Monday, July 30, 2007

الله يرحمك يا بابي

يرجي الدعاء لوالدي / عادل محمد .. توفي فجأه .. البقاء لله .. لا الله الا الله
ارجو الدعاء و طلب الرحمه
اللهم اسكنه فسيح جناتك
و اجعل مثواه الجنه
و ثبته عند السؤال
اللهم اغفر له
اللهم اغفر له
اللهم اغفر له
اللهم ارحمه
اللهم ارحمه
اللهم ارحمه
اللهم ترأف عليه
اللهم ارحمه من عذاب النار و من وحشة القبر
و اجعل قبره روضه من رياض الجنه
و لا تجعله حفره من حفر النار
و نقه من خطاياه كما ينقي الثوب الأبيض من الدنس
و اغسله بالثلج و الماء و البرد
و ابعثه مع الصالحين
يا رب ارحمنا و ارحم المسلمين جميعا الأحياء منهم و الأموات
اللهم استرنا فوق الأرض و تحت الأرض و يوم العرض عليك
امين
جزاكم الله خيرا و جعله في ميزان حساناتكم

Sunday, July 29, 2007

the pianist




قصه واعيه جرت احداثها في بولدنا عام 1930 عن عازف بيانو كان من اشهرهم في الوقت ده
Wladyslaw Szpilman
و مع قيام الحرب العالميه التانيه و دخول جيوش النازي لبولندا بدأت مأساة اليهود اللي بتدور حواليها احداث الفيلم من خلال قصة العازف اليهودي العرق .. مكدبش عليكوا نجح الفيلم في تصوير الماّسي اللي اتعرضولها اليهود لدرجة انهم صعبوا علي بس في نفس الوقت في اوقات وصلني احساس ان المخرج بيحاول يقطع قلبك و يخليك تتعاطف لأقصي درجه ؛ و ده يخليني اديكوا نبذه عن خلفية المخرج
مواليد 1933 ؛ فرنسا و لكنه من اصل بولندي Roman Polanski
هو ابن لأب يهودي و كان من الناجين من محرقة الهولوكست الشهيره ؛ و عاصر بناء حائط الجيتو اللي فصل اليهود في بولندا عن بقية البلد في حي منفصل ورا الجدار ده ؛ و لكن كان الأب بيحاول جاهدا انه يبعد ابنه عن السينمات اللي كان بيروح متسلل سرقه عشان يتفرج مع الغير يهود ؛ و لكن بقي مخرج قد الدنيا ؛اللي يعرف الخلفيه دي عن حياة المخرج و بعدين يشوف الفيلم هيلاقي كتير من أحداث الفيلم متطابقه مع حياة المخرج و ده طبعا لأن عازف البيانو و المخرج الاتنين كانوا مواكبين لنفس الفتره التاريخيه و طبعا تحيز المخرج بشده للجانب اليهودي و ده طبعا حقه ما هم اهل و عيله ؛ الا في مشهد واحد خلي في شئ ايجابي .. و هي شخصية ظابط الماني بيكتشف مخبأ العازف صدفه و بيسألوا انت مين ؟ و بتشتغل ايه ؟ و لما بيعرف انه عازف بيانو بياخدوا عند بيانو قديم
و بيخليه يعزفله و من عزف البيانيست بيتعاطف معاه الظابط لحد ما بيحصل الانقلاب و بيتشال الظابط و بنعرف من تسلسل تاريخه بعد كده انه بيموت في السجون السوفيتيه و ده طبعا لما الاتحاد السوفيتي بيدخل بولندا و يخرج الألمان و ينصر البولنديين علي كل طوائفهم ؛اّخر حاجه هقولها كالعاده .. الفيلم فاز ب3 جوايز اوسكار في دورة المهرجان سنة 2003
جايزة احسن ممثل عن دور البطوله
Adrien Brody
و جايزة احسن مخرج ؛ و جايزة احسن صوره و سنة 2002 حصل المخرج علي جايزه افضل اخراج في مهرجان كان.. اترشح الفيلم لجوايز كتير ؛ و حصل علي جوايز في مهرجانات تانيه كتير محليه و عالميه
في النهايه الفيلم حلو .. و خلاني اسأل نفسي سؤال ؛
الكره اللي عند الناس كلها لليهود
و طبعا عندهم حق هما يستاهلوا الحرق
ممكن يخليني لو انا ماشيه في الشارع و لقيت واحد يهودي محتاج مساعده او اسعاف
و اي شئ مش هتعاطف معاه كأنسان
و مليش دعوه باتجاهه و يكفي اني اساعد روح و اكيد ربنا هيجازيني خير
و لا هاقول لأ ده يهودي يولع و يروح في ستين داهيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
معادله صعبه بجد
سلام



