الفيلم دقيقه

علي اقل التفاصيل غير رحيمه بالمخطئ شكاكه الي اقصي الحدود مما جعل علي الجانب الاّخر

تلاميذ المدرسه ان يميلوا كل الميل ناحية قسيس وواعظ الكنيسه الذي يعتبر شخصيه ضد

لها مما يخلق الصراع الدرامي بين الشخصيتين مما يجعل الراهبه الأم تتصيدله الأخطاء

و هنا تأتي عقدة و حبكة الفيلم و هي (الشك) و هو ما يحمله اسم الفيلم ، الشك في المحيطين

لدرجة تصديق ما في رأسك دون اثباتات

الغريب ان الفيلم رشح لنفس خمس جوائز في مهرجان اوسكار و جولدن جلوب ،ولم ينل اي جائزه في المهرجانين

مع ان من رأي ان ممثل دور القسيس

Phillip Seymour Hoffman

كان يستحق جائزة احسن ممثل بجداره و التي رشح اليها بالفعل

و ايضا الممثله البارعه القديره في دور الراهبه الأم

Meryl Streep

تستحق جائزة احسن ممثله في دور رئيسي و اللتي رشحت لها ايضا

اما الممثله البارعه اللي ظهرت في مشهدين بس ممثله غير معروفه اسمها

Viola Davis

رشحت الممثله لجائزة احسن ممثله في دور مساعد و الحقيقه انها تستحقها مع وسام الشرف

الجدير بالذكر ان الفيلم حصل علي العديد من الجوائز في مهرجانات اخري في امريكا و انجلترا

اشجعكوا تتفرجوا

سلاااااااااااااااااااااااااااااام

اهو نوايا .... تسند الزير

اهو نوايا .... تسند الزير

من كام شهر كده اسعدني حظي ووقفني ربنا بالحصول علي الوظيفه الحكوميه

الحمدلله ، اللهم لا اعتراض، و بقيت اقبض الشهر و اشكر ربنا و ابوس

ايديا وش و ضهر، لغاية ما جيت اقبض اّخر شهر و بالصدفه كنت بقبض انا

وواحد زميلي و كشف الرواتب قدامي فلفت نظري ان مرتبي ازيد من مرتب

زميلي باتنين جنيه بحالهم بس قلت عادي بتحصل

و فوجئت بالصراف بيقلي ... اكيد حضرتك متجوزه مش كده؟؟؟؟

قلتله ... اه سلامة الشوف بس ليه يعني؟؟؟؟؟

فرد علي.... ما هو اصل مرتب حضرتك ازيد اتنين جنيه من مرتب الأستاذ- و شاور علي زميلي

فاترسمت علي وشي ابتسامة بله من اللي هو منغولي ده و قلتله... لا والله

و رحت لفّه ناحية زيميلي و قلتله .... ياللا يا سيدي شد حيلك و اتجوز عشان تزيد اتنين جنيه بحالهم

******************************

ههههههههههه........ هههههههههههههههه

يا بختوا المتجوز... هيغير ستاير البيت ، و يشتري بدل كيلو لحمه يشتري اتنين او تلاته

و اهو برضه ممكن يدخل قتاة الأوربيت برضو ما يضرش، ده مرتبه زياده اتنيييييييييييييييين

