Wednesday, February 28, 2007

امة اقرأ لا تقرأ 00

اللي خلاني اكتب البوست ده هو الموقف اللي
حصل لصاحبتي اللي شغاله في شركة كمبيوتر
و من المفروض ان زمايلها في الشغل ناس
مستواها الفكري كويس 00 و هي من عادتها
تاخد معاها كتاب عشان في فترات الفراغ تقرا
و من يومين قاعده بتقرا 00 و سألها
زميلها 00 يا فلانه انتي بتقري ايه؟؟
ردت 00 بقرا كتاب الأسلام ماهو
للدكتور مصطفي محمود 00 و كانت الصدمه
و الفجيعه لما سألوها و كان عددهم 5 او 6
مصطفي محمود مين؟؟؟؟؟؟؟؟؟؟؟؟؟؟؟؟؟؟؟؟؟؟؟
ردت صاحبتي 00 نعم انتوا بجد مش عارفين مين
مصطفي محمود و لا بتهزروا و ده من باب الدعابه
و اللطافه؟؟ و رد عليها واحد منهم 00
يعني بيبيع ايه مصطفي محمود ده؟
و طبعا هي عند الحد ده كانت و صلت بيها الصدمه
انها مش عايزه تواصل هذا الحوار العقيم
و ردت و قالت 00 الرد الوحيد اللي اقدر ارد بيه
ان ماينفعش حد يقول هي مين الشمس 00
و اما جت تحكيلي كانت قد ايه صدمتها الفظيعه ان
الناس مش عارفه مين مصطفي محمود 00
طب ده حتي مصطفي محمود من العلامات ده انا
مقلتلهمش حد مش معروف كنت هعزرهم 00
الحقيقه يا جماعه انا شايفه ان صاحبتي معاها حق
و انا شايفه ان الجهل و قلة الثقافه ليها اسباب كتير
منها 00
ان اسلوب التعليم التلقيني اللي في مدارسنا و جامعتنا
من الأسباب الرئيسيه علي ان الألف زي كوز الدره
عند اغلب المتعلمين 00
الأهل بيهتموا ان اولادهم يجيبوا مجاميع فظيعه و تكسر الدنيا
اكتر ما يهتموا انهم يثقفوا نفسهم و ليهم حق لحد كبير
و ده لأقتناعهم الشديد بأنها بلد شهادات صحيح
ارتفاع سعر الكتب بشكل خرافي علي سبيل المثال انا رحت اشتري
الروايه الجديده بتاعت علاء الأسواني شيكاجو لقيتها ب30 جنيه
مش كتير دلوقتي عندهم القدره الماديه انهم يدفعوا المبلغ ده
في كتاب هيقولك اجيب بيه عشا احسن 00 و الحقيقه
الواحد يقول اللي ليه و اللي عليه دي احد مزايا مكتبة الأسره
ان الكتب فيها بسعر رمزي بس برضو مش كل الكتب تلاقيها00
اجي بقي للشباب الأمور اللي ماشي علي الموضه و بيشرب
سجاير و بيحشش لو انه بفلوس السجاير و الحشيش دي
اشتري كتاب كل شهر هيبقي احسن من انه يبقي بلاطه
و معندوش فكره عن البطيخ 00
ارجع و اقول في النهايه ان ابراهيم عيسي كان عند حق
و جت منه في الجون لما قال في برنامجه 00 من اول السطر
ان امة اقرأ لاااااااااااااااا تقرأ
سلام

Tuesday, February 27, 2007

جبتك يا عبد المعين 00

جبتك يا عبد المعين تعيني 00 لقيتك يا عبد المعين عايز تتعان

الموضوع ده بقالي فتره عايزه اكتب فيه و بقول لنفسي
يا بت مش مهم اعملي نفسك مش واخده بالك ؛ بس الاقي
نفسي تاخد بالها برده 00 و انا اقول يا واد طنش خالص
بس خلاص الموضوع بقي رخم و لازم اتكلم فيه 00
من المفروض يا جماعه ان اي راجل امن او عسكري
او شرطه يكونوا هما اللي بيحموني و انا ماشيه في الشارع
يعني لو حد عاكسني مثلا المفروض اول واحد اجري عليه هو راجل
الأمن 00 انما لما الاّيه تنعكس و يبقي راجل الأمن هو اللي بيعاكس
يبقي انا المفروض اجري علي مين ؟؟؟؟؟؟؟؟؟؟؟؟؟؟؟؟؟؟؟
و الحاله اللي انا بوصفها دي بتحصل جنب 00
كشك واقف فيه عسكري قدام سفاره مثلا و زهقان من الوقفه و يطلعه
علي كل واحده معدّيه بقي
اي عربية امن مركزي راكنه تلاقي العساكر هتكسر الحديد اللي محبوسين
وراه و بيدّوني احساس بالكلاب المسعوره اللي بتطلع رياله
من جنب بوزها 00 محبش اوصف بني اّدم بحيوان بس هو ده اقرب
تشبيه بيجي في بالي 00
ده غير بقي لو داخله عماره فيها واحد من الأمن و مسبلاتي
انا تعليقي علي الموضوع المتفاقم ده هو المثل اللي بيقول 00
جبتك يا عبد المعين تعيني 00 لقيتك يا عبد المعين عايزلك كلمتين في جنابك
سلام

Monday, February 26, 2007

كوكو و الدرس 00

الحلقه اللي فاتت 00
كوكو و كاكوكاكو خدوا الحاجات اللي اشتراها كاكوكاكو
و دخلوا يا خدوا الدرس
الحلقه دي 00
دخل كوكو الكميل الأوضه بتاعته و ووضب المكتب
بتاعه و كان عنده سبوره صغننه و اقلام فلوماستر
راح مطلعهم و قال لكاكوكاكو 00 حط يا كاكوكاكو
السبكوره دي هناك و حط علي الرف بتاعها الأقلام اللكلوماستر
و شال كاكوكاكو السبوره و راح جايب بعديها كرسي و حطه قدام السبوره
و راح كوكو مطلع الخرزانه و الكراسه وقال 00 امسك يا كاكوكاكو
الكراسه دي عشان تكتب فيها و متنساش و تذاكر منها
ياللا بقي نبتدي 00 بص يا كاكوكاكو انت اما تيجي تكلم كوكوهايه
تقولها انتي كميله 00 و يرد كاكوكاكو 00 انتي جميله 00
لأ يا كاكوكاكو مش جميله بص ك م ي ل ه 00
يرد كاكوكاكو 00 ك م ي ل ه 00 برافو يا كاكوكاكو
اكتبها بقي عشان متنساش 00 و دي اهم كلمه
لما تيجي تكلمها يا كاكوكاكو تبص في عينيها اوي
و متعليش صوتك و اما هي تقولك حاجه وشك يحمر
عشان كوكو الكميل خجلان و لما تقعد معاها في حته
انت اللي تدفع و اوعي تخليها هي اللي تدفع اي
حبوبورو خالص مالص 00 ايه يا كاكوكاكو بتكتب و لا لأ
رد كاكوكاكو 00 بكتب يا كوكو بكتب 00
اوعي تكون بتكتب خلط يا كاكوكاكو وريني كده 00
ايه ده ؛ ايه ده يا كاكوكاكو افتح كناحاك 00
رد كاكوكاكو 00 لأ يا كوكو بلاش تضربني
رد كوكو 00 لأ افتح كناحك عشان تتعلم و تفتكر و مش
تنسي خالص 00 و فتح كاكوكاكو كناحاته
و ضربه كوكو علي كناحاته بس ضربتين كميلين مش كامدين اوي
و قاله 00 بعد كده يا كاكوكاكو لما تيجي تكتب لازم تشيل البرنيطه
بتاعت القلم و تكتب بالمنقار بتاعه عشان كده مش كميل
و هتخليني اعيد الدرس من الأول يا للا مش مهم اهو التكرار
يعلم الكوكوهات 00 و عاد كوكو كل اللي قاله تاني
و فضل يدرس لكاكوكاكو و يضربه و بعدين يصلحاه لغاية ما كاكوكاكو
حفظ كل حاجه و بقي يسمع من غير ما يبص في الكراسه
و قال كوكو 00 ها لو سألتك انت بتحب تشرب ايه هتقول ايه؟
رد كاكوكاكو 00 كوكولا
رد كوكو 00 برافوووو يا كاكوكاكو ؛ طيب انت كنت في كلية ايه؟
رد كاكوكاكو 00 كلية الحكوكو عشان بحب اجيب حقوق لأ حكوك
الكوكوهات 00 و فضل كوكو يسأل و كاكوكاكو يجاوب
لحد ما قال كوكو 00 انت كده برافو عليك يا كاكوكاكو خلاص
تقدر تقوم تنام و بكره نبدأ اول زياره لكوكوهايه 00
و بص كوكو لقا كاكوكاكو فعلا نام خلاص
فصعب عليه و شاله هيلا بيلا و دخله السرير
و غطاه 00 و خرج قعد قدام التليفيزيون
يدعي و يقول 00 يا رب وفقنا و خلي كوكوهايه تحبني
و اكوزها 00 و حس كوكو و هو قاعد بريشه جديده طلعه
و هي ريشة 00
المعلم
كاكان



Sunday, February 25, 2007

العلاج علي نفقة الدوله 00

عمركوا حد ركز مع مقولة 00 العلاج علي نفقة الدوله
بلاش 00 طب حد ركز قبل كده مع مين اللي بيتعالج علي حساب الدوله
صدقوني لو ركزتوا هتلاقوا ان كل اللي بيتعالجوا
علي حساب الدوله ناس مش محتاجه 00
بجد انا لما ركزتلهم لقيتهم كلهم في مكانات مرموقه
و ناس الحمدلله و لا حسد عندهم فلوس قد كده
و ممكن يسافروا و يتعالجوا علي حسابهم الخاص 00
يعني اللي انا اذكرهم مثلا 00 فريد شوقي الله يرحمه
و زاهي حواس يا رب ربنا يرحموا بقي
و من فتره كان في نقاش داير في برنامج من البرامج
الحواريه عن ان السلطه القضائيه في مصر بتطالب بالعلاج علي
حساب الدوله 00 و الله ربنا يزيد و يبارك و محدش يكرهلهم
بس انا من رأي ان في ناس احق من الناس دي كلها
بالعلاج علي حساب الدوله00 و هما الناس اللي
معندهم ثمن شريط اسبرين او ريفو 00
هتقولولي طب ما هو فيه التأمين الصحي و اهو بيبقي
رخيص اوي و علي حساب الدوله يعتبر00
طيب انا هخدكوا دلوقتي رحله في احد المستشفيات العامه
الحكوميه التابعه للتأمين الصحي و انا هتكلم عن المستشفي
دي بالذات عشان دخلتها و في نفس الوقت هي مجرد
مثل لبقية المستشفيات و المستوصفات 00
مستشفي صيدناوي في العتبه 00
رحت ازور احد المرضي و اعمل الواجب
و خرجت عندي اكتئاب من اللي شفته 00
فلان اللي والدته دخلت المستشفي دي قدر انه
يوصل من خلال التأمين الصحي انه يعمل العمليه
لوالدته من غير فلوس و حتي الأوضه في المستشفي ببلاش
يا سلام نعمه 00 بس كانت المفجأه ان العمليه ببلاش اسما بس
لأنه دفع مش عارفه كام للبنج و كام للدوا بعد العمليه
غير الدوا اللي لازم تواظب عليه فتره بعد كده و الحقن و الذي منه ؛
نيجي بقي للمستشفي نفسها 00 منظر اوضة العمليات
اللي تخرج المريض عيان اكتر من الأول و عدم العنايه بتعقيم الأدوات
و خرجت الوالده و دخلوها اوضتها اللي عباره عن جحر فيه اربع سراير
مرضي و لازق في كل سرير كرسي للمرافق اما بالنسبه للتهويه
هي عباره عن فتحه عاليه قرب السقف متغطيه بالسلك 00
و طبعا مقدرش فلان انه يستحمل الجحر ده علي والدته
و صدفه لقا قريبة واحد صاحبه شغاله في المستشفي
فقدروا انهم يتقلوها اوضه تانيه بس الليله 00
ب 50 جنيه 00 و اضطر انه ينقلها و يدفع كل يوم ال50 جنيه
الأوضه ام 50 جنيه عباره عن 2 سرير و جنب كل واحد كرسي برضه
بس الحمدلله فيها بلكونه متر في متر 00
انا بقي من و انا طالعه علي السلم الخمس ادوار لأن الأسانسير كان بايظ
بدأت اكتشف المأساه اللي المرضي قاعدين فيها 00
و مش عايزه احكيلكوا كمان علي الممرضات اللي هما 00عفاريت الرحمه
مش ملايكة الرحمه و علي مدي قذارتهم و قذارة هدومهم و ايديهم و رجليهم
و طبعا ما فاتش علي اني اسأل فلان علي تمن الأوضه الفردي
و طبعا قالي ب 150 جنيه في الليله 00 و متفرقش حاجه كتير عن الزوجي
غير انها فيها سرير واحد 00
شفتوا بقي مين اللي محتاج العلاج علي نفقة الدوله 00
اللي محتاجه الناس اللي معاهاش حتي فلوس المستشفي الحكومي
اللي هي اسمها كده مجانيه انما مش مجانيه و لا حاجه 00
طب في اقتراح اللي معاه فلوس و الدوله كرمته و علجته علي حسابها
طب مايعالج هو حد من الغلابه دول علي حسابه و اهو يبقي علي الأقل
زكّي عن صحته اللي صرفتله عليها الدوله 00
و اهو تبقي عملت خير قبل ما تنتقل للرفيق الأ‘علي
سلام

