Saturday, March 31, 2007

كل مولد النبي و انت طيب يا كوكو

الحلقه اللي فاتت 00
كاكوكاكو جه و قال السر لكوكو الكميل
الحلقه دي 00
كوكو الكميل قاعد لوحده و الدنيا حواليه شبه ضلمه و هو قاعد
علي الكرسي الكميل بتاعه و باصص في السقف و شويه
و قفل عينيه و ابتدي يسمع في ودانه الكلام اللي اتكلمه مع كاكوكاكو 00
كاكو 00 يا كوكو رد عليا قلي حاجه مش تسكت كده ؛ انت كده
بتحسسني بالذنب اكتر
كوكو 00 بص لكاكوكاكو و هو عينيه مدمعه
كاكو 00 يا كوكو اقوم امشي انت مش طايق تشوفني صح؟؟
كوكو 00 بص يا كاكوكاكو انت وجعتني و خنتني و انا موجوع
من كوه اوي انت مش عارف قد ايه ؛ بس انا مش عارف اقولك ايه دلوقتي
خايف اقول كلام وحش و انا مش كميل انا هكلمك في الكلوفون
و لف كوكو وشه الناحيه التانيه و قام كاكوكاكو و هو مكسوف و فتح الشباك
و طار 00 فاق كوكو من سرحانه علي صوت طانط ام مكاوك بتنده عليه00
افتح يا كوكو ؛ يا كوكو افتح انا طانطك ام مكاوك
و قام كوكو براحه و فتح الشباك و دخلت طانط ام مكاوك 00 ايه ده يا كوكو
انت بتعيط حد برضو يعيط في اليوم الجميل اللي احنا فيه كل مولد النبي و انت طيب يا كوكو
و مدت جناحاتها بعلبه فيها حلويات المولد و قالت 00 ياللا بقي كول من الحلويات
انا بص كمان جبتلك ايه و مدت جناحاتها بره الشباك و جابت كوكوحلاوه كبير
و قالت لكوكو 00 انا اسفه يا بني انا كان المفروض اجيلك من اول اليوم
بس بقي انكلك ابو مكاوك كان عنده العيله و انا كنت في المطبخ طول اليوم
و لسه ماشيين من شويه و قولت لازم اجيبلك الحلويات و الكوكو الحلاوه
رد كوكو 00 ميرسي يا طانط انتي فعلا بتحسيسيني انك امي التانيه و حضنها جامد
و بعدين مشيت طانط ام مكاوك و قفل كوكو الشباك وراها 00
و فتح علبة الحلويات لقا جواها 00 فستكيه و سكسكيه و ملبك و كوليه
و بص كوكو للحلويات و افتكر العيد الكميل اللي النهارده و ان في الذكري الكميله
دي لازم كل واحد يسامح كل الناس و فكر شويه و قام اتصل في الكولوفون 00
قالوا ايوه ؛ كل سنه و انت كيب يا كاكوكاكو ؛ انا سامحتك ؛ انا قلت ان انا
حتي لو خاصمتك مش هينفع لأن كوكوهايه كده كده بتحبك انت المهم انا
مبسوط ليكوا و اول كوكو تجيبوه سموه كوكو الكميل و لو احتجتني في حاجه
قولي و قول لكوكوهايه مبروك ؛ كاكان
و قفل كوكو و هو بيعيط كامد اوي و بيقول الحمدلله انا عارف ان اكيد مش كان نصيبي
و انا راضي يا رب عشان انا كوكو كميل بيسمع كلامك و جه كوكو يفتح حتة حلويات
رن جرس الكولوفون و رد كوكو 00 الو ايوه مين ؟؟؟؟؟
كاكان
للأسف يا جماعه مفيش فايزين في السؤال بتاع الحلقه اللي فاتت
شدوا حيلكوا بقي في السؤال الجديد 00 يا تري مين اللي اتصل بكوكو ؟؟؟؟؟؟؟؟؟؟؟؟؟؟؟

Friday, March 30, 2007

كوكو و التاج جزء التاني

سيداتي انساتي سادتي زهور و زهرات العشه 00 حان الان موعد الالتفاف
حوالين العشه الكميله لمشاهدة مسلسل كوكو و التاج الجزء التاني
بعد ان كنا عرضنا كوكو و التاج الجزء الأول في شهر فبراير اللي فات
و جاء هذا الجزء التاني بناء علي طلب احد المشاهدين الكيميلين للعشه
الأستاذ الدكتور وزير الأميره مجهول و اللي انا اطلقت عليه اسم مجهجه
اترككم الان لتستمتعوا و تنبهروا و تندهشوا و تنكشحوا و تنتعشوا و تن0000
اي حاجه علي الوزن بقي اللي عنده حاجه يقول 00
فاصل اعلاني و يعرض مسلسل التاج الجزء التاني
تمنياتي لكم بقرأه ممتعه 00
*****************************************************************
هل كنت طالب شاطر في المدرسه ؟
مسمحلكش تغلط فيا كوكو الكميل طول عمره شاطر و كميل
* ايه اكتر ماده حبيتها في المدرسه و الكليه ؟
في المكرسه 00 الصوصوه و الكورال
في الكليه 00 مادة ازاي اجيب حكوكو الكوكوهات من المنفسنين
* ايه اكتر ماده كرهتها في المدرسه و الكليه ؟
اللي مكتبتش اسمها في اللي حبيتها مش محتاجه ذكاء
* كنت عايز تطلع ايه و انت صغنن ؟
كوكو بيحب السينما و المسرح اوي لو قريت تاريخه هتعرف انه كان نفسه يطلع ممثل
بس بعد كده بقي في الحكوكو
كده الحمدلله الامتحان خلص ؛ و بالنسبه بقي اممره لمين 00 ضربة شمس و شادي فايد و شيكو و سفاح كرموز
يا عيني علي التدبيسه صعبنين علي معلش
سلام بقي

Thursday, March 29, 2007

كاكوكاكو حكي الحكايه 00

الحلقه اللي فاتت 00
كاكوكاكو جه لكوكو الكميل بعد 7 ايام من الأختفاء
الحلقه دي 00
كاكوكاكو بص لكوكو و قاله 00 تعالي يا كوكو نقعد عشان انا هحكيلك
كل حاجه ؛ رد عليه كوكو بتلهف و هو رايح عند الكرسي و بيقعد 00 تحكي كل
حاجه يا كاكوكاكو من صوصو لسلامو عليكوا ماشي يا كاكوكاكو يا كميل انت00
قعد كاكوكاكو علي الكنبه و باين عليه مش عارف يبتدي منين الحكايه
و بعدين بعد تردد كده قال 00 انا يا كوكو لما سيبتك هنا اخر يوم
روحت نمت عادي و تاني يوم استنيت كوكوهايه و هي نازله تركب الأوتوبيس
و ركبت معاها و قعدنا جنب بعض و قعدت تحكيلي عن نفسها كتير من ساعة ماكانت
في البيضه ؛ و لما وصلنا المدرسه انا مكنتش عارف اقولها الموضوع ازاي
و قضيت معاها يوم جميل جدا و اكتشفت في النص ان انا مش بتكلم زيك و ان انا
نسيت الكلمات اللي انت علمتهالي و الغريبه ان كوكوهايه مخدتش بالها ؛
و حسيت ان انا علي طبيعتي خالص ؛ و في اليوم ده روحنا و انا معرفتش
اقولها بس اتفقنا ان هروح معاها تاني يوم تاني فقلت بلاش اجيلك غير لما اقولها
و تاني يوم رحت معاها المدرسه تاني و مش متخيل يا كوكو الكوكوهات الصغيرين
اللي في المدرسه انا اتصحبت معاهم ازاي و بقيت اساعدهم ؛ و في اليوم ده
حكيتلي كوكوهايه ازاي حصل ان معندهاش جناح و قالتلي ان ده حصل من ساعة
و هي بتتباض لأن و هي بتخرج من البيضه اتزنق جناحها تحت حته من القشره
و بعدين و هي بتشد راحت قاطعه حته من جناحها و طبعا جري بيها
باباها و مامتها علي الدكتور بس عقبال ما الدكتور و صل كان مش في حل غير
انهم يقطعوه و بعديها لما كبرت دخلت المدرسه دي 00
كوكو انت مش بترد عليا ليه ؟
ابدا يا كاكوكاكو بسمعك كمل عايز اعرف الباقي 00 و بان علي كوكو علامات مش كميله
من القلق و الضيق
و بعدبن يا كميل في اليوم ده برضو مش عرفت اقولها 00 و حصل تاني يوم ان عندها اجازه
بس هي هتقول لمامتها بس انها نازله معايا و هتقول لباباها رايحه الشغل
و قالتلي انها حكيت لمامتها عني 00 تاني يوم خدتها و رحنا قعدنا علي في روستوران
كوكوشقره 00 و احنا قاعدين هناك قلتلها ان انا عايز اتقدملها
و بالصراحه يا كوكو انا 00 انا 00 انا كنت 00
كمل يا كاكوكاكو 00 رد كوكو بصوت مش كميل
بصراحه يا كوكو انت كان عندك حق اما قلتلي زمان علي الوساوس اللي مضايقاك
انا و انا بتقدملها حسيت ان انا اللي بتقدملها صدقني حاولت كتير امنع نفسي بس معرفتش
المهم لقيت نفسي بقولها علي الحقيقه كلها و ان انت كوكو الكميل مش انا و كنت
مستني منها انها تضربني بجناحها علي وشي و تقوم بس لقيتها بتقولي طب ليه
عملتوا كده انا صحيح كان مثلي و كوكو احلامي هو كوكو الكميل بس لما
قابلتك لقيت ان انت الكوكو اللي انا بحبه 00 بس انت هتعمل ايه مع كوكو
هتقوله ازاي؟؟؟؟؟؟؟
رديت عليها ان انا محتار و مكسوف اوي منك و مش عارف و قضيت
بعديها الأيام اللي قبل ما اجيلك حيران جدا و مش عارف اعمل ايه
و كانت كوكوهايه عايزه تتصل بيك بس انا قولتلها لأ اناهروحله
و اديني قاعد قدامك اهه في نص ريشي و مش عارف اقولك ايه
بس انا اسف يا كوكو غصب عني 00 و بص كاكوكاكو لكوكو
و هو بيدمع و دي كانت اول مره كاكوكاكو يعيط و قاله 00
انا بحبها غصب عني يا كوكو قولي حاجه زعقلي اطردني من البيت حتي 00
بص كوكو الكميل و هو متنح لكاكوكاكو و بعد شويه رد و قال 000000
كاكان
************************************************************
سؤال الحلقه اللي فاتت 00
ماشاء الله ربنا يزيد و يبارك الكسبانين المره دي كتيييييير
السؤال كان 00 يا تري كاكوكاكو هيقول ايه لكوكو ؟
و الاجابات كانت كده 00
يعقوب 00 شكله هيعمل ندل في زمن الأندال
شمس 00 انا حاسه زي ما يكون مشاعر حب تسللت لقلب كاكوكاكو
من حيث لا يدري
اسراء 00 اوعي يكون قالها انه حبها و خطبها لنفسه