Saturday, July 28, 2007

اتقدم .. اتقدم .. و يا كوكو بلاش تتندم

الحلقه اللي فاتت
كوكو الكميل و كوكو ابو الخطوات اتكلموا ؛ و كوكو ابو الخطوات لقا الحل
الحلقه دي
وقف الكميل باصص لكوكو ابو الخطوات بلهفه مسنتي ان يطلع الحل من منقاره المبدع
اللي بينقط سكر .. و ابو الخطوات عمال يروح و يجي في المخبأ يمين و شمال
و بيصوصو برطمه مش مفهومه كده .. و بعدين راح لافف لكوكو الكميل بسرعه و قاله .. بص
يا سيدي انا فكرت و مخمخت و نخورت في نافوخي لأخره لقيت ان الحل الوحيد اللي ممكن نعمله
هو الحل اللي كنت اتفركت عليه زمان في فيلم اجنبي و كان فيه اتنين كوكوهات بيهربوا
من السجن .. بس هما نهايتهم كنت تعيسه و البوليس افشهم يا رب احنا ننجح ..تعالي يا كميل
دور معايا علي اي حاجه نفحت بيها في الأرض .. رد كوكو الكميل .. احنا هنفحت نفق ؟؟
اه انا شوفت الفيلم ده مش اسمه الهروب الكبير ؛ بس الكوكوهات اللي كانوا في الفيلم كانوا عندهم عضلات
احنا معضمين تفتكر هنقدر نحفر نفق كبير كده يطلعنا علي حدود المدينه الخضرا ؟؟
رد ابو الخطوات .. خليك متفائل يا كميل و بص لنص الكوبايه المليان .. بص كوكو الكميل
لكوكو ابو الخطوات و هو بيقولوا كده و استرجع في دماغه صورة ام مكاوك ؛ و صورته و هو في البالطو
الأسود ؛ و افتكر اغنيه كانت بتديله امل و قوه طول عمره كان بيسمعها في فيلم .. الكوكو الأسود..و
و كانت كلمات الأغنيه بتقول
اتقدم اتقدم .. و يا كوكو بلاش تتندم الشمس النور .. ميعطلش كوكو بحور و مدام الدنيا بتدور كوكو مالدنيا يتعلم اتقدم اتعلم استحمل اتبهدل .. يا كوكو
و بدأ كوكو الكيمل يدندن صوصوه كميله بالأغنيه و ابتدا صوت الصوصوه يعلا بالأغنيه
و اتحمس ابو الخطوات و ابتدا هو كمان يصوصو .. و راحوا لافين لبعض و ماسكين في كناحات بعض
و شدوا عليهم بقوه كعلامه انهم اتفقوا .. و بداـ رحلة البحث عن ادوات للحفر في المخبأ الضلمه
اللي مش باين فيه حاجه .. يدوروا يمين و شمال و مفيش فايده .. لغاية ما لقوا كومه كده
عجيبه فيها كراكيب كتير فوق بعض قعدوا ينبشوا فيها و ملقوش غير غطا حله معووج
و مغرفه بنص ايد ؛ الظاهر كانت ست بيت استغنت عنهم و رميتهم في الزباله .. بصوا
لبعض و ماكانش عندوهم حل تاني غير انهم يستعملوهم و خلاص .. اول حاجه عملها ابو الخطوات انه
نبش في فتحه كده و طلع علبه صفيح من الواضح ان فيها اسراره و اوراقه المهمه
اللي بيحتفظ بيها ؛ و راح مدخل منقاره في العلبه و را ح مطلع ورقه ملفوفه كده و راح شايل العلبه
الصفيح تاني .. و بعدين راح فارد الورقه اللي في ايده اللي طلعت خريطه للبلد الصفراويه الأناويه
خريطه كامله للبلد كلها من حدودها مع البلد الحمرا لغاية حدودها مع البلد الخضرا ..و راح
فاردها علي الأرض و بدأ في دراسة المسافات و المواقع عشان يعرف هو المفروض هيحفروا
لحد فين .. و كل ده و كوكو واقف فارس همام شجاع ماسك المغرفه
ام نص ايد في كناحه و علي اهبة الاستعداد لبدء المعركه .. قصدي الحفر .. في اي وقت ؛
المهم بعد تفحص وتمحص قدر ابو الخطوات يحسب التقريب ان المسافه اللي هيحتاجوا يحفروها
هتكون حوالي 50 كيلومتر و بعمق 20 كيلومتر احتياطي لحسن المغرفه و لا غطا الحله يفلت
و يلاقوا نفسهم في بيت رئيس البلد و لا حمام احد ظباط الشرطه الكوكوهيه و لا حاجه ..و لف
ابو الخطوات الخريطه و رجعها مكانها و مسك غطا الحله و مسكوا كناحات بعض و قروا الفتحه
و بدأ الحفر ..و في الخلفيه موسيقي صوصويه للأغنيه الكوكوهيه .. اتقدم اتقدم ويا كوكو بلاش تتندم
****************************************************************
و بعد مرور بتاع 3 او 4 ساعات .. كان المنظر من فوق اكوام من التراب الكتير و حفره في نص المخبأ
غويطااااااااااااااااااااااااااااااااااااااا .. المنظر من تحت .. كوكوهين واحد كان كميل و بقي كوكو المترب
وواحد تاني كان اصلا مترب و ينطبق عليه مثل .. ضربوا الكوكو علي عينه قال خربانه خربانه ..و نسمع
صوت كوكو الكميل و هو مليان تراب بيقول .. ياه ده احنا قربنا نوصل حفرنا كتير .. و يرد عليه
كوكو ابو الخطوات .. يا كوكو متستعجلش احنا لسه في اول 10 كيلو انت بس بيتهيألك .. ايه الاحباط
ده يقول كوكو الكميل في نفسه.. و كمل كوكو حفر والعرق يتساقط من عرفه الصغنن ويبضريب بكناحه المغرفه ف التراب لقي حاجه جامده خبطت في المغرفه رفع كناحه وخبط المغرفه تاني عملت صوت معدني بص كوكو الكيميل لابو الخطوات وقاله ايه ده وشالوا التراب بكناحتهم الكميله لحد مالقو نقوش غريبه علي سطح صندوق خشب بص كوكو لابو الخطوات وقالوا الاتنين في نفس الوقت........الصندوق ده فيه ايييييييييييه؟
كاكان
سؤال الحلقه الصندوق ده فيه ايه؟

