Wednesday, November 26, 2008

فنتازيا الجنون ......... مجانين مجانين

صوره لأبطال العرض (علي قد موبايلي بقي)اي خدمه


ادعوكم يا اصحابي الكيملين و بقلب جامد لمشاهدة العرض المسرحي
(فانتازيا الجنون)

حقيقي يا جماعه عرض يستحق المشاهده-هو مش اسمه جنون ده جنون بجد-الشباب باذلين جهد هايل
كلهم خريجين معهد الفنون المسرحيه،و ده الجميل انك تتفرج علي فن جيد
من ممثلين محترفين مش معروفين و لسه لم تمرضهم اضواء الشهره
فبيفّنوا علي حق، اتفرجت علي العرض مرتين و في المرتين اتبسط جدا
فكل اللي بيحب مشاهدة المسرح و مشاهدة فن نضيف بجد يروح يتفرج
منها تشجيعا للشباب بتذكره تقريبا ببلاش و كمان فرصه الواحد ينضف عينيه
بالفرجه علي فن بصحيح
و ده لينك لمقالة الناقده امال بكير في عمودها الاسبوعي شاهدت لك جريدة الأهرم

التفاصيل
اسم العرض: فانتازيا الجنون
مكان العرض: مسرح السلام (شارع القصر العيني) قاعة الشباب
زمان العرض: الساعه 9
مدة العرض: ساعه و ربع
سعر التذكره: 5 جنيه و عشره جنيه
يوم الراحه : الثلاثاء



ياللا روحوا شجعوهم و اتبسطوا .... و اللي عايز يضحك هيلاقي و اللي عايز يزعل برضو موجود


سلاااااااااااااااااااااااااااااااام

26 comments:

محمد حمدي said...

بوست جميل يا كوكو

انا الصراحه بحب العروض الى بيعملوها الشباب عموما .. بيحسسونى انهم لسه متلوثوش بدخول راس المال فى الانتاج السينمائى والمسرحى

تحياتى ليكى

AHMED SAMIR said...

شكله كدة عرض مسرحي جااااد وممتع
لولا ظروف السفر كنت رحت والله
تحيااااتي

koukawy said...

محمد حمدي .... طب ياللا روح اتفرج و اكتبلنا بوستايه حلوه كده

Yasser Hussein said...

اتمنى انه يستمر عرضه لحين نزولي مصر
:)

MONDAHESH said...

جميل قوي اهتمامك بنقل حاجة زي دي في مدونتك

اكيد ان شاء الله هحاول احضره في خلال الأسبوع ده


تحياتي

sera26 said...

العرض بجد جميل جدااااااااا
انا دخلته و شوفته فعلا انبسط اوى

انت تسال والكمبيوتر يجيب said...

اهلا بك ...ننتظر تعليقاتك على ما نكتبه من بوستات فى مدونتنا ونذيع الموضوعات والتعليقات فى حلقات برنامجنا ويوجد

بعض الحلقات فى بوكس الأرشيف على اليسار يمكنك الأستماع الى اى حلقه فيها
برنامجنا يذاع يوميا صباحا تسعه وعشره على اذاعة البرنامج العام اى الأذاعه الرئيسيه لمصر عدا الجمعه ويوجد رابط فى

موقعنا تضغط عليه وتنتظر وقت الأذاعه فتسمعنا الرابط الى اليسار تحت الساعه والموقع هو
http://dear.to/cairo
لو زرته ستعرف كل شىءعنا وعن ما نفعله ...صوت وصوره
المدونه
http://netonradio.blogspot.com

koukawy said...

مندهش .... طب ياللا لما تروح قولي رأيك

koukawy said...

شيماء .... بجد اتفرجتي ؟؟؟؟

وائل مصطفى said...

عرض رائع للمسرحيه

نحاول نلاقى وقت ونشوفها ان شاء الله

ارق التحيات

يا مراكبي said...

فكرتيني بمسرحية رائعة جدا كان إسمها بالعربي الفصيح من تأليف لينين الرملي وإخراج محمد صبحي وكانت في سنة 1993

كان كل أبطالها من خريجين المعاهد المسرحية وكانت أروع مسرحية شفتها في حياتي على الإطلاق .. لدرجة إني رحتها مرتين أو تلاتة

للأسف ما إتسجلتش فيديو .. تخيلي؟

الميكروباص said...

بقالي 10 سنين لم ادخل السينما ولم اشاهد مسارح
حتى هذه الأيام لا اشاهد أفلام من كثرة التخلف العقلي
لكن أكيد طالما قلتي ان العرض محترم فأكيد انه حلو
لي واحد صديقي مخرج ودائما ما بيقولي ان العروض اللي فيها ناس مجهولين -أو يعني ممثلين صغار- بتبقى معجزه

koukawy said...