مبروك يا كميلين يا فايزيين
ياللا بقي شدوا حلكوا للسؤال الجديد
السؤال هو 00 يا تري كوكو الكميل هيكون رد فعله ايه؟؟؟؟؟؟؟؟؟
ربنا معاكوا و فكروا كويس

Wednesday, March 28, 2007

كاكوكاكو جه 00

الحلقه اللي فاتت 00
كوكو اتفق مع كاكوكاكو انه يقول لكوكوهايه انه عايز يتقدملها
الحلقه دي 00
صحي كوكو الكميل من النوم مش لقا كاكوكاكو في البيت و قام عشان يدخل يتوضا و يصلي
لقا ورقه متعلقه علي المرايه بتاعت الحمام مكتوب فيها 00
عزيزي كوكو الكميل ؛ انا مرضيتش اصحيك الصبح و انا نازل
علي العموم انا هروح لكوكوهايه اعمل اللي اتفقنا عليه
و لما ارجع هجيلك
كاكان يا كميل
و فرح كوكو اوي و اخد الورقه في حضنه و اقعد يبوس فيها من الفرحه الكميله
اللي هو فيها و بعدين حط الورقه في جيب الروب و اتوضا و صلي الصبح
و اقعد يدعي ان كوكوهايه توافق و دخل كوكو المطبخ عشان يحضر الفطار لقا الشباك
بيخبط 00 جري بسرعه افتكر انه كاكوكاكو جايبله الأخبار ؛ فتح كوكو الشباك لقا قدامه
طانط ام مكاوك جارتهم و شايله في جناحاتها صنيه كبيره اوي و متغطيه بمفرش كميل
و فتح كوكو و قال 00 اهلا يا طانط اتفضلي ؛ دخلت ام مكاوك 00 صباح الخير يا اكمل
كوكو في العالم انا اصلي شفت صحبك نازل الصبح قولت انت اكيد قاعد لوحدك روحت عملالك الفطار
عشان عارفه انك تعبان ؛ رد كوكو 00 ميرسي يا طانط ده كتير اوي ؛ نطت طنط
في منقاره و هو بيتكلم و هي رغايه اوي 00 لأ و ميرسي علي ايه انت زي ابني مكاوك الله يرحمه
فاكر يا كوكو الحادثه اللي حصلتله و مات فيها ؛ لغاية دلوقتي انا بكره الولد اللي كان بيلعب بالنبله
و جت في مكاوك موتته الله يرحمك يا بني 00 الا بقي يا كوكو عامل ايه و ازيك و ازي 00000
و لوك لوك لوكلوكلوك 00000 لوكلوكلوكلوك000 و كل ده و كوكو عمال يهز راسه و يبتسم
و هو راسه الكميله مشغوله اوي و مستني كاكوكاكو علي نار ؛ و اخيرا قالت ام مكاوك 00
اسيبك بقي يا كوكو تفطر و امشي انا احسن عندي غسيل و هروح السوق و انشالله
هجيبلك الغدا بس ربنا يسهل و الاقي الخضار كويس في السوق لحسن المره اللي فاتت مقولكش كان شكله ازاي
و لولولوكاوكاولوك صوصوصوصوصولوكولوصوصوص 00 يا للا بقي سلام اسيبك تاكل
و فتح كوكو الشباك و كانت دماغه قااااااااااد كده من الصداع ؛ دخل كوكو المطبخ و شال الغطا من علي الصنيه
لقا طنط ام مكاوك جايباله كل حاجه عيش و جبنه و قمح و لبن و عسل و كمان شوكولاته
فطر كوكو براحه عشان يضيع و قت و بعد مخلص دعا لطانط ام مكاوك و بعدين
قام بعد كده عمل كهوه كميله من كناحاته اللي هو بيحب يشربها دايما
و قعد قدام التليفيزيون يقلب في المحطات و فجأه سمع خبط علي الشباك قام خد العكاز بتاعه
و مشي بسرعه للشباك و فتح لقا قدامه الكوكوسطجي جايبله كواب 00 ازيك يا استاذ كوكو
عامل ايه حضرتك اتفضل الجواب اهو ايه ده هو حضرتك عيان لأ سلامتك الف سلامه
مش عايز خدمه مني و الله لأ اوعي تقول لأ متتكسفش ؛ رد كوكو 00 لأ شكرا يا عم كوكوسطجي
مش هتكسف عيب ده احنا اهل شكرا سلام 00 و قفل كوكو الشباك و دخل يفتح الجواب
لقاه من باباه انكل كاكا 00
حبيبي كوكو وحشتني اوي انا اسف اني اتأخرت عليك بس حصلي ظروف كتير اوي
يا رب تكون انت كويس نفسي اشوفك اوي ؛ علي العموم انا قدامي كام يوم و اوصل البيت
متقلقش علي
باباك كاكا حبيبك
قفل كوكو الكواب و هو فرحان اوي ان انكل كاكا قرب يجي عشان يروح معاه يقابل
بابا كوكوهايه ؛ يا سلام الظروف كلها كميله في نفس الوقت شكرا يا رب 00 قال كوكو كوه نفسه
الصغننه القلقانه الكميله 00
الليل قرب يجي و كاكوكاكو ما جاش يا تري ليه ؟ يا رب خير هو اكيد انشالله
هيجي بكره الصبح هو تلاقيه فاكر ان انا نمت انا اخش اصلي العشا و انام و اصحي بدري
خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ
و اكل كوكو الكميل قمح و لبن مع الملايكه الكميلين
خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ
صحي كوكو 00 و فات اليوم و كاكوكاكو مجاش
و فات اليوم اللي بعده و برضو مجاش و كمان مش بيرد علي الكوكوبايل و لا الكولوفون
و فاتت يوم كمان 00 و يوم كمان 00 و يوم كمان
و في اليوم السابع صحي وكوكو و هو لسه عنده امل ان كاكوكاكو هيجي
و علي بعد الضهر وصل كاكوكاكو 00 و دخل حاطط وشه في الأرض
مكسوف من كوكو اوي 00 و بصله و قاله 00
انا اسف يا كوكو يا كميل انا هحكيلك اللي حصل
و بصله كوكو و قاله 00 قول انت قلقتني
كاكان

مش هحط سؤال جديد الحلقه دي و هفضل اسأل نفس سؤال الحلقه اللي فاتت
عشان اديكوا فرصه لأن الاجابات كانت مش كتيره فعندوكوا فرصه كمان
و السؤال كان 00 تفتكروا كاكوكاكو هيقول ايه لكوكو الكميل ؟

Tuesday, March 27, 2007

لا كرامه لنبي في قومه

لا كرامه لنبي في قومه
الشهر اللي فات كتبت بوست بعنوان كلب الأمير
و استكمالا للحادثه دي هكتب بوست النهارده
بتفرج علي برنامج 90 دقيقه من عشر دقايق كده
و كانوا جايبين حادثه تانيه لكلاب الأمير السعودي
الأمير تُرك منه لله هو و اهله 00
الضحيه المره دي اسمه سيد مصطفي سيد و كان في
فندق الموفنبيك لما هجم عليه كلب الأمير و بطحه ارضا جابله
لمس اكتاف و حط بوزه و سنانه في وش الشاب و عضه و قطعله
هدومه و حاولوا يكلفتوا الموضوع زي ما عملوا مع اهل الطفله حبيبه بالظبط
قبل كده بس الولد اصر انه هيعمل محضر و مش هيسكت و فعلا طلع علي المستشفي
و منها علي معتز الدمرداش لفضح الموضوع و هو سخن كده 00
المهم ان اتصل المستشار القانوني لفندق الموفنبيك بمدينة الانتاج الاعلامي
محمد ابراهيم الزيات ؛ و حرق دمي الصراحه ؛ لأنه قال بعد ما سأله معتز
ايه الدور اللي قام بيه امن الفندق تجاه الحادثه 00 لا يا استاذ معتز امن الفندق
كان ليه الدور الأول و الأقوي في انتشال حبيبه من بين انياب الكلب ؛ و بالنسبه لحادثة
سيد ما قالش حاجه لأن الأمن معملش حاجه اصلا لأنه بشهادة الشهود امن الفندق
كان لامؤاخذه بيتلب من بوديجاردز الأمير 00
و طبعا عجبني رد معتز جدا علي الزيات لما قاله 00 لأ يشكر الأمن
بصراحه لمجهوده العظيم في انقاذ البنت لا الصراحه عمل اللي عليه
و زياده 00
اللي اتقال بقي النهارده و شد انتباهي ان الأمير ترك افندي كعب الغزال
متقدم فيه 87 محضر بنفس السبب 00
و انه في تونس طردوه شر طرده بسبب انه اتهجم علي عامل في الفندق
اللي كان متلقح فيه 00
طب يعني هو تونس اجدع مننا ؟ احنا ليه مرحلناهوش من زمان ؟
و لا هو علي رأي محمد صبحي في مسرحية تخاريف 00 بفلوسي يا كلاب
ما هو بصراحه الموضوع محير جدا 00
و الغريبه بشهادة شهود كتير ان اي حد بيجي يقدم محضر بيقع
تحت ضغط و تهديد من الأمير و دلاديله 00
يا تري مين بقي الضحيه القادمه للكلاب المسعوره ؟؟؟؟؟؟؟؟؟؟؟
و قال علي رأي الحكمه او المقوله او المثل اللي بيقول 00
لا كرامه لنبي لا في قومه 00 و لا في قوم تاني
سلام
اضافه بسيطه بعد قرأة الكومنتات 00
سمو الأميره البلطجيه تنازلت و نزلت من العرش لتتفقد
احوال الرعيه و ناقشت الموضوع ده في بيان ليها بعنوان
ههوهوهووووووهوهوهو00ووووو
و انا بشكر سموها و بنحني علي هذا الفضل العظيم
سلام تاني مره

talk shows

نتيجة الاستفتاء اللي كنت عاملاه عن افضل برنامج
حواري كانت النسبه من خلال 79 صوت
كالتالي 00

Total votes 79

القاهره اليوم
25%
90دقيقه 11%
الساعه العاشره
35%
البيت بيتك
18%
مش متابع
10%


و من رأي ان نسبه اللي مش متابعين كبيره اوي ؛
دلوقتي احب افتح باب الحوار و ادردش مع اللي صوت و اللي ما صوتش
و بخل علي كوكو بصوته ايه اسباب الأختيار اللي كل واحد اختاره
و اللي ما صوتش هغلس و اغتت شويه معلش استحملوني
يا تري ليه ما صوتش ؟؟؟؟؟؟؟؟؟؟؟؟؟؟؟
و ايديكوا معايا بقي في الاستفتاء الجديد
سلام