Saturday, February 24, 2007

الواسطه المحموده 00

نجوم اف ام النهارده كانت بتتكلم في واحد من برامجها
علي موضوع 00 الواسطه
و قد ايه ان الواسطه شئ غير مشروع و غالبا
ما بتدّي ناس متستحقش مناصب و حقوق
غيرهم من اللي معندوش واسطه احق بيها
كل الكلام كده تمام و فل و عال العال00
لغاية ما المذيع قال 00 انما يا جماعه
في نوع من الواسطه اسمه الواسطه المحموده
اللي هي مش وحشه زي الواسطه التانيه
و قعد يشرح ايه هي الواسطه المحموده
اللي متبقاش حرام و مؤذيه 00
بس الصراحه كنت انا لهذا الحد و داني قفلت
و مكنتش عايزه اسمع اكتر من كده
لأن الكلام معجبنيش ؛ و فكرني باللي
بيعمل حاجه غلط و يغير اسمها عشان يبقي فيه مبرر
انه يعملها 00 زيّ الكداب اللي بيقولك 00
لأ دي كانت كدبه بيضه
و ده اسلوب لف و دواران
سلام

كلب الأمير 00

النهارده برنامج 90 دقيقه كان جايب حادثه حصلت
في فندق الموفنبيك يوم الفلانتاين 00
عيله اب و ام و بنتهم الي اسمها 00 حبيبه
كانوا في الموفنبيك بيقضوا اليوم و هجم كلب امير
سعودي علي حبيبه و قطعلها وشها و شوّها
و البنت حاليا في المستشفي 00
و كان رد الفعل تجاه الموضوع بارد و فيه نوع
من الاستهانه بالموضوع من ناحية الأمير
صاحب الكلب ؛ لأنه مكلفش خاطره انه يروح
يزور البنت في المستشفي و اكتفي بأنه
بعت السكرتير بتاعه ببوكيه ورد
و مفكرش انه يسأل الأهل محتاجين حاجه
و لا انه يتكفل بعلاج البنت اللي لازم تعمل
عملية تجميل و لا حتي انه يتأسف
انما كل اللي عمله غير بوكيه الورد
انه غلط ام حبيبه و قال انها كانت سيباها
بعيد عن نظرها و مشغوله عنها ؛
و طبعا رد ابو حبيبه ان المكان كان فيه مراجيح
و ان البنت كانت بتلعب و ان مش المفروض
ان ادارة الفندق تسمح بدخول الكلب مكان لعب الأطفال
المهم نهاية 00 ابو حبيبه مخدش مع الأمير لا حق
و لا باطل 00 فكرتني الحادثه دي بقصيدة 00
كلب الست لأحمد فؤاد نجم 00
انت فين و الكلب فين 00 انت قده يا اسماعين
طب دا كلب الست يا ابن 00 و انت تطلع ابن مين
بشري لصحاب الديول 00 و اللي له اربع رجول
بشري لسيادنا البهايم 00 من جمايس او عجول
اللي صاحبه يا جماعه 00 له غناوي في الاذاعه
راح يدوس فوق الغلابه 00 و النيابه بالبتاعه
هيص يا كلب الست هيص 00 لك مقامك في البوليس
بكره تتولف وزاره للكلاب 00 ياخدوك رئيس
00 السؤال اللي جه علي بالي
لو ان الكلب ده كان كلب راجل غلبان مش امير كان هيبقي ده
نفس رد الفعل من جهة اللي المفروض انهم يعملوا رد فعل؟؟؟؟؟؟
سلام

كوكو و الصداقه 00

الحلقه اللي فاتت 00
كوكو جري بسرعه علي الحمام بعد ما الميه رجعت
الحلقه دي 00
دخل كوكو الحمام و هو مبسوط ان الميه رجعت تاني
و ساب كاكوكاكو بره بيعمل قهوه عشان يفضل صاحي
و يبتدوا دروس الكلام 00 و قعد كوكو يغني و هو جوه الدوش
اغنيه كميله و هو فرحان 00
الدنيا برد ؛ الدنيا برد ؛ و كوكو الكميل بياخد دوش
الدنيا برد يا كوكو يا كميل ؛ و بتاخد دوش يا كوكو يا كميل
و خرج كوكو و هو مبسوط و بينشف نفسه
و بيبص علي كاكوكاكو مش لقاه 00
اتخض كوكو و قعد علي الكرسي و هو زعلان و مطلع منقره
بره و قال 00 اكيد هو مشي عشان زعلان مني ان انا كل شويه
اقوله انت بتعمل حاجات مش كميله 00بس سمع كوكو و هو قاعد
صوت تنقير علي الشباك و بص كوكو لقا كاكوكاكو واقف بره و معاه
كيس في حاجات 00 و فرح كوكو و جري فتح الشباك و قال 00
ايه يا كاكوكاكو انت كنت فين افتكرتك رّوحت و زعلت مني 00
رد كاكوكاكو 00 بص يا كوكو انا مقدرش ازعل منك ؛ بس انا بصراحه
لما مشيت كنت فعلا هتصل بيك بكره و اقولك ان انا مش هقدر
اساعدك في موضوعك ده عشان انا خايف ابوّظ الدنيا ؛ بس بعد
شويه فكرت و قولت ان انا زيّ ما هساعدك في موضوعك انت كمان
هتساعدني في انني اعرف اعتمد علي نفسي و متلبخش
و بعدين في كلام جوايا قالي انت كده جبان عشان تهرب
و تسيب مسؤلياتك و بعدين كوكو الكميل مش بيزعقلك عشان هو مش بيحبك لأ
عشان هو عايزك كويس 00 فرحت مغير طريقي و رحت اشتريت الحاجات دي
رد كوكو و هو عينيه مرغرغه بدموع كميله عشان الكلام اللي قاله
كاكوكاكو00 انا اسف يا كاكوكاكو ان كنت زعلتك 00 و بصوا لبعد و
راحوا مبتسمين 00انت عارف يا كاكوكاكو ان محدش يقدر يستغني عن
صديقه لأن الصداقه دي من احسن حاجات في الدنيا 00 و بعدين و ريني
بقي انت اشتريت ايه 00 و فتح كاكوكاكو الكيس هو و كوكوالكميل
و طلعوا كراسه و قلم و مسطره و خرزانه 00 و قال كاكوكاكو 00
دول بقي يا كوكو عشان نبتدي الدرس 00 فرح كوكو اوي و قال
طب يا للا بينا بقي 00 و دخل كوكو و كاكوكاكو الاوضه عشان يبتدوا
الدرس 00 و حس كوكو بظهور الريشه الخامسه اللي طبعا اسمها 00
الصداقه
كاكان

Friday, February 23, 2007

عم حماد الصياد 00

اللي فيكوا كان متابع برنامج 90 دقيقه الأيام اللي فاتت
كان هيشوف حاجه انا شخصيا لما سمعتها ذهلت و اتخضيت
لأني ما كنتش اعرف انها موجوده 00 و الحاجه دي
هي عائلة عم حماد الصياد ؛ اللي راحت مراسلة البرنامج
ساره اسامه اللي بشكرها جدا علي مجهودتها 00
راحت في النيل و قعدت وسط اسرة الصياد ده و اكلت
معاهم و عاشت مأساتهم اللي اتنقلت لنا بعد كده علي الشاشه
و المأساه هي 00 ان الصيادين دول تحت خط الفقر بحوالي
100كيلومتر 00 متخيلين ان الناس دي بتغمس العيش الحاف
ده ان لقوه في مية النيل ؛ متخيلين ان عم حماد ده عنده ورم في عينه
بقاله 15 سنه لدرجة انه اتعمي و بيشوف بعين واحده 00 متخيلين
ان الناس دي عيله مكونه من اربع افراد بيناموا جوه المركب بتاعة الصيد
و بيتغطوا بتلت كوفرتات 00 متخيلين ان بناتهم علي وش جواز
و عمرهم ما خرجوا من النيل 00 متخيلين انهم بيناموا بالأيام من غير
عشا 00 متخيلين انهم تعدّي عليهم فتره حتي النيل يعاملهم بقسوه
و ميطلعلهمش سمك 00 طب متخيلين بقي انهم بعد كل ده
بيقولوا الحمدلله احنا احسن من غيرنا 00 سبحان الله 00
لما سألوهم نفسكوا في ايه قالوا نفسنا نعيش في شقه 00
نفسنا نتعلم 00 يا جماعه احنا عندنا في البلد بلاد تانيه منسمعش عنها
حاجه بلاد او دويلات او مجتمعات صغيره جوه البلد متعرفش يعني
ايه كهربه و لا يعني اي تليفيزيون و لا يعني ايه حمام00
ناس بحس انهم عايشين تحت الأرض 00 ناس مجهولين
مش موجودين علي الخريطه ناس بدون شهادة ميلاد
ناس عايشه ببركة و رزق ربنا 00
انا الحقيقه كانت اول مره ليا اسمع عن حالة سكان المراكب
بس اعرف ان في مناطق مدفونه محتاجين نحفر و نطلع الناس اللي فيها من تحت
الفقر و الجهل 00 يا تري سؤال برئ هما الناس دي
بعد الاهمال و القهر اللي هما فيه مطالبين انهم يكون عندهم انتماء
لبلد متعرفش عنهم و لا عن احتياجاتهم اي شئ ؟؟؟؟
اّخر حاجه عايزه اقولها ان النهارده و انا بتمشي بين البلوجات
لقيت صديقه بلوجويه كاتبه بوستايه في نفس الموضوع
بعنوان العائشه في الأحلام ؛ ساقط قيد
و سألتها ان كانت متمانعش اني اعمل لينك للبوست
بتاعها لمن يهمه الأمر00
نهاية 00 بدعي من كل قلبي للدويلات المفقوده و المجهوله
بالصبر و ان ربنا يقدرنا نكون خير للناس دي ؛ زيّ
الناس الكتير اللي شافت عم حماد الصياد و عيلته
و بينت حكمة ربنا في فرض الزكاه 00
و ان لو كل فرد دفع الزكاه اللي عليه مفيش مسلم
هينام جعان او بردان00
سلام

Thursday, February 22, 2007

لا حياة لمن تنادي 00

دي تاني مره اكتب بوست في الموضوع ده بس المره دي
هيكون الكلام مختلف حبتين 00 بس احب اقول الأول
ان البوست القديم كان بعنوان
شقاوة عيال
كلاكيت تاني مره 00 كابلات الكهربه و العواميد
مفتحه و السلوك خارجه منها و عريانه 00
يا جماعه مستنيين ايه عشان تحلوا المشكله
دي ؟؟ مستنيين كام كسيح و معاق تاني
بعد اللي اتأذوا قبل كده ؟؟
الواحد كبير و خايف من الكهربه طب العيال الصغيره تعمل ايه؟
و لا هترجعوا تقولوا ان الكهربه مبتشدش حد و ان العيال
هما اللي اشقيه و بيلعبوا فيها 00 زي سيادة
وزير الكهربه و الطاقه لما قال رأيه في الموضوع
بعد حادثة الولد اللي في البوست القديم 00
مش مصدقيني 00 طب اسألوا مني الشاذلي
مقدمة برنامج الساعه العاشره و هي تقولكوا انه ده كان رأيه
لما استضفته في الحلقه 00
يا تري ايه الحل ؟ و لا مش هيبقي فيه حل
و هنعتمد علي الجهود الذاتيه برضو زي المجاري ؟؟
طب انا عندي اقتراح 00 لو اننا هنعتمد علي الجهود الذاتيه
خلاص عينونا بفلوس و احنا ننضف المجاري و نسد بوكسات الكهربه
و نرصف الشوارع و نسد البلاليع المفتحه و00و00و00
و اهو حتي البطاله تقل شويه 00
ما هو احنا لحد امتي نترجي و نقول الكهربه بتاكل العيال
و نتحايل و نطلب و نقبل القدم و نبدي الندم ان يكون في حل سريع 000
لا حياة لمن تنادي00
حقيقي ؛ السؤال لغير الله مذله
سلام