Tuesday, July 24, 2007

مرجان احمد ...... بتنجان


مش من عادتي اني اتفرج علي افلام في السينما كتير بفضل ان اشوفهم علي الكومبيوتر
عشان امخمخ اكتر ؛ و كان اّخر فيلم شفته وش اجرام لمحمد هنيدي ؛
و من ساعتها ما روحتش السينما غير امبارح عشان اتفرج علي فيلم ..مرجان احمد مرجان
من باب التغيير .. و من اللي سمعته عن سمعة الفيلم و مدي اعجاب الناس بيه
قلت بقي يا واد يا كوكو يا كميل ده انت هتشوف فيلم مصري حلو بقي اخيرا
و كانت صدمتي ان الفيلم مش حلو بس في نفس الوقت للأمانه في بعض الايجابيات
اول صدمتي و هي اكتر حاجه مبوظه الفيلم هو المبجل .. يوسف معاطي اللي الظاهر كده
كان جاب اخره في .. عباس الأبيض ؛ لأن من يوم المسلسل ده و انا مشوفتلوش حاجه
حلوه .. المهم و ماعلينا ؛ الأستاذ معاطي اعتقد انه متعبش في كتابة الفيلم لأنه بمنتهي البساطه
اغلب الفيلم هو مشهد و متكرر بعادل امام مع ممثلين مختلفين و لوكيشن مختلف ؛
انما هو نفس الموقف و تقريبا نفس الحوار .. و اقصد بكده مشاهد تقديم الرشوه ؛
اللي هو و انا مغمضه عرفت نهاية المشهد هتكون ازاي لأن اتكررت فاتحرقت
من الحاجات السيئه جدا برضو من الأستاذ معاطي .. تحسه انه جه في منطقه في الفيلم
معرفش يلملم الخيوط و التربيطات الأخرانيه عشان يخلص الفيلم ؛ فعمل نقله للحدث تافهه و غير منطقيه
و سطحيه ميعملهاش مؤلف في اللفه .. و اكتر حاجه استفزتني في المشهد اللي بيعتبر
مغير للأحداث اني عمري مشفت حد قبل كده ابوها يضربها بالألم تتنقل المستشفي و يجلها انهيار عصبي و تفقد النطق
كان موقف اوفر اوي بصراحه ؛ و من الحاجات برضو العجيبه في السيناريو ان عادل امام المفروض
انه راجل مش مثقف و خريج معهد لاسلكي و علي قد حاله علميا و ثقافيا و ادبيا ؛
و في اّخر الفيلم بينجح و يتخرج من جامعه انترناشيونال و امتحاناتهم بالانجليش ؛
شئ من رأي غير منطقي و مستفز في نفس الوقت
***********************************************************
من السلبيات كمان .. الماكياج اللي كان واضح اوي و بالذات علي وش ميرفت امين
و قد ايه كان مبين العجز و التجاعيد اللي في وشها و نفس الموضوع عند بسمه
الماكياج كان موضح العيوب اللي في وشها
*****************************************************
من السلبيات كمان اللي ممكن متلفتش نظر حد بس لفتت نظري اوي .. بيت مرفت امين
المفروض ان ميرفت امين في الفيلم دكتوره علي مستوي راقي من الفكر و الثقافه و بتدرس مادة
حضاره في الجامعه .. و ده يتناقض تماما مع ديكور صالون بيتها اللي كان بيتسم بعدم الذوق و لا التناسق
لا التكويني و لا اللوني .. تحس و انت بتبص ان عينك مش مرتاحه ؛ تحس ان كل قطعه من الديكور منفصله عن اخواتها .. ده غير ان حصل اكتر من مشهد في بيت ميرفت امين و كلهم حصلوا في نفس الصالون