Sunday, March 25, 2007

كوكو قرب يبقي كويس

الحلقه اللي فتت00
كاكوكاكو جاب سر كوكوهايه لكوكو
الحلقه دي 00
سكت كاكوكاكو و بص لكوكو ومكملش اللي كان عايز يقولهوله
عشان لقا كوكو عينيه الكميله دمعت و بيعيط
و اتأثر اوي بالكلام اللي قالهوله كاكوكاكو ؛ و شويه و بص كوكو لكاكوكاكو
و قاله 00 ياه يا كاكوكاكو انا مش جه في دماغي الكميله ان كوكوهايه ممكن
يكون عندها كناح كده مش كميل بس انا دلوقتي بحبها اكتر و اكمل من الأول
هو انت هتقابلها امتي تاني يا كاكوكاكو ؟ بص كاكوكاكو لكوكو و سكت
و قاله 00 ما هو انا 00 لسه يا كوكو مش اتفقت معاها بس لو عايز يا كوكو احنا ممكن
نروحلها المدرسه دي بكره ايه رأيك ؛ رد كوكو 00 اه كده كميل؛ بس لأ انا هنزل ازاي
و انا تعبا ن كده يا كاكوكاكو لأ بص انت تنزل و تقابلها و تيجي تحكيلي و انا خلاص الحمدلله
فضلي حبة ريش صغنين و ابقي كويس و اخف كمان و اروح انا اقابلها بقي انا مبسوط اوي
سكت كاكوكاكو و ابتسم ابتسامه صفره و حط وشه في الأرض و قال لكوكو 00
اه طبعا يا كوكو ربنا معاكوا ؛ و رد كوكو 00 مالك يا كاكوكاكو انا حاسس انك مش كميل
شكلك كده مش كلت كميل و لا زم تاكل انا هعزمك علي كيكزا هت نطلبها
كوليفيري ايه رأيك ؟ رد كاكوكاكو 00 ماشي ؛ و اتصل كوكو و طلب اتنين كيكزا بالخضار
و قفل السكه و قال لكاكوكاكو 00 بص يا كاكوكاكو انت تبات معايا النهارده
و بكره تنزل تروح لكوكوهايه و تقولها انك بتحبها اوي و انك عايز تروح تتقدملها
و بعدين لما تلاقيها موافقه اكون انا ريشي طلع و خفيت انشالله اروح اتقدملها ماشي
انا مش هنسي الكميل اللي انت عملتهولي ده يا كاكوكاكو و اول كوكو صغنون نجيبه
هسميه كاكوكاكو؛ يا للا خش غير و البس الكيجامه كوه بسرعه 00
كاكان
سؤال الحلقه اللي فات
محدش كسب للأسف و كوكو زعلان
الاجابيه عندوكوا في الحلقه
عشان كوكو كان بيعيط
سؤال الحلقه دي
تفتكروا كاكوكاكو بعد ما يرجع من عند كوكوهايه المره الجايه هيقول ايه لكوكو ؟؟؟

شعبان قائض الانتفاضه السياسيه

كل ما اعدي في شارع الهرم و بالتحديد قدام كازينو الليل
اشوف يافطه كبيره للي بيطلقوا عليه قال ايه لا مؤاخذه
فنان شعبي ؛ الشخص العجيب من كل حته شعبان عبد الرحيم
صوره كبيره ليه علي باب الكباريه مكتوب عليها
الفنان شعبان عبد الرحيم
قائد الانتفاضه السياسيه و رئيس وزراء الفنانين العرب
تخيلوا اما هذا الكائن العجيب و الغريب الأطوار اللي مينفعش
اصلا يطلقوا عليه لقب فنان بأي حال من الأحوال يبقي قائد
الانتفاضه السياسيه ؛ الله يرحم قواد الانتفاضات
اللي عمرهم ما خدوا الشهره و لا الضجه دي
الناس اللي ماتوا شهداء و اتبهدلوا و طلع عينيهم
ياخد لقبهم هذا الشعبان اللي هيتحفنا قريب بأبنه كمان
عشان يكمل المسيره الشعبانيه العظيمه
استغفر الله العظيم ؛ اعتقد ان الموضوع مش ناقص كلام اكتر
من كده 00
سلااااااااااااااام

Friday, March 23, 2007

كوبري الموت 00

يا سلام عليك يا كوكو يا كميل لما بتحط منقارك في حاجه
بتجيب قرارها ؛ يا اصحابي الكميلين الحلوييين استكمالا
للبوستايه اللي كتبتها اول امبارح بعنوان 00 السؤال لغير الله مذله
اللي كنت اتكلمت فيها عن حادثة العربيه النقل تحت كوبري السيده عيشه
عرفت النهارده بشغل شارلوك هولمز و تأثرا بخالد الخميسي و حواديته مع سواقين التاكسي تفاصي الحادث اللي حصل من شهود عيان
و هؤلاء الشهود هم 00 سواق ميكروباص و ست من الستات بتوح الحواري
و اللي كانت راكبه جنبي في الميكروباص و دار حوار بينها و بين السواق
ما كنتش منصتاله و ماسكه الكتاب في ايدي و بقرا كالعاده لغاية ما سمعت
الست بتقوله 00
الست 00 هما شالوا العربيه بتاعة الحادثه
السواق 00 اه شالوها النهارده الصبحيه
الست 00 يا لهوي الواقعه كانت جامده اوي
انا محشوره في وسط الكلام 00 هو ايه اللي حصل بالظبط؟
الست 00 هو انتي مدرتيش يا بنتشي ؛ دي العربيه وقعت من فوق الكوبري
انا 00 يا ساتر ؛ انا كنت فاكره ان سور الكوبري هو اللي وقع
السواق 00 لأ يا ابله العربيه و قعت ؛ و دي مش اول حادثه
هو انتي سعادتك متعرفيش انهم مسميين كوبري السيده عيشه ده كوبري الموت
ده كل فتره كده تحصل حادثه جامده كده
الست 00 فاكر ياسطي الأوتوبيس بتاع المدارس اللي وقع و السواق مات برضك
انا 00 يا ساتر اللهم احفظنا ؛ انا شفت العربيه و هي علي الأرض بس ما كنتش عارفه كل ده
الست 00 ايوه ما الناس ربنا يعمر بيتهم غطوا العربيه بالبطاطين عشان المنظر
كان فظيع لأ مؤاخذه
السواق 00 انتي عارفه يا حاجه عارفه يا ابله و النعمه انا كنت معاهم و هما بيطلعوا الراجل من العربيه و كان محشور جامد و كان صعب اوي اننا نطلعه ده كان هيتفرتك في ايدينا ؛ و يوم حادثة الأوتوبيس انا كنت واقف في الموقف تحت الكوبري و شوفت الأوتوبيس و هو بيقع
انا 00 طب هي ايه المشكله ؛ ليه الحوادث دي كلها؟
السواق 00 الملف كده زي ما تقولي سعادتك تصميمه في الأصل غلط و احنا يا ما هاتينا و اشتكينا لكن محدش بيعبرنا و هيفضلوا سيبينا كده و كل شويه حادثه و حد يموت و خلاص ؛ ربنا يرحمنا
انا و كنا وصلنا السيده عيشه 00 ربنا يرحم الكل ؛ السلام عليكم
و فتحت باب الميكروباص و نزلت و عديت مكان مكانت العربيه موجوده
و دعيت للمتوفي بالرحمه
******************
بعد الحوار ده طبعا مش محتاجه اعلق مفيش كلام يتقال اكتر من الأتنين الغلابه اللي علي طبيعيتهم و سجيتهم دول قالوه ؛ و ربنا يحفظنا ؛ و اللي يسوق علي كوبري
الموت يخلي باله
سلام

يوميات الواحات 00


كتاب يوميات الواحات ؛ من الكتب اللي انا حبتها اوي و انا بقراها لأن انا عموما
بحب اعرف عن الأماكن اللي انا عمري مارحتها 00 و يا رب مروحهاش انشالله
بيحكي صنع الله ابراهيم من بداية حياته سريعا ؛ خلفيته و ابوه و اللي أثر فيه
وصولا بفترة اعتناقه المذهب الماركسي و السنين اللي قضاها في المعتقلات
و منها معتقل سجن الواحات اللي كان ليه اثر كبير اوي في انه يسيب العمل السياسي
و يتفرغ للكتابه ؛ بس مش ده اللي عجبني اوي في الكتاب لأن دي مجرد ذكريات
صحيح مثيره جدا بس قارتها لكتاب كتير من النزلاء الدائمين في المعتقلات ؛ انما
اكتر ما شد انتباهي هو الجزء التاني من الكتاب اللي هو عباره عن الـتأملات اللي كان بيكتبها في زنزانته و حتي كاتبلها عناوين بأسامي الشهور اللي كتبها فيها
هي نقط غير مترابطه بس كل نقطه فيها تستدعي انك تقراها اكتر من مره عشان تشبع منها و تستوعبها
يعني مثلا من النقط اللي انا وقفت قدامها و عجبتني 00
*عندما نعبر عن انفسنا فأننا نعبر عن الجماعه ؛ لقطه من عند السور ؛
ما هو المشترك ما بين هذه الجموع 00 الملل ؛ القرف ؛ سقوط الأقنعه 00 ذهبت
رومانسية النضال ؛ بقت الحقائق عاريه تماما ؛ عبادة الفرد و انهيارها ؛ اعادة رومانسية النضال ؛
بقت الحقائق عاريه تماما

**************
* لن يكون للحياه معني الا اذا توقفنا فجأه و نظرنا اليها فرأينا كل ما لم تكن تراه عيوننا من قبل ؛
اذا ما رأينا كل ما يختفي تحت السطح ؛ اذا ما ثار فضولنا لنري معجزة الحياه اليوميه
********************
علي العموم اللي يحب يشتري الكتاب هو الناشر 00 دار المستقبل العربي
و بيتباع في 00 مكتبة مدبولي
و سعره 00 25 جنيه
و محدش يقول يا لهوي غالي
هههههههههههههههههههه
سلام