كوكو و السباك00

الحلقه اللي فاتت 00
كوكو دخل يستحمي و فجأه صرخ و قال 00
يا كاكوكاكوووووووووووووووووو

الحلقه دي00
جري كاكوكاكو بسرعه علي الحمام و خبط علي
كوكو و قال له 00 يا كوكو مالك افتح الباب
رد كوكو و هو بيصرخ 00 الحقني يا كاكوكاكو
حصلي حاجه مش كميله خالص الصابون اللي مش كميل
دخل في عيني و الميه مش بقت موجوده مش عارف راحت فين
رد كاكوكاكو 00 طب اروح عند الجيران اجبلك ميه
في الكوز 00 رد كوكو 00 لأ يا كاكوكاكو 00
افتح اجندة الكلوفون هتلاقي نمرة الكباك اللي
بيصلح الميه لما تبقي مش كميله كلمه و قوله
ان هنا شقة كوكو الكميل و احكيله ؛ بس بسرعه
عشان انا بردان اوي ؛ كاكوكاكو استني متقعدش
علي الكرسي و انت بتكلم في الكولوفون عشان انا
عارفك ممكن تنام و تنساني ماشي 00
و رد كاكوكاكو 00 ماشي 00و جري بسرعه
و اتصل بالتليفون 00الو هنا الأستاذ كباك ؟
انا اّسف اتصلت غلط00 و قفل كاكوكاكو
و حاول يتصل تاني 00 الو حضرتك الكباك
الحمدلله اني لقيت حضرتك اصل احنا شقة كوكو الكميل
و هو مزنوق في الحمام و الصابون في عينيه و الميه مقطوعه
يعني حضرتك هتيجي ماشي 00
و قفل كاكوكاكو السماعه و جري بسرعه علي كوكو
و قاله ان الكباك هيجي 00 و رد كوكو 00 طب انا همسح
الصابون اللي في عيني بالفوطه كده و اطلع لحد ما هو يجي
و طلع كوكو من الحمام بعد ما مسح عينيه من الصابون
و لبس الكرنس بتاع الحمام علي جسمه الكميل و هو فيه
صابون 00 و سأل كوكو 00 يعني هو يا كاكوكاكو مش كان ينفع
يرجّع الميه و هو هناك 00 رد كاكوكاكو 00 هو قالي علي طول انه
هييجي 00 انا هحاول اقوله انه يرجعها ؛ رد كوكو ؛ عشان انا
مش هقدر استناه يمكن يتأخر علينا 00 وراح كوكو للتليفون
و اتصل 00 مساك الخير حضرتك الأستاذ كبّاك
ازيّك انا كوكو الكميل ؛ صاحبي كاكوكاكو اتصل بيك من شويه 00
ايه ده هو ازاي مكلمكش 00 و بص كوكو لكاكوكاكو و برقله عينيه
و راح مكمل كلام مع السباك 00 اصل الميه مش بقت موجوده
و انا كنت عايز حضرتك ترجعها 00
هو حضرتك ممكن ترجعها دلوقتي 00 بجد ميرسي يا كباك يا كميل
باي باي 00 و لف كوكو لكاكوكاكو 00امال انت كلمت مين يا كاكوكاكو
هو انت ليه مش كميل و مش بتعرف تتصرف انا خايف لحسن
تعمل حاجات مش كميله مع كوكوهايه 00
و حس كاكوكاكو انه زعل كوكو فراح جنبه و قاله 00 انا اسف
بس انا اصلي ببقي عايز حد جنبي يساعدني عشان خاطري
متزعلش مني و انا هحاول اعتمد علي نفسي اكتر 00
و بصله كوكو و قاله 00 عشان خاطري يا كاكوكاكو
ركز عشان انا بكره هعلمك الكلام الكميل بتاعي و مش عايزك
تعمل حاجه مش كميله ؛ و انا مش زعلان منك خالص و كمان00
و فجأه سمع كوكو ميه جامده اتفتحت 00 راح ناطط كوكو
من مكانه و قال لكاكوكاكو 00 هيييييييييييييييييييييييييه
الميه الكميله جتتتتتتتت 00
كاكان

Monday, February 19, 2007

القضيه 2007

قال ايه 00 وقفوا عرض مسرحيه بعنوان00
القضيه 2007 كانت بتتعرض علي مسرح الهناجر
و اللي وقفها مصدر مش معروف لحد دلوقتي
تعرفوا و قفوا عرضها ليه يا اصدقائي الحلوين؟؟؟؟؟؟؟
عشان لا مؤاخذه احنا بلد مش متربيه علي راي صديقنا
البلوجاوي ضياء
لما كتبلي كده في كومنت في بوست لي بعنوان
C.T.A
احنا ليه بقي بلد مش متربيه 00عشان وقف المسرحيه
تم بسبب انها بتمس شرف المحروسه امريكا العظمي
و بتنتقد سياستها 00 فطبعا مصر زعلت عشان
انتيمتها و راحت واقفه المسرحيه 00
و لسه في مشاورات و مناورات و محاورات لاعادة
فتح المسرحيه من تاني 00
انا برضو مقلتلكوش سبب اني اقتبست لفظ اننا بلد
مش متربيه 00 السبب هو اننا بلد تموت في الهجايس
و الهلس ؛ يعني في منطق يقول ان مسرحيه هادفه
تتوقف ؛ و افلام السبكيه و الفيديو كليبات اللي
تحولت لعرض ازياء لملابس داخليه و دعاره مقنعه
تتعرض و الناس تصقفلها كمان ؟؟؟
يعني انا فعلا نفسي اشوف الشخص اللي وقف المسرحيه
عشان اسأله السؤال اللي فات ده 00
و الله فكروني بعادل امام في شاهد ما شافش حاجه 00
الواحد يتكل علي الله و يشتغل رقاصه احسن 00
يا اااااااااا رب
سلام

ادخلوها بسلام 00

تلاقي ساعات عربية كدبه مكتوب عليها 00
و كلوا من طيبات ما رزقناكم
او محل عصير قصب كاتب 00
و سقاكم ربكم شرابا طهورا
تخيل انت كده ان الكبده المسممه اللي علي عربيه في
الشارع بقت 00 طيبات 00 و لا عصير القصب
بقي الشراب الطهور 00 كانت بتلفت انتباهي اوي
اليفط دي 00 انما النهارده القدر ودّاني قدام يافطه
كان كل اللي عليه لما قرتها اني ضحكت فجأه
لدرجة ان الناس اللي حواليّ في الميكروباص
بصولي و اكيد قالوا معلش مجنونه 00
اللي حصل ان صدفه الميكروباص خرم من شارع جانبي لتفادي
الاشاره و فجأه لقتني قدام قسم الدقي و انا ببص
لقيت ورا البوابه الحديد مكتوب يافطه كبيره
عليها كلام كتير اوي ؛ انما اللي لفت انتباهي
هي الاّيه القراّنيه 00
ادخلوها بسلام امنين
يا تري اعتبره وعد؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لا تعليق
سلام

Sunday, February 18, 2007

Help your self..

البوستايه دي ليها علاقه ببوستاية امبارح اللي بعنوان
بلد يفط صحيح
و ده لأن برنامج 90 دقيقه النهارده استكمل بقية
الموضوع او زيّ ما تقول كده مش بقيه
هو حادث مشابه00و هو انفجار لماسورة
ميه في احد ارجاء منطقة المعادي00 بس انا مش كاتبه
البوستايه عشان الحادثه نفسها لأن خلاص ما بقاش في جديد
انما انا كتبت لأن شدّ انتباهي جدا التعليق اللي قالته
مراسلة البرنامج ساره اسامه و هي بتنقل الواقعه
صوت و صوره قالت ساره في نهاية نقلها
للموضوع000ان المسؤلين شعروا بالاحباط من كتر
ما الناس بتقول انهم مقصرين ؛ و ان المفروض
لما ماسوره تضرب الشعب ينشف الشوارع من سكات؛
و اما المترو يتعطل الركاب تنزل تزق من سكات برضو ؛
و اما القاهره تولع يبقي الشعب يهف و يطفي النار ؛
و لكن الا التسبب
في احباط المسؤلين00
طبعا انا لما سمعت الكلمتين دول ضحكت لما اكتفيت
و هي المراسله تشكر علي طريقة ادائها كان هايل
و كان تعليق معتز الدمرداش ما معناه ان ربنا يستر عليها ؛
ياه ه ه ه 00ده احنا شعب ما يجيش غير بالشبشب الزنوبه
ازاي كده نسبب احباط للمسؤلين و هما مقطعين
هدومهم عشانا 00 بس انا عايزه اطمنكوا ان الناس
النهارده مع الماسوره الضاربه دي و تأكدهم انهم هيتحلقلهم
زيّ غيرهم فعلا وقفوا هما و سمعوا الكلام من سكات و استعملوا اسلوب
help your self
بس انا سؤالي الأخير هو 00هل احباط المسؤلين كان شديد
اوي يدخلهم في حاله نفسيه و لا عادي قرصين مهدئ
و الحاله تفوت؟؟؟؟؟
اصل انا صحة المسؤلين عندي بالدنيا00
سلااااااااااااااااااااااااااااااام

كوكوهات بيوت00

الحلقه اللي فاتت00
كوكو و كاكوكاكو غرقوا الشقه و هما بيلعبوا
الحلقه دي00
وقف كوكو صب الشوربه الكميله اللي هو عملها و صب
لكاكوكاكو هو كمان طبق 00و فتح كوكو الراديو00
و جابه علي قناة كوكوهات اف ام 100 ريشه 6
و قعد ياكل هو و كاكوكاك و
و هما بيسمعوا الراديو و بيرغوا سوا00
و خلصوا غدا ووقفوا كوكو يغسل المواعين و كاكوكاكو يلم الحاجه
و يدخلها مكنها في الدواليب00و بعد ما خلصوا كاكوكاكو قال لكوكو00
ياه انا بقي كبس علي النوم بعد الأكله اللذيذه دي00فرد عليه كوكو بسرعه
و هو متغاظ00انت كوم نوم يا كاكوكاكو انت مش نمت من شويه في المكبخ
احنا دلوقتي لازم ننضف الشقه اللي اتبهدلت دي ؛ و نبقي كوكوهات بيوت شاطرين
لحسن بص الدنيا مغروقه خالص00رد كاكوكاكو و هو يأس و كسلان و مدلدل
رقبته لتحت00ماشي00رد كوكو 00طب ياللا بينا انا هجيب الكمسحه و الكركل
و انت تجيب كماشه بتاعت التنضيف من كوه في كولاب التنضيف
ماشي 00و ابتدوا مهمة تنضيف
البيت 00
كوكو الكميل قلع الكلوفر الكميل و الزعبوط و لبس بنكالون الكيجامه
بتاعه00و مسك الكمسحه ووقف ينضف00و شمر كاكوكاكو ريش كناحاته
و دخل يجيب القماشه من دولاب التنضيف00و فتح كاكوكاكو الدولاب و ماكانش طايل
القماشه فشب علي طراطيفه مطلش برضو و اخد قرار انه يطير و يطلع يجيبها من
فوق الرف00و طار كاكوكاكو و مسك القماشه بمنقاره بس و هو نازل للأرض تاني
مخدش باله ان ريشه من كناحه اتشبكت في الحديده اللي في ايد المقشه
و راح واخد كاكوكاكو معاه المقشه واراها الجاروف و كل حاجه
جوه الدولاب و راح نازل علي الأرض و كل الحاجات دي فوقيه
و يدوبك حاول يفلت بس الجاروف وقع علي طرطوفة
ديله
و سمع كوكو الدوشه اللي مش كميله و جري لقا كاكوكاكو
نايم علي الأرض و ديله محبوس و مش عارف يفلت00راح كوكو
يحاول يشد الحاجات من حوالين كاكوكاكو عشان يخلصه00و بعد
مجهود مش كميل قدر كوكو انه يطلع ديل كاكوكاكو من تحت الجاروف00
و قال كوكو لكاكوكاكو00يعني احنا عندنا وقت مش كتير نروح مضيعينه
كده ؛ المهم انت كويس مش فيك حاجه مش كميله خد بالك يا كاكوكاكو
لحسن يحصلك حادثه زيّ 00يا للا بينا نشيل الحاجه ندخلها الكولاب
في مكانها تاني00و بعد ما لموا الحاجه و قفوا نضفوا البيت
و طبعا كوكو ما فاتش عليه انه يعمل في نفسه حادثه كالعاده00
لأنه و هو بيمسح و بيرجع بضهره مخدش باله ان الكركل وراه
و راح متشنكل و مقلوب ووقع جوه ميه المسح اللي جوه الكركل
و جري عليه كاكوكاكو و طلعوا و طبعا كان شكله يضحك و لما
كاكوكاكو شافه قعد يضحك اوي و كوكو قعد يضحك معاه و يقول له00
انا هسمي نفسي كوكو حوادث بعد كده00و طبعا جم
علي اّخر اليوم بعد ما خلصوا نضافه و البيت بقي كميل و بيلمع00
دخل كاكوكاكو استحمي00و بعدين دخل وراه كوكو 00و فجأه
صرخ كوكو من جوه الحمام 00الحكني يا كاكوكاكووووووو00
كاكان