جنيه يا اخوانا ...... لوي لوي للوي لوي

و اهو علي رأي المثل

اهو اتنين جنيه .... يسندوا المتجوز

سلاااااااااااااااااااااااااااااااااااااااام

الست قنبله موقوته في الاسلام

المقال ده منقول عن واحده صديقتي

كتبته في (نوت) علي الفيس بووك

و حبيت اشاركه معاكوا بعد موافقتها طبعا

***********************************

ازيكوا انا اول مره اكتب نوتس بصراحه حصلى النهارده استفزاز غير عادىسمعت عن طريق الصدفه شريط لمحمد حسين يعقوب و كان الموضوع عن ( الاستعصام عن النساءءءءءءءءءءءء ) و بيخاطب الرجاله بيقولهم يا اخى الست دى عياره عن قنبله موقوته احذر منها، حتقولى ازاى يا مولانا اقولك ازاى اولا اوعى تكلم واحده ست ( و الله العظيم قال كده باللفظ ) اوعى تختلط و لو حتكلمها تكلمها من وراء حجاب ( طيب هوا حيجيب الحجاب دا منين لو هوا فى مصلحه حكوميه مثلا و بيتعامل مع موظفه )ثانيا متسلمش على اى واحده ست و تقول انها مدتلك ايديها و لو مديتلك ايديها و انت كسفتها دى سنه ( ازاى يقول ان الكسفه دى سنه اكيد الرسول عليه الصلاه و السلام مكسفش الست بس اعرض عن انه يسلم بمنتهى اللباقه و حسن المعامله مش بالكسفه اللى خلاها الشيخ سنه )و يكمل كلامه ان الست دى مجرد نقمه فى المجتمع و حكى عن انه مره ركب اتوبيس و لقى واحده ست واقفه قدامه وواحده واقفه وراه و واحده واقفه جنبه و حب يهرج يعنى العدو محاوطنى من كل اتجاه يا اخونا النساءءءءءءءءء دول بلاوى سوده (وحيات ربنا قال بلاوى سوده)و بعدين ادى افتاءه كده عجيبه اول مره اسمعها ان الست اللى جوزها يزنى هيا تشيل وزر زيه بالظبط و تدخل النار قبله كمان مش قادره اصدق يا اصدقائى ازاى يكون انسان زباله و خاين و مراته ست محترمه جدا و تدخل النار قبله ازاى يفتى فتوى زى دى بجد انا مضايقه جدا من صوره الاسلام قدام الناس اللى بتسمع ازاى تبقى النظره للراجل اللى بيعمل اى حاجه غلط متعلقه على شماعه الست اللى هيا فى رايه مش مفروض تخرج برا البيت اصلا و اشار بعد كده ان فى مدرس ثانوى جه سأله انه يدرس فى مدرسه ثانوى بنات قاله اياك حرام حرام ابتعد عن البنات و السيدات و لا تخالطهم و لا تكلم حتى زملائك فى الشغل حتى لو كنت بتوعظها، حسيت فجاه انى كائن جربان مش مفروض حد يقرب منه الله يرحمه الشيخ الشعراوى اللى كان بيتكلم بمنتهى الحب و السماحه مع اى حد راجل و ست حتى الستات المتبرجات من وجهه نظره كان بيقعد معاهم و يتكلم علشان هوا ده رجل الدين الصح مش الراجل اللى انا سمعته النهارده ايه رأيكوا فى اللى قلته دا و ربنا يعلم انى متجنتش عليه فى ولا كلمه و كل كلمه قلتها على لسانه و الله العظيم هو قالها

سلاااااااااااااااااااااااااااااااااااااااااااااااااام

الشنطه تساوي كام عيله

وضعني قدري صدفه امام احد المجلات الهايفه اللي كلها صور الناس

اللي بتعمل بارتي و اللي بتتجوز و اللي بتتخطب و الحاجات اياها

اكيد عارفنها، و لكن مش ده المهم المهم و اللي لفت نظري لدرجة التتنيح

هو خبر صغنن و كميل بيقول: ان الفنانه (هيفاء وهبي) تقتني شنطة ايد

مصنوعه من جلد التمساح و لا يوجد منها الا عدد 3 شنط في العالم

و يبلغ ثمن هذه الشنطه 150 الف يورو اي ما يعادله بالجنيه المصري

مليوووووووووووووووووووون جنيه

تفتكروا الشنطه دي تأكل كام عيله عندنا كام سنه؟؟؟؟؟؟؟؟؟؟؟؟؟؟؟

بزخ و ترف مفيش كده

سلااااااااااااااااااااااااااااااااااااااام

خلطة فوزيه

شجعني حصول الفيلم علي جوائز علي عدم التردد في مشاهدته بالاضافه لاقتناعي
بجودة سينما / مجدي احمد علي ، لا اخفيكم القول اني توقعت فيلم افضل مما شاهدت
و لكن في المجمل هو فيلم -حاله- مش قصه لو جاز التعبير
نجح المخرج في خلق حاله اجتماعيه واقعيه تتلون ما بين المرح و الحزن و الألم و السعاده
و التوتر و الا مبالاه احيانا بما يدور في هذا الحي العشوائي المبني من طوبه متهالكه و اخري اختها بالظبط متهالكه برضو
نجح الممثلون في اداء ادوارهم، الا مجدي فكري الذي لم يخلع عبائته المعتاده في الاستظراف
و الاستخفاف و التمثيل بصوايع رجليه لقناعته انه ممثل محصلش بس خدعوه فقالوا
و جاء وجهه نجوي فواءد المشدود علي اّخره لدرجة انك تحس و هي بتتكلم ان مابين لحظه
و التانيه هينشق اجلد للكشف عن جمجه متهالكه، بس كانت متسكنه في دورها الي حد كبير
ما اّخذه كسلبيات علي المخرج هو انه لجأ في مشهدين الي استخدام خدعة الجرافيك
مما افقر المشهد قوته الدراميه و فصلك عن حادثه مروعه و هي موت ابن الهام شاهين الأكبر
من المحتمل ان المخرج لجأ للخدعه قاصدا ما وصلني من احساس بالبرود و تخفيف من وطأة
المأساه، بس انا كمتلقي كنت هستمتع اكتر بأستقبال الحدث كما هو
و لكل شيخ طريقه