Thursday, March 22, 2007

سر كوكوهايه 00

الحلقه اللي فاتت 00
كوكو قعد يفتكر مامته في عيد مامة الكوكوهات و يعيط
الحلقه دي 00
كوكو جري بالكرسي بالعجل بتاعه و فتح لكاكوكاكو الشباك و اول ماكاكوكاكو
دخل بص لكوكو الكميل و قاله 00 يا كوكو هيييييه انا عرفت كوكوهايه ليه مش بتطير
رد كوكو بسرعه 00 تعالي اقعد هنا ياكاكوكاكو بسرعه و احكيلي بالتفصيل من اول ماروحتلها
رد كاكوكاكو 00 ما شي ؛ انا يا سيدي سيبتك و روحت البيت و انا مروح اشتريت
لماما هديه و قعدت معاها و بعدين دخلت نمت و قبل ما انام قعدت افكر و افكر و افكر كتير
ازاي هقابل كوكوهايه ؛ المهم لقيت ان احسن طريقه استناها برضو علي محطه الأوتوبيس
من غير متشوفني و اركب نفس الأوتوبيس معاها و اشوف هي بتروح فين
المهم لبست نضاره و كاسكيت عشان متعرفنيش و اول ما جه الأوتوبيس رحت مستني هي تركب
و روحت راكب بعديها ؛ و فضل الأوتوبيس ماشي بينا كتير لغاية ما وصلنا مكان
انا اول مره اشوفه و نزلت كوكوهايه روحت نازل وراها علي طول ؛
و بعدين لقيتها دخلت مكان كده و بصيت علي اليافته اللي موجوده علي البوابه لقيت مكتوب
عليها مدرسة الكوكوهات ذوي الكناحات الخاصه ؛ و فهمت علي طول ان دي مدرسة
اخواتنا الكوكوهات اللي جناحاتهم مش زي بتاعتنا ؛ و روحت داخل من البواب عشان اعرف كوكوهايه بتعمل
ايه هناك ؛ و انا داخل سالني البواب رايح فين قولت له لسه في كوكوهايه دخله من هنا
انا عايزها و رد عليّا البواب 00 اه انت عايز ميس كوكوهايه طيب ادخل حضرتك
من الباب الكبير اللي هناك ده هتلاقيها في اوضتها اول اوضه علي اليمين00
و قولتله ميرسي و مشيت علي الوصفه و فعلا و صلتقدام الأوضه اللي كان بابها نصه
ازاز و ببص شوفت منظر خلاني عايز اعيط شوفت كوكوهايه من غير جناح يمين
و من الخضه معرفتش اعمل ايه و في نفس الوقت ده لفت كوكوهايه فشافتني من ورا الباب
و اتسمرت مكانها و انا كمان ووقفنا نبص لبعض ؛ و بعد شويه قربت كوكوهايه علي الباب
و فتحته و قالتلي 00 ادخل ؛ و اتحركت براحه جدا و انا باين علي اني مخضوض
و قفلت كوكوهايه ورايا باب الأوضه و قالتلي 00 انت جيت ورايا كل ده عشان تعرف سر ان انا مش بطير صح
يا كوكو و اديك عرفت ان انا معوقه و عندي جناح صناعي ايه رأيك ؟
رحت انا رديت عليها و انا مش عارف اتكلم 00 طب و دي فيها ايه ؟ انتي خبيتي عليا ليه؟
ردت كوكوهايه 00 عشان انا مش عايزاك تبقي بتحبني عشان انا صعبانه عليك
طب هو انتي بتيجي هنا ليه كوكوهايه ؟ ردت عليا 00 انا اصلا كنت تلميذه في
المدرسه هنا و لما كبرت اشتغلت مدرسه للكوكوهات اللي زي
عرفت ليه بقي يا كميل 00 و سكت كاكوكاكو و بعدين بص لكوكو و قاله بس كده
كاكان
الفائز في السؤال اللي فات 00 و لا حد كل الاجابات كانت غير مطابقه للمواصفات
بس اللي قربوا للحل كانوا 00
شارم قال 00 عشان معندهاش جناحات
حسن محمود قال 00 يكون كناحها الكميل فيه كرح
فممكن نعتبرهم نص كسبانين
مبروك يا كميلين يا نص كسبانين
هههههههه

سؤال الحلقه دي 00
هو كاكوكاكو سكت ليه و بص لكوكو ؟؟؟؟؟؟؟؟

Wednesday, March 21, 2007

السؤال لغير الله مذله

السؤال لغير الله 00 مذله

النهاره كان يوم ما يعلم بيه الا ربنا ؛ يا ساتر يوم مليان حوادث
معديه من السيده عيشه لقيت عربيه نقل داخله في عامود الكوبري
وواقع عليها سور الكوبري من فوق مبططها زي علبة السردين
يا ساتر منظر مفزع اللهم احفظنا ؛ وصلت مكان ما كنت رايحه
بعد ساعتين عناء و مجاهده في المواصلات و السكه المقفوله بالضبه
و المفتاح الاقي الناس بتقول الحادثه الأفظع بتاعة قلعة الكبش في حي السيده زينب
حريق مهول حرق حوالي 250 بيت من الخشب و الناس بقت في الشارع ملهومش مكان يسترهم
و مأوي ؛ اسأل و كان سببه ايه الحريق يقولولي انبوبة بوتاجاز
طبعا مستغربتش خالص لأن انا كتبت بوست بخصوص الموضوع ده زمااااان
بعنوان روتين حتي مع الوفيات ؛ و كان ساعتها بيقولوا ان هتطلع لجنه للتفتيش و اجراء اللازم
حسبي الله و نعم الوكيل اهه منطقه بحالها ولعت و كانوا لسه مبعتوش اللجنه للتفتيش
يا تري مستنين ايه مصيبه اكبر من كده ؛ علي العموم اللي عايز يقرا اكتر في الموضوع
جبتلكوا لينك اهو هنا
و بدعي للناس دي كلها بالصبر و بالرحمه من ربنا و اقولهم ان حقيقي
السؤال لغير الله و خصوصا في البلد دي 00 مذله
سلام

james horner ..


انا النهارده مكنش في نيتي اني اكتب غير البوست اللي فات و بس؛ بس شئ دفعني
اني اكتب ؛ و هو المؤلف الموسيقي اللي بيسحرني بالموسيقي بتاعته من فيلم لفيلم
الأمريكي الجنسيه اللي برع في افلام كتير ليه ؛ james horner
انا دلوقتي قاعده بسمع الموسيقي التصويريه للفيلم و سعيده سعاده بالغه
مش متصورين انا لما بقعد كتير مسمعهاش ببقي زي ميكون حبيبي مسافر ووحشني
فعلا بتوحشني اويييي ؛ و انا بسمعها بحس انها بتتكلم ؛ فيها وصف للحاله جميل جدا
و فيها شجن جميل و انا بحبها اوي لأن انا عموما بحب موسيقي القرب الاسكتلاندي
و عموما بحب مؤلف الموسيقي ده في كل اعماله ؛ ف و انا بسمعها دلوقتي حسيت قد ايه
انا نفسي اقول احساسي بيها ؛ طبعا انا مش هتكلم عن الفيلم لأن اكيد الناس كلها شافته
لأنه فات عليه 12 سنه ؛ هو فيلم من انتاج 1995 ؛ الفيلم كله علي بعضه حكايه
بس الموسيقي التصويريه حكايه اكبر ؛ و انا بسمعها افتكرت الموسيقي التصويريه بتاعت
افلامنا الجميله دلوقتي و حسيت اني نزلت من السما للأرض حقيقي مفيش مقارنه
لأن الفرق واسع اوي زياده ؛ المهم احب اكتبلكوا شويه اسامي افلام من اللي
الف الموسيقي بتاعتها جيمس هورنر 00
legend of the fall 1994
titanic 1997
the mask of zoro 1998
beautiful mind 2001
troy 2004
apocalypto 2006
دي طبعا مش كلها بس اشهرها ؛ و اللي مسمعش يسمع و يدعيلي الأول و بعدين يقولي رأيه
سلام

عيد مامة الكوكوهات 00

الحلقه اللي فاتت 00
كوكوهايه راحت زارت كوكو الكميل في المستشفي
الحلقه دي 00
كوكو قاعد علي كرسي بعجل و لسه متجبس و كاكوكاكو ماشي في الطرقه بتاعت
المستشفي و متجه ناحيه الأسانسير و كوكو بيقوله 00 هو صحيح المستشفي المفروض
مش كميل و اللي بيخشها بيبقي عشان هو مش كميل بس انا زعلان عشان ماشي لأن كل الناس هنا كميلين
و الكوكارضات طيبين خالص يا كاكوكاكو انا نفسي اقعد شويه كمان
رد كاكوكاكو 00معلش يا كوكو تعالي زرهم لما تبقي كويس بس دلوقتي انا لازم

اروحك و بعدين اروح اشوف مامتي عشان بكره عيد الأم و لازم اقعد معاها
رد كوكو الكميل و هو حزين 00 اه صحيح ماشي و سلملي عليها
بس يا كاكوكاكو انا نفسي اعرف اوي موضوع سر ان كوكوهايه مش بتطير عشان خاطري الكميل
تاني يوم علي طول تروح تستاناها و انا هحملك المسؤليه لأن انا طبعا مش هعرف اكي معاك
و وصلوا تحت الشجره اللي فيها شقة كوكو ؛ و طبعا كانت المشكله الكبيره ازاي هيطلع كوكو و الكرسي اللي بعجل
بس عرف كاكوكاكو يتصرف و راح خبط علي الجيران بتوع كوكو و كانوا كوكوهين كبار و ضخمين
بس طيبين و كميلين و طلب منهم انهم يساعدوه و طبعا رضيوا علي طول
عشان كوكو الكميل حبيب الملايين الكميلين ؛ و شالوا كوكو الكميل طلعوه قدام باب الشقه
بالكرسي ؛ و قالهم كوكو 00 ميرسي اوي يا كيراني يا كميلين مش عارف اقولكوا شكرا ازاي
ردوا عليه 00 لا شكر علي واجب يا كوكو الكوكوهات لبعضيها و بعدين النبي وصا
علي سابع جار كوكو؛ سلام بقي ؛ و دخّل كاكوكاكو كوكو الشقه و سلم عليه و مشي
و قعد كوكو في البيت لوحده و افتكر ان كاكوكاكو رايح لمامته عشان عيد مامة الكوكوهات

و قعد كوكو يبص في السقف و يفتكر لما كان صغير و مامته بتأكله في منقاره الكميل
و ازاي كانت بتطير و ترجع كيباله حبوب و كمح و اكل كميل هو بيحبه ؛
و لما كان يبقي عيان و مش حاسس انه كميل كانت تفضل سهرانه كنبه طول الليل
تعمله كمدات و تديله الدوا ؛ و ازاي لما كان يرجع من المد رسه تقعد تذاكرله
و حتي لما كانت تزعقله او تضربه هو قد ايه كان بيبقي مبسوط انها بتخاف عليه و بتحبه
اوي كده ؛ و سرح كوكو بعيد اوي و افتكر الأغنيات اللي كان بيشغلها في البيت
في عيد الأم و ازاي كان بيعملها مفجأه و يجيبلها هديه كميله و افتكر يوم
ما اشترلها فستان ريشه اخضر كميل و فيه زراير و سوسته و ازاي جه ضيق
عليها و لما نزل بسرعه و طار كتير عشان يغيروا و لما راح مش لقا نفس اللون
و زعل و جاب لها واحد تاني موف و ازاي هي لبسته وهي فرحانه ؛
فاق كوكو من السرحان و راح بالكرسي اللي بعجل و دخل الأوضه بتاعت كوكايه مامته
و فتح دولاب هدومها و مسك الفستان الموف و حطه في حضنه ؛ و راح ناحية الكومودينو و فتح الدورك
و طلع منه البوم فيه صور للعيله ؛ و قعد كوكو و هو بيعيط و حاسس بالوحده
يتفرج علي الصور ؛ صوره و هو و مامته علي البحر في الصيف ؛
و صوره مع مامته في حفلة المدرسه ؛ و صوره ليهم في كنينة الكوكوهات بيزوروا
صحابهم 0000 ياه ه ه ه يا كوكو فين الأيام الكميله دي
و رنت في ودن كوكو اغنيه مامة كوكو كانت بتغنيهاله علي طول قبل ماينام 00
كوكو الحبايب يا كوكوهي انت 00 يا احلي كوكو في حياتي انت
تقول يا ماما يا كوكو ماما 00 مشبعش عمري من كوكو الكيمل
مشبعش عمري من كوكو الكميل 00 كوكو الحبايب يا كوكوهي انت
و خرج كوكو من الأوضه بتاعة مامته و قرر انه لازم يفتح الأغاني في البيت زي ما كان
بيعمل زمان و اكيد مامته هتبقي فرحانه بيه و هتحس بيه 00
و فتح كوكو اغاني 00
كوكايه يا حلوه يا اكمل غنوه 00 عاشيه في كلبي و كوه عنيا
يا كوكايه يا ماما 00 يا ماما يا كوكايه
انتي يا كوكايه يا مامتي من الكنه 00 تحت كناحك اعيش و اتمني
************************************************
كوكايه زمانها كايه 00 كايه بعد شويه
كايبه لكوكو هدايات 00 كايبه معاها شنطه
فيها بطه و وزه بيقولوا كاكاك
عارف الواد اللي اسمه كوكو كه الكوكتور و عمله ايه
************************************************
و يا ماما بنحبك من كلبنا 00 بببمبمبمب
و يا ماما يا حبيبة الكووووووووك
*********************************************
و نام كوكو الكميل و هو بيسمع الأغاني ؛ و بيعيط
و صحي تاني يوم علي خبط جامد عيلي الشباك
و صحي لقا كاكوكاكو جه و راح فتحله الشباك و دخل كاكوكاو و اول كا دخل قاله 00
هيههههههههههه ؛ انا عرفت ليه كوكو هايه مش بتطير
كاكان