Saturday, February 17, 2007

الناس بتكلم روحها00

اللي شوفته النهارده و انا ماشيه في الشارع ماكانش اول مره اشوفه
و كل مره كان بيلفت انتباهي و بيأثر فيا اوي لدرجة اننا ابص
و اركز 00رغم انها مش من عادتي انني ابص علي حد معدّي
لأني مؤمنه بأن انا كده بقتحم خصوصيته 00 بس
اللي شوفته النهارده و شوفته كتير قبل كده00واحده ست كبيره
نوعا ما في السن و الغلب باين علي كل تنتوفه فيها و ماشيه
تكلم نفسها في الشارع و بصوت عالي00 هي شكلها
لا يدّل علي انها من المجاذيب اللي سمعت انهم مع
اعدادهم اللي بتزيد في السرايا الصفرا كل فتره بيرموا
شويه في الشارع و الله اعلم ده حقيقي و لا لأ00
بس هي ما كانش شكلها يدل علي كده خالص بالعكس
و رغم كده بتكلم نفسها و بتشتم00الله يخرب بيت
تييييت و يلعن تييييييت 00من الواضح ان حياتها
الغلب فيها هو المسيطر00سرحت انا مع نفسي كده
يا تري الست دي ممكن يكون ايه اللي عامل فيها كده؟؟
لقيت اسباب كتيييير اوي تعمل كده في اتخن تخين00
يا تري و لادها رموها في الشارع و ملهاش مكان
تقعد فيه00 و لا جوزها طلقها و رماها هي و العيال في الشارع
و قالها اعلي ما في خيلك اركبيه00 و لا عانت معاه و هو محلتوش
و بعدين البليه لعبت معاه و راح اتجوز واحده غندوره
و صرف عليها القرشينات00 و لا طلعوها معاش مبكر
زيّ غيرها من الغلابه اللي اضطر واحد منهم انه ينتحر بولاده
الاتنين من كتر يأسه انه مش قادر يأكلهم00 و لا بقالها كام يوم
مكلتش و بتنام في عز البرد و المطره في الشارع او علي اي كوبري
زيّ عائلات كتير اوي00 و لا يا تري كانت ست الستات في يوم من
الأيام و فجأه راح كله في الهوا 00بصراحه قعدت افكر كتييير
و لقيت اسباب كتير و حسيت انني ممكن اعيط و انا ماشيه
في الشارع 00 و قلت في نفسي ياه ه ه ه
الناس حالها يصعب علي الكافر00 و ما في اليد حيله
و ما كان عليّ غير اني قولت جوه نفسي00
الحمدلله الذي عافنا مما ابتلي به غيرنا
و كملت طريقي و انا بدعيلها و بدعي لكل الناس
بالرحمه 00
سلام

بلد يفط صحيح00

اللي اتفرج النهارده علي حلقة برنامج 90 دقيقه كان هيشوف
مأساه حصلت في اماكن كتيييييير و برضه كل مره بيبقي
نفس رد الفعل من جهة الحي او المنطقه المسؤله00
عرضت حلقة البرنامج بالصوت و الصوره الناس في منطقه
معينه في انحاء الهرم و فيصل غرقانين في مية المجاري00
لدرجة ان واحده من السكان بتقول ان مية المجاري دخله
جوه شقتها00و ست تانيه جابوها بتعيط بالدموع
لأنها معندهاش مكان تاني تروحه غير بيتها اللي
عايم في المجاري00و كان اجماع كل السكان
المتتضررين انهم بعتوا شكاوي كتير و طلبات اكتر
عشان ينقذوهم و لكن كالعاده نفضولهم و حلقولهم
زي ما بيحلقوا للخروف بالظبط 00هو الشئ اللي
كان مضحك جدا في الموضوع رغم انه مأساه00
و اللي شد انتباه مراسلة البرنامج00ان في يافطه
كبيره محطوطه في وسط مية المجاري مكتوب عليها
00النضافه من الايمان00و يافطه تانيه مكتوب عليها
00ان السبب الرئيسي في تلوث البيئه هو دخان السيجاره
طبعا انا بعد موضو ع اليفط ضحكت من قلبي الصراحه00
و افتكرت عادل امام في فيلم انا و هو وهي و هو بيقول00
بلد شهادات صحيح00بس زيّ ما في نيو لوك لكل حاجه
من حقي بقي اني اقول انها00
بلد يفط بصحيح
سلام

كوكو و البهدله00

الحلقه اللي فاتت00
كوكو و كاكوكاكو رّوحوا علي البيت بعد الحلاق
الحلقه دي00
كوكو و كاكوكاكو راحوا اشتروا غدا كميل و هما مروحين
من عند الحلاق00دخلوا الكوكو ماركت و اشتروا
خضار و مشروم و قمح00و بعدين رّوحوا البيت
ووقفوا عملوا الغدا00كوكو وقف قشر البطاطس
و نضف الفاصوليا و الكزر و كاكوكاكو قطع
المشروم و حطوا حله علي النار فيها ميه و
كصل و توم00و حطوا الخضار عشان يعملوا
شوربة خضار و كمان سلقوا القمح و حطوه في الشوربه
مع الخضار 00و دخل كوكو اخد دوش كميل00
و طلع من الحمام لابس الكرنس و رابط الفوطه علي راسه
و خد نفس كبير و قال00الله ريحه الشوربه كميله اوي؛
كاكوكاكو00كاكوكاكو انت فين ؟ و بص كوكو حواليه لقا
كاكوكاكو نايم علي الطربيزه في المطبخ00راح كوكو
مصحيه و قايله00ايه ده يا كاكوكاكو انت في زبابة
تسيتسي كرصاك في كناحاك و لا ايه كل ما اسيبك
في حته تنام مني ؛ ياللا قوم عشان نتغدي و نقوم
نشتغل00يا كاكوكاكو00و كاكوكاكو ولا هنا نايم
و لا عايز يصحي 00راح كوكو شايله هيلا بيلا
علي كناحاته و كتافاته الكميله و دخل بيه الحمام و حطه
في البانيو و فتح عليه الميه الساقعه00قام كاكوكاكو يطرطش ميه
و يرفرف بكناحاته الكميله و يكح و راح باصص لكوكو و
لقاه بيضحك جامد راح طالع من البانيو بعد ما ملي الكركل البلاسكيك
الضغنن بتاع كوكو و جري ورا كوكو و رمي فوقيه الميه
و قعدوا يجروا و يطرطشوا علي بعض ميه لغايه ما سمعوا حاجه
علي النار بتفور و شموا ريحه جامده اوي00راح كوكو قايل00
يا نهار مش كميل الشوربه علي النار و جري بسرعه قفل
الكوكوجاز و قال لكاكوكاكو00شوفت بقي احنا كده لازم ننضف الشكه
بعد البهدله اللي مش كميله و كمان لازم ننضف الكوكوجاز عشان
الشوربه وسخته اوي00رد كاكوكاكو00طب ناكل الأول00
و رد كوكو الكميل طب يارب متنمش مني علي طبك الشوربه
و انت بتاكل00و قعد كاكوكاكو و كوكو يضحكوا بصوت كميل
و يهزروا و قاموا ينضفوا الشقه00
كاكان

Friday, February 16, 2007

كوكو عند الحلاق00

الحلقه اللي فاتت00
كوكو وكاكوكاكو سابوا الهديه لكوكوهايه قدام الشباك
و رّوحوا00
الحلقه دي00
كوكو و كاكوكاكو صحيوا من النوم مكسرين بعد يوم امبارح
اللي كان متعب و مليان مغامرات00دخلوا فطروا
و لبس كوكو البلوفر بتاعه و هو بيلبس قال لكاكوكاكو00
تفتكر يا كاكوكاكو الهديه عجبت كوكوهايه و لا ايه؟
رد كاكوكاكو00طبعا يا كوكو هتعجبها انت مش بتعمل
حاجه وحشه 00رد كوكو وهو بيحط الزعبوط علي راسه
الكميله و قال00طب ياللا بينا ننزل نروح للحلاك بتاعي
عشان تقص شعرك قصة الكوكو الكميل 00و مد كوكو
كناحه الكميل و جاب برواز محطوط علي الترابيزه
فيه صوره لنفسه و قال00 شايف يا كاوكوكاكو كوكو
الكميل كان ريشه ازاي كميل و زي الكمر؛ احنا ناخد
معانا البرواز ده عشان نواري الصوره للحلاق عشان يعملك
نفس الفورمه00و خرج كوكو و كاكوكاكو ووصلوا عند الحلاق
و اول ما دخل كوكو و شافه الحلاق قالوا00ايه ده هو مش حضرتك
برضو الأستاذ كوكو الكميل برضو و لا انا غلطان00رد كوكو00
ايوه انا 00رد الحلاق و هو مستغرب00طب مالك يا استاذ ايه
اللي حصل ريشك فين ده انا كنت بقعد اقصلك ريشك في وقت طويل
سلامتك مالك ؟ و طبعا حكاله كوكو الموضوع و قاله 00اهو بقي
ياسيدي انا عايزك تقص لصاحبي ده ريشه نفس قصة ريشي القديمه
و دي صورتي عشان لو كنت ناسي00رد الحلاق بسرعه00
عيب يا استاذ ده انت من اهم زبايني انا انسي قصة شعرك
برضو ؛اتفضل يا استاذ كاكوكاكو00و قعد كاكوكاكو قدام الحلاق
و كوكو الكميل واقف جنبه عمال يتابع و يقول ارائه00
لأ بص يا حلاك يا كميل قص من هنا شويه اكتر00
لأ كفايه كده هنا00و بعد وقت اتحول ريش كاكوكاكو
لشبه كوكو الكميل بالظبط00وكوكوالكميل قال ميرسي للحلاق
و اخد كاكوكاكو و مشيوا00بص بقي يا كاكوكاكو كده مش فاضل
غير درس الكلام الكميل احنا دلوقتي نشتري اكل للغدا و نرّوح
ناكل و نبتدي دروس00و سكت شويه و قال00مع اني
كان نفسي اعرف كوكوهايه رأيها ايه في الهديه ؛ بس
مش مشكله بعدين هعرف00
يا للا بينا
كاكان

Thursday, February 15, 2007

C.T.A

فاكرين زمان اول ما الأوتوبيس المكييف اللي بيسموه
ابتدي يشتغل كان شكله ايه؟ C.T.A
و كانت ميزاته قد ايه و ده كان السبب ان الناس كانت بتدفع
ال2 جنيه تمن التذكره و هي راضيه00
هفكركوا ببعض مميزاته لأنكوا اكيد نسيتوها00
كان السواق بيلبس يونيفورم نضيف و جزمه
كان الأوتوبيس مواعيده لحد ما مظبوطه
كانت الساعه اللي في الأوتوبيس علي طول صح و بالثانيه
كان بيعلق يافطه مكتوب عليها كامل العدد
كان في اكتر من مفتش بيطلع يشوف التذاكر
كان الفرش بتاع الكراسي بيتغسل و نضيف علي طول
و اكيد في حاجات تانيه كتير بس انا مش فاكره00
المحزن ان الأوتوبيس المكييف ده دلوقتي
تحول لأوتوبيس نقل عام00
التكييف اغلب الوقت بايظ
السواق بقي يلبس اي لبس مش نضيف
و يافطة كامل العدد اختفت و بقي الناس تقف
و تبقي مشحونه زي ميكروباصات الجمعيه
و الساعه اللي متلقه بقت مكسوره
و ممكن تفضل واقف بالساعه الا ربع و الأوتوبيس ما يجيش
و فرش الكراسي مش نضيف و متقطع00
ليه لما بيكون عندنا حاجه كويسه مش بتفضل كويسه
الكلام ده بينطبق علي كل حاجه حتي المنتج00
يعني تلاقي بسكوت كذا اول ما يطلع يبقي جميل
و شويه شويه يختلف و بعدين يبقي الضد00
انا ما بحملش هيئة النقل المسؤليه الكامله
انما بحملهم اللي الناس ملهاش ذنب فيه00
انما في مسؤليه علي الركاب المخربين اللي
مش بيحافظوا علي الجماليات اللي حوالينا00
يا جماعه احنا ما بنصدق ان حاجه كويسه تتعمل
لخدمتنا00يبقي المفروض بقي نمسك فيها بايدينا
و سننا00و لا نخربها؟؟؟؟؟؟؟؟؟؟؟؟؟؟
سلام