سلااااااااااااااااام

بيان هام من السلطان كوكو الكميل

يا اهل العشه الكميله و العشش الجيران اسمعوا و عوا

تك تتك تك تك

يتشرف سمو السلطان كوكو الكميل سلطان العشش الكميله

اطال الله عمره و مد في منقاره و طول في ريشه.. هاي هي

ان يعلنكم بخبر كميل كمال ملوش مثال

و هو انه يحمل في احشائه الصغنونه ولي العهد يوصله الله الي أرض العشه

بالسلامه و يكون له سند و عون علي تحمل صعاب الدنيا

و بهذه المناسبه الكميله اصدر السلطان كوكو الكميل فرمانين كيملين ينصان علي

اولا : ان يتكثف الدعاء ليل نهار صيف شتا بأن يجعله الخلف الصالح انشالله لجلالته

ثانيا : ان يتجمع جميع اصحاب العشش المجاوره و عشش السند و عشش الهند علي

اقتراح اسامي من الكوكوهات الذكور و الكوكوهات الاناث و ذلك حتي يتمكن سموه

من انتقاء اسم يليق بسمو ولي العهد

و اخيرا ... عقاب من يتهرب من هذا الواجب الوطني الكميل .. الجلد ببقسماطه بسمسم

مئة قطمه ...قصدي مئة جلده

و الحاضر يبلغ الغائب

يا اهل العشه الكميله تك تتك تك تك

سلااااااااااااااااااااااااااااااااااااااااااااااام

كلريكاتير ساخر للدكتور شريف عرفه

وصلتني هذه المجموعه من رسومات و الكاريكاتير و عجبتني جدا

بس هل يا تري الدكتور/ شريف عرفه صاحب هذه الرسومات

هو هو مخرج السينما

اللي يعرف يفيدني

و اسمع رأيكوا في الرسومات و خاصة رسامين الكاريكاتير الفنانين و علي رأسهم

فناني المفضل ياسر حسين

بالمانسبه صاحب هذه الرسومات ليه موقع خاص بيه تحت الانشاء في اللينك ده

سلاااااااااااااااااااااااااااااااااااااااااااااااااااااااام

رمضان مبروك ابو العلمين حموده

رجوع مشرف لمحمد هنيدي بعد اّخر افلامه التي افقدته الكثير

من معجبينه و اولهم انا، فيلمه الجديد تظهر فيه بصمات وائل احسان

المخرج المتميز و اللي كانت احد الأسباب الجوهريه في تميز الفيلم ايضا

يتناول الفيلم قضيه هامه جدا في مجتمعنا حاليا الا و هي التعليم

و المقارنه ما بين التعليم الخاص و تعليم الأرياف او المجاني

و قضيه جهل الأجيال الجديده للغتهم الأم و التعامل بالانجليزيه او في معني اّخر غياب الهويه

و يوازيه خط درامي اّخر متعلق بالمغنيات الشباب و تعلق الشباب بيهم

لدرجة اهمالهم دراستهم و الاتجاه احيانا لطرق غير سليمه

*************

اجاد محمد هنيدي رسم تفاصيل الشخصيه الي حد كبير

و حاول جاهدا انه مايجريش خلف الافيه حتي لو رخم و لكن اختيار

الافيهات في الفيلم الي حد كبير تعتمد علي افيهات حركيه او افيه الموقف اكتر من لفظيه

**************

سيرين عبد النور ليست بالسيئه زي ما كنت فاكره و لكن الي حد كبير لطيفه

**************

ما اخذه علي الفيلم هو.... فكرة ان التلميذ يحب المدرس اللي بيضربه و بيشبشبله

لم يعرض الفيلم نموذج لطالب مجتهد كما عرض العديد من النماذج السيئه

طبعا لأسباب ما كلنا عارفنها يتساوي في المعامله ابن الوزير و ابن الغفير

و هو ما يدعو للضجر في بعض مناطق من الفيلم

************

في المجمل فيلم حلو استمعت مدة ساعتين المشاهده

و اتمني ان هنيدي يرجع زي زمان لمستواه من تاني

**************

سلااااااااااااااااااااااااااااااام

انهم يقتلون الأطفال

في عدد امبارح من جريدة الأهرام العدد رقم 44595 كعادة كل يوم سبت

قرأت (تحقيق السبت ) بقلم (عزت السعدني) اللي انا شخصيا بعتبره من الصحفيين

المحترمين و ذوي القلم خفيف الظل و الجاد في نفس الوقت

بس السبت ده غير كل سبت، المقاله كانت تحمل كم من المعلومات التاريخيه و الحقائق ايضا