Monday, March 19, 2007

a walk to remember

كنت قريت بوست للصديق البلوجاوي اللي بعتز جدا بالكومنتات
و البوستات بتاعته ضياء و البوستايه اللي قارتهاله كانت بعنوان
a talk to remember
كانت بوستايه حزينه جدا و من الممكن ان انا اكون بقلب عليه المواجع دلوقتي
بس البوستايه شجعتني جدا علي اني اتفرج علي الفيلم اللي كان بيحكي عليه
و بعد ما شفت الفيلم كان لازم اكتب البوستايه دي منها شكر لضياء علي
انه كان السبب اني شفته و كمان اكتب احاسيسي و محاسيسي
كالعاده و اوجع دماغكوا
a walk to remember
فيلم من انتاج 2002 ؛ فيلم رومانسي من الدرجه الأولي
و ده شئ عجيب جدا لأن انا مش من محبين الأفلام الرومانسيه اوي
بس بالنسبه للفيلم ده و للي كان في البوست اللي قبله
sweet november
الموضوع مختلف و شكلي هتشد كتير للنوعيه دي من الرومانسيه ؛
الفيلم في علاقه جميله بين البطلين تخلي كل واحد نفسه يبقي مكانهم
و الفيلم بيناقش قضيه مهمه و هي التغيير الجذري الخارجي و الداخلي
اللي ممكن يحصل للواحد لما يحب بجد ؛ و ازاي ان اي حاجه كان
من المستحيل انك تعملها او بتتريق عليها قبل الحب بعديه بتحصل
و بكيفك و كمان بتبقي مستمتع ؛ قد ايه كانت البنت ليها رساله
تأديها في حياة الشاب ده ؛ طبعا مش هحكيلكوا علي العياط و المناديل
اللي خلصت قدام الفيلم من كتر ما الحاله قويه اوي ؛ و كان اختيار المخرج
mandy mooreللممثله adam shankman
اختيار موفق جدا هي صحيح مش جميله و لا مبهره بس في وشها نور
و نظره ملائكيه عجيبه و شها فيه حنيه جميله اوي انا شخصيا حبتها اوي


و من المشاهد اللي عجبتني اوي و حفظت الحوار اللي فيها ؛ اّخر مشهد في الفيلم
بعد موت البنت و وزها رايح يزور ابوها و قاله 00
am sorry she never had a miracle
و يرد عليه الأب 00
she did , it was you
و هو ده اللي الفيلم عايز يقوله ان مش المعجزات بس ان حد عيان يشفي اوي
حاجه زي كدا بس انما كون ان حد يغير حياة حد جذريا من الألف للياء و ينتشله من الضياع
و الانحلال و التفاهه و ينقله لعالم مختلف يوصل منه في للنجاح هي دي المعجزه
انا مش لقيه كلام اقوله اكتر من كده غير ان انا سعيده جدا اني
شوفت الفيلم و سعيده اوي بالحاله اللي وصلتلي بعديه
و ادعي في الاّخر لكل الناس بالنجاح و اي حد في حياتك شايف انه عمل التغيير
ده لازم تشكره لأنه اكيد هيكون عمل 00 معجزه
اخر حاجه اقولها ان الأبطال بتوع الفيلم اخدوا جايزة احسن ممثلين في سن المراهقه
سنة 2002 في
Teen Choice Awards
و الصراحه يستحقوها بجداره
سلام
بعد قراية الكومنتات 00
الحته دي بقي عشان ضياء مخصوص و اللي يحب هو كمان مفيش مانع
ده لينك لداونلود للفيلم بس لازم برنامج
bitlord , or utorrent
و لينك الفيلم هنا
اي خدمه يا استاذ ضياء ؛ بس ابقي ادعيلي
سلام تاني مره

Saturday, March 17, 2007

SWEET NOVEMBER

البوستايه دي مخصوص لصديق العشه الدائم 00 حسن محمود
طبعا هتغيروا و تحقدوا عليه و تقولوا اشمعني هو ؟
هروح انا قايلالكوا اصل هو سألني في كومنت ليه
عن سبب حبي للفيلم ده و ان هو شافه و لقاه حزين اوي
و قلت بدل ما ارد عليه في كومنت اهه بالمره اكتب عن الفيلم
اللي شفته فوق السبع مرات و لسه مستعده اشوفه 70 كمان
و انا بتفرج علي الفيلم ده بالذات بتنتابني حاله من الانسلاخ من الواقع
المحيط بيه و وداني بتتسد و بحس ان انا دخلت معاهم جوه الفيلم
و السبب لحبي الفظيع للفيلم ده هو حبي للمثله الجميله الرائعه

اللي لما بتمثل ما بشوفهاش انما بشوف الشخصيه اللي هي بتعملها
قد ايه معبره و قبولها و حضورها رهيب الممثله الجميله

charlize theron
بس طبعا مش هي السبب الوحيد لحبي للفيلم ؛ انما الفيلم فيه حاله
من الحزن الفظيع اللي يخليك تتعاطف مع كل ممثل فيه
و خاصة البطله الفيلم فيه حاجه غريبه بتسحبني انا فعلا مش قادره
احط ايدي عليها بالظبط بس هو احساس عجيب بيجيلي ؛
يعني مش هتصدقوا ان انا و انا بحكي عنه جوايه حاجه بتحرك و بتدفعني اني اتفرج عليه دلوقتي
الفيلم فيه انسيابيه عجيبه و فكرة الفيلم نفسها تخليك تتعاطف مع
بطلة الفيلم المريضه ؛ و فوق كل ده انا كل مره اشوف الفيلم اعيط اوي
في نهايته لأن كمان النهايه مفتوحه ممكن تتوقع اللي يعجبك
كل ده مع اني مش من محبين الممثل التقيل اللي اسمه
الا ان المخرج نجح في انه يظهره بشكل حلو keanu reeves
بس هو في كل الأحوال الفيلم المتحكم فيه البطله مش البطل
انا لو قعدت اتكلم عن احاسيسي و محاسيسي تجاه الفيلم ده
مش هخلص
عموما الفيلم من انتاج 2001؛ و العجيب جدا ان الممثل و الممثله
اترشحوا لجايزة اسوأ ممثل في 2002 في مهرجان
razzie awards
و ده شئ عجيب جدا لأن الممثله ادت دورها ببراعه و طلاقه و صدق ميتوصفش
نهاية انا اشجع اللي ما شفش يشوف و يحكيلي
سلام

هي ليه مش بتطير؟

الحلقه اللي فاتت 00
كوكو نايم في المستشفي مربط من كل حته
الحلقه دي 00
قدام باب اوضة كوكو الكميل في المستشفي واقف كاكوكاكو
و كوكوهايه و شايله في جناحاتها بوكيه ورد كمييييل
و كبير ؛ و بيقولها كاكوكاكو 00 بصي احنا لازم نطبطب علي كوكو
اه قصدي كركر ؛ معلش بتلخبط في الاسم اصل من كتر ما احنا
اخوات و قريبين من بعض بتلخبط في اسامينا ؛ يا للا يا للا ندخل
عشان هو كان عايز يطمن قصدي ان انا اطمن عليكي
و خبط كاكوكاكو بجناحه علي الباب و فتحه براحه و دخل
و دخلت و راه كوكوهايه 00 فتح كوكو عينيه براحه لقي كوكوهايه
قدامه و من فرحته حاول يعدل نفسه عشان يقعد و معرفش
و قال كوكو الكميل 00 ازيك يا كوكوهايه؟ احنا اسفين
علي المشكله اللي عملناها بس هو باباكي اللي مش كميل 00
قصدي 00 انا اسف انا كنت اقصد 00
و صوصوت كوكوهايه ضحكايه براحه 00 لأ انا فاهمه قصدك
و مقدره انك موجوع من الضرب ؛ و رد كوكو 00 طب انتي عملتي ايه
لما روحتي ؟؟ ردت كوكوهايه 00 و لا حاجه لما روّحت قلت له يا بابا انت فهمتني
غلط دول صحابي في الجامعه و قابلتهم صدفه راح مزعق و قايلي بس انا شفتهم قبل
كده كانوا واقفي تحت الشباك ؛ و لفت لكوكو المزور اللي هو كاكوكاكو و قالت ؛
هو انتوا فعلا جيتوا يا كوكو يا كميل قبل كده 00 ارتبك كاكوكاكو و بص لكوكو فهز كوكو
راسه بالعافيه 00 و رد كاكوكاكو 00 اه اصل انا كنت عايز اجي اطمن عليكي
يمكن تطلعي بالصدفه في البلكو 00 الكلكونه بس باباكي شافنا
ردت كوكوهايه 00 المهم ان انا لازم دلوقتي اقوم اروح لحسن بابا
يرجع من السفر مايلاقنيش تبقي مشكله كبيره خالص 00
فبسرعه رد كوكو الكميل 00 ليه ما تستني شويه انتي وحشاني
اقصد و حشا كوكو الكميل ؛ و بص كوكو لكاكوكاكو و قاله 00
متقول حاجه ياكوكو 00 رد كوكو المزيف 00
اه متخليكي شويه 00 ردت كوكوهايه 00 اصل انا خرجت
من الشباك الوراني اللي بابا نسيه مفتوح و سيبته مفتوح
عشان هو اخد مني المفتاح و كمان لما انت يا كوكو حدفتلي الطوبه
الصبح الأزاز اتكسر منه حته و خايفه كمان يرجع يلاقيه مكسور
و يقعد يسألني هو مين اللي كسره انا اسفه بس لازم اطير بسرعه
حتي مش هركب المواصلات عشان اوصل اسرع 00
و استغرب كوكو اوي هي ليه مش بتطير اصلا و بتركب مواصلات
بس معرفش يسألها عشان هي كانت مستعجله ؛ و سلمت
كوكوهايه عليهم بسرعه و راحت خارجه من الشباك
و كوكو الكميل و كاكوكاكو عمالين يبصولها و بعدين راح كوكو
بص لكاكوكاكو 00 هي ليه يا كاكوكاكو بتركب مواصلات؟؟؟؟؟؟؟؟؟؟؟؟؟؟؟؟
كاكان
مسابقة كوكو الكميل 00
قررت اني في كل حلقه يبقي في سؤال اخر كل حلقه
مطروح لصحاب كوكو يجاوبه عليه و اللي هيجاوب صح
كوكو الكميل هيكتب اسمه في الحلقه اللي بعديها
و السؤال هو 00 يا تري ليه كوكوهايه في العادي مش بتطير و بتركب مواصلات؟