موت و خراب ديار00

يا جماعه سؤال برئ00
هل من المنطقي و العقل ان 10 يمشوا علي مزاج واحد؟
ده حته بيقولوا بالبلدي00رأي الأغلبيه
طب هل من المنطقي ان عشان فرد منطقه بحالها
تقف اللي راكبين و اللي ماشيين؟
طبعا هتقولولي لأ مش منطقي00
هروح انا قايلالكوا00بس احنا هنا في
مصر اي شئ مش منطقي بيبقي منطقي بلوي الدراع00
ايوه بجد00عشان مش معقوله ابدا ان عشان
فلان معدّي نروح قافلين الاشارات و نحط حديد
علي الرصيف و نحجز الناس من انها تمشي
في الشارع و نعطلها علي اشغالها و مشاويرها
عشان في تشريفه00و تخيلوا بقي لو واحد
ضرب بكلامهم عرض الحائط و كبر دماغه
و عدّي هيكون ايه مصيره00
انا ساعات بقعد اتخيل ان اي فلان من الفلانات
اللي بيقفلولهم الطرق عشان يعدّو ماشي جنبي
في الشارع و لا حاخد بالي منه اصلا؛
يا تري هو لو راح يحج بيروح بالتشريفه دي
و يمنعوا الحجاج عن الطواف لغاية ما هو
يطوف براحته؟
مفكروش هيعملوا ايه يوم القيامه يا تري هما
فاكرين انهم هيتحاسبوا بالتشريفه برضه؟
انا عندي اقتراح لطيف اوي00
يا ريت اليوم اللي هيكون في فلان
او علان معدّي تدّوا الناس اجازه او عذر تأخير00
ما هواصل الواحد يتلطع بالساعات في اشاره و كمان يتخصمله
من المرتب عشان وصل متأخر او ياخد لفت نظر مثلا00
ده كده يبقي موت و خراب ديار
سلام

Wednesday, February 14, 2007

مصائب قوم00

مصائب قوم 00عند قوم00فوائد

هو ليه الناس مش بتمشي صح من نفسها؟
ليه لازم يتحط غرامات و عقوبات عشان الناس تلتزم
بالقواعد و الروابط و النظام؟
هويعني كان لازم يوقفوا مفتشات عشان الستات
متزوغش من دفع تذاكر المترو؟
اه بجد هو ده اللي حصل00
اللي حصل انهم مسكوا في الرجاله كتير بتزوغ من دفع التذكره
في المترو00فراحو معينين عدد كبير
من البنات كمفتشات للسيدات عشان يكون ليهم
الحق في دخول عربية الستات و يقدروا
يحصروا عدد المزوغات 00و كانت الكارثه
انهم مسكوا في حوالي شهر اكتر من الف ست
مزوغه من دفع التذكره00طب ليه تكسفوا
نسفكوا 00انا اصلي حطيت نفسي في مكان واحده
او واحد من المزوغين لو اتقفشت هيبقي شكلي
ايه 00حسيت انه هيبقي شكلي سخيف و مبلول
طب لو مش مهم الشكل و الاحراج قدام الناس00
قدام ربنا ده الأهم لأن دي سرقه00
و انا باعترف اعتراف اني بعتبر نفسي
واحده من المساعدين علي السرقه لأن لما واحده
بتجيلي في المترو و تقولي ممكن اعدّي وراكي
مبعرفش اقوللها لأ بس مش عارفه اعمل ايه
غير اني اعديها00بس اللي جه في دماغي علي
طول اول ما سمعت موضوع تعيينات البنات
في الوظيفه دي 00المثل اللي بيقول00
تذاكر قوم عند قوم00 فوائد
سلام

كوكو في الكوكونتاين00


الحلقه اللي فاتت00
كوكو و كاكوكاكو دخلوا يشتروا لكوكوهايه هدية
الحلقه دي 00
خرج كوكو و كاكوكاكو شايلين هدايا
كميله و كتيره اوي لكوكوهايه00
كوكو كان شايل دبدوب كميل و كبييير
و لونه روز و ملفوف في ورق هدايا شفاف
و مرسوم علي الورق قلوب صغننه00
و كاكوكاكو كان شايل كيس هدايه كبييير
جواه البوم صور احمر و مرسوم عليه قلوب
كميله 00و جوه الكيس كمان كان في
مخده حمره كبيره و مرسوم عليها
ورده بيضه كبيره00و كمان كان
في كارت كبير اوي مرسوم عليه قلوب
و مناقير صغننه و كوكو الكميل كاتب
جوه الكارت00الي ارك كوكوهايه
كميله في الدنيا؛ عرفت انك
بتدوري عليه ؛قولت لنفسي
الكميله اني لازم اقولك00
happy koukountines day
توقيع 00كوكو الكميل
و مشي كوكو الكميل شايل الدبدوب
و كاكوكاكو شايل الهدايا التانيه اللي جوه
كيس الهدايا00و كل شويه يقفوا يريحوا كناحاتهم يا عيني
اللي نملت من الحاجات التقيله00
و كل شويه الحاجه تقع و يقفوا ينضفوها من التراب
اللي مش كميل اللي بيوسخها00
و اخيرا وصلوا قريب من بيت كوكوهايه00
و قال كوكو لكاكوكاكو 00بص يا كاكوكاكو احنا
هنقعد هنا تحت الشجره دي لحد ما الدنيا تضلم
خالص و بعدين هنمشي براحه اوي؛ لحد ما نوصل تحت
الشجره بتاعتها و هتطير انت يا كاكوكاكو تحط حاجه حاجه قدام الشباك
عشان لما كوكوهايه تصحي الصبح تشوفهم00
طب افرض حد شافنا00رد عليه كاكوكاكو00
رد كوكو 00متخافش ما احنا لازم نكون كميلين و حريصين
المهم انت دلوقتي اظبط الكنبه بتاع الكوكوبايل بتاعك
عشان نصحي بعد ساعه تكون الدنيا ضلمت00
و نام كوكو الكميل و كاكوكاكو و كل شويه يقوم كوكو
مخضوض لحسن يكون حد سرق الحاجات منهم00
و فضل كوكو يصحي و ينام لحد ما رن المنبه00
يا لا يا كاكوكاكو اصحي بقي يا كاكوكاكو انت نومك
مش كميل كده ليه اصحي بقي00و قام كاكوكاكو
يتاوب و قال00ياه كان نفسي افضل نايم
رد كوكو 00بص يا كاكوكاكو احنا نستني اول ما يطفوا
النور فوق و نبتدّي نتحرك00و فضل كوكو مثبت عينيه
الكميله علي شباك كوكوهايه لغاية ما لقي النور اتطفي00
راح مصحي كاكوكاكو اللي راح في النوم تاني و قاموا
علي طراطيف صوابعهم الكميله و راحوا تحت الشجره
و استخبوا00و قال كوكو00بص يا كاكوكاكو
احنا نبتدي بالدبدوب عشان هو اكبر هديه ياللا
خده في حضنك و براحه عليه00
وشال كاكوكاكو الدبدوب و طار بيه
سابه براحه قدام الشباك و نزل تاني00
و بعدين اخد المخده و الكارت مع بعض
و نزل00و كان باقي الألبوم و خده كاكوكاكو و طار
بس و هو بيحط الألبوم جنب بقيت الهدايا حد من بيت كوكوهايه
نوّر النور و اتخض كاكوكاكو و كان خايف اوي و لزق نفسه
في الحيطه اوي لحسن حد يشوفه00و كوكو واقف تحت مستغرب
ليه كاكوكاكو اتأخر00و مد كوكو منقاره الكميل عشان يبص لقي كاكوكاكو
واقف مزنوق فوق مش عارف يتحرك و ماكانش كوكو عارف يعمل ايه
و فضل يروح و يجي من القلق00بس الحمد لله بعد شويه النور اطفي
و راح نازل كاكوكاكو بسرعه00و شد كوكو الكميل من كناحه
و طار بيه بسرعه و بعد ما بعدوا شويه نزل علي الأرض00
و قال كاكوكاكو00انا كنت هاموت من الخضه باباها قام دخل الحمام
يعني هو ده وقته نشن و انا فوق00رد كوكو 00الحمدلله
محصلش حاجه مش كميله 00يا للا نرّوح انا نفسي انام
انت هتبات معايا يا كاكوكاكو00
كاكان

Tuesday, February 13, 2007

النظافه من الايمان00

النهارده راكبه ميكروباص في احد شوارع القاهره المزحومه اوي
و طبعا بسبب الزحمه كان الميكروباص بيتحرك براحه00
و جه في حته ووقف الميكروباص شويه اكتر 00
انا من اول السكه ماسكه في ايدي الكتاب و بقرا
كالعاده عشان محسش بالسكه00و لما الميكروباص
وقف00 لوهله طلعت عيني من الكتاب و بصيت بره الشباك
و شفت مشهد اثر فيا اوي00شوفت راجل عجوز اوي
و التجاعيد مرسومه علي وشه لأ تحسها منحوته
ووشه مكتوب عليه قسوة الأيام و المعاناه
راجل عجوز من اللي بيلبسوا الأوفراول
الأخضر00راجل عجوز من كناسين الشوارع
اللي ضهرهم انحني من الكنس بلا مقابل
بس اهو بدل ما يقعد في البيت و اهو برضه بيلقط
رزقه00المهم و انا بصه علي الراجل العجوز
و سرحانه مع حركته و ضهره المقطوم علي المقشه
و بيكنس الأرض 00و انا حسه انه بينفخ في قربه مخرومه
لأن المقشه عجوزه زيه بظبط المقشه من شكلها المتهالك القديم
تحس انها بتوسخ ما بتنضفش00فجأه حصل
فصل لحلمي و سرحاني مع الراجل العجوز00عدت بنت
من بتوع مدارس البنات00اكيد عارفين شكلهم00
عدت جنبه و راحت رميه كيس الشيبسي اللي كان
فاضي في ايديها رغم ان صندوق الزباله كان
بعيد عنها مفيش يجي 10 متر و رغم كده
رمت الورقه في الأرض و نزل الراجل العجوز
ووطي و شال الكيس00كنت انا في اللحظه دي
لو مش راكبه كنت مشيت وراها و فهمتها ان اللي
عملته ده شئ مش لطيف00يعني انا مش فاهمه
الناس ليه مفهوم المحافظه علي النضافه ده
شئ مش اساسي في حياتهم00يعني تلاقي
واحد متأمع كده و بيبرق و راكب عربيه جامده
اوي00و يروح فاتح شباك العربيه
و رامي منديل كان مستعمله00
طب يعني هيخس عليك ايه انك تسيب
المنديل في العربيه و لما ترّوح ترميه
في صندوق الزباله00
انا شخصيا شوفت ان ده الحل الأمثل
و المؤقت لموضوع الشوارع المزبله
لو ان كل حد ماشي مرماش الورقه
اللي في ايده في الارض و حطها في شنطته
او في جيبه لحد ما يرّوح او يلاقي
صندوق اعتقد ان الزباله علي الأقل
هتقل شويه00
و بعدين احنا شعب بنطلق علي
نفسنا اننا شعب يعرف ربنا
و شعب متمسك بدينه طب
ما الدين يا اخونا بيقول00
النظافه من الايمان
سلام