و ده اداني احساس ان الانتاج ملحقش يفرش بقيت الشقه و كانوا عايزين ينجزوا المشاهد بتاعت بيتها كلها في يوم
فراحوا واخدنهم كلهم في نفس الحته بنفس زاوية الكاميرا
**************************************************
من السلبيات .. ان كنت منتظره ان الزعيم هيضحكني اكتر من كده بس للأسف و علي رأي ناس
كانت بتتفرج معايا علي الفيلم قالولي .. احنا ضحكنا في السفاره في العماره اكتر
*********************************************************
********************************************************
من المشاهد اللي عجبتني .. هو مشهد مجلس الشعب و هو من رأي اكتر مشهد ضحكت فيه
علي الرغم من انه يحمل نفس اسلوب يوسف معاطي الساخر من الأوضاع السيئه اللي في البلد
بس مشهد لطيف و في كوميديا لطيفه و غير مصطنعه
*********************************************************
نيجي بقي للايجابيات .. اولا عادل امام مختلف من الناحيه الاباحيه شويه في الفيلم ده
يعني مفيش حاجات خارجه كتير زي عادته ؛ و برضو مختفتش خالص زي ما كانوا الناس بتقول
يعني مثلا كان في حته ملهاش لازمه خالص و هو في قافلة الفيلم لما بيتجوزوا و اللي هيتفرج هيفهم
و برضو لم يخلوا الفيلم من رجلين واحده لا بسه قصير و هو بيعلق عليهم ؛
او واحده حلوه و هو بيبصلها مش عارفه ازاي
بس في المجمل مش زي قبل كده
****************************************************
عجبني اوي .. احمد السعدني .. و ده لأنه من اللي اجتهدوا في الفيلم رغم ان مساحة الدور
مش كبيره اوي ؛ يعني علق معايا اكتر من شريف سلامه ؛ رغم ان شريف سلامه كويس
مش وحش ؛ بس الحقيقه احمد السعدني اجتهد في دوره ؛ بس يا ريت المره الجايه ياخد مساحه
اكبر من كده عشان يسبت نفسه اكتر من كده ؛ و ياريت ميزنقوهوش في نوعية الأدوار دي
زي عادة المخرجين اللي بيحولوا الممثلين لأنماط لحد ما الناس تتخنق
******************************************************
مش هتكلم عن احمد مكي لأني حاسه اني كنت بشوفه في تامر و شوقيه برضو
حلو بس مكرر
****************************************
الأغنيه من رأي هي احلي حاجه في الفيلم ؛ حقيقي عجبتني
لحن و كلمات و حتي الاستعراضات و المجموعات كان شكلها حلو في الكادر
***************************
عجبني كمان اوي الأفيش بتاع الفيلم و عدم انفراد عادل امام و ميرفت امين بالبوستر و انهم ادوا
الشباب فرصه للظهور ؛ علي خلاف ناس تانيه ناقص تطلع البوستر وشها بس من كتر الغرور
اللي عندهم .. و من راي شئ يحسب للزعيم ؛ و طبعا انا مبقصدش البوستر اللي انا حطاه
لأ اللي متعلق علي السينمات
********************************************************
في الاّخر طبعا كل اللي فات ده رأي واللي عنده كلام تاني يقول احنا مبنخافش لا مؤاخذه
هههههههههههههههههه
سلام