Friday, March 16, 2007

صباحك سكر زياده اوي 000

صحيت النهارده بدري علي غير العاده ؛ و فتحت التليفزيون
برضه الصبح علي غير العاده ؛ فتحته علي قناة او تي في
و كان شغال برنامج اسمه صباحك سكر زياده ؛ و هو شبه برنامج
صحصح معانا اللي كان بيجي علي قناة النيل للمنوعات ؛ و هي نفس الغلاسه
و نفس البرامج تقريبا و نفس ستايل المذيعين بس اهو يبقي الواحد اتفرج00
المهم سأل المذيع المذيعه سؤال 00 يا تري بتحبي تعملي ايه الصبح؟
اللي هي الطريقه اللطيفه اوي زياده اللي بيستعملوها المذيعين في الرغي مع بعض 00
ردت عليه بحب افتح الشباك و اقول يا رب عدّي اليوم ده علي خير
فرد عليها المذيع 00 في ناس كتير بتحب تعمل حاجات مختلفه الصبح
تعالي نروح نشوف الناس قالت ايه 00 و انتقلوا للفقره المسجله
اللي الناس بتقول فيها هي بتعمل ايه الصبح المهم ان ناس كتير قالت كلام عادي
اللي هو زي مثلا 00 بغسل سناني ؛ بلعب رياضه ؛ بشرب نسكافي ؛ بصلي الصبح
بنت واحده قالت 00 انا لما بصحي الصبح اول حاجه بعملها اني بشكر ربنا ان انا لسه
عايشه 000 رجعوا للأستوديو تاني و كان الموقف اللي انا كاتبه عشانه البوست
ده و هو ان المذيعه بصت للمذيع و بمنتهي الأستخفاف و الغلاسه قالت 00
شوفت يا فلان 00 اللي هو المذيع و ضحكت اوي بتريقه 00 شوفت اللي قالت انها
اول حاجه بتعملها انها تشكر ربنا انها لسه عايشه هاهاهاهاهاهاهاها
طبعا انا ركزت اوي للموقف لأن ايه مشكلة انها تعمل كده علي الصبح ؟
و اللي خلاني اركز و استغرب اكتر ان انا شخصيا لما بصحا من النوم بدعي
بالدعا اللي بيقول 00الحمد لله الذي احيانا بعد ان اماتنا و اليه النشور
اعتقد بقي ان المشكله عند المذيعه نفسها و لازم تتعالج من القصور في المعلومات
اللي عندها ؛ ده لو يجوز نطلق عليها معلومات ؛ انما من رأي انها اساسيات
نهاية كده 00 من المفروض ان اللي بيشتغلوا الشغلانه دي يتنقوا علي الفرازه
مش كل من هب و دب كده يشتغلها لأن زي ما معروف ان الاعلام ده اداه
مؤثره بنسبة 1000 في الميه في اللي بيتفرج 00
ياه انا اتكلمت كتير اوي مع ان الموضوع بيتهيألي واضح
سلام بقي 00
بس هقترح اقتراح قبل ممشي ان البرنامج المفروض يعدلوا شويه في اسمه
و يسموه 00 صباحك سكر زياده اوي ي ي ي ي ي و تقيل يموع النفس
سلام

Wednesday, March 14, 2007

ارجوكم ادعوله 00

ارجوكوا ادعوا معايا لزميلي من ايام الدراسه اللي اتوفي
من يومين ؛ اكيد كلنا هنحتاج الدعاء من الأخرين بالرحمه
في يوم من الأيام ؛ فأدعوا معايا و اكيد هتتردلك في يوم وفاتك
احب بس اعرفكوا بسبب موته لعل نتعظ جميعا و نهتم شويه بالعمل
للاّخره ؛ يا جماعه زميلي هاشم الشريف الله يرحمه كان قاعد عادي خالص جتله شرقه
معرفش ياخد نفسه مات و كان في ريعان الشباب ؛ حبيت اكتب سبب موته
لأني حاسه انه مهم اننا نعرف ؛ اسألكم الدعاء
****************************************
الي روح المرحوم 00 هاشم الشريف
اللهم ارحمه و ارحم موتانا جميعا
اللهم اجعل قبره روضه من رياض الجنه و لا تجعله حفره من حفر النار
اللهم ثبته عند السؤال
اللهم ثبته عند السؤال
اللهم هون عليه وحشة القبر
اللهم اغسله بالثلج و البرد
اللهم ترأف عليه
اللهم ارحمه من عذاب القبر
اللهم اجعل من فوقه نور و من تحته نور
و من حوله نور
اللهم صبر اهله و خفف عليهم لقد انعمت علينا بنعمة النسيان
يارب العالمين
ارحمنا و ارحم المسلمين جميعا الأحياء منهم و الأموات
و استرنا و استر المسلمين جميعا الأحياء منهم و الأموت
اللهم لا تمتنا الا و نحن مسلمين
اللهم احسن ختامنا
و امتنا علي شهادة ان لا اله الا الله و ان محمدا رسول الله
امين

Tuesday, March 13, 2007

اللي مالوش خير في اهله 00

اللي مالوش خير في اهله 00 مالوش خير في حد

امبارح بسمع نجوم اف ام و لقيتهم بيتكلموا في
موضوع لطيف و يشجع الواحد علي انه يسمع
و ده علي غير عادة نجوم اف اع ؛ كانوا
بينقشوا موضوع ان ليه لما ربنا بيفتح علي فلان
و يسهلهاله ينسي اصله 00
انا الحقيقه الموضوع عجبني و ده اللي شجعني
اني اكتب فيه بوستايه لأن الموضوع ده منتشر جدا
و خاصة في الوسط الفني 00 تلاقي الأخ و الأخت
الفنانين بداية طريقهم الفني مسلوعين و معضمين
لأنهم كانوا جعانين و مش لقيين الللقمه
تعالي كده شفهم بعد اما يبقوا نجوم و الفلوس بتجري في
ايديهم بقي شكلهم ازاي و تحس انهم بقوا اتنين في بعض و يبان
عليهم اللحمه و الهبر و تيجي في لقاء في التليفيزيون تقولك00
بابي اصله كان عنده سلسلة محلات في لندن ؛ بابي ايه بس
يا حاجه ايش حال احنا شايفينك من يوم ماطلعتي و كنتي بتحطي روج
من اللي بيتباع في محلات 2 و نص ؛ و تلاقي بقي اسطوانات ترعرعت
في بيت بابا ؛ و مامي كانت من العيله المالكه 00 و حاجات شبه كده
كتير ؛ و اللي شبه كده برضو تيجي ممثله تقولك لأ اصل انا مش بعمل ادوار
اغراء و لا مشاهد فيها بوس و حاجات خليعه ؛ و تيجي انت صدفه قاعد قدام ميلودي
افلام او روتانا و جايبن فيلم مقاولات قديم من اللي بيجي الساعه 2 الضهر ده؛ تلاقيها
البوس في الفيلم اقل حاجه عملاها ؛ طب ليه الكدب ما هو انتي تتقفشي بسهوله اوي
ده شئ ما يتخباش ؛ من رأي ان الناس دي لازم متنساش اصلها
بالعكس تفتكر هي قد ايه كانت محتاجه و ربنا اداها ؛ و تفتكر برضو
انها تتوب عن الوحش اللي هي عملته قبل كده و مترمهوش ورا ضهرها و تنكره
و تنساه 00 اصل اللي مش بيشكر ربنا علي نعمه ربنا مش بيزيده
و اللي مش بيتوب و بيطنش و بيسقع هو كمان ربنا مش هيسيبه
و علي رأي المثل 00
اللي مالوش خير في اصله 00 مالوش خير في حد
سلام


Monday, March 12, 2007

كوكو يرقد 00

الحلقه اللي فاتت 00
كوكو فقد الوعي و الكوكوهات لفت حوالين دماغه
الحلقه دي 00
فتح كوكو عينيه الكميله بالعافيه لقا الدنيا قدامه مش كميله
و مزغلله خالص ؛ و حرك كوكو الكميل دماغه يمين و شمال
حس انها تقيله اوي ؛ و ابتدي كوكو شويه شويه يشوف كميل
و شاف كاكوكاكو نايم علي كرسي جنبه و راح كوكو نادهله
و هو مش قادر صوته يطلع 00 يا كاكوكاكو و لأول مره يصحي كاكوكاكو
بسرعه من النوم و راح قايم من علي الكرسي بسرعه و راح لكوكو
و مسك كناحه براحه و قاله 00 ايه يا كميل انت فقت الحمدلله
رد كوكو بصوت مش كميل و موجوع 00 هو انا فين؟
رد عليه كاكوكاكو 00 انت في المستشفي اصل انت كنت متكسر خالص
يا كوكو فبعد العلقه و لما لقيت ابو كوكوهايه اختفي من ساحة
المعركه روحت طاير بسرعه علي المستشفي و طلبت عربية الاسعاف
و جابوك هنا في الستشفي 00 رد كوكو الكميل بسرعه 00
مش مهم انا المهم يا تري كوكوهايه باباها عمل فيها ايه ؟
يا رب ميونش عمل فيها زيّ تيجي نسأل يمكن عمل فيها كده
و نلاقيها هنا معانا في المستشفي ؛ تعرف يا كاكوكاكو انا
مش فاكر حاجه خالص غير ان انا كنت بتضرب و خلاص
الراجل بابا كوكوهايه ده مش كميل خالص ايده بتوكع اوي
بس هو لو كان اداني فرصه انا كنت قلتله ان كوكو قصده كميل
و بص كوكو حواليه لقا نفسه متربط من كل حته و رجليه متعلقه في السقف
و جه يحرك كناحه مقدرش خالص و زعل كوكو كوه نفسه الصغننه الكميله و قال00
انا هعمل ايه دلوقتي ؟ هنشوف كوكوهايه ازاي ؟؟؟؟
و دمعت عينين كوكو و هو بيقول 00 الحمدلله يا رب انت عارف كوكو
الكميل مش بيعترض ابدا بس 00
رد كاكوكاكو بسرعه 00
بص يا كميل انت بمنتهي البساطه متزعلش نفسك و انا هروح بكره اجيبلك
كوكوهايه لحد هنا و متخافش زي ما احنا كنا ماشيين
بس يا كوكو انا عايز اتأسلفك علي حاجه ؛ انا لما سبتك و طرت حصلت غصب عني
انا مش قصدت اهرب و اسيبك 00 رد كوكو 00 انا مش زعلان
اهم حاجه عندي اشوف كوكوهايه 00 رد كاكوكاكو 00 طب ياللا يا كميل خد الدوا
و نام و بكره الصبح هجيبهالك 00
كاكان