روتين حتي مع الوفيات00

اكيد طبعا سمعتوا عن انابيب البوتاجاز اللي بتنفجر
و مات بسببها ناس كتير لحد دلوقتي و ناس
منهم كانوا عرسان في ليله الزفاف00
و بعد ما طلع احد الأحاديد في التليفزيون
و قال 00ان الغلطه غلطة اللي بيشتري الأنبوبه
و طبعا كالعاده المجني عليه هو اللي غلطان00
بس ابشروا الحمدلله حبايبنا خدوا بالهم بعد الهنا بكام
شهر و تفضلوا و اخدوا القرار00
اخيرا00تقريبا بعد ما الناس حبت علي ايديهم00
هيجتمعوا في مجلس
الشعب و يناقشوا المشكله00
و طبعا هذا النقاش سينبثق عنه اجتماع
و الاجتماع سينبثق عنه لجنه و اللجنه
بعدها لجنه كبري ثم لجنه اكبر ثم0000
و هلم جر00بظبط زي مشهد الشنكل
بتاع حسن مصطفي في فيلم ارض النفاق00
يعني انا مش فاهمه هو عادي كده الناس تموت
و لا عشان هما لسه اعداد الوفيات في العشرات فبتعتبر
حالات فرديه00 زي ما بيسموها دايما00
اصل انا بصراحه مش شايفه لزوم للجنه او اجتماع
عشان فحص انابيب او حل مشكله00ما هو عقبال
ما ده يحصل هيكون الأموات وصلوا للمئات00
و لا هو لا غني عن الروتين00 حتي مع الوفيات؟؟؟؟؟؟؟؟؟؟؟
سلام

كوكو و الهديه00

الحلقه اللي فاتت00
كوكو و كاكوكاكو قرروا يروحوا للدكتور
الحلقه دي00
كوكو الكميل اتمشي هو و كاكوكاكو بعد ماريّحوا
نفسهم شويه من الخضه اللي اتخضوها00
و قرروا انهم يتجهوا ناحية الحلاق بتاع
كوكو عشان يظبطوا ريشات كاكوكاكو
تبقي شبه ريشات كوكو الكميل00
بس و هما ماشيين في السكه شاف كوكو
محل كوكوبايلات و قال لكاكوكاكو00
تعالي يا كاكوكاكو عايز ادخل اشتري
كوكوبايل كميل بدل اللي راح في البكله
الكميله00و دخلوا المحل و وقف
كوكو قدام الفاكرينه يتفرج
و اخيرا لقا واحد كوكوبايل كميل اوي00
و قال لكاكوكاكو 00ايه رأيك يا كاكوكاكو
مش الكوكوبايل ده كميل00فرد عليه
كاكوكاكو00ايوه جميل اوي يا كوكو الله ده
فيه كاميره00فبص كوكو الكميل لكاكوكاكو
و قاله00ايه ده يا كاكوكاكو انت بتقول
كميل غلط لأ ركز معايا و انا بكلم ماشي؛
المهم دلوقتي ننده الراكل عشان نشتري الكوكوبايل
ده00و نده كوكو00لو سمحت من فضلك
انا كوكو الكميل و عايز اشتري الكوكوبايل
ده00و رد عليه البياع00طب يا استاذ كوكو
انت عارف ده بكام ؟ ردعليه كوكو00بكام حبوبورو
لو سمحت؟ رد البياع00ب700حبوبورو00
حط كوكو كناحه في جيبه و طلع الحبوبورات
و لقاهم مش هيكملوا و اخد كاكوكاكو
باله من ان كوكو مزنوق في الحبوبورو
و قال كاكوكاكو00انا ممكن اسلفك الباقي
لو مش مكمل معاك يا كوكو00
رد كوكو الكميل00لأ اصل انا افتكرت
ان بكره الكوكونتاين و انا عايز اجيب
هديه كميله لكوكوهايه 00و كمل كوكو00
مش مهم بعدين اشتريه انشاءالله00و بص
كوكو للبياع و قال له00ميرسي يا بياع يا كميل
انا هاجي اشكريه بعدين00و خرج كوكو و كاكوكاكو
و قال كوكو 00بص يا كاكوكاكو احنا مش
هنروح الحلاق النهارده احنا ندخل محل الهدايا الكميل
اللي اسمه هدايا كوكوهاتي اللي في الشارع اللي جاي يمين
و نشكري الهديه لكوكوهايه و نوديها عشان تصحي
بكره الصبح تلاقيها00رد كاكوكاكو00انا مش فاهم
هتديها الهديه ازاي بأبوها الضخم ده؟
و كانوا خلاص وصلوا قدام محل هدايا كوكوهاتي فرد كوكو
00تعالي بس احنا نشكري الهديه الأول و بعدين احكيلك
و دخلوا محل الهدايا00و هما علي الباب
بص كوكو و صوصو و هوه فرحان اوي و قال00
الللللللله بص يا كاكوكاكو حلو اوي ده000
كاكان

Monday, February 12, 2007

خليك ورا الضرايب00

خليك ورا ال 000 لحد باب الدار
زمان و انا عندي حوالي 10 سنين00
كنت بلعب بالعجله الحمرا بتاعتي00
و دخلت علي بابا و انكل محمود صاحبه
و هما قاعدين في الجنينه بتاعت البيت
و كانوا بيتكلموا عن حاجه اسمها00
الضرايب00فسألت انكل محمود00
يعني ايه ضرايب يا انكل00و رد
عليا انكل محمود و قالي00الضرايب
دي يا كوكو عباره عن نسبه من ربح
او من الدخل المادي لكل فرد من الشعب
بتاخده منه الحكومه 00رحت انا
قايله 00الله طب انا سمعتك بتقول يا انكل
انك مش بتدفع الفلوس دي انت كده حرامي؟
و رد عليه انكل محمود بكلام مفهمتوش اوي ساعتها
بس فهمت معناه لما كبرت و بدأت اركز و افهم اكتر00
و فهمت ليه انكل محمود ماكانش بيدفع الضرايب00
لأن المفروض ان الضرايب اللي بتتسحب من الفرد
او من المواطن بتروح في اصلاحات و حاجات مفيده للبلد00
بس كنت امشي و ابص حوالي الاقي كراسي المواصلات
مكسره00و الشوارع كلها مطبقات و بلاليع بتكسر العربيات
و الشوارع عايزه تترصف00و المستشفيات الحكوميه
حالتها صعبه اوي و لو العيان يدخل يعي اكتر00
و المدارس و00و00و000الخ0
و اما كنت اشوف كل ده كنت بسأل نفسي
معقول كل الناس بتعمل زيّ انكل محمود عشان
كده كل الحاجات دي بايظه و لا ايه السبب؟
و ماكنتش عارفه الحقيقه ايه00
بس يا جماعه من كام يوم سمعت خبر اداني
شوية امل و قلت اهو شعرايا الواحد يتعلق فيها
و نفسي يا رب يكون انكل
محمود عايش عشان يعرف الموضوع ده
الموضوع اللي جابلي حبة تفاؤل هو00
ان مصلحة الضرايب في اعلانها
الجديد بتقول 00ان التهرب من دفع الضرايب
مش في مصلحة البلد و ده لأنه بيقصر في الاعمار
و التجديدات و بناء المدارس و المستشفيات
و لما الواحد مبيدفعش بيضر اخواته من الشعب
و بيعطل مسيرة النمو و التقدم و الاصلاح
و انا رأي اننا نجرب نظام الاقرار الضريبي
الجديد اللي اتطبق من السنه اللي فات
و اللي هو باعتباري من المتعاملين
مع الضرايب احسن بكتير من الكعب الداير بتاع
قبل كده00و اهو نجرب و نشوف
و علي رأي المثل00
خليك ورا الضرايب00 لحد اما نشوف النتايج
سلام


كوكو و الضخم00

الحلقه اللي فاتت00
كوكو و كاكوكاكو واقفين تحت شباك كوكوهايه00
الحلقه دي00
اتفتح الشباك فجأه و خرج منه واحد كبير00
اتخض كوكو و اتسمر مكانه و قال لكاوكاكو00
ايه ده مين ده هي كوكوهايه عندها راجل في البيت؟
رد كاكوكاكو00يا كوكو عادي تلاقيه باباها
تعالي بينا نخلع قبل ما يشوفنا و نضرب و لا حاجه00
و اتدور كوكو و كاكوكاكو عشان يمشوا00
و سمعوا فجأه صوت صوصوه عالي اوي
و بيشخط و بيقول00انت يا واد انت و هو
تعالوا قربولي هنا00و مكانش من كوكو و كاكوكاكو
الا انهم يسمعوا الكلام اللي مش كميل ده و يلفوا
براحه00 و راح طاير الضخم ده من الشباك
بسرعه و نزل قدامهم 00و كوكو و كاكوكاكو
مكانوش شايفين غير ركب كبيره و رفعوا راسهم
براحه و بصوا له و كانت ركابهم بتخبط في بعضيها
من الخضه00و زعق الضخم ده و قال لهم00
انتوا عايزين مين ؟ و كنتوا واقفين هنا ليييييييه؟
رد كوكو و لسانه الكميل بيترعش و مش عارف يتكلم00
احنا00احنا00و بص لكاكوكاكو فكمل كاكوكاكو و قال00
احنا 00احنا كنا00 شخط فيهم الضخم جامد و قال00
احنا احنا انتوا ايه هتتكلموا و لا00رد كوكو الكميل بسرعه
و قال00لأ احنا هنتكلم احنا اصلنا زمايل كوكوهايه و كنا
معديين من هنا صدفه و كنا عايزين نطمن علي صحتها00
و قال الضخم 00اه زمايل كوكو هايه بس دي مش موجوده
و انا ابوها و مبحبش حد يجي يزورها انتوا سامعيييييييين
و راح مصرخ فيهم جامد و طلع عاصفه من بقوا طار
كوكو الكميل و كاكوكاكو و اتنطروا بعيييد علي الرصيف التاني
و قاموا يجروا و خايفين00و جريوا كتير لحد ما تعبوا اوي
فقعدوا علي الرصيف يريحوا00و بعد شويه قال كاكوكاكو
لكوكو00انت مصمم يا كميل بعد اللي حصل اننا نكمل الخطه
متكبر دماغك و الكوكوهايات ماليه البلد00رد كوكو الكميل00
لأ انا بحبها و مستعد اعمل اي حاجه عشانها يا كاكوكاكو00
و لا انت مش عايز تساعدني00رد كاكوكاكو00لأ يا كوكو
متقولش كده تاني00و خد كاكوكاكو كوكو في حضنه
و طبطب عليه و كوكو عينيه دمعت00و قال كوكو
و هو بيمسح دموعه في كمه00طب ياللا بينا بقي
عشان اوديك عند الحلاق بتاعي00
كاكان

Sunday, February 11, 2007

هو فيه بجاحه و هيافه كده00

طبعا عارفين محل التابعي بتاع الفول و الطعميه
اللي في شارع جامعة الدول في المهندسين00
اهو انا امبارح كنت هناك و حصل موقف لفت
انتباهي جدا لدرجة اننا بكتب عنه دلوقتي00
اسمعوا الحكايه صلوا عالنبي00
كنت انا وواحده صاحبتي في المهندسين
و هفتني نفسي علي طبق سلاطه مشكل من بتاع التابعي
اللي بيبقي في التلاجه و انت تنقي المكونات00
المهم قررت اني اروح التابعي اشتري00
و انا متجهه للكاشير اللي هو موقعه
في الشارع جوه بارتيشن 00
عدت واحده قدامي لابسه بالطو
طويل لغاية الركبه و في فتحه من ورا00
و بوت طويل لغاية الركبه00و باين من
الفتحه بتاعت البالطو من وره حته تيجي
مثلا 3 سنتي تبين انها لابسه كولون شبك
يعني مش باين منها حاجه اصلا00
المهم كان المنظر بالظبط00انا و صاحبتي
عاموديين علي البنت دي و هي قطعت الطريق قدامنا
و عديت00و في نفس الوقت اتنفض الشابين
بتوع الكاشير و مطّوا رقابيهم و قاموا يبصوا
علي الحته ال3 سنتي00و كان التركيز
لدرجة انهم مشفونيش و انا واقفه مده
ايدي عشان ادفع00المضحك جدا في الموضوع
ان الشاب رجع بصلي باستغراب و بجاحه
ان انا ازاي ابصله باستنكار علي اللي هو بيعمله00
و طبعا انا مسترش روحت بصاله و قايلاله 00
تعرف اننا بستغربكوا اوي00و كان نفسي
حتي يكسف علي طوله و هبله00انما فضل باصصلي
نفس بصة الاستغراب اللي كان بصصها في الأول00
المهم ان انا دفعت و مشيت00بس فضل الموضوع معلق معايا
اوي00و فضلت انا و صاحبتي نتكلم و نسأل نفسنا00
هو فيه بجاحه و هيافه كده00
سلام