Sunday, July 22, 2007

The Incredibles


فيلم ينطبق عليه المثل المعروف .. يموت الزمار و صوابعه بتلعب
و في نفس الوقت المثل التاني اللي بيقول .. مين فات قديمه تاه
و هي دي الفكره اللي بتدور حوالها الفيلم .. و هو بعد هجوم شديد من الناس
و حقد علي الخارقين رغم انهم كانوا بيقدمولهم مساعدات كبيره و بيقوموا بعمليات انقاذ
كتير ؛ و لكن هما كده البني ادمين لما يشوفوا حد ناجح يفضلوا وراه لحد مايدمروه
خلف و طلع نسله في نفس الصفات الخارقه بس كانوا بيحاولوا يداروا عشان المشاكل mr .incredible
و بعد تقاعده من شغلته كخارق اشتغل شغلانه مش حاببها بس فضل علي طول
يحن لشغلته الخارقه اللي هو اصلا اتولد عرفها لأنه لما فات قديمه تاه و فضلت صوابعه تلعب
******************************************
شخصيات الفيلم الأساسيه هي
اللي بيمتاز بقوه خارقه و جسم قوي و متين و رشيق
mr .incredible
مراته و اللي عندها قوه خارقه من نوع تاني و هي المطاطيه جسمها بيمط في كل الاتجاهات elastigirl

بنته الكبيره اللي ليها قوه في الاختفاء و بتقدر تعمل حواليها حقل من الطاقه يحميها من اي هجوم violet

و عنده سرعه خارقه يسبق الصاروخ dash

ابنه البيبي لسه مش معروفله ايه هي قوته الخارقه انما اللي بان عليه انه بيولع نار jack jack

و هو صديق للبطل و عنده القدره علي تجميد اي حاجه قدامه frozone

في شخصيات تانيه برضو في الفيلم لطيفه جدا زي
و هي مصممة ازياء الخارقين و شخصيه تنكه اوي و تعتبر محرك للأحداث eda moda

و اّخر شخصيه هي شخصية الشرير و هو الضد للبطل اللي حدوته في الفيلم لطيفه جدا و غير متوقعه
و هو صاحب قوي خارقه متعدده sydrome

في شئ لطيف استهواني جدا و انا بدور علي صور للفيلم عشان البوستايه و هو الممثل اللي عامل شخصية مدير البطل
في الشغل ؛ و جبتلكوا الصوره اهو صورة الممثل فيها شبه كبير من صورة الشخصيه
في الاّخر احب اقول ان الفيلم من انتاج 2004 و هو قصة و اخراج المخرج
اللي برضو من باكورة اعماله
brad bird
ratatouille 2007فيلم جرافيكس انتاج ديزني هكتبلوكوا عنه قريب انشالله
jack jack attack 2005
عباره عن فيلم قصير تصور
لمكالة تليفون حصلت في الفيلم الأصلي بين الأم الخارقه و المربيه اللي كانت قاعده مع الولد الصغير
فكره عجبتني اوي ؛ انا كنت شفت الفيلم القصير قبل الأصلي و مفهمتش اوي و بعد ما شفت الأصلي
فهمت و لقيتها فكره لطيفه جدا
اخيرا حصل الفيلم علي جايزتين اوسكار في سنة 2005
جايزه احسن مؤثرات صوتيه للأفلام الجرافيكس
و جايزه احسن مخرج للأفلام الجرافيكس
و طبعا حصل علي جوايز في مهرجانات كتير و اترشح لجوايز اكتر
بس مش قادره احكي اكتر من كده باي باي بقي
سلام

Saturday, July 21, 2007

مين اللي عليه الدور ؟؟؟؟؟

يا تري مين اللي عليه الدور في موضوع الأنابيب اللي بقالنا فيه اكتر من سنه مثلا
بسمع دلوقتي الساعه العاشره .. حريق هائل في حدائق حلوان بسسب انفجار انبوبه
ادي اللي مقتل اسره من 8 افراد و 5 منهم اطفال ما بين ال6 شهور و ال6 سنين
و للأسف و كالعاده و صلت المطافي بعد ساعتين بعد ما الناس بقوا رماد لدرجة ان المراسله بتقول
انهم مش عارفين يحددوا هوية الناس اللي ماتوا
طبعا انا نقلت لكم الخبر و مش مستنيه اي شئ غير اني اسمع خبر الأسره الجديده اللي بعدها
اللي هتموت بسبب الأنابيب
يا رب ارحمنا جميعا الأحياء منا و الأموات
و تقبلهم يا رب و ثبتهم عند السؤال
و حسبي الله و نعم الوكيل في ............................. الأنابيب
سلام


Monday, July 16, 2007

يا سلام علي الدنيا



ياسر حسين الفنان البلوجاوي صاحب الشخبطات الرائعه .. تفضل مشكورا و رسم تصور
لشخصية البطل الاسطوري .. كوكو الكميل .. الحقيقه انا اول ما شفت الرسمه فكرتني
بشخصيه عزيزه علينا جدا .. و علي طول دموعي جريت علي خدي و فضلت انشف
و مفيش فايده تنزل برضو ..
و اعيط .. و اقول ميرسي يا ياسر .. و اعيط ..
و اقول ميرسي يا ياسر..