Saturday, March 10, 2007

بطل مصري جدا 00

الي اسرة الشهيد ملازم اول 00 محمد عبد الكريم حسن
معاون مباحث شرطة الهرم خالص العزاء و الدعوه بالرحمه
للشهيد البطل اللي مات من اجل الشرف و تفاني في اداء
عمله و فقد حياته في سبيل انقاذ فتاه من الاغتصاب
ادعوا لهم بالصبر و السلوان 00
*************************************
لازم الواحد يا جماعه زي ما بيعمل سبوت علي النماذج السيئه
لازم كمان يعلن و يقول و يرفع القبعه للنماذج الجيده ؛
زيّ ما ناس كتير عملت ضجه و اعتراض شديد علي الظباط اللي
خرجوا عن حدود عملهم و مارسوا حاجات مش المفروض كانت تحصل
لازم برضوا اننا مننساش البطل ده اللي فعلا رجعلنا الثقه ان لسه
في ناس ما بتقولش ياللا نفسي و لو شافوا مصيبه بتحصل يقول و انا مالي
المرحوم محمد عبد الكريم مات بالرصاص و هو بيطارد سواق ميكروباص كان خاطف
بنت هو و اتنين صحابه في منطقة المنصوريه في الهرم و لما سمع الملازم الشهيد صرخات
استنجادها طلع لمطاردتهم و ضربوه بالرصاص و مات في لحظتها 00
نهاية احب اقدم شكري ليه و لكل اللي زيه و اقولهم ان هي دي الشرطه
و هي دي خدمتها للشعب 00
ان لله و ان اليه راجعون
سلام

Friday, March 9, 2007

يا نهاري يا كوكو 00

الحلقه اللي فاتت 00
كوكوهايه و هي واقفه مع كاكوكاكو لقيت حاجه وراها و راحت مصرخه
الحلقه دي 00
و لقيت كوكوهايه باباها في وشها و بيزعق في وشها بصوته
الطخين المحشرج 00 انتي بتعملي ايه يا بنت يا كوكوهايه مع
جوز الشباب دول في الشارع انا شكلي معرفتش اربيكي
و حاولت كوكوهايه ترد 00 يا بابا دول 00
قاطعها الضخم 00 انا حاسس اني شفتكوا قبل كده و انا ذاكرتي
حديد في رصاص في صلب يعني مبنساش انا شفتكوا قبل كده؟
رد كوكو بصوت مخنوق و مش كميل 00 لأ اكيد حضررررتك
بييييتهيييأأألك 00 صرخ الضخم 00 لاااااااااااااااااااااااااااا
انا مش مجنون انا متأكد 00و سكت شويه و كلهم بيبلعوا ريقهم
و ركبهم بتخبط في بعض و قال فجأه00 ايوه ه ه ه ه انتوا مش كنتوا
تحت الشباك عندنا مستنين الست هانم تطل من الشباك و انا افشتكوا
و قولت يمكن انتوا مظلومين بس لأ انتوا مش مظلومين و انا مش هسيبكوا النهاره
و راح فارد الضخم جناحه الضخم اللي زيه و راح زاقق كوكوهايه راحت
مخبوطه في عامود النور و قال 00 امشي انجري انتي يا بنت يا كوكوهايه علي البيت
و انا لما اجيلك حسابي معاكي و حسك عينك متروّحيش00 و جريت كوكوهايه بسرعه
و اتدور الضخم لكوكو و كاكوكاكو اللي كانوا خلاص من كتر العرق يتعصروا
و قالهم 00 انتوا بقي فاكرني مغفل و بتستغفلوني و تعكسوا بينتي 00
رد كوكو 00 لأ يا عمي حضرتك فاهم الكلام بطريقه مش كميله
هو الموضوع و ما فيه 00 و ملحقش كوكو يكمل الجمله لقا الضخم بيقولوا00
و هو انا عندي وقت تقعد تحكيلي الموضوع و ما فيه و لا انت هتصحبني00
و ثبتوا شويه بيبصوا لبعض و فجأه قال كوكو لكاكوكاكو 00 اجري يا كاكوكاكووووو
و فجأه جري كوكو بسرعه ووراه كاكوكاكو و وراهم الضخم
و فضلوا يجروا و كوكو يدخل تحت عربيه ركنه و الضخم يجيله
من الناحيه التانيه عشان يمسكه يروح كوكو راجع تاني من الناحيه التانيه
اما كاكوكاكو فخد بعضه و طار و استخبي في وسط شجره و رقها كتير
و باع كوكو الكميل اللي كان بيحاول بكل جهده يحرك كناحاته الكميله الصغننه و يطير
و لكن مفيش فايده ريشه مش مساعده و كل ما خلاص يجي الضخم
يقبض علي كوكو يلاقيه فلت منه و استخبي تحت حاجه واطيه
ميقدرش هو يدخل تحتها و فضل كوكو يصرخ علي كاكوكاكو يجيله بس كاكوكاكو كان
خايف و ووصل كوكو لحته في شارع ضيق و جه يجري لقي الضخم في وشه
لف الناحيه التانيه ملقاش اي حته كميله يجري منها و ادور كوكو و بص للضخم
و قاله 00 اسمعني بس يا انكل انا بس كنت عايز اقولك لأ اسمعني من فضلك
و فجأه 00 الدنيا اسودت و ظهر كوكوهات صغننه علي راس كوكو
دايخين و بيصوصوا
كاكان



Wednesday, March 7, 2007

osama


فيلم انتاج و اخراج افغانستاني سنة 2003
فيلم يحكي مأساة الشعب الأفغاني osama
من حركة طالبان و مدي قسوة العيشه و تطبيق
الدين بأسلوب خاطئ و منفر ؛ و الفيلم بطولة بنت عندها
13 سنه و قامت بدورها ممثله افغانيه من مواليد
كابول سنة 1989 و اسم الممثله
marina golbahari
و حصلت الممثله دي عن جايزتين عن دورها في الفيلم؛
و الحقيقه هي تستاهل لأنها هايله ؛ جايزة احسن ممثله
في مهرجان 00
cinemanila international film festival
و جايزة احسن ممثله صغيره في السن في مهرجان 00
molodist international film festival
و اخد الفيلم جايزة احسن فيلم اجنبي اللغه ؛
سنة 2004 في مهرجان
golden globe ,USA
من الناحيه الفنيه انا من رأي انه فيلم مش ممل
بمعني ان المخرج كان محافظ علي الايقاع طول الوقت رغم ان في مشاهد
طويله و رغم انه منقدرش نقول عليه مخرج جامد برضو ؛
اللي نجح في توصيله اوي هي حالة القهر و العنف ؛
ده غير كمان انه كان موفق جدا في اختيار الممثلين
اما من ناحية الحقيقه مقدرش اجزم هل فعلا الصوره اللي منقوله في الفيلم
حقيقيه و لا فيها شئ من المبالغه و الافتراء لأن انا معرفش كتير
عن نشاط حركة طالبان جوه افغانستان ؛
علي العموم انا استمتعت بالفرجه لأن كانت اول مره
اتفرج علي فيلم من السينما الأفغاني و شايفه انه فيلم
يستاهل يتشاف و قررت اني اتابع افلام من عندهم تاني
و هبقي احكيلكوا متخافوش
سلام
اضافه بسيطه بعد قرأتي للكومنتس0000000
جبتلكوا لينك للفيلم عشان لو حد يحب يعمله داونلود و يشوفه
فيلم اسامه علي سايت ميني نوفا
بس ده لأزم تنزلوا برنامج مخصوص للتنزيل اسمه
bitlord download link
اللي فيكوا ينزل الفيلم و يعجبه بعد ما يدعي لكوكو الكميل
يقولي رأيه
سلام تاني مره

Tuesday, March 6, 2007

يا فرحه ما تمت 00

الحلقه اللي فاتت 00
وقف كاكوكاكو و نده علي كوكوهايه
الحلقه دي 00
لفت كوكوهايه و بصت لكاكوكاكو شويه و كوكو الكميل واقف
في المخبأ حاطط كناحه علي قلبه اللي بيدق بسرعه
و بيقول لنفسه الكميله القلقانه يا تري ايه اللي هيحصل يا رب
يا كاكوكاكو ما تعكش الدنيا 00 في نفس الوقت قلعت
كوكوهايه نضارة الشمس اللي هي لبساها و راحت مبتسمه
و عينيها نورت و بان فيها الفرحه و راحت قايله 00
كوكو الكميل صح ؟ و قبل ما كاكوكاكو يرد راحت كوكوهايه مكمله
كلام 00 علي فكره انا اتبسط اوي
بالهديه بتاعت الكوكونتاين
ماكنتش متوقعه انت حقيقي كميل جدا ؛ هو انت ساكت ليه يا كوكو
لف كاكوكاكو وراه و بص لكوكو و راح باصصلها تاني
لأ انااااااااا 000 انت ايه يا كوكو متقول ؛ و رد كاكوكاكو 00
مفيش انا مبسوط يعني اوي انك الهديه كانت جميله اقصد كميله و عجبتك
انا كنت قلقان كلكان لحسن تبقي مش كميله يعني 00
و فضل كاكوكاكو يبص ناحية كوكو كل شويه و في الاّخر
كوكوهايه قالتله 00 انت خايف من ايه و متوتر ؟
رد كاكوكاكو 00 لأ ابدا ؛ و حس نفسه مزنوق فاضطر يقولها؛
اصل انا معايا واحد صاحبي واقف بعيد ؛ ردت كوكوهايه 00
طب اندهله هو مكسوف 00 و حس كاكوكاكو انه اتبسط جدا
ان كوكوهايه قالتله كده و ما صدق اتدور و شاور لكوكو 00
راح كوكو منزل الزعبوط الكميل بتاعه علي وشه عشان متخدش
بالها من شكله و رفع الكوله بتاعت الكلوفر و راح بيسحب رجليه الكميله
علي الأرض براحه و هو خايف و قلبه بيدق و خايف يبصلها لحسن
يبان عليه ووصل كوكو عندهم و رحبت كوكوهايه بيه
و مدت جناحها تسلم عليه و قالتله00 اهلا بيك انا كوكوهايه
انت اسمك ايه ؟ 00 و قعد كوكو يقدم كناح و يأخر كناح قبل ما يسلم
و راح لامس كناحها مسلم و شايل كناحه بسرعه و هو بيفكر في اسم يقوله
بدل اسمه 00 و كوكوهايه قالتله 00 كاكوكاكو الظاهر صاحبك بيتكسف
اوي و لا هو مش عارف اسمه و راحت مصوصوه ضحكه 00
رد كاكوكاكو 00 لأ هو بيتكسف هو اسمه يا سيتي 00
و بعد لحظة تفكير رد كوكو الكميل بسرعه 00 انا اسمي
كركر اهلا بيكي يا كوكوهايه 00 و صوصوة كوكوهايه
و هي بتضحك الله 00 اسمك حلو 00
و فجأه و هما قاعدين بيتكلموا تنح كاكوكاكو و كوكو الكميل اتسمر
و لفت كوكوهايه علي الصوت اللي سمعوه و راحت مصرخه0000
كاكان