انا اتأثرت00


مش قادره احكيلكوا شعوري و انا قاعده بتفرج
علي الفيلم00و طبعا قبل ما اشرح شعوري لازم
اقدم شكري لأميرة البلطجيه لأن هي المشجع
الرئيسي ليا عشان اشوف الفيلم00
happy feet 2006
امبارح و انا بتفرج من كتر تأثري و اندماجي
مع الفيلم عيط00البنجوان بطل الفيلم
اثر فيا اوي00حقيقي يا جماعه براعه
رهيبه في التحكم في تعبيرات وش شخصيه
الشعور التاني اللي جالي animation
ان الشخصيات دي حقيقيه من كتر التدقيق
في تفاصيل كل شعرايه في جسم المخلوقات00
و طبعا مش عايزه احكيلكوا علي البراعه
في رسم حركة الجرافيك و ازاي التحكم الرهيب
في ان الشخصيات ترقص و تعمل استعراضات
و تكوينات اعتقد ان و لا فرقة الرقص في الأوبرا
تعمل كده00و يا سلااااااااام علي الأغاني
و الموسيقي اللي في الفيلم 00الأغاني
كتير اوي بس مفيش ملل خالص 00
ده غير كمان ان الاختلاف بين تفاصيل الشخصيات
واضح جدا00يعني اللي اقصده ان مش كل البنجوان
كانوا بيتكلموا لهجه واحده00كان في شله منهم بيتكلموا
و حتي مش بس في اللكنه كانوا حتي في latin
فرق في المشيه و طريقة الأداء00
و الشئ اللي لفت انتباهي كمان هو الدمج ما بين
البني ادمين و الجرافيكس ببراعه و تقنيه
عاليه جدا متحسش ان دول مرسومين
و دول حقيقيين 00
في المجمل هو فيلم فيه ابهار00
و كمان قصه و مضمون 00يعني مش فيلم
جرافيكس و خلاص 00لأ في معلومه
و سياق درامي الفيلم ماشي فيه00
وفي النهايه عايزه اقولكوا ان كوكو قضي سهره سعيده
لأن الفيلم كان بطولة كوكوهات زيه00
سلام

Saturday, February 10, 2007

الظلم وحش00

مش عارفه ابتدي منين و لا اقول ايه00
الموضوع و كل ما فيه ان الراجل المصري الغلبان
مش عارف يلقيها منين و لا منين00
هما اكتر من واحد حصل معاهم نفس الموضوع00
في طنطا و الأسكندريه00اشخاص لقوا
اثار مدفونه تحت بيوتهم او في المحيط اللي حوالين بيتهم
فلأن الناس دي تتسم بالأمانه خدوا اللي لقوه
و راحوا يسلموه للجهه المختصه و مستنيين
طبعا انهم يخدوا مكفأه مجزيه00و ذهلوا طبعا
لما لقوا المكفأه 30 جنيه و خدوا منهم 50
قرش دمغات00و لما جم الناس يعرضوا مشكلتهم
طبعا طلع اللي يقول ان احنا مبنصرفش مكفأه اقل من 1000جنيه
طب انا راضيه ذمتكم 00هل الألف جنيه دي مبلغ
مجزي يخلي الواحد منهم بعد كده لو لقه اثر يروح
يسلمه و لا ياخدوا هو يبيعه بطريقته و ياخد الفلوس اللي تبقي مجزيه
تخيلوا بقي ان الف جنيه تعتبر و لا حاجه00طب يا تري ال30
جنيه دي نسميها ايه؟؟؟؟
انا لقيتلها تسميه هايله00و هو الافتراء علي خلق الله
و التشجيع علي السلوك و التصرف الغير مشروع
ما هو المثل بيقول00
كتر الضغط 00يولد النفجار
الظلم وحش اويييييي
سلام

الناس اتهبلت00

برنامج العاشره مساءا النهارده كان بيعرض
دليل مادي علي ان الناس اتهبلت و مخها
سلوكه ضربت00البرنامج كان عارض
مشهد متصور علي موبايل00
لشباب بنات و اولاد بيرموا نفسهم
في النيل من فوق كوبري المنيب بهدومهم
و منهم بنات محجبات00
و كان رأي مني الشاذلي ان دي تعتبر
جريمه و ان الشباب دول بيرموا
بنفسهم في التهلكه لأن من الممكن بكل
سهوله حد منهم يغرق او الهوا يطيره يخبط
في حاجه و يموت برضه00
بس انا شايفه فوق ده ان الموضوع ده
ليه اسباب كتير00
اولا00انهم شوية شباب هايف
عايز يلفت النظر و يعمل حاجه غريبه
ثانيا00تقليد اعمي للي بيحصل في
اوروبا و امريكا من اختراع حاجات او زي ما بيطلقوا
عليها رياضات جديده بيكون فيهي خطر كبير
اوي علي حياة اللي بيمارسها ؛ و احنا الشباب
عندنا ماشالله جامع ما بين صفات القرد و البغبغان
ثالثا00انهم شباب الفراغ هيموتهم و مش لقيين
حاجه يعملوها في حياتهم00
بس اين كان السبب السبب الأكيد
انهم شباب مش سويين نفسيا و لا اجتماعيا00
و اللي خلاني استغرب اوي 00يا تري هما بيروحوا
ازاي و هما مدهولين و مبلولين كده؟
طب يا تري محدش من الناس اللي ماشيه في الشارع
سألهم انتوا بتعملوا ايه؟ و ده شئ غريب لأن احنا شعب
يحب يتحشر في اللي يخصه و اللي مايخصوش00
طب يعني مافيش امن في الشارع او عساكر؟
سؤالي بقي بخصوص البنات و خصوصا المحجبات المودرن
متكسفوش و هما بيعملوا كده00 و طبعا معروف اللبس
لما بيتبل و بيلزق علي الجسم بيبقي شكله ازاي00 و شواطئ
المصايف تشهد00
انا كل اللي اقدر اقوله للشباب الحلوين اللي ماينفعش
يكونوا سند و لا ينفع نطلق عليهم حتي ضل راجل و لا ضل حيطه
اقولهم00ربنا يشفيكوا
سلام

كوكو و التاج00

كوكو يا عيني عليه 00اتدبس يا و لداه
في التاج اللي هو مايعرفش يعني ايه اصلا
بس الحاجه شيكو00هي اللي دبسته يا حرام
و هو مضطر غصب عن منقاره الكميل
يجاوب00انا نفسي مشفقه اوي
علي كوكو من هذا المزنق00
ياللا يا كوكو يا كميل شد حيلك00
استعني علي الشقا يالله00
ايه اللي هيحصل لايميلك بعد ما تموت؟
كوكو الكميل ليه اتباع و انصار و كوكوهات تانيين
هيكمله المسيره و المنهج و هيبقوا خلفائه الكيميلين
اديت الباس وورد لحد قبل كده؟
ايوة
و لو اديته لحد هو مين؟
قلب الكوكو الكميل
اسمك؟
كوكو كاكا الكميل
اسم الدلع المشهور بيه؟
كوكو الكميل00و ساعات الكميل اوي
عمرك؟
للأسف كوكو مش بيهتم بالحاجات دي
عشان في حاجات اهم يركزلها
برجك؟
كوكو الكميل مش مؤمن بالأبراج00بس هو اكيد
هيكون00 برج حمام
مجالك او مجال دراستك؟
كوكو الكميل بيفهم في كل المجالات00
بس هو كان في كلية الحكوكو00
ما انا قلت في قصه حياته
شخصيتك نوعها ايه؟
كوكو ميحبش الامور المعووجه00
و عصبي اوي عشان الحق00
و طول عمره يدافع عن حكوك الأخرين
السفر بالنسبه لك؟
كوكو يحب السفر عشان بيحس بالحريه
و الانطلاك00و يخليه فريش علي طول
المود بتاعي؟
بصوا علي اليمين تعرفوا من الصوره
وقت الفراغ بتعمل فيه ايه؟
كوكو وقته ثمين و كميل و مفيهوش فراغ
بس لو عنده هيفكر في مشاكل الكوكوهات
الأكله المفضله؟
كوكو يحب ينقر حب و ياكل خكار مسلوك
الصفات اللي خدتها من بابا؟
نص الحاجات الكميله اللي فيا
الصفات اللي خدتها من ماما الله يرحمها؟
النص اللي باقي
اكتر 6 حاجات مش بحبها؟
كوكو بيكره00
الكدب
النفسنه
اللحمه و الفراخ
عدم الخصوصيه
استخدام الالفاظ اللي مش كميله
اكتر 6 حاجات بحبها؟
كوكو يحب00
الكميلين
الخضار المسلوك
و النص التاني لكوكو الكميل
و بحب كوكو الكميل
الهدوء
الخصوصيه
الشغل بالنسبه لي؟
كوكو يعتبر الشغل قضيه
ايه الكمبيوتر و الأنترنت بالنسبه لك؟
كوكو مثقف فطبعا هما اهم عنده من الاكل
امرر التاج لمين؟
لكل ضيوف العشه الكميله00اللي معملوهوش قبل كده
عشان كوكو مايكونش دبس حد بالذات
كاكان بقي

كوكو و السبت00

الحلقه اللي فاتت00
كوكو اتفق مع كاكوكاكو
الحلقه دي00
كوكو اتفق مع كاكوكاكو انهم يبدأو ترتيب الخطه
من دلوقتي00و خرج كوكو الكميل و كاكوكاكو
و هما ماشيين في الشارع كوكو قال00
بس يا كاكوكاكو احنا دلوقتي اول حاجه
نروح محل هدوم كميل عشان اشتري
كلوفر البسه عشان ما امشيش
اقرع كده و ابرد00رد كاكوكاكو00
انا يا كوكو اعرف محل حلو اوي
في شارع الكراكيب00رد كوكو بسرعه00
يا سلام ده الشارع اللي ساكنه فيه كوكوهايه
كويس اهو بالمره اوريك البيت بتاعها00
و مشيوا كوكو الكميل و كاكوكاكو شويه00
و قال كوكو00 احنا نروح نركب الكوكوبيس
يا كاكوكاكو00فرد كاكوكاكو00لأ و ليه
الزحمه و البهدله انا عندي حل لطيف00
تعالي00و دخلوا محل و اشتري كاكوكاكو
سبت صغنن علي قد كوكو00و قال كاكوكاكو00
ادخل يا كوكو في السبت و انا هشيلك بمنقاري00
رد كوكو 00مش هبقي تقيل عليك يا كاكوكاكو؟
رد كاكوكاكو00لأ يا كوكو متخافش انا متعود
عشان كنت بشيل كوكوهات اختي الصغننين كده00
و دخل كوكو جوه السبت و شال كاكوكاكو السبت
و طار00و قال كوكو و هما طايرين00ياه ه ه
انت كميل اوي يا كاكوكاكو انا بقالي كتير مطرتش
و الهوا يخبط فيا و ابص علي الدنيا من فوق
ميرسي اوي يا كاكوكاكو00و قعد كوكو يتنفس
اوي ي ي00و يفتح كناحاته الكميله و يحضن الهوا
بس فجأه و كوكو بيلعب بكناحاته الكميله في الهوا حس ان
السبت بيتمرجح اوي00 و راح السبت فالت من منقار كاكوكاكو
و حس كوكو انه بتسحب بسرعه لتحت00و قعد يقول كوكو 00
لأ يا كوكو مش تاني هيحصلك حادثه مش كميله تاني يارب يارب00
و كان في الوقت ده كاكوكاكو بينادي علي كوكو00متخافش يا
كميل انا هلحقك 00و طار كاكوكاكو بسرعه لتحت00
و كوكو الكميل بيحاول يحرك كناحاته بسرعه يمكن
يعرف يلحق نافسه00و خلاااااااااص قرب السبت
علي الارض00و كاكوكاكو بينادي 00كوكوووووووووو
و هوب 00لحق كاكوكاكو يدخل منقاره في ايد السبت
و رفعه قبل ما يقع علي الأرض00و خد كوكو نفس جامد اوي
و بص لكاكوكاكو و قال له00ميرسي يا كاكوكاكو
انت انقذت حياتي الكميله و انا مديون لك00
رد كاكوكاكو طب تعالي ننزل الكشك اللي هناك ده نشرب كوكولا
و ناخد نفسنا بعد الخضه دي00و نزلوا شربوا كوكولا
و طاروا تاني بس المره دي قعد كوكو كميل و هادي
و ماسك بكناحاته الاتنين في جنب السبت00
و وصلوا اخيرا شارع الكراكيب00
قدام المحل اللي اسمه كلوفرات كريكو00و ركنوا
السبت علي جنب و دخلوا المحل00و قعد كوكو يتفرج علي
البلوفرات الكميله00و اخيرا لقي واحد اصفر كميل اوي
و عجبه عشان فكره بلون ريشه الكميل00
و كان معاه كمان كوفيه كميله فيها كور احمره
واخضره وشراشيب فى اخرها
و اشتراهم كوكو بعد ما فرجهم لكاكوكاكو و خد رأيه انهم كيميلين
و لبسهم كوكو ودفع تمنهم 33حبوبورو و خرجوا
من المحل و مشيوا شويه و بعدين
و قف كوكو و قال 00بص شايف الشجره الكبيره الطخينه
الكميله اوي اللي هناك دي00
شايف الشباك الكميل اللي عليه ستاره
اصفره في اخضره هناك دي00
رد كاكوكاكو00اه يا كوكو شايفهم00
هو ده شباك كوكوهايه 00
وقعد كوكو وكاكوكاكو يبصوا للشباك ويقربوا حبه حبه
وفجأه اتفتح الشباك مره واحده00
كاكان