و قولت يا سلام اللي يعمل الطيب عمرنا ما ننساه ابدا..
لو عرفتوا الشخصيه دي مين .. هتحيوا ذكري بطل من ابطال مغامرات الكميل
ياللا بقي شغلوا الذاكره و قولولي يبقي البطل ده مييييييييييييييييييييييين؟؟؟؟؟؟؟؟
كاكان
***********************************************************************

Friday, July 13, 2007

notes on a scandal

مباراه تمثيليه شديدة الوطيس .. زي ما بيقولوا .. بين اتنين ممثلات جامدين اوي
حقيقي الفيلم اكتر حاجه فيه عجبتني هما الممثلات ؛ طبعا الفكره حلوه و نجح السيناريست
في رسم نفسيات الشخصيات ؛ و رسم المواقف المختلفه بين الشخصييتين ؛
و المخرج هايل برضو ؛ بس احتمال لو ان الفيلم مفيهوش الممثلات دول كان يبقي فيلم عادي
لأن في ما بين الممثلات اللي بيسموه الكيميا .. تحس انهم بيسلموا و يستلموا من بعض
الأحاسيس و النظرات و الأنفاس بمنتهي البراعه و الحساسيه و الانسيابيه ؛
فكرة الفيلم قائمه علي الوحده و الفراغ وبيعملوا ايه في نفسية البشر ؛ و كمان ان الوحده مش لازم
ان يكون الواحد لوحده لأ ممكن يبقي عنده عيله و اهل و اطفال بس هو وحيد ؛ و ده اللي جمع
ما بين الشخصييتين و هي الوحده علي اختلاف صورها واللي وصلت ليه كل شخصيه منهم ؛
الفيلم جديد من انتاج 2006 و كان مشارك في اّخر دوره لمهرجان الأوسكار
و اترشح لأربع جوايز منها جايزه احسن ممثله للرائعه

judi dench
و جايزة الممثله دور مساعد للممثله الهايله
cate blanchett
و كمان اترشح لجايزة احسن موسيقي تصويريه و جايزة احسن سيناريو
بس للأسف و ده شئ غريب مخدوش و لا جايزه مع ان الممثلات كانوا يستهلوا
بجايزة احسن ممثله مساعده في مهرجان دالاس cate blanchett
و لكن فازت
و تورينتو في نفس سنة الانتاج
فيلم يستحق المشاهده و اللي يحب يتعلم تمثيل يقعد ياخد دروس علي ايدين
جوز المبدعات اللي في الفيلم
يالللا بقي كفايه عليكوا
سلام

Friday, July 6, 2007

corpse bride


فيلم جرافيكس هايل و فريد من نوعه سواء في الرسومات او في الفكره
مدة الفيلم ساعه و ربع متحسش بيهم من كتر ما الفيلم يشد ؛
فيلم مليان بالشخصيات و الأنماط الغريبه زي شخصية العنكبوت و الدوده
طبعا اللي هيتفرج هيفهم قصدي ؛ هو فيلم انتاج 2005
و المبهر في الفيلم هو خيال المؤلف و الفكره اللي كاتبها ؛
ده طبعا بالاضافه للموسيقي التصويريه اللي بتتسم بالبساطه و الروعه و التأثير
و كمان برع الممثلين بأداء اصوات الشخصيات ؛ و المضحك انكوا لو شفتوا
الشخصيات الجرافيك هتلاقوا فيهم شبه كبير من الممثلين اللي عملين صوتهم ؛
شخصيات الفيلم الرئيسيه 3 ؛ و الشخصيات الثانويه كتير بس تحس ان الفيلم من غيرهم
مينفعش عاملين جو بالبلدي كده ؛ ده غير بقي زي ما قولت في الأول ان رسم الشخصيات
جديد يعني الرسومات او الخطوط اللي مكونه الرسومات غريبه مشفتهاش بالشكل ده قبل كده ؛
اللي احب تعرفوه كمان ..
اللي قام بصوت شخصية
او الشخصيه الرئيسيه هو ممثل انا مش بحبه اوي بس هو عامل الصوت حلو في الفيلم هو الممثل victor
؛ و حصل الفيلم علي اربع جوائز في اخراج الجرافيكس خلال 2005 و 2006 jhonny deep
في الاّخر احب اشجعكوا تتفرجوا علي الفيلم .. و ارجع و اقول انه فيلم غريييييييييييييييييييييب
اوي
سلااام