يا مراكبي.... ما هما ما يصوروش الا المسرحيات الواقعه و الهشك بشك عشان يبسطوا الناس و يفرفشوهم في العيد
****************
لورانس العرب ... صاحبك ليه حق
انا بحب اتابع مسارح الشباب عشان اشوف الناس الفنانين الحقيقيين
و هما دول المحترفين بجد مش الهبل اللي بنشوفه

اقصوصه said...

من الاسم مبين ان العرض غريب

شكرا على التدوينه

كل عام وانته بخير

قلم رصاص said...

مدونتك رائعه

ربنا يوفقك

وكل عام وانتم بخير

Diyaa' said...

ليكي جزيل الشكر وصدقيني أول ما هقدر أخد أجازة من الشغل المؤقت بتاع اليومين دول هبقي أروح ..بس أعرف مكان المسرح الأول :$

عموماً جيت عشان أقولك كل سنة وإنتي طيبة ويا رب يكون عيد سعيد عليكي
ومش هوصيكي علي الإعتدال في أكل اللحمة :))))))
وحشتني المدونة علي فكرة

وبعدين ليه كاتبة أصحابك الكيملين ؟:)

يلا سلاااااااااااااااااااااام

Diyaa' said...

واللي هيشجعني لو جاتلي فرصة ..للأسف هشتغل في العيد بالمناسبة :( ..إن فعلاً العيال دول بيمثلوا لمجرد إنهم يوصلوا معني معين ليس إلا وواخدينها جد مش باصين علي الموضوع من فوق وواخدينها تجارة..

وفي حاجة لفتت إنتباهي في التعليقات..إن المسرحية اللي عجبت المراكبي مش اتسجلت...وردك كان ناقص عليه.لأن أي معني ممكن يشغل تفكير الناس ويحركهم ويمكن يفوقهم مش مطلوب ..المطلوب بس عينة اللمبي وهيفا وكل حد بيتاجر بسذاجة الناس وشهواتهم وبس ..عشان نفضل نايمين في ساااااااااااااااااااااااااااابع نومة
ونستاهل اللي بيحكمنا وبيتحكم فينا
سلاااااااااااااااااااااام تاني
وكل سنة وإنتي طيبة

*^*AL.7aAzZeEnN*^* said...

السلام عليكم

الصراحه اول زياره ليا للمدونه الرائعه دي و ان شاء الله مش هتكون الاخيره

بوست جميل اوووي و الأستايل رائع

و انا بشكرك على زيارتك لمدونتي المتواضعه

و مرسي على الدفعه القويه دي الصراحه اديتني صقه في نفسي

و كل عام و انتي بخير

*^*AL.7aAzZeEnN*^* said...

السلام عليكم

بوست رائع الجمال و الاستايل جميل

اتنمي لك المزيد من التفوق و النجاح

و كل عام و انت بخير

koukawy said...

قلم رصاص.... ميرسي من ذوقك
****************
ضياء ..... انا سمعت انهم هيفتحوا تالت يو م العيد، اللي هو يو م الأربع
و المسرح في نص شارع القصر العيني
و يبقي كويس لو خلصت شغلك بدري يوم انك تروح هتتبسط بجد
و انت كمان طيب و مبسوطه لزيارتك بقالك كتييييييير
مختفي .... بس انت زعلان ليه من الكيميلن .... هو انتوا مش كميلين؟؟؟؟؟؟

koukawy said...

تيتو ... ميرسي علي كلامك الجميل و نورتني
*************
احمد الصباغ ... و انت طيب و بصحه و سلامه

هى فوضى said...

ماااااااااااااء مااااااااااااااء
مااااااااااااء مااااااااااااااااااااااء ماااااااااااااااااااااااااء


عيد سعيد
وكل عيد اضحى وانت بخير
وان شاء الله العام القادم على عرفات متجمعين

خمسة فضفضة said...

السلام عليكم ورحمة الله وبركاته

ازيك يا كوكو اخبارك ايه

كل سنة وانت طيبه يا كميله ويارب تتحقق كل امانيك

bastokka طهقانة said...

نروح ان شاء الله
و كل سنة و انتم طيبين
و اوروفوار

Diyaa' said...

لأ بس هو في ياء زيادة فيها :))
وشكراً للمعلومات

Blank-Socrate said...

kol sana w enty tayba
ya gameeeeeeeeeeeeeeeeeeeeeel
================================
Miss koko's stories