يا واخد القرد00

يا واخد القرد علي ماله00يروح المال و يبقي القرد علي حاله
هو في شباب عايزه تتجوز؟؟
هو في حاجه اسمها جواز دلوقتي؟؟
الجواز ده كان زمان ايام العز و الناس اللي عايزه
تفتح بيت بصحيح
كل الكلام ده بنسمعه من الأهالي الأفاضل
اللي عندهم بنات عايزين يجوزوهم00
و ده رأيهم و هما حرين00
انا بقي معترضهههههه جدا00لأن الشباب عايزه
تتجوز بس مش عايزه تتدبس او حد يبيع
و يشتري فيها او يحس انه رايح يشتري غساله00
الأهالي بيغالوا في المهور و الطلبات زياده
عن اللزوم و الحاله ضنك00و ممكن تبقي البنت موافقه
علي انها تتجوز بأقل الامكانيات و ربنا
يسهل بعد كده ما الجواز بييجي برزقه
و رغم كده تلاقي الأهل بتتكلم في
حاجات سطحيه متوقفش الحياه00زي مثلا ان يكون
المطبخ من عمرو حلمي اللي ب20 الف
و الحلل تكون من اللي ب الف مش ب800
يعني انا مش فاهمه هتفرق ايه00
انا من رأي ان الأهل بالطريقه دي بيعجزوا الشباب
و بيضطروهم للجواز العرفي و للغلط00و بعدين
هل الاب او الام هيتبسطوا لما يجوزوا بنتهم لواحد
محشي فلوس بس معندوش دين و مش بيراعي ربنا
و ممكن يكون عجوز00و في كل الحالات يبقوا قضوا عليها
و ساعتها الفلوس و لا هتنفع ده حتي الناس بتقول
ان الفلوس مش كل حاجه00الفلوس مش بتشتري السعاده
و احنا بنشتري راجل00انما مش بنشتري بنك
لأن ممكن ببساطه البنك يفلس و المال يروح
و ماناب اللي اتجوزت الا التدبيسه في القرد لامؤاخذه
طب ليه البهدله دي00و ليه
لما الشاب يجي يدخل من الباب تضغط عليه
و تحسسه انه ما ينفعش يتجوز و يروح ينتحر احسن
يا ابهات يا امهات00حرام عليكوا انتوا
بتعملوا كارثه و انتوا مش حاسين00
و بعدين علي رأي المثل اللي مكتوب فوق
و المثل التاني اللي بيقول00
خدوهم فقرا يغنيكم ربنا00
سلام

Thursday, February 8, 2007

كوكو و كاكوكاكو000

الحلقه اللي فاتت00
كاكوكاكو وصل عند كوكو الكميل البيت
الحلقه دي00
فتح كوكو الكميل الشباك لكاكوكاكو و دخله
و حضنه جامد و قاله00وحشتني اوي يا كاكوكاكو
و رد عليه كاكوكاكو00و انت كمان يا كوكو ياه فاكر
مشفناش بعض من ساعة محاكمة المنفسنين
و رد كوكو 00تعالي ياكاكوكاكو ندخل المكبخ
و نعمل طبق الكول الجامد و الكعميه السخنه
بتاعت زمان انا عارف انك بتحبهم00
ووقف كوكو الكميل يعمل الفطار و كاكوكاكو
يساعده 00و قعدوا يفتكروا زمان لما كانوا
بيذاكروا سوا في الحكوكو00و ازاي كانوا
متكاتفين ضد الناس المنفسنين و الوحشين
و ازاي كانوا بيقلوله ان كاكوكاكو ده فيه
شبه منه كبير00و فطر كوكو الكميل مع كاكوكاكو
و بعدين عملوا كوبايتين كاوكاو يشربوهم00
و راحوا قعدوا في الصالون00 و قال كاكوكاكو
لكوكو00في ايه بقي يا كوكو يا كميل انت
خضتني امبارح لما لقيتك بتكلمني فجأه كده
اوعي يكون في حد منفسن بيضايقك؟
و رد كوكو 00لأ ابدا يا كاكوكاكو00بس اناااا
و شرب بق من الكاوكاو و سكت00
و قاله كاكوكاكو و هو مخضوض 00متقول يا كوكو
انت مكسوف مني و لا ايه00
فأتشجع كوكو و رد بسرعه و قال00
بص يا كاكوكاكو انا محتاجك في خدمه مهمه اوي
و عمري مهنسهالك ابدا00انا بحب واحده كوكوهايه
بس عندي مشكله كبيره اوي00رد كاكوكاكو00
يا سلام مبروك طب ايه المشكله؟
قام كوكو وقف و قلع روبه الصوف الكميل
و هو مكسوف00فأتخض كاكوكاكو00
ايه ده يا كميل ريشك الكميل فين
رد كوكو00اصلي انا عملت حادثه و 0000
و000و0000000و00000و هو ده اللي حصل
يا سيدي 00و كمل كوكو و هو بيلبس الروب تاني
و قال00انا بقي ياسيدي عايزك تعمل انك انا
شويه لحد ما ريشي يطلع و بعدين خلاص00
فرد كاكوكاكو00لأ قول تاني يا كميل عشان مفهمتش
رد كوكو00انت مش فاكر زمان و احنا في
الحكوكو كانوا بيقولوا انك شبهي00رد كاكوكاكو00اه
راح رادد كوكو بسرعه00بس انا بقي هعرفك علي
كوكوهايه علي انك كوكو الكميل اللي هي بتدور عليه
و طبعا اكيد هتحبك و اول ما ريشي الكميل يطلع تاني
هاروح انا اتقدملها علي طول00بس ده محتاج
مننا شوية تمرين عشان ادربك انك تتكلم كميل
زيّ و اخدك اوديك عند الحلاق بتاعي
يعملك قصة ريشي الكميل و هبقي اتابعك
في الموضوع علي طول و اقولك تعمل ايه
هااااا ايه رأيك00وافقت؟؟
رد كاكوكاكو00انا يا كميل اعمل عشانك اي حاجه
و حتي لو عايز اني اخلّع ريشي و اديهولك
بس انت حاسس اننا هننجح ؟؟
رد كوكو00لأ انا عايزك تحافظ علي
ريشك عشان المهمه تنجح00و انشالله
هننجح عشان انا نيتي خير00
اديني كناحك و خد كناحي الجميل
عشان نقرا الفاتحه00و مسكوا كناحات بعض
و قالوا00بسم الله الرحمن الرحيم0000
صدق الله العظيم00و قال كوكو علي طول00
احنا كده نقدر نبتدي دلوقتي00
ياللا بينا0000
كاكان

Wednesday, February 7, 2007

كوكو ياخد خطوه تانيه00

الحلقه اللي فاتت00
كوكو دخل السرير و اتصل ب كاكوكاكو
الحلقه دي00
كوكو الكميل رفع سماعة الكليفون و بيتصل
بكاكوكاكو00ترن ترن00ترن ترن00
الو00مساك الخير يا طانط انا كوكو الكميل
ازيّ حضرتك00يا تري كاكوكاكو موجود
ميرسي يا طانط00و استني كوكو الكميل
شويه علي السماعه00الو ازيك يا كاكوكاكو
عامل ايه00ياه ه ه بكالنا كتير مش اتقابلنا
من ساعة الحكوكو فاكر ؟00انت وحشتني كتير
اوي اوي 00يا كاكوكاكو00انا بكصل بيك
دوقتي عشان انا عايزك في موضوع00
اه عايزك في خدمه00ربنا يخليك ليه00
طيب بس انا هستناك تيجي الصبح
نفطر سوا00هعملك طبق كول و اقليلك
كعميه هتقرقش كناحك وراها بس اوعي
تقرقش كناحي الكميل معاك00ماشي يا كاكوكاكو
ماتتأخرش00تصبح علي خير00و قفل كوكو
الكميل الكليفون 00و دخل كناحه الكميل تحت المخده
و طلع الروايه اللي بيقراها قبل ماينام00
رواية 00يا طالع الشجره سلملي عالكوكو بتاعت المؤلف
الكوكاهي00كوكفيق الحكيم00و فتح كوكو الكميل الكتاب
و قعد يقرا00و شويه يقفل الكتاب 00و يفكر يا تري
كاكوكاكو هيوافق يساعده في الموضوع اللي هو عايزه فيه
و فضل كوكو كده 00شويه يقرا و شويه يسرح00
و خخخخخخخخخخخ00غرق كوكو في سابع نومه
و محسش و قعد ينقر حب مع الملايكه الكميلين
في الحلم 00و فاق كوكو علي صوت صوصوه جامد اوي
و قام كوكو دعك عينيه المعمصه الكميله بكناحه00
و ركز شويه عرف انها صوصوة كاكوكاكو00
جري كوكو من السرير و فتح الشباك00
و قال00ازيك يا كاكوكاكو00
كاكان

Tuesday, February 6, 2007

الكارفان00

مبقتش عايزه اخرج من البيت يا جماعه00
بسبب طول مدة الواقفه في الاشارات
و بدون استثناء 00و لا عشان ماكنش ظالمه
هستثني منها الأشاره التوموتيكي توموتيكي
عشان هي دقيقه و خلاص فبيبقي في عدل
نوعا ما بين الناحييتين اللي واقفين00
انما بقي انا بتكلم عن مأساة الاشاره
العاديه اللي بيتحكم فيها بتاع المرور00
اللي ممكن يسيبك و يقعد يرغي
مع زميله او يعدي الناحيه التانيه
يجيب شاي من عالقهوه00و عادي
كأنه في الجنيه بتاعة القصر بتاعه
مش في وقت تأدية عمله00و
بحس و انا في الاشاره اين ما كانت
الوسيله اللي انا ركباها اني جايه من سفر
و مش اي سفر ده سفر بعيد اوي00
و اقعد بقي افتكر حاجات من ايام ما كنت بلبس كافوله
و يبتدي يجيلي هلوسه و لحوسه في الأفكار
و السلوك تدخل علي بعضيها و يحصل ماس00
و افوق اكتشف ان انا لسه في الأشاره00
و يا سلاااااااام00لو نصيبك يجي في اشارتين
ورا بعض في نفس الشارع00او ان الاشاره
تفتح و تقفل عليك اكتر من مره00
يا حلاوه00علي رأي مظهر ابو النجا
انا بحس انه تخليص ذنوب00و هتلاقي
النوع ده من الاشارات مثلا 00ابتداء
من عند مقار اللي في الكوبري الخشب
لغاية كوبري قصر النيل00اشاره
في ديل اشاره و حاجه تشرح القلب
الحزين الصراحه00المهم من غير لت
و عجن و انا النهارده في هذه الاشاره
الملعونه محبوسه و متأخره عن ميعادي
و الموبايل موترني و كل شويه تليفون
عشان يعرفوا اتأخرت ليه00فجأه
نطت في دماغي فكره هايله00
و هي الكارافان00زود نقطتين علي الفاء
لو كل مواطن جاب كارافان
مش هيحس بمأساة الانتظار في الاشاره
لأنه بمنتهي البساطه متوفر عنده كل سبل الراحه
و يحصل بقي تعاون ما بين الواقفين في الاشاره
اللي صاحي يبلغ النايم ان الاشاره فتحت00
و اهو لو هتتأخر عن ميعادك 00شوف اللي انت
رايحله ده مزنوق في انهي اشاره هو راخر00
و حد فيكوا يعزم التاني في كارافانه00
و اهو نبقي ضربنا اشارتين بحجر
سلام