Thursday, July 5, 2007

كوكو ابو الخطوات

الحلقه اللي فاتت
كوكو فجأه الدنيا اسودت في وشه
الحلقه دي
مكان عجيب غريب مريب .. ضلماااااااااااااه و مش كميل خالص
تفوح منه رائحه شنيعه ملهاش وصف .. حشرات من كل الأنواع بتجري
في كل مكان .. شوال مرمي علي جنب .. صوت رجلين بيقرب بيقرب بيقرب .. ظهرت الرجلين
في الشاشه رجلين كوكوهيه و تعرف كده من النظره الأولي .. فضلت الرجلين تقرب
من الشوال براحه براحه لحد ما وصلت .. الله الله دي في كناحات كمان ظهرت مع الرجلين
الكناحات قربت من الشوال .. بتحاول تفتح الشوال .. تفتح الشوال .. تزق الشوال
لتحت .. صوت كحه خارجه من الشوال .. حاجه بتتحرك في الشوال و بتصوصو ..زعيق جامد اوي
خرج من الشوال .. ظهر من الشوال .. كوكو الكمييييييييييييييل.. هيييييه هييههههه .. خرج كوكو و هو متضايق
و بيصوصو و يزعق و في نفس الوقت خايف .. كوكو مش فاكر حاجه خالص غير ان الدنيا اسودت فجأه قدامه
خرج كوكو و عقبال ما عينيه الكميله جمعت ايه اللي بيحصل .. سكت كوكو وهو بيبص لصاحب الرجلين اللي واقف
قدامه باستغراب .. لقي قدامه كائن كوكوهي صحيح بس عجيب من نوعه..و ركز كوكو في شكل
الكوكو صاحب الرجلين لقا شكله عليه اثر السنين رغم انه مش عجوز و لقا عنده عين متغطيه
بقماشه سوده .. و هدومه مقطعه و متوسخه و مش كميله خالص يا حرام .. و ريشه لونه
كأنه متحماش من ايام الحرب الكوكوهيه الأولي .. و حاول كوكو الكميل يعرف من ملامح الكوكو التاني ده
اذا كان كميل و لا مش كميل بس معرفش .. و بدأ كوكو الكلام بعد فترة صمت ..هو انت مين؟؟؟؟
و انا هنا ليه ؟؟؟؟؟ انت خطفتني في الشوال ده صح ؟؟؟؟ ليه انت حرامي و مش كميل .. ابتسم
الكوكو ابو الخطوات ابتسامه مريحه و قال .. ليك حق تفتكر فيا كده ؛ بس انا مش خاطفك
ده انا عايز مصلحتك صدقني ؛ انا كنت كوكو زيك كده حر و منطلق بس منهم لله اللي كانوا السبب؛
اتأثر كوكو الكميل اوي و قاله .. انا اسف سامحني بس اللي انت عملته يخليني افكر فيك مش كميل
بس متزعلش بقي .. و مد كوكو كناحه يسلم علي الكوكو ابو الخطوات و كمل كلامه و قال ..انا اسمي
كوكو الكميل و انا ضيف لمدة ساعات في البلد الغريبه بتاعتكوا دي و حصلي فيها حاجات غريبه
رد الكوكو ابو الخطوات .. ما هو انا عارف اللي حصلك و انا خطفتك كده عسان الحقك من اللي ممكن يحصلك
اكتر و يجرالك زي ما جرالي .. رد كوكو الكميل .. و انت ايه اللي جرالك .. رد ابو الخطوات و هو بيحط كناحه
علي كتف كوكو و بيقوله .. تعالي طب نقعد هنا علي الطوبخ دي و انا هحكيلك .. و قعدوا و بدأ ابو الخطوات في
سرد حدوتة حياته .. انا يا سيدي يا كوكو يا كميل كنت زائر زيك كده جاي المدينه سياحه
اهو اتفسح و اشوف اماكن جديده مشفتهاش قبل كده و الكلام ده من حوالي 10 سنين كده ؛ و اللي حصل
اني حاولت اعمل زي ما انت عملت و حاولت اساعد اللي يحتاج و فضلت مصر علي اللي في دماغي
و كان غصب عني لأن انا ربنا خلقني كده بحب اساعد غيري ؛ لحد ما في يوم نجحت اني اساعد عيله
كامله من الموت ؛و عينه اللي متغطي دي حادثه حصلتلي و انا بحاول افتح باب الشقه اللي كان ماليها الغاز