انا هعبّي شريط00

بقالي فتره بفكر في الموضوع ده و اخيرا خدت القرار
انا هعمل شريط 00 هتقولولي يا كوكو اتجننتي
هقولكوا ليه ؟ و اشمعني انا 00 يا كوكو استني
اعقلي 00 لو سمحتوا محدش يحوشني و لا يمسك في كمي
ما هو انا كل مفتح التليفزيون الاقي روتانا عامله
مسابقه للأصوات الجميله افتح الراديو الاقي نجوم اف ام
بتقول انها بتعمل التصفيات النهائيه ما بين خمسه من الاصوات
الشابه الجديده 00 ازهق و ارجع افتح التليفزيون
الاقي اعلان 00 اذا كان صوتك او صوتيك حلو و بدك
اتغني شركه اللي معرفش ايه بتقدملك الفرصه 00
طب بعد كل ده يا تري معايا حق و لا لأ 00
ما هو انا مش فاهمه يعني كل البلد بتغني و كمان بنستورد
لحمه بيضه من لبنان تغني و برضه اخوانا الخليجيين
مش عاتقنا و كل سمكري و لا نجار و سباك معاه قرشين و لا و لاد الحته
عندهم لمولوا قرشين صدقه عشان يغني و لا الحاجه امه
كانت شايله قرشين عشان الحج و لا الجامعيه و ادتهومله و لما يبقي نجم
و يقرفنا يبقي يرجعهملها 00 يا تري هو المغنيين قليلين للدرجه دي انهم
يعملوا مليون مسابقه و مسابقه للأصوات الجديده 00
ده كده بقي و لا مرض الطاعون و الكوليرا 00
يا ساتر و عليهم اصوات يعدموها 00 بس الواحد بقي يقول اللي ليه و اللي عليه
هما بيوفروا كتير للمنتج لأنهم ما بيلبسوش هدوم كل واحده جايبه قميص نومها
من البيت و رايحه تعبي شريط و بالمره في ساعتين يضربوا الفيديو كلوب
يعني حد ركز كده مع شركه زيّ روتانا كمثل بس ؛ بتنتج
كام شريط في السنه في حين ان دلوقتي كله بينزل من النت
مش زيّ زمان كان الواحد يتابع الشرايط الجديده و يشتريها
ده انا لو هيدوني الشريط ببلاش مش هخده بصراحه اصوات عايزه
الضرب بالجزمه و بعدين الحرق في ميدان عام 00
انا احلي تعليق سمعتوا من احد المقربين ليا علي الموضوع ده
قال لي الشخص 00 ياه ده كده فاضلنا مطرب و ناخد 75 قرش
بعد كلللللللللل اللي قلته ده مش معايا حق 00
انا هسيبكوا بقي عشان اعبي الشريط
و انتظروا شريطي قريبا في الأسواق و الميكروباصات
سلام

Sunday, March 4, 2007

سينما الأطفال 00


اي حد مهتم بالسينما هيعرف ان مهرجان سينما الأطفال
اللي بتقام فعلياته في القاهره سنويا بدأ فعلا من يوم 1 مارس
و أخر يوم 8 مارس ؛ و بتشارك زي كل سنه بلاد البلطيق
استوانيا و ليتوانيا اللي بيعتبروا من الدول الناجحه جدا
في سينما الأطفال الروائيه و مشاركين السنه دي ب7 افلام
مشاء الله و منهم فلمين عرايس ؛ اما السينما المكسيكيه
فكان ليها نصيب الأسد و مشاركه 13 فيلم متنوع ما بين
افلام الرسوم و الصلصال و الروائيه الطويله و القصيره
اما البلاد العربيه اللي مشاركه 00 سوريا 2 فيلم
فلسطين فيلم و ده شئ مشجع جدا و الأردن و تونس
كل واحده بفيلم ؛ اما بالنسبه لمصر ما قالوش
بالظبط عدد الأفلام المشاركه و لا نوعيتها 00
المهم ان اللي فات ده كله كان مجرد بانوراما سريعه قبل ما ادخل
في الموضوع 00 يا جماعه شاغل بالي من زمان تساؤل وهو
ان ليه مصر معندهاش رصيد كويس من سينما الأطفال؟؟؟؟؟؟؟
و انا اقصد بسينما الأطفال مش الكارتون لأن في سنه من السنين كانوا
مشاكين ببكار اللي كان يعتبر طفره في الرسوم المتحركه في مصر
انما انا اقصد السينما الروائيه القصيره او الطويله
اللي بتكون ببطولة اطفال و بتناقش قضايا اطفال
انا شايفه ان النوع ده مختفي من سينمتنا خالص رغم انه
مهم جدا و حتي بالنسبه للكارتون و الرسوم المتحركه
اغلبها مستورد و احنا مدبلجينه او ممصرين الصوت
نفسي في يوم اشوف فيلم مصري من النوعيه بتاعت
marry poppins, the little princess,
jumanji,baby`s day out,home alone
و اكيد في تاني بس انا مش فاكره ؛ معرفش
حلمي كبير و لا ممكن في يوم من الأيام
نتخلص من افلام الجزارين و الفكهانيه و بالفلوس
دي نعمل سينما اطفال ؛ ده فلسطين المحتله
مشتركه بفيلم نبقي احنا بلد الديموقراطيه
و الحريه مايبقاش عندنا فيلم واحد كل سنه؟؟؟؟؟؟؟
يا للا ما هو الواحد لازم يبقي عنده طموح
سلام

كوكوهايه وصلت 00

الحلقه اللي فاتت 00

كاكوكاكو وقف يستني كوكوهايه علي المحطه و كوكو الكميل استخبي
الحلقه دي 00
وقف كاكوكاكو علي المحطه و كانت الساعه اتنين و بدأ الوقت يمر
و كل اوتوبيس يعدي يشب كوكو الكميل من ورا الحيطه اللي مستخبي وراها
عشان يبص كوكوهايه نزلت من الأوتوبيس و لا لأ و لما ما يشوفهاش
يشاور لكاكوكاكو انها مش موجوده 00 و زهق كاكوكاكو من الوقفه و رجليه وجعته
راح قاعد علي الرصيف عشان مكانش فيه مكان علي الكرسي بتاع المحطه
و فضل كوكو يراقب الأوتوبيسات من غير ما يزهق خالص 00
و فجأه جه اوتوبيس و حس كوكو بقلبه الكميل بيدق بسرعه و بيخرج من مكانه
لما شاف كوكوهايه نازله علي السلم بتاع الأوتوبيس ؛ و قعد كوكو
يهز كناحه الكميل في الهوا جامد عشان كاكوكاكو ياخد باله انما كاكوكاكو
من التعب كان حاطط راسه بين كناحاته و سرحان و شكله كده نام علي الرصيف
و هو قاعد و فضل كوكو يصوصو و يهز كناحاته كامد و عمل لكاكوكاكو
قرد و كاكوكاكو ولا هنا و كانت كوكوهايه في الوقت ده واقفه مستنيه عشان تعدي الشارع
و جت لكوكو فكره كميله بسرعه و قعد يدور علي الأرض حواليه و لقا زلطايه
صغننه راح ماسكها و لف كناحاته جامد في الهوا بسرعه زي الطاحونه
و راح حادف الزلطه راحت خابطه في دماغ كاكوكاكو اللي راح ناطط من مكانه و اتخض
و بص ناحيه كوكو لقاه عامل يشاور بكناحه ناحية كوكوهايه
و فهم كاكوكاكو انها وصلت بس راح باصص لكوكو الكميل و شاورله اعمل ايه؟
و رد عليه كوكو الكميل بالاشاره برضو روح وراها بسرعه 00
و مشي كاكوكاكو بسرعه عشان يكلم كوكوهايه انما لسه هيندهلها راحت معديه الشارع
و ملحقش كاكوكاكو يعدي وراها و بص لكوكو لقاه بيقوله عدّي بسرعه
و عدّي كاكوكاكو بسرعه و فضل يجري في وسط العربيات و كانت هتخبطه
و في نفس الوقت كان كوكو الكميل بيعدّي برضو الناحيه التانيه معاهم
و جري كاكوكاكو بسرعه ورا كوكوهايه و لما خلاص قرب منها اوي ادّور و بص لكوكو راح
كوكو مشاورله 00 اندهلها 00 اتشجع كاكوكاكو و خد نفس كميييييل اوي
و راح نادهلها 00 كوكوهايه 00
كاكان

Saturday, March 3, 2007

انقذوا الأقصي 00

من مدونة الزميله كلبوزه لكن سمباتيك
ايدكم معانا ننجح حملة الدفاع عن الاقصى اللي متبنيها الزميل




يقول:

بأقترح نبعث في اليوم ده (3 مارس) رسالة إلي اليونسكو لتخصيص لجنة دائمة لمراقبة والحفاظ علي المسجد الأقصى (كأثر تاريخي)وفقا لاتفاقية حماية التراث الثقافي والطبيعي أسوة بحملتهم للحفاظ علي أصنام أفغانستان وننشر نسخة من الرسالة دي علي كافة مدواناتنا ومنتدياتنا ومجموعاتنا البريدية. مع العلم أنهم بالفعل قرروا إرسال بعثة تقصي للحقائق يوم 23 فبراير
مكتب اليونسكو برام الله
مكتب اليونسكو بجنيف
ولو نجحنا وقدرنا نحرك الجبال بصوتنا نعمل يوم تاني للتضامن مع حقن دماء العراق فدم الانسان أعظم حرمة.ممكن أعرف رأيكم وهل دي أولوياتكم زي ما هي أولوياتي ولا أنا غلطان والأولي أشغل بالي بكريم وهالة وهند وتامر؟أفيدوني أفادكم الله________
تحديث
نص الرسالة المقترحة:
Mr. Koshiro MatsoraUnesco GMDear Sir,We acknowledge and appreciate your great efforts to protect and save the priceless human heritage all over the world. Recently, we read that a group of professional investigators has been sent by the Unesco to Jerusalem to investigate the situation of Israeli excavations at the area of Al Masjed Al Aqsa, which we have a big concern that this may affect the foundations and lead to buildings collapse for one of the most important historic elements of this area and allover the world.We do support your efforts and your investigation group and looking for assigning a permanent chamber near this area to monitor, announce and stop any trial to destroy our heritage either for political or religion reasons.Thank you

and best regards,Sincerely,