عن دولة اسرائيل في اطار الأحداث الحالي

اهي المقاله عندكوا هنا انهم يقتلون الأطفال- عزت السعدني
ادخلوا علي اللينك و اضغطوا علي الصوره للتكبير

و احب اسمع اللي في نفسكوا، بس وحياتكوا بلاش تلبيخ عشان انا مش حمل قفا واحد :(

و كمان احب اشكر الزميل المدون العزيز محمد حمدي

عشان هو اللي عمل المقاله علي شكل صوره

لتسهيل فتحها و ده لأنه اكتشف انه تقريبا

جريدة الأهرام بتحدث يوميا علي نفس اللينكات

فاللينك كان بيفتح مقاله تانيه خالص غير اللي انا قصداها

ميرسي يا استاذ محمد

سلااااااااااااااااااااااااااااااااااااااام

ناس في طريقي و مشاهد ملخبطه

المشهد الأول: ليل داخلي

حوار بيني و بين اثنان من الأشخاص علي شخص تالت كان قاعد و مشي

س: مقموس مني مش باين عليه ؟؟؟

ز: يعني... ليه؟؟

انا : (مفيش رد) صمت تام

س : يتفلق هو صحبي و حبيبي و انا بحبه فنيا و شخصيا بس انا قلتله اني مش هسهر تاني

انا : رد فعل مني بنظره - ما معناها يعني ايه هسهر؟؟؟؟

س : اصل خلاص انا اخدت قرار اني اتغير، و بعدين من يومين كنا سهرانين

و قعدت معاه شويه صغيرين و دفعت فلوس و قمت روحت، و بعدين هو رجع تاني

و صرف 2000 جنيه .... هي المسأله مش مسألة فلوس هي القضيه

ان انا مش عايز اسهر ما انا زمان كنت بدفع و بسهر ، بس دلوقتي

خلاص (يوجه كلامه ليا) اصل انا زمان كنت بسهر معاه سهرات من اللي هي يعني

بس انا اخدت قراري ان انا اغير اتجاهي و اغير من نفسي

يقوم هو صاحبي يجي بدل ما يشجعني اتغير و يبقي مبسوط يديني بوزو يزعل

انا : لأ ما يصحش - و من جوايا بقول ربنا يثبتك و يبعد عنك اصحاب السوء

****************************

المشهد التاني (مؤخر حيث انه حصل في الترتيب قبل اللي فوق) :ليل خارجي و داخلي

انا في الميني باص علي كوبري اكتوبر، اقزقز بعض من السوداني الأسواني الملهلب

اللي كان سخن و جميل ، و سرحانه بفكر في عشرين حاجه

و فقت فجأه علي صوت السواق و محصل التذاكر

الراجل خبطه ، يا لهوي الراجل مات

في نظرتي من الشباك الي حيث تتجه كل انظار الركاب و جدته مسطح ارضا و لا حراك

و ميني باص تاني واقف و الناس حواليه في محاولات لاكتشاف الراجل قابل وجه كريم و لا

لسه مش ميعاده مجاش

بس كويس اهه الميني باص اللي خبطه وقف

اللهم استرنا فوق الأرض و تحت الأرض و يوم العرض عليك

**********************

المشهد الثالث :( ليل داخلي) في الترتيب قبل المشهد الأول و بعد الشهد التاني

في اشارة ميدان التحرير في انتظار الفرج، و ظهر علي الساحه فجأه

بائع مناديل يظهر عليه اثار المرض العقلي، و مش قادر يصلب

طوله لاصابته بعيب في قدميه يجعل المشي بالنسبه له معاناه

لفت نظري واحاسيسي دون تردد طلعت اللي فيه القسمه

و فجأه تعثر الراجل و سقط ارضا و فورا نزل الراجل اللي في العربيه

اللي قدامنا و ساعده علي الوقوف و كل ده و انا معاه بروحي و مشاعري

و معاناتي ايضا، و اللي زاد و غطي اني لما وصلت و مديت ايدي بالفلوس

اصر اني اخد كيس مناديل وانا كنت ناويه اساعد وبس بس اصراره

و توسلاته في اني اخد كيس المناديل خلاني احب الراجل ده اكتر و اكتر

*************************

المشهد الأخير: ليل داخلي

دخلت البيت في حاله من الذهول و الشرود مش عارفه افكر في انهي مشهد فيهم

دلخت لقيته فاتح الجزيره ....... فزادت معاناتي و صراعي النفسي

بشهداء غزه

سلاااااااااااااااااااااااام حزيّني