عشان الحق العيله و انا بزق الباب جامد رجعت علي ضهري عشان اخد دفعه افتح الباب راح مفتوح فجأه
رحت متزحلق و طاير و راشق بعيني في حدديه بتاعت اباجوره كانت علي الطرابيزه في صالة الشقه
و من يومها و انا بهرب مش لاقي وقت اعالجها و خلاص اتعمت مش بقيت اشوف بيها خالص ؛
المهم ان اتقلبت الدنيا و مقعدتش و طلع ضدي احكام كتير بالغرامه و الشنق ؛
و هربت و فضلت اهرب من مكان لمكان كل ما يلاقوني ؛ لحد ما وصلت المكان اللي احنا فيه ده
في البلاعات اللي بيعدموا فيا الخارجين عن القانون القاصي الظالم ده ؛ و طبعا عمرهم ما فكروا
اني هكون مستخبي في مكان الموت نفسه و بقالي هنا كتير مش عارف قد ايه لدرجة ان انا لما بخرج دلوقتي
لو اضطريت محدش بيركز لشكلي اوي لأن بقي شكلي مختلف شويه عن الصور اللي ملزقه في كل
حته بأعلان مكفأه عن اللي يلاقيني ؛ تخيل يا كوكو مش عايزينا نساعد حد بس هما عايزين اللي يساعدهم يلاقوني
تناقض مش كده ؛ المهم يا سيدي انا عرفت مشكلتك و انا خارج في رحلتي السريه الشهريه لأني اجيب اكل
من صفافيح الزباله و انا في صفيحه من الصفافيح سمعت المحكمه اللي كانت معمولالك في الشارع
فأفتكرت نفسي علي طول فقررت اني لازم اساعدك عشلان متتكررش المأساه معاك تاني ؛
بس هي دي الحدوته من طأ طأ لسلاموا عليكوا .. ايه رأيك بقي مش احسن كنت عملت معاك كده و لا كنت سبتك
اتبهدلت بهدلتي ؛ انا مستعد اساعدك يا كوكو ياكميل انك تخرج من هنا .. رد كوكو الكميل بسرعه .. يا
سلام انت بتتكلم بجد انا عايز اطلع علي البلد الخضرا عشان انا عايز اوصل لطانط ام مكاوك اصل الموضوع
..............................................................و كمان الخطاف قالي .............................
و بعد مارحت البلد الحمرا حصل ...............................و بعدها جيت هنا و لازم ارزح البلد الخضرا
عشان هي البلد اللي هتوديني للخطاف يا ريت تساعدني .. سكت الكوكو ابو الخطوات شويه ..
و قام اتمشي حوالين كوكو الكميل و كل شويه يبصله و يقف كأنه هيقول حاجه و بعدين يهز راسه
كأنه بيقول لأ و يكمل مشي تاني .. و بعد فتره علي نفس الحال وقف فجأه و بص لكوكو و قال .. بس
لقيت الفكره الجهنميه بس لازم نبتدي فيها حالا .. اتبسط كوكو اوي و قال .. يا سلام هنعمل ايه ؟؟؟؟؟؟؟؟
كاكان
سؤال الحلقه
يا تري ايه الحل اللي لقاه كوكو ابو الخطوات ؟؟؟؟؟؟؟؟؟؟؟؟؟؟؟
سؤال الحلقه اللي فاتت
للأسف محدش عرف الحل .. معلش حاولوا المره دي
كاكان

Sunday, July 1, 2007

حدوتة زمان منين ؟

نتيجه الاستفتاء المره دي و اللي كان بيتكلم عن حواديت زمان و مين اللي كان
بيحكيهالنا كانت بالشكل ده
من ناتج 37 صوت كانت النتيجه


مامتك 18 49%
باباك 6 16%
تيته 7 19%
جدو 2 5%
اخواتك الكبار 1 3%
OTHER 3 8%

احب اعرف بقي ايه نوعية الحواديت اللي كانت بتتحكلكوا؟؟

و اللي جاوب بالجواب الأخير احب اعرف مين كان بيحكيله حكايات غير الناس اللي انا كتبتهم ؟؟

و شدوا حيلكوا في الاستفتاء الجديد عن افلام الصيف

سلام